ပပ်ႉပိုၼ်းသၢမ်ၵူၵ်း (သၢမ်ၸုမ်း) မိူင်းၶႄႇ ဢၼ်ၶူးမိူင်းလီ (ၶမ်းၸၢမ်ႇႁိူင်း) ယၢမ်ႈၶိုင်ပွင်ဢိတ်ႇဢွၵ်ႇ ပိုၼ်ၽႄႈမႃး၊ မီးၵၢၼ်ၶိုၼ်းဢိတ်ႇဢွၵ်ႇပိုၼ်ၽႄႈမႂ်ႇ၊ ယိူင်းဢၢၼ်းပိူင်လူင် ႁႂ်ႈၸၢဝ်းတႆးမီးတၢင်းႁူႉတၢင်းႁၼ်မေႃၽွမ်ႉႁူမ်ႈၵၼ်ႁဵတ်း သၢင်ႈၵၢၼ်ငၢၼ်း။

ပပ်ႉပိုၼ်းသၢမ်ၵူၵ်း (သၢမ်ၸုမ်း) ဢၼ်ဢိတ်ႇဢွၵ်ႇပိုၼ်ႈၽႄႈမႂ်ႇထႅင်ႈၵမ်းၼႆႉ ပဵၼ်ပပ်ႉထိ 1 ၊ မီး 193 ၼႃႈ၊ တင်းမူတ်းဢိတ်ႇဢွၵ်ႇ 1,000 ပပ်ႉ။ တေႃႇပေႃးယဝ်ႉပိုၼ်းတင်းမူတ်းမီး 7 ပပ်ႉ၊ ၵႃႈၶၼ်ပပ်ႉ 129 ဝၢတ်ႇ၊ ပၼ်ႁႅင်းသိုဝ်ႉလႆႈတီႈ 1.တီႈႁၢၼ်ႉၶမ်းၸၢမ်ႇႁိူင်း (ၶူးမိူင်းလီ) လင်ဝတ်ႉပႃႇပဝ်ႈ ၵဵင်းမႆႇ။ 2.ႁၢၼ်ႉသဵင်ၵွင်တႆး ဝဵင်းတႃႈၶီႈလဵၵ်း။ 3.ႁၢၼ်ႉၶၢႆလိၵ်ႈလၢႆးတႆး ပဵင်းလူင် ၸိူဝ်းၼႆႉ။

“ပပ်ႉပိုၼ်းသၢမ်ၵူၵ်းၼႆႉ ဢွၼ်တၢင်းၵေႃႈယၢမ်ႈဢိတ်ႇဢွၵ်ႇ ဝၢင်းၶၢႆယဝ်ႉ ၼိုင်ႈၵမ်းလႂ် 100-200 ပပ်ႉ၊ သဵင်ႈၵႂႃႇၵမ်းလႂ်ၵမ်းၼၼ်ႉ။ ၵူၺ်းၵႃႈ ၵဵဝ်ႇၵပ်းၵၢၼ်ပိၼ်ႇၽႃသႃလႄႈသင်၊ ၵၢၼ်ၸႂ်ႉၶေႃႈၵႂၢမ်းလႄႈသင်၊ လွင်ႈၸႂ်ႉတူဝ်လိၵ်ႈၸိူဝ်းၼႆႉလႄႈသင် ပႆႇပေႃးႁၢၼ်ႉ ၸႂ်လႄႈ ၸင်ႇၶိုၼ်းထတ်းထွင်သေဢိတ်ႇဢွၵ်ႇ ပိုၼ်ၽႄႈမႂ်ႇ။ ၼႂ်းပပ်ႉထိၼိုင်ႈၵမ်းၼႆႉ ဢိင်ဢဝ်ၽႃသႃထႆးသေပိၼ်ႇပဵၼ်ၽႃသႃတႆး၊ ၵေႃႉပိၼ်ႇၽႃသႃပဵၼ် ၶိူဝ်းတႆးၶွၼ်ႈတုမ်ၵႅၼ်ႇ တင်း ၶမ်းၸၢမ်ႇႁိူင်း မိူင်းလီ၊ ၵေႃႉထတ်းထွင်ႈလိၵ်ႈၵေႃႈပဵၼ်ႁဝ်းသွင်ၵေႃႉၼႆႉ။ လိူဝ်သေပပ်ႉထိၼိုင်ႈယဝ်ႉ မိူဝ်ႈလဵဝ် ပပ်ႉထိ 2 ၵေႃႈ ႁၢင်ႈႁႅၼ်းတူဝ်ႈတၼ်းပိူဝ်ႈတႃႇဢွၵ်ႇထႅင်ႈယဝ်ႉ၊ ပပ်ႉထိ 3-7 တႄႉတိုၵ်ႉႁၢင်ႈ ႁႅၼ်းယူႇ”- ၶူးမိူင်းလီ လၢတ်ႈၼႄၼင်ႇၼႆ။

သိုပ်ႇလၢတ်ႈဝႃႈ-“ယိူင်းဢၢၼ်းဢၼ်လႆႈဢိတ်ႇဢွၵ်ႇပိုၼ်ၽႄႈၼႆႉ ပိူဝ်ႈႁႂ်ႈပီႈၼွင်ႉတႆးႁဝ်း လႆႈဢဝ်ၵႂႃႇၸႂ်ႉတိုဝ်း၊ ၵွပ်ႈဝႃႈၼႂ်းပပ်ႉ သၢမ်ၵူၵ်းၼႆႉ မီးလွင်ႈၽွမ်ႉၵၼ်၊ ႁၵ်ႉၵၼ်၊ လွင်ႈဢုပ်ႇဢူဝ်းၵိူဝ်းၵုမ်ၵၼ်၊ လွင်ႈဝၢင်းၽႅၼ် ပိူဝ်ႈတႃႇႁဵတ်းသၢင်ႈၵၢၼ်ယႂ်ႇငၢၼ်း လူင်ၸိူဝ်းၼႆႉလႄႈမီးၽွၼ်းလီတႄႉတႄႉ။ ၵၢၼ်ၵူႈလွင်ႈလွင်ႈၼႆႉ တေလႆႈ ဝၢင်းၽႅၼ်ဢွၼ်တၢင်း ၸင်ႇၵွႆႈလူင်းမိုဝ်းႁဵတ်း၊ ပေႃးတေႁဵတ်းသင် တေလႆႈမီးတီႈၵိူဝ်းၵုမ်၊ ပဵၼ်ၵူၼ်းလီ၊ မီးပၺ်ၺႃ။ ၽူႈဢွၼ်ႁူဝ်ၼမ်းၼႃႈၼၼ်ႉၵေႃႈ တၵ်းလႆႈပဵၼ်ၵူၼ်းလီ မီးပၺ်ၺႃ ပဵၼ်တီႈၵိူဝ်းၵုမ်၊ တေလၢတ်ႈ တေႁဵတ်းသင် ၸင်ႇၵွႆႈတႅပ်းတတ်း။ ပဵၼ်ပပ်ႉဢၼ်ပၼ်တၢင်းႁူႉၵူႈပၢႆးပၢႆး၊ ႁဵတ်းႁႂ်ႈၵူၼ်း ႁဝ်းလၵ်းလႅမ် ၸဵမ်ၵၢၼ်ၼႃႈႁိူၼ်း၊ လွင်ႈယူႇသၢင်ႈၵိၼ်သဝ်း၊ ၵၢၼ်လၢတ်ႈၸႃၵၢၼ်တိတ်းတေႃႇၵပ်းသိုပ်ႇၶဝ်ႈၸူးၵူၼ်းၸုမ်းၼိုင်ႈ လႄႈၸုမ်းၼိုင်ႈ တေႃႇထိုင်ပူၵ်းပွင်ဢဝ်ဝၢၼ်ႈမိူင်းၶိုၼ်း။

မိူဝ်ႈၽွင်းမိူင်းၶႄႇတႅၵ်ႇပဵၼ် 3 မိူင်းၼၼ်ႉ ၶဝ်တိုၵ်းၵၼ်ႁိုင်ထိုင် 70 ပီ၊ လိုၼ်းသုတ်းၵေႃႈ ပဵၼ်မူႇၼိုင်ႈ ၸုမ်းလဵဝ်။ ႁၼ်ဝႃႈငဝ်း လၢႆးဢၼ်ၼႆႉ မိူၼ်ၵၼ်တင်းမိူင်းတႆးႁဝ်းမိူဝ်ႈလဵဝ်၊ ၼႂ်းမိူင်းတႆးႁဝ်းမီးၸုမ်းၸၢဝ်းၶိူဝ်း ယိပ်းၵွင်ႈၵၢင်ႇလၢႆမူႇလၢႆၸုမ်း၊ ယုမ်ႇယမ်ဝႃႈ ဝၼ်းၼိုင်ႈတေၽွမ်ႉၵၼ် ပဵၼ်တပ်ႉသိုၵ်းၼႂ်းၸိုင်ႈတႆး ဢၼ်လဵဝ်- ႁၼ်ထိုင်ၼင်ႇၼႆ။

ၶႂ်ႈတုၵ်းယွၼ်းပီႈၼွင်ႉတႆးဝႃႈ ၶႅၼ်းတေႃႈဢွၼ်ၵၼ်ပၼ်ႁႅင်း၊ ၵွပ်ႈဝႃႈပဵၼ်ပပ်ႉပၼ်တၢင်းႁူႉ ပိူဝ်ႈတႃႇတႆးႁဝ်း၊ ၾၢႆႇၼိုင်ႈၵေႃႈ တိုၼ်းႁဵတ်းမၼ်းသဵင်ႈၼမ်။ ပေႃးမီးၵူၼ်းပၼ်ႁႅင်း ဢွၵ်ႇမၢႆ 1 ယဝ်ႉ တေလႆႈဢွၵ်ႇၵပ်းၵၢမ်း တၢမ်းၵၼ်ၵႂႃႇတိၵ်းတိၵ်း တေႃႇထိုင်မၢႆ 7 ။ ပပ်ႉသၢမ်ၵူၵ်းၼႆႉ တေမီးၽွၼ်းလီပိူဝ်ႈတႃႇ လုၵ်ႈဢွၼ်ႇတႆးႁဝ်း မိူဝ်းၼႃႈ၊ တင်ႈတႄႇၵၢၼ်ဢွၼ်ႇတေႃႇထိုင်ၵၢၼ်လူင်။ ၵၢင်ၸႂ်ၶႃႈႁဝ်းတႄႉ မီးၵူၼ်းပၼ်ႁႅင်းဢေႇ/ၼမ် ၵေႃႈယဝ်ႉ ယိူင်းဢၢၼ်းဝႆႉ တိုၼ်းတေၶတ်းၸႂ်ဢိတ်ႇဢွၵ်ႇတေႃႇပေႃးယဝ်ႉတူဝ်ႈ တင်း 7 ပပ်ႉ၊ သင်ဝႃႈမီးၵူၼ်း ပၼ်ႁႅင်းၼမ်ၶႅၼ်းၸူမ်း”- ၶူးမိူင်းလီ သိုပ်ႇလၢတ်ႈၶွတ်ႇယွတ်ႈၵႂႃႇၼင်ႇၼႆ။

တိတ်းတေႃႇ ၶမ်းၸၢမ်ႇႁိူင်း မိူင်းလီ လႆႈတီႈမၢႆၾူၼ်ႊ 089-5530906