ၵူၼ်းတႆး ၽူႈဢွၼ်ႁူဝ်ပႃႊတီႊ ၼႂ်းပိုၼ်ႉတီႈၶွင်ပႃႊတီႊ NLD (ဢၼ်ဢွင်ႇသၢၼ်းၸုၵျီႇဢွၼ်ႁူဝ်) လူင်းသူၼ်း တုမ်ႁႃသဵင် ၼႂ်းဢိူင်ႇဝၢၼ်ႈၸၢမ် ၸႄႈဝဵင်းၼမ်ႉတူႈ၊ တဵၵ်းၸႂ်ႉၵူၼ်းမိူင်းၶဝ်ႈပႃႊတီႊ ။ မိူဝ်ႈလဵဝ် ၸၢဝ်းပလွင်ႈ ပွတ်းၼၼ်ႉပႃးၵႂႃႇၼမ်။

ၵူၼ်းၼႂ်းပိုၼ်ႉတီႈ ၼႂ်းဢိူင်ႇဝၢၼ်ႈၸၢမ်ၵေႃႉၼိုင်ႈလၢတ်ႈဝႃႈ- မိူဝ်ႈလဵဝ် တၢင်းၼမ်ႉတူႈၼႆႉ ပႃႊတီႊၼူၵ်ႉယုင်းၶဝ်လူင်း သူၼ်းတုမ်ယူႇယဝ်ႉ၊ ၵူၼ်းဢွၼ်ႁူဝ်လူင်းသူၼ်းတုမ်ၸိုဝ်ႈ လုင်းၶမ်းလႅင်။ လၢႆးသူၼ်းတုမ် ၽူႈၶဝ်ႈပႃႊတီႊၼႆႉ ၶႂ်ႈၸႂ်ႉလၢႆး ႁၢဝ်ႈႁႅင်းဝႆႉ၊ ပေႃးလူင်းသူၼ်းတုမ် ၵူၼ်းဝၢၼ်ႈၵေႃႈ ၸၼ်ၶႅၼ်ပိူၼ်ႈသေ တဵၵ်းၸႂ်ႉ ႁႂ်ႈၶဝ်ႈ ပႃႊတီႊၶဝ်ဝႃႈ ၶဝ်ႈလႄႈၶဝ်ႈလႄႈ။ ယွၼ်ႉၶဝ်ၸၼ်ၶႅၼ်ပိူၼ်ႈတိၵ်းတိၵ်းသေ ၵူၼ်းဝၢၼ်ႈသမ်ႉ မေႃၵဵင်ၸႂ်သေ ၵမ်ႈၽွင်ႈၵေႃႈၶဝ်ႈ၊ မၢင်ၵေႃႉလၢတ်ႈဝႃႈ ႁဝ်းပႆႇ ၶႂ်ႈၶဝ်ႈ၊ တေပႂ်ႉတူၺ်းထႅင်ႈၵွၼ်ႇ ၼႆၸိူဝ်းၼႆႉ ၶဝ်ၵေႃႈထၢႆႇဢဝ် ၶႅပ်းႁၢင်ႈၵေႃႉၼၼ်ႉၵႂႃႇ- ဝႃႈၼႆ။

ပႃႊတီႊ ၼူၵ်ႉယုင်း (NLD) ၶဝ်သူၼ်းတုမ် လၢတ်ႈတီႈၵူၼ်းဝၢၼ်ႈဝႃႈ- သူၵုမ်ႇမိုင်ႉဝူၼ်ႉၵႂင်ယူႇႁဵတ်း သင်၊ ပႃႊတီႊတႆးသူ သွင်ပႃႊတီႊၵေႃႈယင်းဢမ်ႇထုၵ်ႇမႅၼ်ႈၵၼ်၊ ပေႃးသူႁဵတ်းၼႆၵႂႃႇတိၵ်းတိၵ်း သူတေၵၢၼ်ႉထႅင်ႈယဝ်ႉ၊ သူတေတူၵ်းလိုၼ်း မိူၼ်ၵဝ်ႇၵူၺ်း- ဝႃႈၼႆ။

လုင်းၸၢႆးၶမ်းလႅင်ၼႆႉ ပဵၼ်တႆးပွတ်းၼမ်ႉတူႈ ၸိုင်ႈတႆးပွတ်းႁွင်ႇ။ ဢၼ်ပႃႊတီႊၼူၵ်းယုင်း (NLD) သူၼ်းတုမ်ႁႃသဵင် ၼႂ်းဢိူင်ႇဝၢၼ်ႈၸၢမ် ပွၵ်ႈၵမ်းၼႆႉ မီးတႆး 3 ၵေႃႉ (ပႃးလုင်းၸၢႆးၶမ်းလႅင်)၊ မီးမၢၼ်ႈ 3 ၵေႃႉ။  မိူဝ်ႈလဵဝ် ဝၢၼ်ႈပလွင်ႈၵမ်ႈ ၼမ်တႄႉ ၶဝ်ႈပႃႊတီႊၼူၵ်းယုင်းမူတ်းယဝ်ႉ၊ ၵူၼ်းဝၢၼ်ႈၶဝ်ဝႃႈ ပေႃးၼၢင်းၶမ်းဢေး (ၽူႈတႅၼ်းၵူၼ်းမိူင်း ၼမ်ႉတူႈ၊ ပႃႇတီႇသိူဝ်ၽိူၵ်ႇ SNDP) ဢမ်ႇတူင်ႉတိုၼ်ႇႁႅင်း ႁႅင်းတႄႉ ၵူၼ်းဝၢၼ်ႈၸိူဝ်းၼႆႉ တေပႃးၵႂႃႇတၢင်းၾၢႆႇၼူၵ်ႉယုင်းမူတ်းယဝ်ႉ၊ လီမႆႈၸႂ်ၸွမ်းယူႇ- ဝႃႈၼႆ။

ၼႂ်းဢိူင်ႇဝၢၼ်ႈၸၢမ်ၼႆႉ မီးဝၢၼ်ႈ လၢႆလၢႆဝၢၼ်ႈမိူၼ်ၼင်ႇ ဝၢၼ်ႈမိူင်းမု၊ ၵွင်းႁုင်း၊ လူင်မိုတ်ႈ၊ ဝၢၼ်ႈမႂ်ႇ၊ သၢမ်ၶႃ၊ ၼွင်ငိုၼ်း၊ ၼမ်ႉသီလိၼ်း၊ ပၢင်ႇႁႅၵ်ႈ၊ ပၢင်ႇလူင်၊ ပၢင်သပေႇ၊ ဝၢၼ်ႈလီၸိူဝ်းၼႆႉ။