ဝၼ်းၸိူဝ်ႉၸၢတ်ႈၸိုင်ႈတႆး တီႈမိူင်းၽျၢၵ်ႈ
ၵူၼ်းမိူင်းၽျၢၵ်ႈ
ပူၵ်းတိုၼ်ႇပိုၼ်းၸတ်းႁဵတ်းဝၼ်း ၸိူဝ်ႉၸၢတ်ႈၸိုင်ႈတႆး
ဝၢႆးထုၵ်ႇလူင်ပွင်ၸိုင်ႈ ၸုမ်းသိုၵ်း မၢၼ်ႈ တဵၵ်းၵမ်ႁႅတ်ႉ
ဢမ်ႇပၼ်ႁဵတ်းမႃးလၢႆသိပ်းပီ။
ဝၼ်းၸိူဝ်ႉၸၢတ်ႈၸိုင်ႈတႆး တီႈမိူင်းၽျၢၵ်ႈ
ပၢင်ပွႆးၵမ်းၼႆႉ မီးမေႃယႃၸၢႆးၼၢၼ်တိပ်ႉ မိူင်းၽျၢၵ်ႈ ၽွင်းတႅၼ်းသၽႃးၸႄႈမိူင်းတႆး လႄႈၼၢင်းၽွင်း ႁူဝ်ပဝ်ႈၵေႃလိၵ်ႈ လၢႆးၾိင်ႈငႄႈတႆး မိူင်းၽျၢၵ်ႈ ပဵၼ်ၵဝ်ႉငဝ်ႈဢွၼ်ၸတ်းႁဵတ်း။ ၼႂ်းဝၼ်းတီႈ 7 ဝၼ်းၸိူဝ်ႉၸၢတ်ႈ ၸိုင်ႈတႆး ၵၢင်ၼႂ်ၽွင်းယၢမ်း 8.00 မူင်း မွၵ်ႇၸိူၼ်းဢဝ်ၽူႈၼင်ႈ ၸိုင်ႈ ၶိုၼ်ႈဢဝ်တီႈယူႇယဝ်ႉၵေႃႈ ဢွၼ်ၵၼ် တၵ်ႉယမ် တုင်းၸိုင်ႈမိူင်းႁူမ်ႈတုမ်ယဝ်ႉ သိုပ်ႇတၵ်ႉ ယမ်တုင်းၸိူဝ်ႉၸၢတ်ႈၸိုင်ႈတႆး။
ဝၢႆးၼၼ်ႉ မေႃယႃၸၢႆးၼၢၼ်တိပ်ႉ မိူင်းၽျၢၵ်ႈ ၽွင်းတႅၼ်းၸႄႈမိူင်းတႆး ၵၢဝ်ႇမွၵ်ႇလၢတ်ႈလွင်ႈပဵၼ် မႃး ဝၼ်းၸိူဝ်ႉၸၢတ်ႈၸိုင်ႈ တႆးသေ ႁူဝ်ၼႃႈၸၢဝ်းၶိူဝ်းလႃးႁူႇ ဢူးမေႃးသႄႇ မိူင်းၽျၢၵ်ႈ ၽွင်းတႅၼ်း သၽႃးၸၢဝ်းၶိူဝ်း၊ ဢူးဢႃးၵူဝ်ႇ တူဝ်တႅၼ်းဢႃးၶႃႇ၊ ၸၢႆးသၢမ်လူင် တူဝ်တႅၼ်း ၵူၼ်းၶိူဝ်းဢႅၼ်ႇ ၵၢဝ်ႇမွၵ်ႇလၢတ်ႈပိုၼ်းၸိူဝ်ႉၸၢတ်ႈၶိူဝ်းၵူၼ်း ၽႂ်မၼ်းလႄႈ ဢူးၶိၼ်ႇမွင်ႇၶျူဝ်ႇ ၽူႈၵွၼ်းၵူႈလွင်ႈလွင်ႈ ၶႂႅင်မိူင်းၽျၢၵ်ႈ မွၵ်ႇလၢတ်ႈၶေႃႈၵႂၢမ်းၼႂ်းပၢင်ၵႅဝ်ႈ ဝၼ်းၸိူဝ်ႉ ၸၢတ်ႈၸိုင်ႈတႆးပီၼႆႉ။
ဝၼ်းၸိူဝ်ႉၸၢတ်ႈၸိုင်ႈတႆး တီႈမိူင်းၽျၢၵ်ႈ
ဝၼ်းတီႈ 7 လိူၼ်ၾႅပ်ႊပိဝ်ႊရီႊၼႆႉ ၸဵမ်မိူဝ်ႈ 1922 ပၢၼ်ၶုၼ်ဢိင်းၵလဵတ်ႈသျ် ၸဝ်ႈၾႃႉၶဝ် ႁူမ်ႈတုမ်ၵၼ်ပူၵ်းတင်ႈမိူင်း ႁူမ်ႈတုမ်ၸိုင်ႈတႆး ႁဵၵ်ႈၸိုဝ်ႈဝႃႈ “Federated Shan State” သေ တွၼ်ႈတႃႇၵၢၼ်ၽွင်းငမ်း မၢႆမီႈ ဢိၵ်ႇတင်းလွင်ႈၶဝ်ႈ ဢွၵ်ႇၵပ်းသိုပ်ႇ ၵႃႉၶၢႆတေႃႇၵၼ်ၸိူဝ်းၼၼ်ႉ ၵေႃႈ လႆႈၶွတ်ႇၽွတ်ႈၶွင်ႊသီႊမိူင်းႁူမ်ႈတုမ်ၸိုင်ႈတႆး (Federted Shan States Council) မႃးယဝ်ႉ။ ၶွင်ႊသီႊမိူင်းႁူမ်ႈတုမ်ၸိုင်ႈတႆးၼႆႉ မၢၼ်ႈထုၵ်ႇလီႁဵၵ်ႈၸိုဝ်ႈဝႃႈ ရှမ်းပြည်ထောင်စုကောင်စီ ၼႆသေတႃႉ ၶုၼ်မၢၼ်ႈၶဝ်သမ်ႉ တင်ႈၸႂ်ပိၼ်ႇၽႃသႃၽိတ်းၽိတ်းၽူၼ်ၽူၼ်ဝႃႈ ပဒေသရာဇ်စော် ဘွားများကောင်စီ ၼႆသေ လႅၼ်ၵူၼ်းမိူင်းတႆးႁဝ်းမႃးတေႃႇႁၢၼ်ႉၼႆႉ။
ထိုင်မႃး1928 လိူၼ်သႅပ်ႊထႅမ်ႊၿိူဝ်ႊရ် 7 ဝၼ်း ၸဝ်ႈၾႃႉၶဝ် ႁဵတ်းပၢင်ၵုမ်တီႈဝဵင်းတူၼ်ႈတီးသေ လႆႈၸႂ်ၵၼ်ဢဝ်ဝၼ်း ၼၼ်ႉ ပဵၼ်ဝၼ်းၸိုင်ႈတႆးမႃး။
ဝၢႆးၼၼ်ႉ ဢွၼ်ၵၼ်ႁၼ်ထိုင်ဝႃႈ ႁူဝ်လိူၼ်သႅပ်ႊထႅမ်ႊၿိူဝ်ႊရ်ၼႆႉပဵၼ်ၶၢဝ်းႁိုဝ်ၶၢဝ်းၾူၼ် ၵႂႃႇမႃးထွင် သူႇႁၵၼ် ယၢပ်ႇၼႆလႄႈ ထိုင်မႃးပၢင်ၵုမ်လူင်ၶွင်ႊသီႊမိူင်းႁူမ်ႈတုမ်ၸိုင်ႈတႆး FSSC ဢၼ်ႁဵတ်းတီႈ ဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းလၢႆးၶႃႈ မိူဝ်ႈဝၼ်းတီႈ 7 လိူၼ်ၾႅပ်ႊပိဝ်ႊရီႊ 1947 မီးၽူႈတၢင်တူဝ်ၸဝ်ႈၾႃႉ 7 ၸဝ်ႈ တင်း ၽူႈတႅၼ်း ၵူၼ်းမိူင်း 7 ၵေႃႉ ၶဝ်ႈႁူမ်ႈပႃးၸွမ်းၼၼ်ႉ လႆႈၸႂ်ၵၼ်ၶိုၼ်းမႄးလႅၵ်ႈလၢႆႈတႅပ်းတတ်း ဢဝ်ဝၼ်းတီႈ 7 လိူၼ်ၾႅပ်ႊပိဝ်ႊရီႊပဵၼ်ဝၼ်းၸိူဝ်ႉ ၸၢတ်ႈၸိုင်ႈတႆးမႃးတေႃႇႁၢၼ်ႉၼႆႉ။
ဝၼ်းၸိူဝ်ႉၸၢတ်ႈၸိုင်ႈတႆး တီႈမိူင်းၽျၢၵ်ႈ
Tags: News, Politic
