ဝၼ်းၶွပ်ႈႁွပ်ႈဝၼ်းၵိူတ်ႇ ၸဝ်ႈမုၼ်ယႂ်ႇၶုၼ်ႁေႃၶမ်းမိူင်းထႆး 85 ဝႃႇသႃ ဢၼ်ပီႈၼွင်ႉၵူၼ်းထႆး ၸတ်းတင်းမိူင်းပတ်း ပိုၼ်ႉၼႆႉ ပီႈၼွင်ႉတႆးၸိူဝ်းတူၵ်းႁွတ်ႈမိူင်းထႆး ၵဵင်းမႆႇ၊ ၵုင်းထဵပ်ႈ (မိူင်းၵွၵ်ႇ) ၶဝ်ႈႁူမ်ႈယွၼ်းပွၼ်းတင်းၼမ်၊ ယွၼ်းပွၼ်းႁႂ်ႈၸဝ်ႈမုၼ်ယႂ်ႇႁေႃၶမ်းထႆး ဢႃႇယုယိုၼ်း ယၢဝ်းၶၢဝ်းႁိုင်။

ဝၼ်းထိ 05/12/12 ဢိင်ၼိူဝ်ပဵၼ်ဝၼ်းယႂ်ႇလူင်ႁူင်ႁၢင်း ၼႂ်းၸိုင်ႈထႆး၊ ၸဝ်ႈႁေႃၶမ်းထႆး ဢႃႇယုၶွပ်ႈ ႁွပ်ႈ 85 ဝႃႇသႃသေ ပီႈၼွင်ႉထႆးတင်းမိူင်းပတ်းပိုၼ်ႉ ၵူႈၸႄႈဝဵင်း၊ ၵူႈၸႄႈတွၼ်ႈ ႁဵတ်းပၢင်ပွႆးၶုၵ်း ထူပ်းယွင်ႈယေႃး ၵုၼ်းမုၼ်ၵူႈတီႈၵူႈလႅၼ်။  ယွၼ်းပွၼ်းႁႂ်ႈမၼ်းၸဝ်ႈဢႃႇယုယိုၼ်းယၢဝ်း၊ ႁႂ်ႈပဵၼ်တီႈပိုင်ႈဢိင် ၶႂၼ်ၸႂ်ၵူၼ်းမိူင်း ၵႂႃႇထႅင်ႈမိူဝ်းၼႃႈၶၢဝ်းႁိုင်။


ၼႂ်းတိုဝ်ႉတၢင်းၼႆႉ ယူႇတီႈပီႈၼွင်ႉတႆးၸိူဝ်းတူၵ်းႁွတ်ႈမိူင်းထႆးၵေႃႈ မိူၼ်ၼင်ႇၼႂ်း ၵဵင်းမႆႇ၊ ၵုင်းထဵပ်ႈ (မိူင်းၵွၵ်ႇ)ၸိူဝ်းၼႆႉ ၶဝ်ႈႁူမ်ႈယွၼ်းပွၼ်းၸွမ်းပီႈၼွင်ႉၵူၼ်းထႆး ဢၼ်တၢင်းလူင်ပွင်ၸိုင်ႈထႆးၸတ်း ႁဵတ်း တင်းၼမ်။ ၼွၵ်ႈသေၼၼ်ႉ တီႈၼႂ်းၵဵင်းမႆႇ ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ႁပ်ႉပဵၼ်ၸဝ်ႈတႃႇၼလူင်သေ ၸတ်းတီႈဝတ်ႉၻွၼ်းၸၼ်ႇ ဢိူင်ႇတႃႈသႃလႃး။ ဢဝ်တိုဝ်ႉတၢင်းၼႆႉ သေ ၸတ်းပႃးပၢင်ပွႆး ႁပ်ႉတွၼ်ႈပီမႂ်ႇတႆး 2107 ၼီႈၸွမ်း။


တီႈဝတ်ႉၻွၼ်းၸၼ်ႇၼႆႉ ပွတ်းၼႂ် ယၢမ်း 09:00 မူင်း မီးၵၢၼ်သိုပ်ႇၸႃတႃပၼ်ၸဝ်ႈႁေႃၶမ်းထႆး၊ ၼိမၼ်တၼသင်ၶ 9 တူၼ် ႁေႃးမင်ၵလပၼ်။ မီးပီႈၼွင်ႉတႆးၶဝ်ႈႁူမ်ႈၼပ်ႉပၢၵ်ႇ။ ၵၢင်ၶမ်ႈမီးလွင်ႈ မူၼ်ႈသိူဝ်း ၵူၼ်းၼုမ်ႇတႆးၼႂ်းၵဵင်းမႆႇ လႄႈၵူၼ်းၼုမ်ႇလၢႆလၢႆၸုမ်းမူၼ်ႈၸႂ်ပၼ်။ မီးၸၢတ်ႈသႅင်း လႅင်းမႂ်ႇ ပဵင်းလူင် မႃးၵႃႈ/ႁွင်ႉၵႂၢမ်း လဝ်ႇမူၼ်ႈတူၼ်ႈၸႂ်ပၼ်။ ၼွၵ်ႈသေၼၼ်ႉ ၸုမ်းထမ်ႇမၸၵ်ႈၵျႃႇ ဝတ်ႉပႃႇပဝ်ႈၵေႃႈ မႃးၼႄတၢင်းၵႃႈလၢႆးသႅၼ်ႉလၢႆးၸိူင်းတႆးၸိူဝ်းၼႆႉ။ ႁူမ်ႈပီႈၼွင်ႉ ၵူၼ်းၶဝ်ႈႁူမ်ႈပၢင် ပွႆး ဢိၵ်ႇၸဝ်ႈၵႃႉတၢင်းၶၢႆၼပ်ႉႁူဝ်ႁဵင်ၵေႃႉ။


ၾၢႆႇၼိုင်ႈတၢင်းၼိုင်ႈ သမႃးၶူမ်းပၢႆးပၺ်ႇၺႃႇလႄႈၾိင်ႈငႄႈတႆး ၵဵင်းမႆႇ ဢွၼ်ႁူဝ်ပီႈၼွင်ႉတႆး ၸိူဝ်းမႃးယူႇသဝ်းႁဵတ်းၵၢၼ် ၼႂ်းၵဵင်းမႆႇ ၵႂႃႇၶဝ်ႈႁူမ်ႈပၢင်ယိုၼ်ႈယွၼ်းပွၼ်းထိုင်ၸဝ်ႈႁေႃၶမ်း ဢၼ်တၢင်းလူင်ပွင်ၸိုင်ႈထႆး ၸတ်းတီႈလုမ်းႁွင်ႈၵၢၼ် လူင် (သႃလႃးၵၢင်) ၸႄႈတွၼ်ႈၵဵင်းမႆႇ။

ၼွၵ်ႈသေၼၼ်ႉ တီႈၵုင်းထဵပ်ႈ (မိူင်းၵွၵ်ႇ) မီးပီႈၼွင်ႉတႆးဢွၼ်ၵၼ်ၵႂႃႇၶဝ်ႈႁူမ်ႈ ပၢင်ယွၼ်းပွၼ်းတီႈ ၼႃႈ ႁူင်းယႃလူင် သီရီရၢတ်ႉ ဢၼ်ၸဝ်ႈႁေႃၶမ်းထႆးၶဝ်ႈယူႇယူတ်းယႃတူဝ်ဝႆႉ။ မီးၵၢၼ်ၼႄတၢင်း ၵႃႈၼူၵ်ႉၵႃႈတူဝ်း ၼွမ်းတၢၼ်းထိုင်ၸဝ်ႈ ႁေႃၶမ်း။ ၸဝ်ႈၼႃႈတီႈႁူင်းယႃၶဝ်လၢတ်ႈဝႃႈ- ၸဝ်ႈႁေႃ ၶမ်းယူႇၼႂ်းႁွင်ႈသဝ်းသေတူၺ်း တၢင်းၵႃႈ သူၸဝ်ႈပီႈၼွင်ႉတႆး ၽၢၼ်ႇၵွင်ႈထၢႆႇၵမ်းသိုဝ်ႈ (CCTV) ယူႇ- ဝႃႈၼႆ။ ဝၢႆးဝၼ်းမႃး ပီႈၼွင်ႉတႆးလၢႆမူႇလၢႆၸုမ်းၶွၼ်ႈတုမ်ၵၼ်မွၵ်ႈ 500 ၵေႃႉပၢႆ ၵႂႃႇၶဝ်ႈႁူမ်ႈ ပၢင်ယွၼ်းပွၼ်း ဢၼ်တၢင်း လူင်ပွင်ၸိုင်ႈထႆး ၸတ်းတီႈသၼၢမ်လူင်၊ ၵၢင်ၶမ်ႈမႃးသမ်ႉ ၶဝ်ႈႁူမ်ႈ ၸုတ်ႇတဵၼ်း / ႁူမ်ႈႁွင်ႉၵႂၢမ်းယွင်ႈယေႃး / ယွၼ်းပွၼ်းထိုင်ၸဝ်ႈႁေႃၶမ်း၊ ႁႂ်ႈၸဝ်ႈမီးဢႃႇယုယိုၼ်း ယၢဝ်း ပဵၼ်ႁူမ်ႈၽူၺ်းႁူမ်ႈငဝ်းၵူၼ်းၵူႈ ၸၢဝ်းၶိူဝ်း ၼႂ်းမိူင်းၸိုင်ႈထႆးသိုပ်ႇၵႂႃႇ။