ၽူႈၼမ်းသႅင်ၵႅဝ်ႉ ၸဝ်ႈလွႆမၢဝ်း တင်း ၸဝ်ႈၵၢႆႇၾႃႉ ၵႂႃႇႁူပ်ႉ ၸဝ်ႈပၢင်ႇၾႃႉတီႈငဝ်ႈငုၼ်းဝၢၼ်ႈႁႆး၊ ၵႃရဝၸဝ်ႈသိူဝ်ထႅၼ်ႈ၊ ၵိၼ်ၶဝ်ႈႁူမ်ႈမူႇ၊ သိုပ်ႇၶၢဝ်းတၢင်းၵႂႃႇပွတ်းၵႃလိထႅင်ႈ။

မိူဝ်ႈဝၼ်းထိ 26/12/12 ယၢမ်းဝၢႆးဝၼ်း ၸွမ်သိုၵ်းလွႆမၢဝ်း၊ ၸွမ်သိုၵ်းၵၢႆႇၾႃႉ (သႅင်ၵႅဝ်ႉ) တင်းသိုၵ်း ႁူမ်ႇလူမ်ႈ 8 ၵေႃႉ၊ လူတ်ႉၵႃး 2 လမ်း လုၵ်ႉလႃႈသဵဝ်ႈႁွတ်ႈၽႅဝ် ငဝ်ႈငုၼ်းဝၢၼ်ႈႁႆး ၶွင်ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ။ ႁူပ်ႉထူပ်းၵၼ်တင်းၸဝ်ႈပၢင်ႇၾႃႉသေ ၶဝ်ႈႁူပ်ႉၵႃရဝ ၽူႈၼမ်းၼႃႈ SSPP/SSA ၸဝ်ႈသိူဝ်ထႅၼ်ႈ- ၼႆယဝ်ႉ။

ဝၼ်းၼၼ်ႉၵၢင်ၶမ်ႈ ၸဝ်ႈသိူဝ်ထႅၼ်ႈ တင်းၸဝ်ႈပၢင်ၾႃႉ ႁပ်ႉပဵၼ်ၸဝ်ႈႁိူၼ်းသေ မီးၵၢၼ်လဵင်ႉလူ ၵိၼ်ၶဝ်ႈ ႁူမ်ႈမူႇၵၼ်၊ လိုဝ်ႈၼွၼ်းႁႅမ်းတီႈဝၢၼ်ႈႁႆးၶိုၼ်းၼိုင်ႈသေ ၽူႈၼမ်းသႅင်ၵႅဝ်ႉသွင်ၸဝ်ႈ သိုပ်ႇၶၢဝ်းတၢင်းၵႂႃႇတၢင်း တပ်ႉၸုမ်း 7 ပွတ်းၵႃလိ- ၵုၼ်ႁဵင်- ၼႆယဝ်ႉ။

မိူဝ်ႈၸဝ်ႈလွႆမၢဝ်း တင်း ၸဝ်ႈၵၢႆႇၾႃႉ ႁွတ်ႈၽႅဝ်တီႈငဝ်ႈငုၼ်းဝၢၼ်ႈႁႆးၼၼ်ႉ မီးၸဝ်ႈၼႃႈတီႈၸၼ်ႉ သုင်ၼႂ်း SSPP/SSA ၸိူဝ်းမႃးႁူမ်ႈႁပ်ႉတွၼ်ႈ ၸဝ်ႈသိုၵ်းလူင်ၶိူဝ်းတႆး (ၵႅမ်ႁူဝ်ပဝ်ႈ)၊ ၸဝ်ႈသိုၵ်းလူင် ၶုၼ်သႅင် (ၽူႈၼမ်းၼႂ်း)၊ ၸဝ်ႈသိုၵ်းလူင်သိူဝ် ဢွၼ်ႇ၊ ၸဝ်ႈသိုၵ်းလူင်သၢႆမိူင်း၊ ၸဝ်ႈသိုၵ်းလူင် သႅင်မိူင်း (ၼႂ်းၸုမ်းၽူႈၵိူဝ်းၵုမ်)- ၸိူဝ်းၼႆႉ။

ၸၼ်ႉၽူႈၼမ်း (SSPP/SSA)ၼႆႉ မိူဝ်ႈပၢင်ၵုမ်တႆးတီႈတႃႈၵုင်ႈၵေႃႈ လႆႈႁူပ်ႉထူပ်းဢုပ်ႇဢူဝ်းၵၼ် ယဝ်ႉၵမ်းၼိုင်ႈ။ ဢၼ်ႁူပ်ႉၵၼ်ထႅင်ႈၵမ်းၼႆႉ ၵမ်ႈၽွင်ႈထတ်းသၢင်ဝႃႈ- 1.မိူဝ်ႈလဵဝ်ဢိင်ၼိူဝ်ၸဝ်ႈ ၶုၼ်ထုၼ်းဢူး မီးၽႅၼ်ၵၢၼ်ပိူဝ်ႈတႃႇ ႁႂ်ႈၸုမ်းတႆးႁူပ်ႉၵၼ်ထႅင်ႈၵမ်းၼိုင်ႈ၊ 2.ပိူဝ်ႈတႃႇၸတ်းႁႅၼ်း ပၢင်ၵုမ်ၸႄႈမိူင်းတႆး ထႅင်ႈၵမ်းၼိုင်ႈသေ ၸၢင်ႈႁူပ်ႉဢုပ်ႇၵဵဝ်ႇ ၶွင်ႈၸွမ်းလွင်ႈၸိူဝ်းၼႆႉၵေႃႈပဵၼ်လႆႈ- ဝႃႈၼႆ။