ၸၢႆးၼေႃႇၶမ်း ၵေႃႉထုၵ်ႇမၢပ်ႇၽၢမ်းဝႃႈ ၵဵဝ်ႇၶွင်ႈၵၢၼ်ၶႃႈ ႁႅမ်ၵူၼ်းၸွမ်းႁိူဝ်းၶႄႇ 13 ၵေႃႉ ၼႂ်းမႄႈ ၼမ်ႉၶွင်ပူၼ်ႉမႃး လႄႈ ထုၵ်ႇသၢလ် (လုမ်းတြႃး) ၸၼ်ႉငဝ်ႈတႅပ်းတတ်း ပူင်တူတ်ႈတၢမ်ႇတၢႆၼၼ်ႉ ယိုၼ်ႈယွၼ်းတီႈလုမ်းတြႃး ၸၼ်ႉသုင်ထႅင်ႈၵေႃႈ ပၢၵ်ႈပႅတ်ႈထႅင်ႈ။

ဝၼ်းထိ 26/12/12 ထုၵ်ႇသၢလ်(လုမ်းတြႃး)ၸၼ်ႉသုင် ၸႄႈမိူင်းယုၼ်ၼၼ် ၸိုင်ႈမိူင်းၶႄႇ၊ ပၢၵ်ႈပႅတ်ႈၶေႃႈယိုၼ်းယွၼ်း ၵႄႈၵၢဝ်ႇတူတ်ႈ ပိူဝ်ႈတႃႇပူၼ်ႉလွတ်ႈတၢင်းၽိတ်း ၶွင်ၸၢႆးၼေႃႇၶမ်း။ ယွၼ်ႉထုၵ်ႇမၢပ်ႇၽၢမ်း ၸိၼႄးဝႃႈ ၵဵဝ်ႇၶွင်ႈၵၢၼ် ၶႃႈႁႅမ်ၵူၼ်းၼိူဝ်ႁိူဝ်းၵၢၼ်ၵႃႉ 2 လမ်း ၼႂ်းမႄႈ ၼမ်ႉၶွင် မိူဝ်ႈဝၼ်းထိ 05/10/2011 ပူၼ်ႉမႃး။ သၢလ် (လုမ်းတြႃး) ၸၼ်ႉသုင်ၸႄႈမိူင်းယုၼ် ၼၼ်ၼႆႉ ၶိုၼ်းတႅပ်းတတ်းပူင်ပၼ်တူတ်ႈတၢမ်ႇတၢႆ ၸွမ်းၼင်ႇ သၢလ် (လုမ်းတြႃး) ၸဝ်ႈငဝ်ႈ ၶုၼ်းမိင် တႅပ်းတတ်းဝႆႉဢွၼ်ၼႃႈၼႆႉ မိူဝ်ႈလိူၼ်ပူၼ်ႉ။

ၵဵဝ်ႇၵပ်းလွင်ႈၼႆႉ သိုဝ်ႇၶႄႇ သျိၼ်းႁႂႃ ယၢမ်ႈဢွၵ်ႇၶၢဝ်ႇဝႃႈ- မိူဝ်ႈဝၼ်းထိ 06/11/12 ယၢမ်းဝၢႆးဝၼ်း သၢလ် (လုမ်းတြႃး)ၶႄႇၸၼ်ႉငဝ်ႈ ဝဵင်းၶုၼ်းမိင် ၸႄႈမိူင်းယုၼ်ၼၢၼ်၊ တတ်းသိၼ်ဝႃႈ ၸုမ်းၸိူဝ်း ၸၢႆးၼေႃႇၶမ်း မီးတၢင်းၽိတ်းၵဵဝ်ႇၵပ်း တင်ႈၸႂ်ၶႃႈႁႅမ်ၵူၼ်း၊ ၵႃႉယႃႈမဝ်းၵမ်၊ တိၵူၼ်း၊ ၸူၼ်ႁိူဝ်းၶႄႇ ၸိူဝ်းၼႆႉတႄႉ-ၼႆသေ ပူင်တူတ်ႈ တၢမ်ႇတၢႆ တီႈၸၢႆးၼေႃႇၶမ်း တင်းၸုမ်းၸိူဝ်း 1.သၢင်ႇၶမ်း (ၵႅမ်ထိ 1)၊ 2.ယီႈလၢႆႈ (ၵႅမ်ထိ 2)၊ 3.ၵျသိုဝ်းၵႃး ႁူမ်ႈတင်းမူတ်း 4 ၵေႃႉ။ ၼွၵ်ႈသေၼၼ်ႉ ၵျပူဝ်း ၵေႃႈ ၺႃးတူတ်ႈတၢမ်ႇတၢႆၼင်ႇၵဝ်ႇ၊ ၵူၺ်းၵႃႈ ၵိုတ်းပႂ်ႉႁပ်ႉတူတ်ႈ ထႅင်ႈ 2 ပီ ၊ ၵျပူဝ်း သမ်ႉၺႃးၶွၵ်ႈ 8 ပီ။

ၵပ်းၵၢႆႇလွင်ႈၶဝ်တင်း 6 ၵေႃႉ ၺႃးတူတ်ႈတၢမ်ႇၼႆႉသေ ၸင်ႇမီးၵၢၼ်ယိုၼ်ႈယွၼ်းၵႄႈၶေႃႈၵၢဝ်ႇ တူတ်ႈ တီႈသၢလ်(လုမ်းတြႃး) ၸၼ်ႉသုင် တီႈယုၼ်ၼၼ်ၼႆႉထႅင်ႈ၊  ၼင်ႇႁိုဝ်တေမီးၵၢၼ်လူတ်း ယွၼ်ႇပူတ်းပွႆႇပၼ်၊ ၵူၺ်းၵႃႈ လႆႈထုၵ်ႇပၢၵ်ႈ ပႅတ်ႈ၊ ၶိုၼ်းဢဝ်ၸွမ်းၶေႃပူင်လုမ်းတြႃးၸၼ်ႉငဝ်ႈ။ ၵဵဝ်ႇလူၺ်ႈလွင်ႈၼႆႉ ၼင်ႇႁိုဝ်တေမီးၵၢၼ်လူတ်းယွၼ်ႇပူတ်းပွႆႇတူတ်ႈပၼ်ၼၼ်ႉ တေသိုပ်ႇတၢင်ႇ ယိုၼ်ႈယွၼ်းၵႄႈၶေႃႈၵၢဝ်ႇတူတ်ႈထႅင်ႈ တီႈသၢလ် (လုမ်းတြႃး)သုင်သုတ်း ဝဵင်းလူင်ပိူၺ်ႇၵျိင်း၊ ပေႃးဝႃႈထုၵ်ႇႁပ်ႉႁွင်း/မၵ်းမၼ်ႈ ပၼ်ထႅင်ႈၼႆၵေႃႈ တၵ်းဢမ်ႇပူၼ်ႉ တူတ်ႈတၢမ်ႇတၢႆတႄႉယဝ်ႉ- ဝႃႈၼႆ။

ၼႂ်းၶဝ် 6 ၵေႃႉၼၼ်ႉ လိူဝ်သေ ၸၢႆးၼေႃႇၶမ်း မီးပႃးၸၢႆးသၢင်ႇၶမ်း၊ ၸၢႆးယီႈလၢႆႈ၊ ၸၢႆးဢွင်ႇမျၢတ်ႈ၊ ၸၢႆးထုၼ်းၵလႃး ၸိူဝ်းၼႆႉ (ၸၢႆးဢွင်ႇမျၢတ်ႈၼႆႉ ၸတ်းၵႂႃႇပဵၼ် ၽယၢၼ်း (သၢၵ်ႈသေႇ) ၽူႈႁူႉႁၼ် ၸွမ်းၾၢႆႇလူင်ပွင်ၸိုင်ႈ။