ဢိင်ၼိူဝ်သိုၵ်းမၢၼ်ႈတူင်ႉၼိုင် ၶိုၼ်ႈဢိူမ်ႈၸမ်ႁိမ်းငဝ်ႈ ငုၼ်းၶၢင်လၢႆႇၸႃႇ မႃးလိူဝ်ၵဝ်ႇသေ သွင်ၾၢႆႇ လႆႈ ပဵၼ်ပၢင် တိုၵ်းၵၼ်မႃးၶိူဝ်းယႂ်းလိူဝ်ၵဝ်ႇ။ ပၢင်တိုၵ်းလၢႆဝၼ်းပူၼ်ႉမႃး သိုၵ်းမၢၼ်ႈၸႂ်ႉႁိူဝ်းဝိၼ် ႁဵတ်းႁႂ်ႈၾၢႆႇသိုၵ်းၶၢင်တိူဝ်ႉဝၢတ်ႇ ၸဵပ်း/တူၵ်းသုမ်း။

မိူဝ်ႈဝၼ်းထိ 04/12/12 ယွၼ်ႉပိူဝ်ႈသိုၵ်းမၢၼ်ႈၶိုၼ်ႈဢိူမ်ႈၸမ် ငဝ်ႈငုၼ်းလၢႆႇၸႃႇႁႅင်းၼႅၼ်ႇလႄႈ ပိူဝ်ႈတႃႇႁူမ်ႇလူမ်ႈ ငဝ်ႈငုၼ်းၼၼ်ႉ သိုၵ်းၶၢင် (KIA) တင်း သိုၵ်းလုၵ်ႈႁဵၼ်း တႅဝ်းႁူမ်ႈၻီႊမွၵ်း ၶရႅတ်ႊတိၵ်ႊ မိူင်းမၢၼ်ႈပတ်းပိုၼ်ႉ (ABSDF) ၶဝ် ႁၢင်ႈႁႅၼ်းသိုၵ်းတူဝ်ႈတၼ်း ပိူဝ်ႈတႃႇႁပ်ႉတိုၵ်း ၶိုၼ်း။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်းၼႂ်းသိုၵ်းၶၢင် (KIA) ၵေႃႉၼိုင်ႈလၢတ်ႈဝႃႈ- ယွၼ်ႉသိုၵ်းမၢၼ်ႈ ၶိုၼ်ႈမႃးၸမ်ငဝ်ႈငုၼ်း လၢႆႇၸႃႇတိၵ်းတိၵ်းသေ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။ ပဵၼ်ပၢင်တိုၵ်းၵၼ် ပွတ်းၼမ်ႉမူးလႄးၶျွင်း၊ ႁိမ်းႁွမ်းဝၢၼ်ႈမေႃႇ၊ ဝၢၼ်ႈသၢႆးၸိူဝ်းၼႆႉ။ သိုၵ်းမၢၼ်ႈလဵၼ်ႈလွၵ်းသိုၵ်းၶဝ် မိူၼ်ၼင်ႇ ဢဝ်ငႃးသိုၵ်းႁၢႆတူဝ်မူၵ်းထိူၼ်ႇၼိုင်ႈၵမ်း၊ ဢွၵ်ႇမႃးပဵၼ်ၵမ်း၊ ႁၢႆၵႂႃႇပဵၼ်ၵမ်း၊ တီႈတႄႉ မၼ်းၶဝ်ဢမ်ႇထွၼ် ပွၵ်ႈမိူဝ်း။ ၵွပ်ႈၼၼ် ယူႇတီႈၾၢႆႇတပ်ႉသိုၵ်းလုၵ်ႈႁဵၼ်းၵေႃႈ လႆႈႁၢင်ႈႁႅၼ်းသိုၵ်း တူဝ်ႈတၼ်းဝႆႉ။ မိူဝ်ႈဝႃးၼႆႉ (ဝၼ်းထိ 4) တီႈပွတ်းၾၢႆႇႁွင်ႇဝၢၼ်ႈဝဵင်းပၢင်ဝႃႈ ႁိမ်းလႅၼ်လိၼ်ၶႄႇ သဝ်လၵ်းမၢႆ 5-6-7 ၸိူဝ်းၼႆႉ  သိုၵ်းၶၢင် (KIA) တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ်တင်းဝၼ်း- ဝႃႈၼႆ။

ၼႂ်းပၢင်တိုၵ်းၼၼ်ႉ သိုၵ်းမၢၼ်ႈၸႂ်ႉႁိူဝ်းဝိၼ်ႁႄႊလီႊၶွပ်ႊတိူဝ်ႊယိုဝ်းလႄႈ ၾၢႆႇသိုၵ်းၶၢင် (KIA) တူၵ်းသုမ်းၵေႃႉၼိုင်ႈ၊ ဝၢတ်ႇၸဵပ်း 10 ၵေႃႉ၊ တႃႇ 3 ၵေႃႉဝၢတ်ႇၸဵပ်းလိူဝ်ႁႅင်း။ ယွၼ်ႉပိူဝ်ႈဝဵင်းပၢင်ဝႃႈ ပဵၼ်ဝဵင်းၶွင်သၶူင်ႇတဵင်ႇယဵင်းလႄႈ သၶူင်ႇတဵင်ႇယဵင်း ၵူဝ်တိူဝ်ႉသူၼ်ယႃႈမၼ်းသေ မၼ်းၵေႃႈႁွင်ႉ တပ်ႉ တိူင်းသိုၵ်းပွတ်းႁွင်ႇ (မပၶ)ၶိုၼ်ႈတိုၵ်း။ တႄႇပဵၼ် ပၢင်တိုၵ်း ယၢမ်း 6 မူင်းၵၢင်ၼႂ်တေႃႇထိုင် ၵၢင်ၶမ်ႈ။ ဢၼ်ပဵၼ်ပၢင်တိုၵ်းၵၼ်ၼႆႉ ၾၢႆႇသိုၵ်းမၢၼ်ႈ ပဵၼ်တပ်ႉၶလယ 74, 77, 260 ၸိူဝ်းၼႆႉ၊ တေႃႇထိုင်မိူဝ်ႈဝႃး ๖(04/12/12) ၵၢင်ၼႂ်ၼႆႉၵေႃႈ ယင်းတိုၵ်ႉငိၼ်းသဵင်ၵွင်ႈၵၢင်ႇ၊ သဵင်ႁိူဝ်းဝိၼ်ပၼ်ႇ လဵပ်ႈၵႂႃႇလဵပ်ႈမႃးယူႇ- ဝႃႈၼႆ။

သိုပ်ႇလၢတ်ႈဝႃႈ- မိူဝ်ႈလဵဝ်သိုၵ်းမၢၼ်ႈ တူင်ႉၼိုင်ၶိုၼ်ႈၸမ်ႁိမ်းဝဵင်းလၢႆႇၸႃႇလိူဝ်ႁႅင်း၊ မိူဝ်ႈသိုၼ်း ၼၼ်ႉ သိုၵ်းမၢၼ်ႈယင်း ယူႇၼိူဝ်တၢင်းၵႃး တူင်ႈၽူင်းယၢၼ်ႇ-ဝၢၼ်ႈမၢၼ်ႈမေႃႇသေ ဢဝ်ၶိူင်ႈ ၵွင်ႈလူင် 81mm ယိုဝ်းသႂ်ႇဝဵင်းလၢႆႇၸႃႇ 15 လုၵ်ႈ လူးၵွၼ်ႇ။ မၢၵ်ႇလူင် 15 လုၵ်ႈၼၼ်ႉ သိုၵ်းမၢၼ်ႈ ၸၢင်ႈယိုဝ်းလွၵ်ႇၵူၺ်း၊ ၵွပ်ႈဝႃႈဢမ်ႇတူၵ်းသႂ်ႇၼႂ်းဝဵင်းလၢႆႇၸႃႇ၊ တူၵ်းသႂ်ႇႁိမ်းထိူၼ်ႇတီႈ ဢၼ်ၵူၼ်း ဢမ်ႇယူႇၸိူဝ်းၼႆႉ။ တူၺ်းၵၢၼ် တူင်ႉၼိုင်တၢင်းသွင်ၾၢႆႇၼႆႉ လႅပ်ႈပၢင်တိုၵ်းတေၵိူတ်ႇၶိုၼ်ႈႁၢဝ်ႈ ႁႅင်းထႅင်ႈ- ဝႃႈၼႆ။

ယၢမ်းလဵဝ် ပဵၼ်ပၢင်တိုၵ်းဝူင်ႈၵၢင်သိုၵ်းမၢၼ်ႈ တင်းသိုၵ်းၶၢင်ၼႂ်းၸႄႈဝဵင်းဝဵင်းမွၵ်ႇ၊ ပၢင်ဝႃႈၸိူဝ်းၼႆႉ ၵူၺ်းပႆႇပေႃး၊ ၼႂ်းၸိုင်ႈ တႆးပွတ်းႁွင်ႇၵေႃႈ ပွတ်းမိူင်းၵူဝ်းၸိူဝ်းၼႆႉ ပဵၼ်ပၢင်တိုၵ်းၵၼ်ယူႇၶိူဝ်းယႂ်း- ၼႆယဝ်ႉ။