ၸုမ်းၶိုင်ပွင်လွင်ႈငမ်းယဵၼ်မၢၼ်ႈ ဢၼ်ဢူးဢွင်ႇမိၼ်း ဢွၼ်ႁူဝ်ၼမ်းၼႃႈ တင်း ၸုမ်းၸၢဝ်းၶိူဝ်း UNFC ႁူပ်ႉထူပ်းဢုပ်ႇဢူဝ်းၵၼ်ၼႂ်းၵဵင်းမႆႇ။ ပိူင်လူင်ဢုပ်ႇဢူဝ်း လွင်ႈပၢင်တိုၵ်းၼႂ်းမိူင်းၶၢင် တင်းယူင်ႉၶၢပ်ႈပိူဝ်ႈတႃႇ ဢုပ်ႇဢူဝ်းတၢင်းၵၢၼ်မိူင်း။

ဝၼ်းထိ 20/02/13 (မိူဝ်ႈၼႆႉ) မီးပၢင်ႁူပ်ႉထူပ်းဢုပ်ႇၵုမ်ၵၼ်ဝူင်ႈၵၢင် ၶွမ်ႊမတီႊၶိုင်ပွင်လွင်ႈငမ်း ယဵၼ် ၸိုင်ႈမိူင်းႁူမ်ႈတုမ် (UPWC)] ၶွင်လူင်ပွင်ၸိုင်ႈတဵင်းၸဵင်ႇ တင်း ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) တီႈႁူင်းႁႅမ်း (Holiday Inn) ၼႂ်းၵဵင်းမႆႇ။ ၾၢႆႇမၢၼ်ႈမီး ဢူးဢွင်ႇမိၼ်း [ၵႅမ်ႁူဝ်ပဝ်ႈ (မၢႆ 2) UPWC]  ဢွၼ်ႁူဝ်ၼမ်းၼႃႈ တင်းမူတ်းၵူၼ်းမွၵ်ႈ 20 ၵေႃႉ၊ ပႃးၸဵမ်ဢူးလႃႉမွင်ႇသူၺ်ႇ လုၵ်ႈၸုမ်း သုၼ်ၵၢင် လွင်ႈငမ်း ယဵၼ်မၢၼ်ႈ (Myanmar Peace Center) ဢၼ်ႁဵတ်းၶဵဝ် ၵၢႆႇၶူဝ်ပၼ်ပိူဝ်ႈတႃႇ ပဵၼ်မႃး ပၢင်ဢုပ်ႇဢူဝ်း။ ၾၢႆႇ UNFC မီး ၼၢႆႁူင်သႃ တင်း ၻွၵ်းတိူဝ်ႊလႃႉၵျႃႇ ဢွၼ်ႁူဝ်ၼမ်းၼႃႈ ၸုမ်းဢုပ်ႇဢူဝ်း 12 ၵေႃႉ ဢၼ်ၶွတ်ႇ ၽွတ်ႈဝႆႉ- ၼႆယဝ်ႉ။
ပၢင်ႁူပ်ႉဢုပ်ႇဢူဝ်းၵၼ်ပွၵ်ႈၼႆႉ ပဵၼ်ပၢင်ႁူပ်ႉဢုပ်ႇၵၼ်ပဵၼ်တၢင်းၵၢၼ် ပွၵ်ႈဢွၼ်တၢင်းသုတ်း။ ပိူင်လူင်မၼ်း  ဢုပ်ႇၵုမ်ၵၼ်လွင်ႈပၢင်တိုၵ်းၼႂ်းမိူင်းၶၢင်၊ လွင်ႈတမ်းဝၢင်းယူင်ႉၶၢပ်ႈပိူဝ်ႈတႃႇ ဢုပ်ႇဢူဝ်းၵၢၼ်မိူင်း။ ၵူၺ်းၵႃႈ လႆႈႁူႉဝႃႈ ဢမ်ႇပၼ်ၽူႈသိုဝ်ႇၶၢဝ်ႇၶဝ်ႈႁူမ်ႈၸွမ်း။ လွင်ႈတေမီးပၢင်ၵုမ် ၽူႈသိုဝ်ႇၶၢဝ်ႇ (Press Conference) ႁိုဝ် ဢမ်ႇမီးၼၼ်ႉ ဢိင်ၼိူဝ်ၶေႃႈတူၵ်းလူင်းလႆႈၸႂ်ၵၼ်ထႅင်ႈ ၵမ်းၼိုင်ႈ- ၼႆယူႇ။

ၵဵဝ်ႇၵပ်းပၢင်ဢုပ်ႇဢူဝ်းၼႆႉ မီးလၢႆၵေႃႉလၢႆၾၢႆႇထတ်းသၢင်ၵၼ်တင်းၼမ်၊ ၵွပ်ႈဝႃႈဢွၼ်ၼႃႈၼႆႉ ၸတ်းပၢင်ၵုမ် တီႈမိူင်းမၢဝ်း (ရူၺ်ႉလိ)ၵေႃႈ  ယူႇတီႈၶႄႇၶပ်းၶိုင်ပၼ်။ ၸတ်းပၢင်ဢုပ်ႇဢူဝ်းၼႂ်း မိူင်းထႆး ၵမ်းၼႆႉၵေႃႈ ဢမ်ႇၸႂ်ႈလူင်ပွင်ၸိုင်ႈသေတႃႉ ပဵၼ်ၸုမ်းၵျပၼ်ႊၶဝ်မႃးၶပ်းၶိုင်ပၼ်။