ၶၢဝ်းတၢင်းၶဝ်ႈယူတ်းယႃတူဝ်မိူင်းထႆး ၶွင်ၽူႈၼမ်းၼႂ်း ပႃႇတီႇႁူဝ်သိူဝ် (SNLD) ပီႈၸၢႆးၼုတ်းၼၼ်ႉ ၸုမ်းၶၢဝ်ႇ ၽူႈတွႆႈႁွၵ်ႈ လႆႈမီးတိုဝ်ႉတၢင်းႁူပ်ႉထူပ်းတွင်ႈထၢမ်ဝႆႉ ၼင်ႇၼႆ။

ထၢမ်- ဢွၵ်ႇၶၢဝ်းတၢင်းမႃးမိူင်းထႆးၼႆႉ ပိူင်လူင်မၼ်းလႆႈငိၼ်းဝႃႈ ၶဝ်ႈမႃးယူတ်းယႃတူဝ်ၼႆ၊ မိူဝ်ႈလဵဝ် ပၢႆးယူႇလီ ပဵၼ်ၸိူင်ႉႁိုဝ်ၶႃႈ?။ တွပ်ႇ-မႃးထိုင်တီႈမိူင်းၵွၵ်ႇသေ ၽႃႇသႆႈလူင် (တၢင်းပဵၼ်ၶူတ်းတွင်ႉလူင်း)၊ မိူဝ်ႈလဵဝ်ၶႅၼ်းမႃးယဝ်ႉ။ ပေႃးလုၵ်ႉ တီႈၵဵင်းမႆႇ ပွၵ်ႈမိူဝ်းထိုင်ၶိုၼ်းမိူင်းၵွၵ်ႇယဝ်ႉ တေမိူဝ်းထူပ်းမေႃယႃထႅင်ႈၵမ်းၼိုင်ႈ၊ ၵူတ်ႇပၢႆးယူႇလီယဝ်ႉ ၸင်ႇပွၵ်ႈမိူဝ်းၶိုၼ်းတႃႈၵုင်ႈ။

ထၢမ်- တၢင်းပဵၼ်ၼႆႉ ပဵၼ်မႃးၽွင်းလူင်ပွင်ၸိုင်ႈ ၸုမ်းသိုၵ်းမၢၼ်ႈတိၺွပ်းသႂ်ႇၶွၵ်ႈၶႃႈႁႃႉ၊ ပဵၼ်မႃးမိူဝ်ႈလႂ်ၶႃႈ?။
တွပ်ႇ-ပဵၼ်မႃးႁိုင်ယဝ်ႉ၊ ၸဵမ်မိူဝ်ႈ 10 ပီပၢႆယဝ်ႉ။ ၵူၺ်းၵႃႈ ၽိူဝ်ႇၸမ်တေယူတ်းယႃ လူင်ပွင်ၸိုင်ႈသမ်ႉတိၺွပ်းၵႂႃႇတူၵ်း ၶွၵ်ႈပႅတ်ႈသေ ဢမ်ႇတၼ်းလႆႈယူတ်းယႃ။ မိူဝ်ႈလဵဝ် ဢွၵ်ႇမႃးၶိုၼ်းလႆႈပီပၢႆယဝ်ႉ ၸင်ႇယွၼ်းဢၼုၺၢတ်ႈတီႈလူင်ပွင် ၸိုင်ႈသေ ဢဝ်ဝႂ်ဢွၵ်ႇမိူင်း (Passport) သေမႃးယႃတူဝ်။

ထၢမ်-မႃးယူတ်းယႃတူဝ်ၼႆႉ ၶႅမ်ႉလႅပ်ႈယူႇၶႃႈႁႃႉ၊ မီးပၼ်ႁႃလွင်ႈၵိတ်ႇၶွင်ႈသင်ၽွင်ႈ၊ ၵမ်ႈၼမ်ပဵၼ် တၢင်းပဵၼ်သင်ၶႃႈ?။
တွပ်ႇ-တၢင်းပဵၼ်သႆႈလူင် ၶူတ်းတွင်ႉလူင်း လႄႈတၢင်းပဵၼ်သလိူၵ်ႈၸွမ်း၊ လႆႈၽႃႇ 2 တီႈၼင်ႇၵၼ်။ မိူဝ်ႈလဵဝ်တႄႉ ဢမ်ႇပေႃးလႆႈမႆႈၸႂ်ယဝ်ႉ၊ ၵူၺ်းၵႃႈ ပေႃးမိူဝ်းၶိုၼ်းတီႈၵုင်းထဵပ်ႈ (မိူင်းၵွၵ်ႇ) တေလႆႈမိူဝ်းၵူတ်ႇ တူၺ်းထႅင်ႈၵမ်းၼိုင်ႈ။

ထၢမ်- ၶၢဝ်းတၢင်းမႃးယူတ်းယႃတူဝ်မိူင်းထႆးၼႆႉ ၼႂ်းပီႈၼွင်ႉတႆးၵေႃႈလီ၊ ၼႂ်းဝူင်းၵၢၼ်မိူင်းၸိူဝ်းၼႆႉၵေႃႈလီ၊ လႆႈႁူပ်ႉထူပ်း ၽႂ်လၢႆလၢႆၶႃႈ?။
တွပ်ႇ- လႆႈမႃးထူပ်းပီႈပီႈၼွင်ႉၼွင်ႉၸိူဝ်းယၢမ်ႈယူႇၸွမ်းၵၼ်မႃး ၸဵမ်မိူဝ်ႈၵူႈပွၵ်ႈ၊ မိူၼ်ၼင်ႇၸိူဝ်းယၢမ်ႈ ႁဵတ်းၵၢၼ်ယူႇသဝ်း ၸွမ်းၵၼ်မႃး၊ တႆးၵေႃႉတႆးသေႈၸိူဝ်းၼႆႉ။ ၼွၵ်ႈသေၼၼ်ႉ ၽူႈယႂ်ႇၵူၼ်းလူင်လၢႆလၢႆၵေႃႉ ၸိူဝ်းပႆႇယၢမ်ႈထူပ်းၵေႃႈလႆႈထူပ်း။

ထၢမ်- ဢၼ်လႆႈမႃးႁၼ်ပီႈၼွင်ႉၵူၼ်းမိူင်းတႆးႁဝ်း ပၢႆႈၶဝ်ႈႁဵတ်းၵၢၼ်မိူင်းထႆး၊ ၽၢတ်ႇဝၢၼ်ႈၽၢတ်ႇမိူင်း တင်ႈတႄႇပီ 1996  ၸိူဝ်းၼႆႉ ၼႂ်းၸႂ်ၼႂ်းၶေႃးၶႂ်ႈလၢတ်ႈၸိူင်ႉႁိုဝ်ၶႃႈ?။
တွပ်ႇ- လႆႈမႃးႁၼ်ပီႈၼွင်ႉၵူၼ်းမိူင်းတႆး မႃးယူႇသဝ်းႁဵတ်းၵၢၼ် ၼႂ်းမိူင်းထႆးၼႆႉ ႁဝ်းၵေႃႈဢမ်ႇသိူဝ်းၼင်ႇၵဝ်ႇ။ ၶႂ်ႈႁႂ်ႈပီႈ ၼွင်ႉၵူၼ်းမိူင်းတႆးၸိူဝ်းလႆႈပၢႆႈၽေး ဢွၵ်ႇဝၢၼ်ႈမိူင်းမႃးတူၵ်းမိူင်းပိူၼ်ႈၸိူဝ်းၼႆႉ ပွၵ်ႈမိူဝ်းယူႇၶိုၼ်း တီႈယူႇၽႂ်မၼ်း၊ ဝၢၼ်ႈဢိူင်ႇဝဵင်းၽႂ်မၼ်းယူႇ၊ ၵွပ်ႈဝႃႈ တေႁဵတ်းႁႂ်ႈပီႈၼွင်ႉၵၼ်ၸိူဝ်းၽၢတ်ႇၵၼ်လႆႈၶိုၼ်း ထူပ်းႁၼ်ၵၼ်။ မိူဝ်ႈလဵဝ် ႁဝ်းၶႃႈၵူၼ်းႁဵတ်းၵၢၼ်ပၢႆးမိူင်းၵေႃႈ ပိူဝ်ႈတႃႇဝၢၼ်ႈမိူင်းႁဝ်းၵတ်းယဵၼ်ၼၼ်ႉ ႁဝ်းၶႃႈၵေႃႈဢဝ်လၢႆးၵၢၼ်မိူင်းသေၶတ်း ၸႂ်ပၼ်ယူႇ။

ထၢမ်-လွင်ႈၶႂ်ႈႁႂ်ႈပီႈၼွင်ႉတႆးႁဝ်းၶႃႈပွၵ်ႈမိူဝ်းၶိုၼ်းၼႆႉ မိူဝ်ႈလဵဝ် လွင်ႈဝၢၼ်ႈမိူင်းႁဝ်းၶႃႈၶိုၼ်းယႂ်ႇမႃး၊ လွင်ႈလူင်ပွင်ၸိုင်ႈႁဵတ်း ၵၢၼ်ယူႇၼႆႉ ဝၢင်းတမ်းၸႂ်လႆႈၵႃႈႁိုဝ်ၶႃႈ?။
တွပ်ႇ-မိူဝ်ႈလဵဝ် ပေႃးလၢတ်ႈသိုဝ်ႈသိုဝ်ႈ ပႆႇလႆႈတမ်းၸႂ်၊ ပွၵ်ႈမိူဝ်းၵေႃႈပႆႇလႆႈ၊ ဢၼ်ၶႂ်ႈႁႂ်ႈပွၵ်ႈမိူဝ်းၼႆႉ တိုၵ်ႉမီးၵၢင်ၸႂ်ၵူၺ်း၊ မိူဝ်ႈလဵဝ် တႃႇပွၵ်ႈမိူဝ်းၼႆႉယင်းပႆႇပဵၼ်လႆႈ၊ ၵူၺ်းၵႃႈ ၼင်ႇႁိုဝ်တေပဵၼ်မႃးၼၼ်ႉ ႁဝ်းၶႃႈၶတ်းၸႂ်ယူႇ။

ထၢမ်-မိူဝ်ႈဝၼ်းထိ 26-28/11/2012 ပူၼ်ႉမႃး ယူႇတီႈပႃႊတီႊႁူဝ်သိူဝ် (SNLD) ဢွၼ်ႁူဝ်ၼမ်းၼႃႈ/ပဵၼ်ၵဝ်ႉပဵၼ်ၵၼ်း သေ ႁဵတ်းပၢင်ၵုမ်ၵေႃႇသၢင်ႈလွင်ႈယုမ်ႇယမ်ၼႂ်းတႆးႁဝ်း။ ၵမ်းၼႆႉၵေႃႈ တေသိုပ်ႇႁဵတ်းထႅင်ႈ ပိူဝ်ႈတႃႇပဵၼ်ပၢင်ၵုမ်မိူင်းတႆး၊ လွင်ႈၼႆႉ ထိုင်ၶၵ်ႉတွၼ်ႈလႂ်ယဝ်ႉၶႃႈ?။
တွပ်ႇ-မိူဝ်ႈပႆႇမႃးယူတ်းယႃတူဝ်ၼႆႉ လႆႈလူင်းပိုၼ်ႉတီႈၵႂႃႇၼႂ်းမိူင်းတႆးပွတ်းဢွၵ်ႇၶူင်း၊ ပွတ်းႁွင်ႇ၊ ပွတ်းၸၢၼ်း ၵႂႃႇထိုင်လွႆ ၵေႃႇ (မိူင်းယၢင်း)၊ လႆႈၵႂႃႇဢုပ်ႇပႃႊတီႊၵၢၼ်မိူင်း လႄႈ တပ်ႉသိုၵ်းၸိူဝ်းဢဝ်ငမ်းယဵၼ်ဝႆႉ။ ထိုင်မႃး 29/01/13 ၵေႃႈ ပႃႊတီႊၵၢၼ်မိူင်း 9 ပႃႊတီႊ ႁူမ်ႈၵၼ်ႁဵတ်းပၢင်ၵုမ်တီႈလႃႈသဵဝ်ႈ၊ ၶွတ်ႇၽွတ်ႈၶွမ်ႊမတီႊ ပွင်ပဵၼ်ပၢင်ၵုမ် (Trust Building for Peace) ပွၵ်ႈၵမ်း 2 မိူၼ်ၼင်ႇႁဵတ်းတီႈတႃႈၵုင်ႈ။ ပွၵ်ႈၵမ်း 2 ၼႆႉ ၼႂ်းမိူင်းတႆးပတ်းပိုၼ်ႉၵူၺ်းပႆႇပေႃး မိူင်းယၢင်းလႅင်ၵေႃႈပႃးမႃးၸွမ်း၊ မိူဝ်ႈလဵဝ် သွင်မိူင်းတိုၵ်ႉတေသၢင်ႈ လွင်ႈယုမ်ႇယမ်ၵၼ်ယူႇ။

ထၢမ်- လွင်ႈမိူင်းယၢင်းလႅင် ၵေႃႈတေၶဝ်ႈပႃးၸွမ်းၼႆႉ တေႁဵတ်းႁိုဝ်၊ ႁၼ်ထိုင်ၸိူင်ႉႁိုဝ်ၶႃႈ?။
တွပ်ႇ-မိူင်းယၢင်းလႅင်ၼႆႉ ဢမ်ႇမီးပႃႇတီႇဢၼ်လႆႈႁပ်ႉမၢႆၾၢင်ဝႆႉ၊ မီးၸုမ်းငမ်းယဵၼ်ၵူၺ်း။ ၶဝ်ႁဵတ်းႁင်းၵူၺ်းၵေႃႈ ဢမ်ႇပေႃးပေႉတူဝ်၊ ဢမ်ႇပေႃး ထၢင်ႇႁၢင်ႈ၊ ၶဝ်ၸင်ႇမႃးတုၵ်းယွၼ်းၶႂ်ႈၶဝ်ႈႁူမ်ႈၸွမ်းမိူင်းတႆး။ ပေႃးႁဵတ်းၽႂ်ႁဵတ်းမၼ်း မၼ်းလႆႈပႂ်ႉၵၼ်၊ ပေႃးႁဵတ်းမိူဝ်ႈလဵဝ် ၸွမ်းၵၼ် လွင်ႈငိုၼ်းတွင်းၵေႃႈ ဢမ်ႇပေႃးလႆႈၶပ်းၶိုင်ယၢပ်ႇ။
ထၢမ်- ဢၼ်တေႁဵတ်းပၢင်ၵုမ်မိူင်းတႆး-မိူင်းယၢင်းလႅင်ႁူမ်ႈၵၼ်ပွၵ်ႈၵမ်းၼႃႈၼႆႉ ပႃႇတီႇၵၢၼ်မိူင်း၊ ၸုမ်းယိပ်းၵွင်ႈၵၢင်ႇ ၸိူဝ်းၼႆႉ တေဢၢၼ်းႁႂ်ႈၶဝ်ႈပႃးၵူႈၸုမ်းၶႃႈႁႃႉ?။

တွပ်ႇ-တေႁႂ်ႈလႆႈၶဝ်ႈပႃးၵူႈၸုမ်း၊ ႁဝ်းၶႃႈၼပ်ႉသွၼ်ႇဝႆႉသၢႆမၢႆမၼ်း မီးတင်းမူတ်း 23 ၸုမ်း၊ ပိူဝ်ႈတႃႇမႃး ၶဝ်ႈႁူမ်ႈပၢင်ၵုမ် ၼၼ်ႉ ယူႇတီႈၶွမ်ႊမတီႊပွင်ပဵၼ်ပၢင်ၵုမ် တေသူင်ႇလိၵ်ႈႁွင်ႉမွၵ်ႇထိုင်။

ထၢမ်-ယူႇတီႈႁူဝ်သိူဝ် (SNLD) သေ ၶႂ်ႈႁႂ်ႈၾၢင်ႁၢင်ႈၸိုင်ႈမိူင်းႁူမ်ႈတုမ်ပဵၼ်ႁိုဝ်ၶႃႈ?။
တွပ်ႇ-ၶႂ်ႈႁႂ်ႈပဵၼ်ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ၊ မီးသုၼ်ႇလႆႈၽဵင်ႇပဵင်းလႄႈ သုၼ်ႇလႆႈတႅပ်းတတ်းႁင်းၶေႃ။ ပေႃးဝႃႈ လႆႈဢုပ်ႇၵၼ်ၸၼ်ႉၸိုင်ႈမိူင်းႁူမ်ႈတုမ်မႃးၼႆႉ ႁဝ်းၶႃႈယိူင်းဢၢၼ်းတေလၢတ်ႈလွင်ႈၼႆႉ။

ထၢမ်-ဝၢႆးလင်ပီ 1090 မႃးၼႆႉ ဢိင်ၼိူဝ်ႁူဝ်သိူဝ် (SNLD) ဢမ်ႇႁပ်ႉလႆႈသေ ထွၼ်တူဝ်ဢွၵ်ႇၵၢၼ်ၶဵၼ်ႇတႅမ်ႈပိူင်ငဝ်ႈပိုင်း မိူင်း၊  ဝၢႆးမႃးပဵၼ်ပၼ်ႁႃ ထိုင်တီႈလႆႈတိၺွပ်းၵၼ်သႂ်ႇၶွၵ်ႈ။ မိူဝ်ႈလဵဝ် ပိူင်ငဝ်ႈပိုင်းမိူင်းၼႆႉ ပဵၼ်ၼမ်ႉပဵၼ်တူဝ်မႃးယဝ်ႉ။ ၾၢႆႇၼိုင်ႈၵေႃႈ SNLD ၶိုၼ်းတင်ႈပႃႇတီႇပဵၼ်တၢင်းၵၢၼ်ၶိုၼ်းယဝ်ႉ။ ၼၢင်းဢွင်ႇသၢၼ်းၸုၵျီႇၵေႃႈ ၶဝ်ႈမႃးၼႂ်းသၽႃးယဝ်ႉ၊ ၵွပ်ႈၼႆ ပိူဝ်ႈတႃႇမူၼ်ႉမႄးပိူင်ငဝ်ႈပိုင်းမိူင်း 2008 ၼႆႉ ႁၼ်တၢင်းမၼ်းယဝ်ႉၶႃႈႁႃႉ၊ ပဵၼ်ၸိူင်ႉႁိုဝ်ၶႃႈ?။
တွပ်ႇ-ပိူင်ငဝ်ႈပိုင်းမိူင်း 2008 ၼႆႉ ႁဝ်းၶႃႈဢမ်ႇႁပ်ႉ၊ ဢမ်ႇလႆႈၸႂ်။ ၵူၺ်းၵႃႈ ယူႇတီႈပဵၼ်ၵူၼ်းမိူင်း ၵေႃႉၼိုင်ႈသေ ႁဝ်းၵေႃႈ ႁဵတ်းၸွမ်းယူႇ။ ၵူၺ်းၵႃႈ ပိူဝ်ႈတႃႇမူၼ်ႉမႄးၵေႃႈ ႁဝ်းၶႃႈၶတ်းၸႂ်ယူႇ။ မိူဝ်ႈလဵဝ် ပိူင်ငဝ်ႈပိုင်းမိူင်း 2008 ၼႆႉ ၸႂ်ႉမႃးမီးႁိမ်း 2 ပီယဝ်ႉ၊ မၼ်းလီႁိုဝ် ၸႃႉႁိုဝ်၊ ထုၵ်ႇႁိုဝ်ၽိတ်းႁိုဝ်ၼၼ်ႉ ၵူၼ်းမိူင်းၵေႃႈႁူႉယူႇ။ ႁဝ်းၶႃႈႁၼ်ထိုင်တႄႉ မၼ်းမီးပၼ်ႁႃလၢႆပိူင်၊ ဢမ်ႇၸႂ်ႉလႆႈ။

တူဝ်ယၢင်ႇမၼ်း မိူၼ်ၼင်ႇလူင်ပွင်ၸိုင်ႈၸႄႈမိူင်းတႆး ဢမ်ႇမီးသုၼ်ႇလႆႈပၢႆးပၺ်ႇၺႃႇသင်၊ ပၢႆးယူႇလီၵေႃႈ ဢမ်ႇမီး။ ပဵၼ်ၸႄႈမိူင်းလုၵ်ႈၼိုင်ႈ ဢမ်ႇလႆႈပူၵ်းပွင်ပၢႆးပၺ်ႇၺႃႇ ပၢႆးယူႇလီၼႆႉ မၼ်းၸၢင်ႈပွင်ႇသင်။ ၸိူဝ်းၼႆႉထုၵ်ႇလႆႈမူၼ်ႉမႄး၊ ၵူၺ်းၵႃႈ တေမူၼ်ႉမႄးလၢႆးၸိူင်ႉႁိုဝ်ၼၼ်ႉ တိုၵ်ႉၵုမ်ၵၼ်ယူႇ၊ တေမီးမႃးလွၵ်းလၢႆး မၼ်းယူႇ။

ထၢမ်- ဢမ်ႇႁိုင်ဢမ်ႇၼၢၼ်း ပီ 2015 တေမီးပၢင်လိူၵ်ႈတင်ႈပတ်းပိုၼ်ႉထႅင်ႈၵမ်းၼိုင်ႈယဝ်ႉ၊ ပိူဝ်ႈတႃႇမူၼ်ႉမႄးပိူင်ငဝ်ႈ ပိုင်းမိူင်းၵေႃႈလီ၊ ပိူဝ်ႈတႃႇၵၢၼ်လိူၵ်ႈတင်ႈ 2015 ၵေႃႈလီ၊ ႁူဝ်သိူဝ်သမ်ႉႁၢင်ႈႁႅၼ်းဝႆႉၸိူင်ႉႁိုဝ်ၶႃႈ?။
တွပ်ႇ-ပိူဝ်ႈတႃႇၶဝ်ႈၵၢၼ်လိူၵ်ႈတင်ႈ 2015 ၼႆႉ ဢမ်ႇၶဝ်ႈၼႆၵေႃႈဢမ်ႇဝႃႈ၊ မိူဝ်ႈလဵဝ်ၼႆႉတိုၵ်ႉၵိုတ်းၵႆယူႇ၊ ႁဝ်းၶႃႈၵေႃႈပႆႇမီး ၶေႃႈတႅပ်းတတ်းသင်။

ထၢမ်-လွင်ႈၽွမ်ႉႁူမ်ႈၼႂ်းတႆးႁဝ်းၼႆႉ ပေႃးဝႃႈတူၺ်းဢၼ်ယင်ႇၵၢင်ၸႂ် (Survey) မိူဝ်ႈပၢင်ၵုမ်ၵေႃႇသၢင်ႈ လွင်ႈယုမ်ႇယမ် ပိူဝ်ႈတႃႇလွင်ႈငမ်းယဵၼ် (Trust Building for Peace) မိူဝ်ႈဝၼ်းထိ 26-28/11/12 တီႈတႃႈၵုင်ႈၼၼ်ႉ ၵူၼ်းတင်းၼမ် တုၵ်းယွၼ်း ၶႂ်ႈႁႂ်ႈပႃႊတီႊၵၢၼ်မိူင်းႁဝ်းၶႃႈပဵၼ်ဢၼ်လဵဝ်ၵၼ်၊ ၶႂ်ႈႁႂ်ႈတပ်ႉသိုၵ်းႁဝ်းၶႃႈပဵၼ်ဢၼ်လဵဝ်ၵၼ်။ လွင်ႈၽွမ်ႉ ႁူမ်ႈၼႂ်းပႃႊတီႊၵၢၼ်မိူင်းၵေႃႈလီ၊ ၼႂ်းၸုမ်းယိပ်းၵွင်ႈ ၵေႃႈလီ၊ ၶႅၼ်းတေႃႈသပ်းလႅင်းၼႄၽွင်ႈၶႃႈ?။
တွပ်ႇ-ၵူၼ်းမိူင်းတႄႉၶႂ်ႈႁႂ်ႈပဵၼ်ဢၼ်လဵဝ်ၵၼ်၊ လွင်ႈၵၢင်ၸႂ်ၵူၼ်းမိူင်းၶႂ်ႈပဵၼ်ၸိူဝ်းၼႆႉ ႁဝ်းၵေႃႈဢမ်ႇသၢၼ်ၶတ်း။ ဢၼ်ပႃႊတီႊႁဝ်းမီးသွင်မူႇသွင်ၸုမ်းလႄႈသင်၊ ဢၼ်တပ်ႉသိုၵ်းမီးဝႆႉသွင်မူႇသွင်ၸုမ်းလႄႈသင်၊ ၼင်ႇႁိုဝ်တေၶဝ်ႈဢွၵ်ႇ ၵၼ်၊ ပွင်ႇၸႂ်ၵၼ်၊ တိုတ်ႉတၢႆးၸုင်ၸၼ်ၵၼ်၊ ႁူမ်ႈမိုဝ်းၵၼ်ႁဵတ်းသၢင်ႈၵၢၼ်ငၢၼ်းၸိူဝ်းၼႆႉ ၶႂ်ႈသင်ႇထိုင်ပေႃႈမႄႈၵူၼ်းမိူင်း ဝႃႈ ယႃႇပေမႆႈၸႂ်၊ ဝၼ်းၼိုင်ႈၸဝ်ႉၸဝ်ႉတေပဵၼ်မႃးယူႇ။

ထၢမ်-ပိူဝ်ႈတႃႇႁဵတ်းပၢင်ၵုမ်လူင် ပွၵ်ႈၵမ်း 2 ၼႆႉ ႁၢင်ႈႁႅၼ်းဝႆႉတေႁဵတ်းမိူဝ်ႈလဵဝ်ၶႃႈ?။
တွပ်ႇ- ယိူင်းဢၢၼ်းဝႆႉတေၸတ်းတီႈလႃႈသဵဝ်ႈ ၼႂ်းဝူင်ႈထိၼိုင်ႈၶွင်လိူၼ်မၢတ်ႊၶျ်၊  လွင်ႈၼႆႉ ၶွမ်ႊမတီႊပွင်ပဵၼ် ပၢင်ၵုမ်တေတႅပ်းတတ်း။ ယိူင်းဢၢၼ်းႁႂ်ႈ ပႃႊတီႊၼႂ်းမိူင်းတႆးတင်းမိူင်းယၢင်းလႅင် မီးလွင်ႈၽွမ်ႉႁူမ်ႈၵၼ်၊ ၶဝ်ႈၸႂ်ၵၼ်၊ ၶဝ်ႈဢွၵ်ႇငူပ်ႉငိၵၼ်ငၢႆႈ။ ပေႃးဝႃႈမီးၵၢၼ်ဢုပ်ႇဢူဝ်းတင်း ၸိုင်ႈမိူင်းႁူမ်ႈတုမ်တၢင်းၼႃႈၵေႃႈ ႁႂ်ႈမိူင်းတႆးတင်းယၢင်းလႅင် မီးၶေႃႈမုလ်းမိူၼ်ၵၼ်- ၸိူဝ်းၼႆႉ။

ထၢမ်- ဢိင်ၼိူဝ်တိုဝ်ႉတၢင်း ၽူႈၼမ်းၼႂ်းႁဝ်းလႆႈႁွတ်ႈၽႅဝ်မိူင်းထႆးသေ၊ လိုၼ်းသုတ်း ၶႂ်ႈသင်ႇ လၢတ်ႈပၼ်ပီႈၼွင်ႉၵူၼ်း မိူင်းတႆးႁဝ်း၊ ၽူႈပဵၼ်ႁႅင်းႁဝ်းၶႃႈၸိူင်ႉႁိုဝ်ၶႃႈ?။
တွပ်ႇ- တႃႇဝၢၼ်ႈမိူင်းတႆး၊ တႃႇၸိူဝ်ႉၸၢတ်ႈတႆး၊ ပိူဝ်ႈတႃႇၸိုင်ႈမိူင်းႁူမ်ႈတုမ်ၼၼ်ႉ ႁဝ်းၶႃႈႁဵတ်း ၵၢၼ်ယူႇ ဢမ်ႇလိုဝ်ႈဢမ်ႇ သဝ်း။ တႃႇတေယႃႉသၸ်ႉၸႃႇ/ ႁၵ်းလင်ၼိူဝ်ၸိူဝ်ႉၸၢတ်ႈဝၢၼ်ႈမိူင်း ၼၼ်ႉ ဢမ်ႇမီး။ ဢၼ်ပႃႊတီႊပဵၼ်ယူႇသွင်မူႇသွင် ၸုမ်းလႄႈသင်၊ ဢၼ်တပ်ႉသိုၵ်းပဵၼ်ယူႇသွင်မူႇ သွင်ၸုမ်းၸိူဝ်းၼႆႉလႄႈသင် ဢမ်ႇတၢပ်ႈမႆႈၸႂ်၊ ယူႇတီႈပႃႊတီႊတႆးဢၼ် ႁဵတ်းၵၢၼ်မိူင်းယူႇၼႆႉ ပဵၼ်ႁိုဝ်မီးႁိုဝ်ၵေႃႈ မီးလွင်ႈငူပ်ႉငိၵၼ် ပွင်ႇၸႂ်ၵၼ်ယူႇ၊ တိုၼ်းတေပဵၼ်ၽွၼ်းလီပိူဝ်ႈတႃႇ ပီႈၼွင်ႉ မိူင်းတႆးႁဝ်း၊ ၸိူဝ်ႉၸၢတ်ႈတႆးႁဝ်းတင်းသဵင်ႈယူႇ၊ ၶႂ်ႈသင်ႇလၢတ်ႈၼင်ႇၼႆ။