သိုၵ်းမၢၼ်ႈၵဝ်ႇၸိူဝ်းၵိုတ်းလိုဝ်ႈၵၢၼ်လႄႈ ၸိူဝ်းပဵၼ် တုၵ်ႉၶိတပွတ်းၼမ်ႉတူႈ တဵၵ်းၶၢႆႁၢင်ႈၼၢင်း ဢွင်ႇသၢၼ်းၸုၵျီႇပၼ်ၵူၼ်းဝၢၼ်ႈၼိုင်ႈႁၢင်ႈလႂ်ႁဵင်ပၢႆ။

ဝၼ်းထိ 29/01/13 (မိူဝ်ႈဝႃး) သိုၵ်းမၢၼ်ႈထၢၵ်ႈ (ၵဝ်ႇ) ၸိူဝ်းၵိုတ်းယင်ႉၵၢၼ်သိုၵ်းတင်း ၸိူဝ်းယၢမ်ႈ ႁၢပ်ႇၵၢၼ်သိုၵ်းမႃးသေ ပဵၼ်တုၵ်ႉၶိတၶဝ် တီႈၼမ်ႉတူႈ တဵၵ်းၶိၼ်ၶၢႆၶႅပ်းႁၢင်ႈ ၼၢင်းဢွင်ႇသၢၼ်း ၸုၵျီႇ ပၼ်ၵူၼ်းဝၢၼ်ႈ ၼိုင်ႈၶႅပ်း 1,500 ပျႃး။ မၢင်တီႈတဵၵ်းၶၢႆပၼ်ပဵၼ်ဝၢၼ်ႈ၊ မိူၼ်ၼင်ႇ ၼိုင်ႈဝၢၼ်ႈ ၵူၼ်းဝၢၼ်ႈမီးလၢႆႁိူၼ်းၵေႃႈ ၼပ်ႉသွၼ်ႇပၼ်-ၼႆယဝ်ႉ။

ပူၼ်ႉမႃးမိူဝ်ႈမွၵ်ႈ 2 ပီ၊  ပဵၵ်ႉသမ်ႉၸွမ်ၸိုင်ႈတဵင်းၸဵင်ႇပိုၼ်ၽၢဝ်ႇ ၶိုၼ်ႈပၼ်ငိုၼ်းၵိုတ်းလိုဝ်ႈၵၢၼ်ၶဝ် ယူႇၵေႃႈ ၵွပ်ႈဢမ်ႇ ပဵင်းပေႃးပိူဝ်ႈတႃႇၵႃႈၸႂ်ႉၸၢႆႇလႄႈ ၶဝ်ၸင်ႇလႆႈမႃးႁဵတ်းၸိူင်ႉၼႆ- ၶႃႈႁၢပ်ႇၵၢၼ် ၶုၼ်မၢၼ်ႈ ၵေႃႉၼိုင်ႈလၢတ်ႈၼင်ႇၼႆ။

ငိုၼ်းၵိုတ်းလိုဝ်ႈၵၢၼ် သိုၵ်းမၢၼ်ႈထၢၵ်ႈ/ၵဝ်ႇ တင်း တုၵ်ႉၶိတၶဝ်ၼႆႉ လူင်ပွင်ၸိုင်ႈမၢၼ်ႈပၼ်ၼိုင်ႈ လိူၼ်ၼိုင်ႈပွၵ်ႈ၊ လႆႈၵႂႃႇထုၵ်ႈဢဝ်တီႈလႃႈသဵဝ်ႈ၊ ၵူၺ်းၵႃႈ ၸိူဝ်းၶဝ်ဢမ်ႇၸၢင်ႈၵႂႃႇထုၵ်ႈဢဝ်ၸွမ်းၵူႈ လိူၼ်၊ ၵွပ်ႈဝႃႈ ငိုၼ်းလိူၼ်ၼိုင်ႈလိူၼ် ၼၼ်ႉ ယင်းဢမ်ႇပေႃးတႃႇၵႃႈလူတ်ႉၵႃး/ၵႃႈၸလိပ်ႈၵႂႃႇမႃး၊ ၵွပ်ႈၼၼ် ၸိူဝ်းၶဝ်လႆႈပႂ်ႉထိုင် 6 လိူၼ်လႂ်ၸင်ႇၵႂႃႇထုၵ်ႈ ဢဝ်တီႈလႃႈသဵဝ်ႈ 1 ပွၵ်ႈ-ၼႆယဝ်ႉ။