ပၢင်ၵုမ်လူင်သိူဝ်ၽိူၵ်ႇ တီႈတႃႈၶီႈလဵၵ်း လႆႈၶေႃႈတႅပ်း တတ်း 6 ၶေႃႈလႄႈ ၶေႃႈတုၵ်းယွၼ်း 7 ၶေႃႈ။ ႁူမ်ႈလုၵ်ႈ ၸုမ်းပႃႇတီႇတင်းသဵင်ႈ တေမီးၵၢၼ်ၵိၼ်ၶဝ်ႈႁူမ်ႈမူႇ ၵၼ်သေ ပွၵ်ႈၶိုၼ်းၸႄႈဝဵင်းၽႂ်မၼ်း။

ပၢင်ၵုမ်လူင် ပႃႇတီႇသိူဝ်ၽိူၵ်ႇ ဢၼ်ၸတ်းမႃးတင်ႈတႄႇဝၼ်းထိ 02/01/13 တီႈဝတ်ႉၶႄႇ ဝၢၼ်ႈပႃႇလႅင် ၸႄႈဝဵင်းတႃႈၶီႈလဵၵ်း ၼၼ်ႉ ယဝ်ႉတူဝ်ႈၵႂႃႇမိူဝ်ႈၼႆႉ ဝၼ်းထိ 04/01/13 လီငၢမ်း။ ၵၢင်ၶမ်ႈၶိုၼ်းၼႆႉ တေမီးၵၢၼ်ၵိၼ်ၶဝ်ႈႁူမ်ႈမူႇၶွတ်ႇယွတ်ႈလူပ်းလိုၼ်း။ တေမီးမေႃႁွင်ႉၽဵင်းၵႂၢမ်း ၸၢႆးၸိူင်းႁၢၼ် တင်း ၸၢႆးႁၢၼ်လႅင်း ၶဝ်ႈႁူမ်ႈႁွင်ႉၽဵင်းၵႂၢမ်းမူၼ်ႈၸႂ်ပၼ်-ၼႆယဝ်ႉ။

ႁူဝ်ၼႃႈပႃႇတီႇသိူဝ်ၽိူၵ်ႇ (SNDP) ၸၢႆးဢၢႆႈပဝ်းတႄႉ ပွၵ်ႈမိူဝ်းၵႂႃႇၸွမ်းႁိူဝ်းဝိၼ်မိူဝ်ႈဝႃး (03/01/12)။ ၵူၺ်းၵႃႈ လုၵ်ႈၸုမ်းပႃႇတီႇ တင်းလၢႆၶဝ်တႄႉ တေပွၵ်ႈမိူဝ်းၸွမ်းလူတ်ႉၵႃးၸွမ်းၵၼ် ၵူၼ်း 100-200 ၸိူင်ႉၼင်ႇ ၵမ်းမိူဝ်ႈလုၵ်ႉတူၼ်ႈတီးဢွၵ်ႇမႃး တီႈတႃႈၶီႈလဵၵ်းၼၼ်ႉ။

ပၢင်ၵုမ် ဝၼ်းထိ 03/01/13 ၼၼ်ႉ လႆႈၶေႃႈပိုၼ်ၽၢဝ်ႇ 6 ၶေႃႈ-  1.တင်ႈတႄႇလႆႈပိုတ်းယိုဝ်းၵၼ်မႃး ၼႂ်းၸႄႈမိူင်းၶၢင်ၼႆႉ ၵူၼ်းမိူင်း လႆႈႁၢမ်းႁိူၼ်းႁၢမ်းယေး၊ လႆႈဢွၼ်ၵၼ်ၶၢႆႉပၢႆႈ၊ ၵွပ်ႈၼၼ် တုၵ်းယွၼ်းႁႂ်ႈ တင်းသွင်ၾၢႆႇၵိုတ်းယိုဝ်းၵၼ်ၵမ်းလဵဝ်။ 2.ယူႇတီႈ SNDP သေ ၼင်ႇႁိုဝ်တေပဵၼ်မႃးၸိုင်ႈမိူင်းႁူမ်ႈတုမ် ၸိုၼ်ႈၸၢင်ႈၼၼ်ႉ တေၶတ်းၸႂ်ၵႂႃႇ။ 3.တိုၵ်းသူၼ်းလူင်ပွင်ၸိုင်ႈမိူင်းႁူမ်ႈတုမ်လႄႈ မုၵ်ႉၸုမ်းၸိူဝ်း ဢၼ်ၵဵဝ်ႇၶွင်ႈတင်းသဵင်ႈ ႁႂ်ႈၸဵဝ်းႁဵတ်းသၢင်ႈ ဢွၵ်ႇၼမ်ႉဢွၵ်ႇတူဝ် လွင်ႈငမ်းယဵၼ်ဢၼ်မၼ်ႈၵိုမ်းယိုၼ်း ယၢဝ်း တေႃႇၸူဝ်ႈလုၵ်ႈပၢၼ်လၢၼ်။ 4.ၼင်ႇႁိုဝ်တေမီးမႃးမၢႆမီႈ ၵႅတ်ႇၶႄႁႄႉၵင်ႈသုၼ်ႇလႆႈၸၢဝ်းၶိူဝ်း/ ၵူၼ်းၸုမ်း ဢေႇၼၼ်ႉ သိူဝ်ၽိူၵ်ႇ SNDP တေႁူမ်ႈမိုဝ်းၵၼ်တင်းပႃႇတီႇၸၢဝ်းၶိူဝ်းတင်းသဵင်ႈသေ တေၶတ်း ၸႂ်ႁဵတ်းသၢင်ႈႁၢင်ႈပွင်ၵႂႃႇ။ 5.တွၼ်ႈတႃႇၵၢၼ်လိူၵ်ႈ တင်ႈပီ 2015 ၼၼ်ႉ ယင်းပႆႇလီၸႂ်ႉလႄႈ ဢမ်ႇၸၢင်ႈ ယွမ်းႁပ်ႉ ၵၢၼ်ၸႂ်ႉတိုဝ်းလွၵ်းပိူင်သဵင်ၵၼႅၼ်းၽူႈတႅၼ်းၸွမ်းပုၼ်ႈသုၼ်ႇ (PR system) ။ 6.ဢၼ်တႆးတင်း သဵင်ႈ ဢွၼ်ၵၼ်မုင်ႈမွင်းဝႆႉဝႃႈ ႁႂ်ႈၵိူတ်ႇပဵၼ်မႃးပႃႇတီႇၵၢၼ်မိူင်းတႆးၽွမ်ႉႁူမ်ႈ (လၢႆပႃႇတီႇမႃး ၽွမ်ႉႁူမ်ႈၵၼ် United Shan Political Parties ၊ ဢမ်ႇၸႂ်ႈပႃႇတီႇလဵဝ်) ဢၼ်ဝႃႈၼၼ်ႉ လႆႈၵမ်ႉထႅမ်ၵႂႃႇၼၵ်းၼၵ်း ၼႃၼႃ- ၸိူဝ်းၼႆႉ။

ၼွၵ်ႈသေၼၼ်ႉ ၸွမ်းၼင်ႇလႆႈႁဵတ်းပၢင်ဢုပ်ႇဢူဝ်း (Workshop) လႄႈသင်၊ လႆႈႁဵတ်းလႆႈပၢင်လူင်လႄႈ သင်၊ လုၵ်ႈၸုမ်းသိူဝ်ၽိူၵ်ႇ လႆႈၶေႃႈတုၵ်းယွၼ်း 7 ၶေႃႈ- 1.ႁႂ်ႈပႃႇတီႇတႆးသွင်ပႃႇတီႇႁူမ်ႈႁွမ်းၵၼ်ပဵၼ်ၼိုင်ႈလဵဝ်။ 2.ႁႂ်ႈယုၵ်ႉယွင်ႈၾၢႆႇသူၼ်းတုမ်/ၾၢႆႇသိုဝ်ႇ။ 3.ယုၵ်ႉယွင်ႈၼမ်ႉၵတ်ႉၵူၼ်းၼႂ်းပႃႇတီႇ။ 4.လႅၵ်ႈလၢႆႈလွၵ်းပိူင် ဝႃႇတၼႂ်းပႃႇတီႇ။ 5.မူၼ်ႉမႄးပူၵ်းပွင်ပေႃႇလသီႇပႃႇတီႇ။ 6.လႅၵ်ႈ လၢႆႈတၢင်းႁတ်းႁၢၼ်လႄႈ တၢင်းႁၼ်ထိုင်။ 7.လွၵ်းလၢႆးပိူဝ်ႈတႃႇႁဵတ်းသၢင်ႈၵႂႃႇမိူဝ်းၼႃႈ ၸိူဝ်းၼႆႉ။

ပၢင်ၵုမ်လူင်ပႃႇတီႇသိူဝ်ၽိူၵ်ႇ (SNDP) ပွၵ်ႈၵမ်းၼႆႉ မီးလုၵ်ႈၸုမ်းပႃႇတီႇသိူဝ်ၽိူၵ်ႇ ၼႂ်းၸိုင်ႈမိူင်းႁူမ်ႈတုမ် ပတ်းပိုၼ်ႉၶဝ်ႈႁူမ်ႈ 600 ပၢႆ။ ဝၼ်းထိ 02/01/13 ဢုပ်ႇဢူဝ်းၵၼ် 2 လွင်ႈ 1.ပိူဝ်ႈတႃႇၶိုၼ်မူၼ်ႉမႄး ပေႃႇလသီႇပႃႇတီႇ ၼင်ႇႁိုဝ်ပေႃးတေပေႉၵၢၼ်လိူၵ်ႈ တင်ႈပီ 2015 ။ 2.ဢုပ်ႇဢူဝ်းလွင်ႈ ပိူဝ်ႈတႃႇႁႂ်ႈပႃႇတီႇ တႆး 2 ပႃႇတီႇႁူမ်ႈႁွမ်းၵၼ်ပဵၼ်ပႃႇတီႇလဵဝ်။ ၵွပ်ႈႁၼ်ဝႃႈ ၼင်ႇႁိုဝ်တေပေႉ ၵၢၼ်လိူၵ်ႈတင်ႈပီ 2015 ၼၼ်ႉ ပႃႇတီႇ တႆး 2 ပႃႇတီႇ၊ ႁူဝ်သိူဝ် (SNLD) တင်းသိူဝ်ၽိူၵ်ႇ (SNDP) ထုၵ်ႇလႆႈ ႁူမ်ႈႁွမ်းၵၼ် ပဵၼ်ပႃႇတီႇၼိုင်ႈ ပႃႇတီႇလဵဝ်။