ၽူႈၵွၼ်းဝၢၼ်ႈဢိူင်ႇတင်းပလိၵ်ႈမၢၼ်ႈၼႂ်းမိူင်းၽူင်း ႁူမ်ႈၵၼ်တဵၵ်းယိုတ်းတီႈလိၼ်ၵူၼ်းမိူင်း (ဝၢၼ်ႈပူင်ႇ) ႁိမ်းၾင်ႇၼမ်ႉၶွင် တႃႇၶၢႆပၼ်ၸဝ်ႈငိုၼ်းတိုၼ်းယႂ်ႇ သၢင်ႈပဵၼ်ဢွင်ႈတီႈၵၢၼ်ၵႃႉ။

လႅင်ႇၶၢဝ်ႇၵူၼ်းၸွႆႈထႅမ်တူင်ႇဝူင်းၵူၼ်းၼႂ်းတႃႈၶီႈလဵၵ်းလၢတ်ႈဝႃႈ မိူဝ်ႈဝၼ်းထိ 17/01/13 ပူၼ်ႉမႃးၸဝ်ႈၼႃႈတီႈပလိၵ်ႈ မၢၼ်ႈၼႂ်းမိူင်းၽူင်း ၸႄႈတွၼ်ႈတႃႈၶီႈလဵၵ်း ၵႂႃႇႁွင်ႉဢဝ်ၵူၼ်းဝၢၼ်ႈ ဝၢၼ်ႈပူင်ႇ ဢၼ်ပဵၼ်ၸဝ်ႈၶွင်တီႈလိၼ်ႁိမ်းၾင်ႇ မႄႈၼမ်ႉၶွင် ႁူမ်ႈ 10 ၵေႃႉ ၵႂႃႇတီႈလုမ်းပလိၵ်ႈ ပိူဝ်ႈတႃႇဢုပ်ႇဢူဝ်းၵဵဝ်ႇလူၺ်ႈလွင်ႈတီႈလိၼ်ဢၼ်ၵူၼ်း 10 ၵေႃႉ ပဵၼ်ၸဝ်ႈၶွင်ႁဵတ်းၵိၼ်ယူႇ။

“ၸဝ်ႈၶွင်တီႈလိၼ်တင်း 10 ၵေႃႉ ထုၵ်ႇႁွင်ႉၵႂႃႇတီႈလုမ်းပလိၵ်ႈ၊ ၸဝ်ႈၼႃႈတီႈပလိၵ်ႈလၢတ်ႈဝႃႈ ၵူၼ်းလူင်ႁွင်ႉ၊ ၸိူဝ်းၶဝ် ၵႂႃႇပႂ်ႉယူႇတင်းႁိုင် ၵွပ်ႈဢမ်ႇႁၼ်ၵူၼ်းလူင်လႄႈ ၵူၼ်းဝၢၼ်ႈၸိူဝ်းၼၼ်ႉ ၸင်ႇၸူဝ်းၵၼ်ပွၵ်ႈႁိူၼ်း၊ ၽိူဝ်ႇပွၵ်ႈထိုင်ႁိူၼ်း ၵႅပ်ႉၼိုင်ႈၵူၺ်း ၸဝ်ႈၼႃႈတီႈပလိၵ်ႈမၢၼ်ႈၶိုၼ်းလမ်း ႁွင်ႉသေ ႁိုတ်းထႃႉလႃႇပႃးဝႃႈ ဢမ်ႇၼပ်ႉယမ်ၵူၼ်းလူင်ၼႆသေ တင်းပွင်ႉတင်းလႃႇႁွင်ႉဢဝ် ၸိူဝ်းၶဝ်ၵႂႃႇတီႈလုမ်းထႅင်ႈ” -လႅင်ႇၶၢဝ်ႇလၢတ်ႈ။

လႅင်ႇၶၢဝ်ႇသိုပ်ႇလၢတ်ႈထႅင်ႈဝႃႈ -မိူဝ်ႈၵူၼ်း 10 ၵေႃႉ ႁွတ်ႈၽႅဝ်တီႈလုမ်းၸဝ်ႈၼႃႈတီႈပလိၵ်ႈၶဝ်လႆႈ ႁၢင်ႈႁႅၼ်းၽိုၼ်လိၵ်ႈ သေ တဵၵ်းႁႂ်ႈၸဝ်ႈၶွင်တီႈလိၼ်တင်း 10 ၵေႃႉလူင်းလၢႆးမိုဝ်း၊ ၸိူသ်းဢၼ် ဢမ်ႇယွမ်းလူင်းထုၵ်ႇလွၵ်ႇငိုတ်ႈဢဝ်ၵွင်ႈၸမ်ႈ သေ ၵႃႈလႆႈလူင်း၊ ၼႂ်းၵူၼ်း 10 ၵေႃႉၼၼ်ႉ မီးၵေႃႉၼိုင်ႈၵူၺ်းတၼ်းငိူင်ႉပၢႆႈလွတ်ႈဢမ်ႇတၼ်းလႆႈလူင်းလၢႆးမိုဝ်း၊ ၽိုၼ်လိၵ်ႈဢၼ်ၸဝ်ႈၼႃႈတီႈ ပလိၵ်ႈမၢၼ်ႈတဵၵ်းႁႂ်ႈၵူၼ်းမိူင်းလူင်းလၢႆးမိုဝ်းၼၼ်ႉ ဢမ်ႇမီးၽႂ်ႁူႉဝႃႈပဵၼ်ၽိုၼ်လိၵ်ႈမီးတီႈပွင်ႇဝႃႈ သင်။ ၸဝ်ႈၼႃႈတီႈပလိၵ်ႈၶဝ်ဢမ်ႇပၼ်ဢၢၼ်ႇသေဢိတ်း၊ ၵဵဝ်ႇၵပ်းၽိုၼ်လိၵ်ႈၼႆႉၵူၼ်းမိူင်းၶဝ် ယုမ်ႇယမ်ဝႃႈ ပဵၼ်ၽိုၼ်လိၵ်ႈတဵၵ်းႁႂ်ႈၸဝ်ႈၶွင်တီႈလိၼ်ယွမ်းႁပ်ႉဝႃႈ ၸိူဝ်းၶဝ်ဢမ်ႇၸႂ်ႈၸဝ်ႈၶွင်တီႈ လိၼ်ၵူၺ်းၼၼ်ႉယဝ်ႉ -ဝႃႈၼႆ။

ၵဵဝ်ႇၵပ်းတီႈလိၼ်ႁိမ်းၾင်ႇမႄႈၼမ်ႉၶွင် ဢၼ်ၵူၼ်းဝၢၼ်ႈ 10 ၵေႃႉ ပဵၼ်ၸဝ်ႈၶွင်ၼႆႉ မိူဝ်ႈပီၵၢႆမီး ပၼ်ႁႃႁိမ်ၸိင်းၵၼ် ၵမ်းၼိုင်ႈ၊ ၵူၼ်းသိုၵ်းၵဝ်ႇ MTA ပၢၼ်ၶုၼ်သႃႇၵေႃႈဝႃႈ ပဵၼ်တီႈလိၼ်ၶဝ်၊ ပလိၵ်ႈမၢၼ်ႈၵေႃႈဝႃႈပဵၼ်ၶွင်ၼႂ်းလူင်၊ ၵူၼ်းဝၢၼ်ႈၵူၼ်းမိူင်းၵေႃႈဝႃႈပဵၼ်ၶွင်ၶဝ်ႁဵတ်းၵိၼ်မႃးၶၢဝ်း တၢင်းႁိုင်။ ႁဵတ်းၼႆသေ မိူဝ်ႈၽွင်းၸဝ်ႈၶွင်တီႈလိၼ်ၽုၵ်ႇထူဝ်ႇ လိၼ်ၸမ်တေထိုင်ၶၢဝ်းထူၺ်ႈ ထွၼ်ၼၼ်ႉ ၸဝ်ႈၼႃႈတီႈမၢၼ်ႈၶဝ်ဢဝ်လူတ်ႉထႆၵႂႃႇထႆပႅတ်ႈမူတ်း၊ ၸဝ်ႈတီႈလိၼ် ဢမ်ႇႁၢၼ်ႉၸႂ် သေ ဢွၼ်ၵၼ်တၢင်ႇလိၵ်ႈထိုင်ၽွင်းတႅၼ်းပႃႇတီႇၶဝ်ဢဝ်တၢင်ႇလၢတ်ႈၼႂ်းသၽႃး။ တႄႇၼၼ်ႉမႃး ဢဝ် လိူင်ႈမၼ်းယဵၼ်ၵႂႃႇသေ ၸင်ႇမႃးၵိူတ်ႇလိူင်ႈၶိုၼ်းထႅင်ႈၵမ်းၼႆႉ။

ၵူၼ်းၼႂ်းပိုၼ်ႉတီႈလၢတ်ႈၼႄလႅင်ႇၶၢဝ်ႇဝႃႈ -တီႈလိၼ်ၵူၼ်းဝၢၼ်ႈ 10 ၵေႃႉ ဢၼ်ၸပ်းတိတ်းၵၼ် ယူႇႁိမ်းၾင်ႇမႄႈၼမ်ႉ ၶွင်ၼႆႉ ပဵၼ်တီႈလိၼ်လီမီးၵႃႈၶၼ်၊ ၵွပ်ႈယူႇႁိမ်းၸမ်မိူင်းလၢဝ်း၊ မိူင်းထႆး၊ ၸဝ်ႈငိုၼ်းတိုၼ်းယႂ်ႇၶဝ်ဢွၼ်ၵၼ်မၢႆတႃၶႂ်ႈလႆႈ ႁဵတ်းပဵၼ်ဢွင်ႈတီႈၵႃႉၶၢႆ။ ဢၢၼ်းႁဵတ်းတႃႈႁိူဝ်း ႁဵတ်းႁူင်းႁႅမ်း (ႁူင်းသဝ်း)၊ ႁဵတ်းၵၢတ်ႇၵႃႉၶၢႆၶူဝ်း၊ ယွၼ်ႉလွင်ႈၼႆႉလႄႈ ၵူၼ်းလူင်ၼႂ်းဢိူင်ႇ (ဢုၵ်ႉၵထ) ၶသ်လွမ်လၵ်ႉႁူမ်ႈမိုဝ်းၵၼ်တင်းၸဝ်ႈၼႃႈတီႈမၢၼ်ႈသေ ၶိၼ်တဵၵ်းဢဝ်တေဢၢၼ်းၶၢႆ ပၼ်ၸဝ်ႈငိုၼ်းတိုၼ်းယႂ်ႇၶဝ်၊ မိူဝ်ႈလဵဝ်ၼႂ်းတီႈလိၼ်ႁိမ်းႁွမ်းၼႆႉတႄႇမီးၵၢၼ်ၵေႃႇသၢင်ႈတိူၵ်ႈႁိူၼ်း ႁူင်းသဝ်းၵၼ်ယဝ်ႉ -ဝႃႈၼႆ။