မေႃယႃသိုၵ်းမၢၼ်ႈထၢၵ်ႈ ပွတ်းမိူင်းပေႃႈ ၵေႃႉၸႂ်လီၸႂ်ဝၢၼ် ႁႃယူတ်းယႃတၢင်းပဵၼ်ပၼ်ၵူၼ်းဝၢၼ်ႈ ထုၵ်ႇပလိၵ်ႈမၢၼ်ႈ ယိုဝ်းတၢႆ၊ တၢင်းႁိူၼ်းဢမ်ႇႁၢၼ်ႉၸႂ်ၵေႃႈ ၸဝ်ႈၼႃႈတီႈ မၢၼ်ႈဝႃႈ မၼ်းဢူမ်ပၢၵ်ႇ ၵွင်ႈယိုဝ်းတူဝ်တၢႆၵူၺ်း။

ပူၼ်ႉမႃးမိူဝ်ႈဝၼ်းထိ 23/12/12 ၵူဝ်ႇၵျေႃႇမိၼ်း (သိုၵ်းမၢၼ်ႈထၢၵ်ႈ) ၵေႃႉဢဝ်မေးၸၢဝ်းၶၢင်သေ ယူႇသဝ်းတၢင်းမိူင်းပေႃႈ သေ ႁဵတ်းၵိၼ်ၵၢၼ်မေႃယႃ၊ ႁႃယူတ်းယႃပၼ်ၵူၼ်းဝၢၼ်ႈၵူၼ်းမိူင်း ၸိူဝ်းဢမ်ႇ ယူႇလီၵိၼ်ဢမ်ႇဝၢၼ် လႆႈထုၵ်ႇၽူႈၵွၼ်း ပလိၵ်ႈတီႈမိူင်းပေႃႈ ႁွင်ႉၵႂႃႇယူတ်းယႃပၢႆး ယူႇလီ။ ၵူၺ်းၵႃႈ မၼ်းၸၢႆးၵႂႃႇၺႃးယိုဝ်းတၢႆပႅတ်ႈ။ ၾၢႆႇပလိၵ်ႈၶဝ်ဝႃႈ မၼ်းယိုဝ်းတူဝ်တၢႆႁင်းၵူၺ်း- ၼႆယဝ်ႉ။

ၵပ်းၵၢႆႇလွင်ႈၼႆႉ ဢိင်ၼိူဝ်ၵူၼ်းႁိူၼ်းၵူၼ်းယေးမၼ်း ဢမ်ႇႁၢၼ်ႉၸႂ်သေ ဢဝ်တူဝ်တၢႆမၼ်းၵႂႃႇ ၵူတ်ႇထတ်းတူၺ်း တီႈမူႇၸႄႈ။ ၽူႈၵွၼ်းပလိၵ်ႈတီႈမူႇၸႄႈ လၢတ်ႈဝႃႈ မၼ်းၶႃႈတူဝ်တၢႆႁင်းၵူၺ်း။ ဝၢႆးၼၼ်ႉ ယွၼ်ႉဢမ်ႇႁၢၼ်ႉၸႂ်သေ သိုပ်ႇဢဝ်ၵႂႃႇထတ်းၵူတ်ႇတူၺ်းထႅင်ႈတီႈလႃႈသဵဝ်ႈ၊ ပလိၵ်ႈၾၢႆႇဢမုလွင်ႈႁုၵ်းႁၢႆႉ တီႈလႃႈသဵဝ်ႈၵေႃႈဝႃႈ မၼ်းၵိၼ်ယႃႈမဝ်း ယႃႈသေ ဢူမ်ပၢၵ်ႇၵွင်ႈယိုဝ်း တူဝ်တၢႆႁင်းၵူၺ်း- ဝႃႈၼႆ။

မိူဝ်ႈတႄႇမၼ်း ၽူႈၵွၼ်းပလိၵ်ႈမႃးႁွင်ႉၵႂႃႇသမ်းပၼ်ၶဵမ်၊ ၵူၺ်းၵႃႈ ၵႂႃႇၺႃးယိုဝ်းတၢႆပႅတ်ႈ။ ၵူၼ်းၼႂ်း ပိုၼ်ႉတီႈ ၶဝ်လၢမ်းဝႃႈ ႁူဝ်သိုၵ်းပလိၵ်ႈ (သွင်မႆ) ၽူဝ်းၶၢႆႇ ပဵၼ်ၵေႃႉယိုဝ်း။ ၶဝ်ဝႃႈမၼ်းၶႃႈတူဝ်မၼ်း တၢႆႁင်းၵူၺ်း တိၵ်းတိၵ်း၊  ဢမုၼႆႉပႆႇလႆႈပိၵ်ႉ၊ ၵူၺ်းၵႃႈဢမ်ႇပေႉဢႃႇၼႃႇၶဝ်လႄႈ ဢမုၼႆႉ ႁဝ်းၶႃႈၵေႃႈဢမ်ႇၸၢင်ႈ ႁဵတ်းႁိုဝ်၊ ႁၢၼ်ႉတေႃႇထိုင်မိူဝ်ႈလဵဝ် ယင်းပႆႇလႆႈႁႅၼ်း သွမ်းပၼ်မၼ်း- ၵူၼ်းဝၢၼ်ႈၵေႃႉၼိုင်ႈလၢတ်ႈၼင်ႇၼႆ။

ၵူၼ်းဝၢၼ်ႈၶဝ်ဝႃႈ ၸိုင်ဝႃႈပဵၼ်မိူင်းႁဝ်းပဵၼ်ၻီႊမွၵ်းၶရေႊသီႊ၊ ၵွပ်ႈသင်လွင်ႈၼႆႉၵူၺ်းၵေႃႈဢမ်ႇ ထတ်းသၢင် ပၼ်လီလီ၊ ပေႃးပဵၼ်ဢမုလမ်ႇလွင်ႈၸိူင်ႉၼႆ ၶႅၼ်းလီထတ်းၵူတ်ႇႁႂ်ႈ ႁႂ်ႈႁူႉလွင်ႈမၼ်း။ ႁူးၶဝ်ႈမၢၵ်ႇၵွင်ႈ တၢင်းလင်(ႁူဝ်) ပဵၼ်ႁူးလဵၵ်ႉ လဵၵ်ႉ၊ ႁူးဢွၵ်ႇတၢင်းၼႃႈ ၼႃႈ/ၵႅမ်ႈပေႃးသိၵ်ႇ၊ ၶဝ်သမ်ႉဝႃႈမၼ်းဢူမ်ပၢၵ်ႇၵွင်ႈ သေယိုဝ်းတူဝ်တၢႆၶိုၼ်း။ တီႈတႄႉမၼ်း ပေႃးဢူမ်ပၢၵ်ႇၵွင်ႈသေ ယိုဝ်းၼႆ ဢွၵ်းဢေႃးမၼ်းတၢၼ်ႇၵီႈၵႂႃႇ မူတ်းယဝ်ႉ၊ ၼႆႉသမ်ႉဢမ်ႇပဵၼ်ၸိူင်ႉၼၼ်။ မၼ်းပဵၼ် သိုၵ်းထၢၵ်ႈဢမ်ႇမီးၵွင်ႈလူး၊ မၼ်းတေႁဵတ်းႁိုဝ်မီးၵွင်ႈ ၶႃႈတူဝ်တၢႆႁင်းၵူၺ်း၊ မၼ်းပဵၼ်မေႃယႃ မီးၶဵမ်ၵူၺ်း- ဝႃႈၼႆ။

ၵူဝ်ႇၵျေႃႇမိၼ်းၼႆႉ ပဵၼ်သိုၵ်းမၢၼ်ႈထၢၵ်ႈ၊ ဢႃႇယု 36 ပီ၊ ပဵၼ်ၵူၼ်းၸႃႇတိဝဵင်းၼၢတ်ႉမွၵ်ႉ၊ တိူင်းမ ၵူၺ်း မိူင်းမၢၼ်ႈ၊ တီႈၸွမ်သိုၵ်းဢွင်ႇသၢၼ်း ပေႃႈၼၢင်းဢွင်ႇသၢၼ်းၸုၵျီႇၵိူတ်ႇ။ တႄႇၼႃႈႁိူၼ်း ၵိုၵ်းၼၢင်းယိင်းၶၢင်၊ မီးလုၵ်ႈၸၢႆးႁူမ်ႈၵၼ် 3 ၵေႃႉ၊ (ၵေႃႉယႂ်ႇ 6 ၶူပ်ႇ၊ ၵေႃႉၵၢင် 4 ၶူပ်ႇ၊ ၵေႃႉလဵၵ်ႉ 2 ၶူပ်ႇ)။ တူဝ်မၼ်းၼပ်ႉထိုဝ်ပုတ်ႉထၽႃသႃ၊ မေးမၼ်းပဵၼ်ၶရိတ်ႉ ယၼ်ႇ။ မၼ်းၼႆႉ ပဵၼ်ၵူၼ်းလီ၊ ႁူမ်ႈဝႃႈမၼ်းပဵၼ် သိုၵ်းမၢၼ်ႈထၢၵ်ႈၵေႃႈ မၼ်းဢမ်ႇယူႇၾၢႆႇလႂ်၊ ၽႂ်ယူႇဢမ်ႇလီ ၵိၼ်ဢမ်ႇဝၢၼ်ၵေႃႈ မၼ်းၵႂႃႇယူတ်းယႃပၼ်၊ ၵႂႃႇႁႃသမ်းၶဵမ်ပၼ်ဢမ်ႇလိူၵ်ႈၼႃႈၵူၼ်း။ ၵူၺ်းၵႃႈ မၼ်းသမ်ႉမီးပၼ်ႁႃၵၼ် ဝႆႉတင်းပလိၵ်ႈတီႈမိူင်းပေႃႈ ၸိူင်ႉႁိုဝ်ၵေႃႈႁဝ်းၶႃႈဢမ်ႇႁူႉ၊ မႃးၺႃးပလိၵ်ႈယိုဝ်းတၢႆၸိူင်ႉၼႆ- ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။