ၸူဝ်ႈၶၢဝ်းသိုၵ်းမၢၼ်ႈ ႁၢင်ႈၼႃႈသိုၵ်းတၢင်းမိူင်းၶၢင်ၼႆႉ ပီႈၼွင်ႉတႆး ဢၼ်ယူႇၼႂ်းပွတ်းထုင်ႉလွႆ ႁူဝ်သိူဝ် လႆႈၺႃးတၢင်းတုၵ်ႉၶ ၸွမ်းၵူႈလွင်ႈလွင်ႈ။

မိူဝ်ႈဝၼ်းထိ 12/12/12 တီႈဝၢၼ်ႈမႂ်ႇ ထုင်ႉလွႆႁူဝ်သိူဝ်၊ ၵူၼ်းဝၢၼ်ႈၵေႃႉၸိုဝ်ႈၸၢႆးသၢမ်ၸိင်ႇ၊ ဢႃႇယု 20 ပီ၊ ၽွင်းၵႂႃႇမႃး တၢင်းဝၢၼ်ႈမွၼ်း ၺႃးသိုၵ်းၶၢင်တိၺွပ်းသေၵူတ်ႇထတ်း၊ ႁုပ်ႈယိုတ်းဢဝ်မိုဝ်း ထိုဝ်မၼ်းၸၢႆး၊ မၼ်းၵေႃႈပႅတ်ႈဝႆႉလူတ်ႉၶိူင်ႈ သေ လႅၼ်ႈပၢႆႈ၊ ဝၢႆးၼၼ်ႉ ၵူၼ်းႁိူၼ်းၶဝ်လႆႈၵႂႃႇထုတ်ႇ ဢဝ်လူတ်ႉၶိူင်ႈ၊ လႆႈပၼ်ငိုၼ်း 50,000 ပျႃး- ၼႆယဝ်ႉ။

ၵူၼ်းၵႂႃႇမႃး ပေႃးပဵၼ်မၢဝ်ႇသၢဝ် ၺွပ်းဝႆႉ၊ ပေႃးပဵၼ်မႄႈႁိူၼ်းၶိုၼ်းပွႆႇပၼ်၊ မၢင်ဝၢၼ်ႈလႆႈဢဝ်ငိုၼ်း ၸၢင်ႈသေၵႂႃႇ၊ မၢင်ဝၢၼ်ႈလႆႈၸူၵ်းဝႂ်သေၵႂႃႇ ၼႂ်းပီၼႆႉၵူၺ်း ယွၼ်းမႃးသၢမ်ပွၵ်ႈယဝ်ႉ။ ပွၵ်ႈဢွၼ် တၢင်းၼိုင်ႈဝၢၼ်ႈ 8 ၵေႃႉ၊ ပွၵ်ႈၵမ်းသွင် ၼိုင်ႈဝၢၼ်ႈ 3 ၵေႃႉ၊ ပွၵ်ႈၵမ်းသၢမ် ၼိုင်ႈဝၢၼ်ႈ 10 ၵေႃႉ ၵွပ်ႈဢမ်ႇလိူဝ်လႆႈလႄႈ လႆႈသူင်ႇပၼ်မႃး။

မိူဝ်ႈဝၼ်းထိ 13/12/2012 မႄႈႁိူၼ်းၵေႃႉၼိုင်ႈ ဢႃႇယု 35 ပီ၊ လုၵ်ႉဝဵင်းမူႇၸႄႈၵႂႃႇဢႅဝ်ႇပီႈၼွင်ႉ ဝၢၼ်ႈမႂ်ႇၼၼ်ႉ ၵႂႃႇၽႃႇ ၺႃးသိုၵ်းၶၢင်တီႈဝၢၼ်ႈမွၼ်း၊ ဢမ်ႇပၼ်မၼ်းၼၢင်းပူၼ်ႉၵႂႃႇ၊ မၼ်းၼၢင်း သမ်ႉ ပႃးလုၵ်ႈဢွၼ်ႇလဵၵ်ႉ ဢႃႇယု 3 ၶူပ်ႇဝႆႉ။ ပီႈၼွင်ႉၶဝ်ဝႃႈ “မႄႈမၼ်းပၼ်ၵိုတ်းဝႆႉ၊ ယွၼ်းဢဝ် လုၵ်ႈဢွၼ်ႇၵႂႃႇ ဢွၼ်တၢင်း” ၼႆၵေႃႈ ဢမ်ႇလႆႈ။ ပၼ်ၼင်ႈပႂ်ႉၶဝ်ၶိုင်ႈဝၼ်း ၸင်ႇႁႂ်ႈပွၵ်ႈမိူဝ်းၶိုၼ်း တၢင်းမူႇၸႄႈ။

သင်ဝႃႈသိုၵ်းၶၢင်ပႂ်ႉၺွပ်းၵူၼ်းမိူင်းယူႇတိၵ်းတိၵ်းၼႆ ၵူၼ်းၼုမ်ႇတႆးႁဝ်းတေပၢႆႈၶဝ်ႈမိူင်းပိူၼ်ႈသေ ဢမ်ႇၵႃး ဝၢၼ်ႈၵေႃႈတေ မွင်၊ ၼႃႈၵၢၼ်ၵေႃႈဢမ်ႇပဵၼ်ႁဵတ်း၊ တေၵႂႃႇၵၢတ်ႇယင်းဢမ်ႇၸၢင်ႈယဝ်ႉၼႆ ၵူၼ်းဝၢၼ်ႈ ၵေႃႉၼိုင်ႈၶၢင်းၼႄၼင်ႇၼႆ။