ၼမ်ႉၶမ်း ၸတ်းပၢင်သပ်းလႅင်း လွင်ႈပၢင်ၵုမ်ၸၢဝ်း ၶိူဝ်းတႆး တီႈတႃႈၵုင်ႈ။ ၸဝ်ႈၶုၼ်ထုၼ်းဢူးဝႃႈ ၸၢဝ်းၶိူဝ်း မိူၼ်မွၵ်ႇၸိုင်ႈမိူင်းႁူမ်ႈတုမ်၊ ၽႂ်ယႃႉမွၵ်ႇၵေႃႈပဵၼ်ၵူၼ်း ယႃႉၸိုင်ႈမိူင်းႁူမ်ႈတုမ်။

ဝၼ်းထိ 04/12/12 မီးၵၢၼ်ၸတ်းပၢင်သပ်းလႅင်းၼႄၶိုၼ်း လွင်ႈပၢင်ၵုမ်ၸၢဝ်းၶိူဝ်းတႆး ၵေႃႇသၢင်ႈ လွင်ႈယုမ်ႇယမ်ပိူဝ်ႈတႃႇ လွင်ႈငမ်းယဵၼ် တီႈတႃႈၵုင်ႈ ဢၼ်ၸတ်းပူၼ်ႉမႃးမိူဝ်ႈဝၼ်းထိ 26-28/11/12 တီႈၵေႃလိၵ်ႈလၢႆးလႄႈၾိင်ႈငႄႈတႆး တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ မီးၵူၼ်းၵႂႃႇၶဝ်ႈႁူမ်ႈထွမ်ႇငိၼ်းမွၵ်ႈ 100 ၵေႃႉ။

ပၢင်သပ်းလႅင်းၼႆႉ ႁူဝ်ပဝ်ႈၸႄႈဝဵင်းပႃႇတီႇသိူဝ်ၽိူၵ်ႇ (SNDP) ၸၢႆးၸေႃးလႃႉ၊ ႁူဝ်ပဝ်ႈၵေႃလိၵ်ႈ လၢႆးၾိင်ႈငႄႈ ၸၢႆးၵျေႃႇဝိၼ်း ၵေႃႉပိုတ်ႇပၢင်ၵႅဝ်ႈမွၵ်ႇလၢတ်ႈၵႂၢမ်း။ ၼွၵ်ႈသေၼၼ်ႉ တင်ႈတႄႇယၢမ်း 13:00-16:40 မူင်း၊ မီးၽူႈတႅၼ်း 3 ၵေႃႉ (1.ၸၢႆးထုၼ်းလႃႉ သိူဝ်ၽိူၵ်ႇ၊ 2.ၸၢႆးမွၵ်ႇၶမ်း ႁူဝ်သိူဝ်၊ 3.ၸၢႆးမိၼ်ႉတၢၼ်း ၵေႃလိၵ်ႈလၢႆးၾိင်ႈငႄႈ) ၸိူဝ်းၵႂႃႇၶဝ်ႈႁူမ်ႈ ပၢင်ၵုမ်ၸၢဝ်းၶိူဝ်းတႆး တီႈတႃႈၵုင်ႈ မႃး တၢင်ႇလၢတ်ႈၼႄ လွင်ႈပၢင်ၵုမ်။ ၸၢႆးထုၼ်းလႃႉ တၢင်ႇၼႄလွင်ႈပၢင်ၵုမ် ဝၼ်းထိ 26 ။ ထႅင်ႈ 2 ၵေႃႉ တၢင်ႇၼႄလွင်ႈ ဢုပ်ႇဢူဝ်းၼႂ်းပၢင်ၵုမ် 27-28 - ၼႆယဝ်ႉ။

ၵႂၢမ်းလၢတ်ႈၶွင် ၸဝ်ႈၶုၼ်ထုၼ်းဢူး ဝၼ်းထိ 26 ၼၼ်ႉ ပဵၼ်ဢၼ်လီမၢႆလီတွင်း။ မၼ်းၸဝ်ႈ လၢတ်ႈၽႃသႃမၢၼ်ႈဝႃႈ- ၸိုင်ႈမိူင်းႁူမ်ႈတုမ်ၼႆႉ မိူၼ်ၵၼ်တင်းသူၼ်လူင်ဢၼ်မီးမွၵ်ႇသႅၼ်း တင်းၼမ်။ ၸၢဝ်းၶိူဝ်းၸိူဝ်းယူႇၼႂ်းၸိုင်ႈမိူင်းႁူမ်ႈတုမ် ၼႆႉ မၼ်းမိူၼ်မွၵ်ႇၸိုင်ႈမိူင်းႁူမ်ႈတုမ်၊ ႁၢင်ႈလီ ႁင်းၽႂ်ႁင်းမၼ်း။ မိူၼ်ၼင်ႇမွၵ်ႇၵူႇသွႆႈၵေႃႈႁၢင်ႈလီယူႇ၊ မွၵ်ႇၵွၼ်ၵေႃႈႁၢင်ႈ လီႁင်းၵူၺ်းမၼ်း၊ ၸိူဝ်းဢၼ်မႃးယႃႉမွၵ်ႇၸိူဝ်းၼႆႉ ပဵၼ်ၸိူဝ်းဢၼ်မႃးယႃႉၸိုင်ႈမိူင်းႁူမ်ႈတုမ်ယဝ်ႉ- ဝႃႈၼႆ။