မီးၸုမ်းဢမ်ႇႁူႉၸၵ်းၾၢႆႇ ဢဝ်မၢၵ်ႇပွမ်းမိုဝ်းၵႂႃႇထိုမ်ႈသႂ်ႇ လုမ်းၾၢႆႇပႃႇမႆႉ ၼႂ်းၸႄႈဝဵင်းသႅၼ်ဝီ၊ ႁဵတ်းႁႂ်ႈလူတ်ႉၵႃး လမ်းၼိုင်ႈလုၵွႆလႄႈ ၽူႈၵွၼ်းၸႄႈဝဵင်းၾၢႆႇပႃႇမႆႉတိူဝ်ႉ ဝၢတ်ႇၸဵပ်း။

ဝၼ်းထိ 27/12/12 ၵၢင်ၼႂ်ယၢမ်း 02:00 မူင်း၊ မီးၸုမ်းဢမ်ႇႁူႉၸၵ်းၾၢႆႇ ဢဝ်မၢၵ်ႇပွမ်းမိုဝ်းၵႂႃႇထိုမ်ႈ သႂ်ႇလုမ်းၾၢႆႇပႃႇမႆႉ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ (ဢၼ်မီးႁိမ်းလၢၼ်ႇ/ၵဵတ်ႉ ဢေႊသျိူဝ်ႊဝိူဝ်ႊလ်၊  သဵၼ်ႈတၢင်းလုၵ်ႉသႅၼ်ဝီ ၵႂႃႇၸူးၵူတ်ႉၶၢႆ)၊ မၢၵ်ႇတႅၵ်ႇတိူဝ်ႉၺႃး လူတ်ႉၵႃးလုၵွႆ လမ်းၼိုင်ႈ ဢၼ်ၸွတ်ႇဝႆႉ ၼႂ်းဝၢင်းလုမ်းပႃႇမႆႉလႄႈ တိူဝ်ႉၺႃးၽူႈၵွၼ်း ၸႄႈဝဵင်းၾၢႆႇပႃႇမႆႉ ဢူးလႃႉမိၼ်ႉ ဝၢတ်ႇၸဵပ်း။

ၵဵဝ်ႇၵပ်းလွင်ႈၼႆႉ ၵူၼ်းလႃႈသဵဝ်ႈ ႁွတ်ႈသႅၼ်ဝီ ၵေႃႉၼိုင်ႈလၢတ်ႈဝႃႈ- မိူဝ်ႈၼႂ်ၼႆႉ (27/12/12) မွၵ်ႈယၢမ်းၵၢင်ၼႂ် 2 မူင်း၊ မီးၵူၼ်းဢဝ်မၢၵ်ႇပွမ်းမိုဝ်းထိုမ်ႈသႂ်ႇ လုမ်းၾၢႆႇပႃႇမႆႉ တၢင်းဢွၵ်ႇၵႂႃႇၸူးဝဵင်း ၵူတ်ႉၶၢႆလုၵ်ႈၼိုင်ႈ၊ မၢၵ်တႅၵ်ႇသႂ်ႇတီႈလူတ်ႉၵႃး သေ ၽူင်ႉတႅၵ်ႇသႂ်ႇပႃးတီႈလုမ်းၾၢႆႇပႃႇမႆႉလႄႈ ႁဵတ်းႁႂ်ႈၽူႈၵွၼ်းၸႄႈဝဵင်းၾၢႆႇပႃႇမႆႉ ဢူးလႃႉမိၼ်ႉ တိူဝ်ႉဝၢတ်ႇၸဵပ်းသေ လႆႈဢဝ်သူင်ႇႁူင်းယႃလႃႈ သဵဝ်ႈ- ဝႃႈၼႆ။

မၢၵ်ႇတႅၵ်ႇၵမ်းၼႆႉ ၵူၼ်းဝၢၼ်ႈၵူၼ်းဢိူင်ႇၵမ်ႈၼမ်လၢမ်းဝႃႈ ပဵၼ်မၢၵ်ႇသိုၵ်းၶၢင် (KIA) မႃးထိုမ်ႈသႂ်ႇ။ ၵူၺ်းၵႃႈ ၵူၼ်းၼႂ်း ပိုၼ်ႉတီႈၵေႃႉၼိုင်ႈလၢတ်ႈဝႃႈ- မၢၵ်ႇဢၼ်မႃးထိုမ်ႈသႂ်ႇလုမ်းၾၢႆႇပႃႇမႆႉၼႆႉ ဢမ်ႇၸႂ်ႈမၢၵ်ႇဢၼ်ၸႂ်ႉၼႂ်းပၢင်တိုၵ်း၊ ပဵၼ်မၢၵ်ႇ သႅၼ်းဢၼ်ႁဵတ်းဢဝ်ၵူၺ်း၊ ပေႃးဝႃႈပဵၼ်မၢၵ်ႇသိုၵ်း ၶၢင် (KIA) မႃးထိုမ်ႈသႂ်ႇတႄႉ လႅပ်ႈတေႁႅင်းလိူဝ်ၼႆႉယူႇ- ဝႃႈၼႆ။

လုမ်းၾၢႆႇပႃႇမႆႉ ဝဵင်းသႅၼ်ဝီၼႆႉ ၵင်ႈပႅၼ်ႈမုင်းလဵၵ်း၊ မီးၵူၼ်းႁဵတ်းၵၢၼ် ၶႃႈႁၢပ်ႇၵၢၼ်ၶုၼ် 4-5 ၵေႃႉယူႇသဝ်း။ လူတ်ႉၵႃး လမ်းဢၼ်မၢၵ်ႇတႅၵ်ႇသႂ်ႇၼၼ်ႉၵေႃႈ ပဵၼ်ၵႃးၶွင် ဢူးလႃႉမိၼ်ႉ ၵေႃႉတိူဝ်ႉ ဝၢတ်ႇၸဵပ်းၵူၺ်းၼင်ႇၵဝ်ႇ၊ ၵွပ်ႈတီႈၼွၼ်း ဢူးလႃႉမိၼ်ႉ ၼႂ်းလုမ်းၼၼ်ႉၵေႃႈမီးႁိမ်းၼၼ်ႉၵူၺ်း လႄႈ ၸင်ႇတိူဝ်ႉပႃးတူဝ်မၼ်း- လႆႈႁူႉၼင်ႇၼႆ။

လုမ်းၾၢႆႇပႃႇမႆႉ သႅၼ်ဝီၼႆႉ တင်ႈယူႇၼိူဝ်သဵၼ်ႈတၢင်းလူင်ဝဵင်းလိူဝ်ႇ-မူႇၸႄႈ၊ ပေႃးလုၵ်ႉသႅၼ်ဝီ ဢွၵ်ႇၵႂႃႇပဵၼ်တၢင်းၵႂႃႇ ၵူတ်ႉၶၢႆ၊ ယၢၼ်တၢင်းၽႄၵုၼ်လူင်-ႁူဝ်ပၢင်ႇ မွၵ်ႈၶိုင်ႈလၵ်း (4 ၾိူဝ်ႊလွင်ႊ)- ၼႆယဝ်ႉ။