ၽွင်းတႅၼ်းသၽႃးၵူၼ်းမိူင်း ၵုၼ်ႁဵင် လၢတ်ႈဝႃႈ လိူၼ်ၼႃႈ တေမီးၵၢၼ်တႄႇၵဵပ်းသဵၼ်ႈမၢႆႁူဝ်ၵူၼ်း (ၶူင်းၵၢၼ် ၼမ်းႁွင်ႈ) ၼႂ်းမိူင်းတႆး။ ၵူၺ်းၵႃႈ ဢၼ်တေၵဵပ်းတႄႉတႄႉပဵၼ်ပီၼႃႈ။

ဝၼ်းထိ 29/03/13 ၼႆႉ တေမီးၵၢၼ်တႄႇၵဵပ်းသဵၼ်ႈမၢႆႁူဝ်ႁိူၼ်း (ၼမ်းႁွင်ႈ) ႁူဝ်ႁႅၵ်ႈႁူဝ်တီး ၼႂ်းၸိုင်ႈမိူင်းပတ်းပိုၼ်ႉ၊ ၼႂ်းမိူင်းတႆးပွတ်းႁွင်ႇ/ပွတ်းၸၢၼ်း/ပွတ်းဢွၵ်ႇ။ ပွတ်းႁွင်ႇ တီႈမူႇၸႄႈ၊ ပွတ်းၸၢၼ်း တီႈယွင်ႁူၺ်ႈ၊ ပွတ်းဢွၵ်ႇၶူင်း တီႈပွၵ်ႉတႃႈလေႃႉ ဝဵင်းတႃႈၶီႈလဵၵ်း။ ၵူၺ်းၵႃႈ ဢၼ်တေၵဵပ်းတႄႉတႄႉ  တေတႄႇဝၼ်းထိ 29/03/14 (ပီၼႃႈ) - ၼၢင်းဝႃႇၼု ၽွင်းတႅၼ်းသၽႃးၵူၼ်းမိူင်း ၵုၼ်ႁဵင် လၢတ်ႈၼင်ႇၼႆ။

ပေႃးမိူဝ်ႈၵဵပ်းသဵၼ်ႈမၢႆႁူဝ်ႁႅၵ်ႈႁူဝ်တီး(ၼမ်းႁွင်ႈ) ၼႆႉ တူဝ်ႁဝ်းဢမ်ႇမိူဝ်းၵေႃႈဢမ်ႇပဵၼ်သင်၊ ႁဝ်းလၢတ်ႈဝႆႉၵူၼ်းႁိူၼ်းႁဝ်း ဝႃႈ- ပေႃးပိူၼ်ႈမႃးၵဵပ်းသဵၼ်ႈမၢႆႁူဝ်ႁိူၼ်း ႁႂ်ႈသႂ်ႇပၼ်ၸိုဝ်ႈႁဝ်းၵူႈၵေႃႉ၊ တူဝ်ယၢင်ႇမိူၼ်ၼင်ႇ ၵေႃႉၼၼ်ႉၵေႃႉၼႆႉၵႂႃႇမီး မိူင်းထႆး၊ ၵေႃႉၼႆႉၵႂႃႇမီးမိူင်းၶႄႇ၊  ၵႂႃႇမီးတီႈလႂ်ၵေႃႈႁႂ်ႈသႂ်ႇဝႆႉၸိုဝ်ႈသဵင်ပၼ်။ ၵူၺ်းၵႃႈ ပေႃးၵဵပ်းသဵၼ်ႈႁူဝ်ႁိူၼ်းတႄႉတႄႉမႃး ပေႃးပဵၼ်လႆႈ၊ ဢၼ်လီသုတ်းႁဝ်းထုၵ်ႇလႆႈၽႅဝ်ဝႆႉၼႂ်းမိူင်းတႆး သေတီႈ တီႈ၊ ဢမ်ႇၸႂ်ႈတီႈဝၢၼ်ႈႁဝ်းၵေႃႈဢမ်ႇပဵၼ်သင်၊ ႁႂ်ႈၽႅဝ်ၵွၼ်ႇၼႃႈတေၵဵပ်းသဵၼ်ႈမၢႆ 12 ဝၼ်း။

မိူၼ်ၼင်ႇ ႁဝ်းပဵၼ်ၵူၼ်းၵႃလိ-ၵုၼ်ႁဵင် ဢမ်ႇၼၼ် ၵဵင်းၶမ်း၊ ႁဝ်းဢမ်ႇမီးဝႂ်ၵပ်းတူဝ် (မၢတ်ႈပူင်ႇတိၼ်ႇ) သင်၊ တူဝ်ႁဝ်း သမ်ႉမီးဝႆႉယူႇတီႈတႃႈၶီႈလဵၵ်းၼႆ ပေႃးႁဝ်းၵႂႃႇႁဵတ်းတီႈတႃႈၶီႈလဵၵ်း၊ ၸဝ်ႈၼႃႈတီႈၶဝ်တေထၢမ်ဝႃႈ ႁိမ်းႁွမ်းဝၢၼ်ႈဢိူင်ႇႁဝ်း မီးဝၢၼ်ႈဢိူင်ႇသင်လၢႆလၢႆ၊ ဝၢၼ်ႈႁဝ်းမီးလင်ႁိူၼ်းမွၵ်ႈလၢႆလင်၊ ၾၢႆႇလႂ်ဝၢၼ်ႈႁဝ်းမီး ဝၢၼ်ႈသင်လၢႆလၢႆၸိူဝ်းၼႆႉ ပေႃးႁဝ်း တွပ်ႇလၢတ်ႈလႆႈထုၵ်ႇမႅၼ်ႈၵမ်ႈၽွင်ႈၵေႃႈ ပႃးၼႂ်းသဵၼ်ႈမၢႆႁူဝ်ႁိူၼ်း လႆႈယဝ်ႉ- မၼ်းၼၢင်းသပ်းလႅင်းၼႄၵႂႃႇၼင်ႇၼႆ။