လူတ်ႉၵႃးၵူၼ်းမိူင်း ဢၼ်လုၵ်ႉတူၼ်ႈတီးၵႂႃႇမိူင်းသူႈ ၺႃးၸူၼ်ၽဵဝ်ႈဢဝ်ၶူဝ်းၶွင် တီႈၵူတ်ႉဢႅတ်ႉသ်၊ ၵူၼ်းမိူင်း တုၵ်းယွၼ်းႁႂ်ႈမီးလွင်ႈႁူမ်ႇလူမ်ႈၵူၼ်းၵႂႃႇတၢင်း။

ပူၼ်ႉမႃးမိူဝ်ႈဝၼ်းထိ 08/02/13 မီးလူတ်ႉၵႃးဝႅၼ်ႊၵူၼ်းမိူင်းလမ်းၼိုင်ႈ လုၵ်ႉတီႈဝဵင်းတူၼ်ႈတီး ဢွၵ်ႇတၢင်း ၵႂႃႇမိူင်းသူႈ၊ မိူဝ်ႈထိုင် တီႈၵူတ်ႉဢႅတ်ႉသ် (ၵူတ်ႉ S ႁိုဝ် ဢႅတ်ႉသ်ၵူၺ်ႉ) ၼႂ်းၵႄႈႁၢႆးသႅင် လႄႈႁၢင်ၼႃး၊ ယၢၼ်ၵႆ ဝၢၼ်ႈႁၢင်ၼႃး 3 လၵ်း၊ ဢၼ်ယၢၼ်မိူင်းၼွင်မွၵ်ႈ 10 လၵ်းၼၼ်ႉ ၺႃးၸူၼ်ၸုမ်းၼိုင်ႈ ၸူၼ်ဢဝ် ၶူဝ်းၶွင်ၼိူဝ်လူတ်ႉ ဢၼ်သိုဝ်ႉမႃးတီႈတူၼ်ႈ တီးတင်းမူတ်း၊ ထူင်ၶူဝ်းထူင်ၽႅၼ်ႇၵေႃႈၽဵဝ်ႈဢဝ်ၵႂႃႇမူတ်းသဵင်ႈ- ၼႆယဝ်ႉ။

ၵူတ်ႉ S ဢွင်ႈတီႈဢၼ်ၺႃးၸူၼ်ၼႆႉ ပဵၼ်ပိုၼ်ႉတီႈဢၼ်ႁၢမ်းႁႅၵ်းလွင်ႈႁူမ်ႇလူမ်ႈဝႆႉ၊ ပဵၼ်လႅၼ်ၶႅၼ်ႈ ၼႃႈလိၼ် တပ်ႉသိုၵ်းၸိုင်ႈတႆး SSPP/SSA လႄႈ RCSS/SSA ။ ၵႃႈပူၼ်ႉမႃး တပ်ႉတႆး SSPP/SSA ၵေႃႈဝႃႈ ပဵၼ်ပိုၼ်ႉတီႈၵုမ်းၵမ်ၶွင် လွႆတႆးလႅင်း RCSS/SSA ၼႆသေဢမ်ႇၵႅဝ်ၸွမ်း၊ ၾၢႆႇ RCSS/SSA ၵေႃႈသမ်ႉဝႃႈ ပဵၼ်ပိုၼ်ႉတီႈၼႃႈလိၼ်ၵုမ်းၵမ်ၶွင် SSPP/SSA ဝၢၼ်ႈႁႆး ၼႆသေဢမ်ႇၵႅဝ်ၸွမ်းၼင်ႇၵဝ်ႇ။ ၵွပ်ႈၼႆ တီႈၵူတ်ႉ S ၼႆႉ ၵူၼ်းမိူင်းဢွၵ်ႇတၢင်းၵႂႃႇမႃးၵႆႉၺႃးၸူၼ် လၢႆပွၵ်ႈ၊ ပႃးၸဵမ်သိုၵ်းမၢၼ်ႈ။

ၵပ်းၵၢႆႇလွင်ႈၼႆႉ ၵူၼ်းၼႂ်းပိုၼ်ႉတီႈလၢတ်ႈဝႃႈ- တီႈတႄႉမၼ်း သိုၵ်းတႆးတင်း 2 ၸုမ်းၵေႃႈလီ၊ သိုၵ်းမၢၼ်ႈၵေႃႈလီ မီးပုၼ်ႈၽွၼ်းပိူဝ်ႈတႃႇဢဝ်ႁူမ်ႇလူမ်ႈပၼ်ၵူၼ်းၵႂႃႇတႃႈပႆတၢင်း၊ ၼႆႉသမ်ႉ မိူၼ်ၼင်ႇ ၵဝ်ဢီးသႂ်ႇမႂ်း-မႂ်းဢီးသႂ်ႇၵဝ်၊ ပွႆႇႁႂ်ႈၵိူတ်ႇၶိုၼ်ႈမီးမႃးၸုမ်းၵူၼ်းႁၢႆႉၸိူင်ႉၼႆ ဢမ်ႇၵိုင်ႇလီပဵၼ်- ဝႃႈၼႆ။

ၵႃႈပူၼ်ႉမႃး တီႈၵူတ်ႉ S ၼႆႉ ၵႆႉမီးၸူၼ်ပႂ်ႉၸူၼ်ၵူၼ်း/လူတ်ႉၵႃး လုၵ်ႉမိူင်းသူႈ-မိူင်းၼွင်ၵႂႃႇတူၼ်ႈတီး။ ၵူၺ်းၵႃႈ ၵူတ်ႉ S ၼႆႉ  မီးႁိမ်းငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း(ၸၵၶ) 2 မိူင်းၼွင်ၵူၺ်း၊ လုမ်းလူင်ပွင်ၸိုင်ႈလၢႆႁွင်ႈၵၢၼ်ၵေႃႈ မီးႁိမ်းၼၼ်ႉ ၵူၺ်းၼင်ႇၵဝ်ႇ။ ပူၼ်ႉမႃးမိူဝ်ႈဝၼ်းထိ 01/03/12  ၵေႃႈမီးၸူၼ် 3 ၵေႃႉ၊ ၼုင်ႈၶူဝ်းၶဵဝ် ပႂ်ႉၸူၼ်ၵူၼ်းဝၢၼ်ႈၵူၼ်းမိူင်းၸိူဝ်း ဢွၵ်ႇတၢင်းၵႂႃႇမႃး။ ထိုင်မႃးမိူဝ်ႈဝၼ်းထိ 29/04/12 ၵႃးသိုၵ်း မၢၼ်ႈလမ်းၼိုင်ႈ ဢၼ်ဢဝ်ႁူမ်ႇလူမ်ႈပၼ်ၸွမ်သိုၵ်းဢွင်ႇ တၢၼ်းထုတ်ႉ ၽူႈၵွၼ်းတိူင်းသိုၵ်းၼႂ်းမိူင်းတႆး လုၵ်ႉတၢင်းမိူင်းၼွင်မႃးၺႃးၸူၼ် 8 ၵေႃႉ၊ ပႃးၵွင်ႈယၢမ်း၊ ဢဝ်ၵွင်ႈယၢမ်း ယိုဝ်းသႂ်ႇ ယဝ်ႉသွင်ႉလႅၼ်ႈပၢႆႈ၊ ၽူႈမီးၸၼ်ႉသိုၵ်းမၢၼ်ႈတၢႆ 1 ၵေႃႉ၊ ၵူၼ်းသိုၵ်းဝၢတ်ႇၸဵပ်း 1 ၵေႃႉ-ၼႆယဝ်ႉ။