ပေႃးထိုင်မႃးဝၼ်းလိူၼ်သီႇမူၼ်း တၢင်းတၵ်ႉၵႃႇသတ်ႉထႃး ဝတ်ႉၾႃႉဝဵင်းဢိၼ်း၊ လၵ်းတႅင်ႇ-ပဵင်းလူင် တေၸတ်းပၢင် ပွႆးလူႇတၢၼ်းယၢတ်ႇၼမ်ႉ ၸေးၻီး (ၵွင်းမူး) မႃရၸိၼ တီႈဝတ်ႉၾႃႉ ဝဵင်းဢိၼ်း။ မွၵ်ႇထိုင်တၵ်ႉၵႃႇသတ်ႉထႃးတီႈ ၸမ်တီႈၵႆ/ ၼႂ်းမိူင်းၼွၵ်ႈမိူင်းၶဝ်ႈႁူမ်ႈႁွမ်းတၢၼ်း။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းထိ 01/01/2013 (မိူဝ်ႈဝႃး)ၼႆႉ  မီးၵၢၼ်ၸတ်းပၢင်ၵုမ်တီႈဝတ်ႉၾႃႉဝဵင်း ဢိၼ်း ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇ။ မီးၽူႈယႂ်ႇၵူၼ်းလူင်/ၵၢင်ႉၵႄႇ/ၽူႈၸွႆႈ ဝၢၼ်ႈလၵ်းတႅင်ႇ ၽူႈယႂ်ႇၵူၼ်းလူင်/ပူႇႁဵင် ဝၢၼ်ႈပဵင်းလူင် ၶဝ်ႈႁူမ်ႈပၢင်ၵုမ်။ ၸဝ်ႈၵွၼ်းဝတ်ႉၾႃႉဝဵင်း ဢိၼ်း ၸဝ်ႈၶူးပၺ်ၺႃ ပဵၼ်ၽူႈၼင်ႈၸိုင်ႈပိုတ်ႇပၢင်ၵုမ်။ ဢုပ်ႇဢူဝ်းၵဵဝ်ႇၵပ်း လွင်ႈလႆႈၶိုၼ်းမႄးၵေႃႇ ၵုမ်းလုမ်းလႃး ထၢတ်ႈၸေးၻီး (ၵွင်းမူး) လူင်မႃရၸိၼ ဢၼ်ၸဝ်ႈၵွၼ်းၸိူင်း ဢွၼ်ႁူဝ်ၵေႃႇ သၢင်ႈဝႆႉတီႈလႅၼ်လိၼ်တႆး-ထႆး။ ဢိင်ၼိူဝ်ၵၢၼ် မႄးၵေႃႇၵုမ်းလုမ်းလႃးၸမ်ယဝ်ႉတူဝ်ႈသေ ႁူမ်ႈၵၼ်တႅပ်း တတ်းဝႃႈ တေၸတ်းပၢင်ပွႆး လူႇတၢၼ်းယၢတ်ႇၼမ်ႉ ၼႂ်းဝၼ်းလိူၼ်သီႇမူၼ်း ဝၼ်းထိ 26/03/13 တၢင်းၼႃႈၼႆႉ- ၼႆယဝ်ႉ။

ၵၢၼ်ႁႅၼ်းတၢၼ်း ပၢင်ပွႆးလူႇတၢၼ်းယၢတ်ႇၼႆႉၼႆႉ တေၸတ်းၸွမ်းၵၼ်တင်းၾိင်ႈထုင်းပုတ်ႉထ သႃသၼႃၾိင်ႈတႆး လႄႈၾိင်ႈထႆး။ ဝၼ်းထိ  24/03/12 လူႇတၢၼ်းယိူင်းၸူးထိုင် ၽူႈၸိူဝ်းသုတ်း သဵင်ႈမုၼ်ၵႂႃႇ၊ ဝၼ်းထိ 25 ဝၼ်းႁပ်ႉၶႅၵ်ႇ၊ ဝၼ်းထိ 26 လူႇတၢၼ်းယၢတ်ႇၼမ်ႉ- ၼႆယဝ်ႉ။

ထၢတ်ႈၸေးၻီး (ၵွင်းမူး) မႃရၸိၼ (ဢၼ်မီးတီႈပွင်ႇဝႃႈၵွင်းမူးပေႉၶုၼ်သူင် ႁိုဝ် ပေႉၽူႈၶဵၼ်) တီႈလႅၼ် လိၼ်တႆး-ထႆး ဝတ်ႉၾႃႉဝဵင်းဢိၼ်းၼႆႉ ႁူဝ်ပဝ်ႈလူင်ၸဝ်ႈၵွၼ်းၸိူင်း ၶဝ်ႈမႃးတင်ႈပၵ်း တပ်ႉသိုၵ်း တီႈလႅၼ် လိၼ်တႆး- ထႆးသေ ဢွၼ်ႁူဝ် ၵေႃႇသၢင်ႈဝႆႉ မိူဝ်ႈပီ 1968 ။ ထိုင်မႃးပီ 1978 ၸဝ်ႈၵွၼ်းၸိူင်း ဢွၼ်ႁူဝ် ၶိုၼ်းမႄးၵေႃႇၵုမ်းလုမ်းလႃးထႅင်ႈၵမ်းၼိုင်ႈသေ ယၢတ်ႇၼမ်ႉမိူဝ်ႈဝၼ်း လိူၼ် 6 မူၼ်း၊ ဝၼ်းထိ 21/05/1978 ဢၼ်မႅၼ်ႈၸွမ်းဝၼ်းလုၵ်ႉၽိုၼ်ႉၸိုင်ႈတႆး။

ၵၢၼ်ၶိုၼ်းမႄးၵေႃႇၵုမ်းလုမ်းလႃးပွၵ်ႈၼႆႉ ပဵၼ်ပွၵ်ႈၵမ်းထိ 3 ။ ပွၵ်ႈၵမ်းထိ 1 ၵမ်ႈၽွင်ႈဝႃႈမိူဝ်ႈပီ 1968 ၼၼ်ႉ ၸဝ်ႈၵွၼ်းၸိူင်း ဢွၼ်ႁူဝ်ၶိုၼ်းမႄးၵေႃႇၵုမ်းလုမ်းလႃးထၢတ်ႈၸေးၻီး(ၵွင်းမူး)ဢွၼ်ႇ ဢၼ်မီးတီႈလႅၼ်လိၼ်ၼႆႉ၊ ပွၵ်ႈၵမ်း 2 1978 ဝၼ်းလိူၼ် 6 မူၼ်း။ မိူဝ်ႈၵေႃႇၵုမ်းပွၵ်ႈထိ 1 ၼၼ်ႉ ၵမ်ႈၽွင်ႈယင်းဝႃႈ ၸဝ်ႈၵွၼ်းၸိူင်းၶိုၼ်းမႄးၵေႃႇ ၵုမ်းလုမ်းလႃး ၸေးၻီးဢွၼ်ႇ ဢၼ်ၸဝ်ႈၼရေး သူၼ် မႁႃရႃၸႃ ဢွၼ်ႁူဝ်ၵေႃႇသၢင်ႈ ဝႆႉၼၼ်ႉ- ၼႆယူႇ။

လွင်ႈတၢင်းလႆႈၶိုၼ်းမႄးၵေႃႇၵုမ်းလုမ်းလႃးပွၵ်ႈၼႆႉ ၵွပ်ႈဝႃႈ ဝၢႆးသေ 1996 တပ်ႉသိုၵ်းမိူင်းတႆး (MTA) ဝၢင်းၶိူင်ႈၵွင်ႈၵၢင်ႇ ၵႂႃႇယဝ်ႉ လွင်ႈလုမ်းလႃးလူတ်းယွမ်းလူင်းသေ ႁဵတ်းႁႂ်ႈၸေးၻီး မႃရၸိၼ ၵဝ်ႇသဝ်ႈဝဝ်း မွင်မႃး၊ ၾူၼ်ႁူဝ်ႈ၊ ႁၢင်ႈၾၢင်တၢင်း ၼႂ်း ဢမ်ႇလီလွမ်လီတူၺ်း၊ ဢမ်ႇလႅပ်ႈၵႅၼ်ႇၶႅင်ႈ တင်ႈယူႇၵႂႃႇလႆႈမိူဝ်းၼႃႈ ၶၢဝ်းႁိုင်။ ၵပ်းၵၢႆႇလွင်ႈၼႆႉသေ ပူၼ်ႉမႃးမိူဝ်ႈၼႂ်း ပီ 2010 တၢင်းၸဝ်ႈၵွၼ်း ဝတ်ႉၾႃႉဝဵင်းဢိၼ်း ၸဝ်ႈၶူး ပၺ်ၺႃ၊ ၽူႈယႂ်ႇၵူၼ်းလူင်ဝၢၼ်ႈလၵ်းတႅင်ႇ၊ ပေႃႈလူင်တဵင်း ဝၢၼ်ႈပဵင်း လူင် (ယၢမ်းလဵဝ်ပူႇႁဵင်တဵင်း) ၊ ၸၢႆးတႃႇဢူး ဢုပ်ႇဢူဝ်းၵၼ်သေ လႆႈၶိုၼ်းမႄးၵေႃႇၵုမ်းလုမ်းလႃး။ ၵမ်းၼႆႉၵေႃႈ ၸၢႆးတႃႇဢူး ႁပ်ႉပဵၼ်ၸဝ်ႈ တႃႇၼလူင် ဢွၵ်ႇႁႃငိုၼ်းတွင်း ၵႃႈၸႂ်ႉၸၢႆႇၵူႈလွင်ႈလွင်ႈ သေ မီးၵၢၼ်ၵေႃႇၵုမ်းလုမ်းလႃးမႃး တေႃႇထိုင် မိူဝ်ႈလဵဝ်။

တင်ႈတႄႇၶိုၼ်းမႄးၵေႃႇၵုမ်းမႃးပွၵ်ႈၵမ်း 3  ႁၢၼ်ႉတေႃႇထိုင်မိူဝ်ႈလဵဝ်ၼႆႉ လႆႈငိၼ်းဝႃႈသဵင်ႈငိုၼ်းၸႂ်ႉ ၸၢႆႇမွၵ်ႈ 2,870,446 ဝၢတ်ႇ။ လၢမ်းဝႆႉဝႃႈတေႃႇပေႃးယဝ်ႉတူဝ်ႈ တေသဵင်ႈၵႃႈၸႂ်ႉၸၢႆႇဢမ်ႇယွမ်းမွၵ်ႈ 3,000,000 လၢၼ်ႉဝၢတ်ႇ။ ၵွပ်ႈဝႃႈ တိုၵ်ႉၵိုတ်းလိူဝ်ဢၼ်တေႁဵတ်းသၢင်ႈထႅင်ႈမိူၼ်ၼင်ႇ တႅမ်ႈႁၢင်ႈၸၢတ်ႈၵိုၵ်း ၽႃဢုတ်ႇ ၼႂ်းၵူင်ထၢတ်ႈၸေးၻီး တင်းမူတ်း 24 ႁၢင်ႈ၊ ႁုၼ်ႇႁၢင်ႈပၼ်ႈ (မိူၼ်ၼင်ႇၸဝ်ႈဢူးပၵုတ်ႈ) လႄႈ သိူဝ်ႇမၢၵ်ႇ ဢုတ်ႇ (ဢိတ်ႇၼွၼ်) ၼႂ်းဝၢင်းၸေးၻီး ၸိူဝ်းၼႆႉ။ ၼႂ်းဝၼ်းလိူၼ် 4 မူၼ်းၼႆႉ ဢမ်ႇလႅပ်ႈယဝ်ႉတူဝ်ႈလႆႈ သေတႃႉ တေသိုပ်ႇႁဵတ်းသၢင်ႈၵႂႃႇတေႃႇပေႃး ယဝ်ႉတူဝ်ႈတင်းသဵင်ႈ- ၼႆယူႇ။

ၸေးၻီး (ၵွင်းမူး) မႃရၸိၼ ဢၼ်ၶိုၼ်းမႄးၵေႃႇၵုမ်းလုမ်းလႃးၵမ်းၼႆႉ ၸွမ်းၼင်ႇသင်ၶမိူင်းထႆး ၶဝ်ၸဝ်ႈမႃးဢႅဝ်ႇယဵမ်ႈ တူၺ်းၼၼ်ႉ ယွင်ႈယေႃးဝႃႈ ၵၢၼ်မေႃမိုဝ်းၶိုၵ်ႉၶႅမ်ႉ ႁၢင်ႈလီတႃတႄႉတႄႉ- ၼႆယဝ်ႉ။

ၸဝ်ႈၽူႈၵူၼ်းလီ ၽူႈလႂ်ၽႂ်သေဢမ်ႇဝႃႈ ၸိူဝ်းၶႂ်ႈႁူမ်ႈႁွမ်းတၢၼ်း ဝတ်ႉထုငိုၼ်းၼႂ်းၵၢၼ်တၢင်းလီၼႆႉ တိတ်းတေႃႇၵပ်း သိုပ်ႇၵမ်းသိုဝ်ႈ လႆႈတီႈ ၸဝ်ႈၶူးပၺ်ၺႃ မၢႆၾူၼ်ႊ 087-1764170 ၊ ဢမ်ႇၼၼ် တိတ်းတေႃႇတီႈၸုမ်းၶၢဝ်ႇၽူႈတွႆႇႁွၵ်ႈ shan@cm.ksc.co.th ၵေႃႈလႆႈ။