ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ဢွၵ်ႇၽိုၼ်ႁၢႆးငၢၼ်းဝႃႈ ဝၢႆးမီးလွင်ႈၵိုတ်းယိုဝ်းၵၼ်မႃးၶၢဝ်းတၢင်း 1 ပီၼႆႉ ၵူၼ်းမိူင်း ယင်းပႆႇလႆႈၵတ်းယဵၼ်။ လွင်ႈၶႃႈႁႅမ်တၢႆၵူၼ်းလူတ်းယွမ်းလူင်းၵေႃႈ လွင်ႈပူၼ်ႉ ပႅၼ်သုၼ်ႇလႆႈၵူၼ်းတၢင်ႇၸိူဝ်ႉ တၢင်ႇပိူင် ယင်းတိုၵ်ႉမီးယူႇ။

ၽိုၼ်ႁၢႆးငၢၼ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) လိူၼ်ၼူဝ်ႊဝႅမ်ႊၿိူဝ်ႊ (2012)ပိုတ်ႇလၢတ်ႈ ဝႃႈ- မိူဝ်ႈလဵဝ် ၼႂ်းၶၢဝ်းတၢင်းၸူဝ်ႈမီးၵၢၼ်ၵိုတ်းယိုဝ်း (ဝူင်ႈၵၢင်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်း လူင်ပွင်ၸိုင်ႈ တဵင်းၸဵင်ႇ၊ ၸုမ်းၶပ်း ၶိုင်လွင်ႈငမ်းယဵၼ်)မႃးၼႆႉ လွင်ႈတပ်ႉသိုၵ်းမၢၼ်ႈ ၵၼ်ႉၸၼ်လူ လၢႆၼၢင်းယိင်း၊ ယိုဝ်းၵူၼ်းဝၢၼ်ႈ၊ လွင်ႈၶႃႈႁႅမ်တၢႆၵူၼ်း ၸိူဝ်းၼႆႉ လႆႈဝႃႈလူတ်းယွမ်းမႃး။ ၵူၺ်းၵႃႈ တၢင်ႇၸိူဝ်ႉတၢင်ႇပိူင် မိူၼ်ၼင်ႇလွင်ႈတိၺွပ်းၵူၼ်းဝၢၼ်ႈၵူၼ်းမိူင်းသေ ပေႃႉထုပ်ႉ၊ ၶႃတူဝ်ၶႃၸႂ်၊ လွင်ႈၵုမ်းၶင်၊ ႁုပ်ႈယိုတ်း ဢဝ်ၶူဝ်းၶွင်၊ တဵၵ်းၸႂ်ႉႁႅင်းၵၢၼ်ၸိူဝ်းၼႆႉ ယင်းပႆႇလူတ်းယွမ်းလူင်း။ မၢင်ပိုၼ်ႉတီႈ လွင်ႈပူၼ်ႉပႅၼ် သုၼ်ႇလႆႈၵူၼ်းတိူဝ်းမႃးလိူဝ်ၵဝ်ႇ၊ ၵႃႈပူၼ်ႉမႃး သိုၵ်းမၢၼ်ႈၵႆႉဢဝ်ၵွင်ႈ ယိုဝ်း၊ မိူဝ်ႈလဵဝ်သမ်ႉ ၵႆႉဢဝ်တႃမိုဝ်း ထုပ်ႉ၊ ဢမ်ႇၼၼ် ဢဝ်ၶွၼ်ႉထုပ်ႉ ဢဝ်တိၼ်ပိတ်ႉၸိူဝ်းၼႆႉ- ၼႆယဝ်ႉ။

ၼႂ်းၽိုၼ်ႁၢႆးငၢၼ်းလၢတ်ႈဝႃႈ- ၵၢၼ်ပေႃႉထုပ်ႉႁႅမ်ၵူၼ်း ပူၼ်ႉပႅၼ်သုၼ်ႇလႆႈၵူၼ်းၸိူဝ်းၼႆႉ ၵမ်ႈၼမ် ၵိူတ်ႇၶိုၼ်ႈၼႂ်း 5 ၸႄႈဝဵင်း မိူၼ်ၼ်င်ႇၸႄႈဝဵင်းၵုၼ်ႁဵင်၊ မိူင်းတူၼ်၊ လၢႆးၶႃႈ၊ မိူင်းၵိုင်၊ မိူင်းၼၢႆး ၼႂ်းပိုၼ်ႉတီႈၼႃႈလိၼ် ဢၼ်တပ်ႉသိုၵ်း ၸိုင်ႈတႆး (RCSS/SSA) တူင်ႉၼိုင်။

သပ်းလႅင်းၼႄ လွင်ႈမီးၵၢၼ်ပူၼ်ႉပႅၼ်သုၼ်ႇလႆႈၵူၼ်းဝႃႈ- ပဵၵ်ႉသမ်ႉဝႃႈ တပ်ႉသိုၵ်းၸိုင်ႈတႆး (RCSS/SSA) တင်းလူင် ပွင်ၸိုင်ႈ လႆႈၸႂ်တူၵ်းလူင်းၵိုတ်းယိုဝ်းၵၼ် ၸဵမ်မိူဝ်ႈဝၼ်းထိ 02/12/11 မႃးသေတႃႉၵေႃႈ လွင်ႈတပ်ႉသိုၵ်းမၢၼ်ႈယူႇယူႇ ပူၼ်ႉပႅၼ်ၶေႃႈလႆႈၸႂ်သေ ၵႂႃႇယိုဝ်း SSA ယင်း မီးယူႇ၊ ပေႃးသွင်ၾၢႆႇ ပဵၼ်ပၢင်တိုၵ်းၵၼ်ၵေႃႈႁဵတ်းႁႂ်ႈတုမ်ႉတိူဝ်ႉၵူၼ်းမိူင်း။ မိူၼ်ၼင်ႇမိူဝ်ႈလိူၼ် ၾႅပ်ႊၿိဝ်ႊရီႊ (2012) တပ်ႉမၢၼ်ႈၵႂႃႇယိုဝ်းပၢင်သဝ်း SSA တီႈမိူင်းပူးလူင် ၼႂ်းၸႄႈဝဵင်းမိူင်းပဵင်း၊ ပေႃးတပ်ႉ SSA ၶိုၼ်းယိုဝ်းသေ ထွၼ်ၵႂႃႇၵေႃႈ သိုၵ်းမၢၼ်ႈတၢႆ 3 ၵေႃႉ၊ ၵေႃႈၼိုင်ႈပဵၼ်ၸၼ်ႉႁူဝ်သိုၵ်း လူင် (3 မႆ)။ လွင်ႈၼႆႉ သိုၵ်းမၢၼ်ႈၸႂ်လမ်သေဢဝ်မၢၵ်ႇ M60 ပွႆႇသႂ်ႇၼႂ်းဝၢၼ်ႈဝဵင်းႁွင်ႇ ဢၼ်မီးႁိမ်း ပၢင်တိုၵ်းၼၼ်ႉ တႃႇ 6 လုၵ်ႈ၊ သိုၵ်းမၢၼ်ႈ ၸိၼႄးဝႃႈ ၵူၼ်းဝၢၼ်ႈၵူၼ်းမိူင်းၸိူဝ်းၼႆႉ ၸွႆႈထႅမ်ၶဝ်ႈ ၼမ်ႉတၢင်းၵိၼ်သိုၵ်းတႆး။ ယွၼ်ႉသိုၵ်း မၢၼ်ႈပွႆႇမၢၵ်ႇလူင်ၼႆႉသေ ႁိူၼ်းၵူၼ်းလုလႅဝ်ၽွင်ႈ၊ ၵမ်ႈၽွင်ႈတိူဝ်ႉဝၢတ်ႇၸဵပ်း၊ ၼႂ်းၵူၼ်းတိူဝ်ႉဝၢတ်ႇ ၸဵပ်းၼၼ်ႉ ပႃးတင်းလုၵ်ႈဢွၼ်ႇၵေႃႉၼိုင်ႈ- ၼႆယဝ်ႉ။

ၵဵဝ်ႇၵပ်းပၢင်တိုၵ်းၼႆႉ ၶၢဝ်ႇပၢင်လူင်ယၢမ်ႈဢွၵ်ႇဝႃႈ- ၶၢဝ်ႇဢမ်ႇယိုၼ်ယၼ်လၢတ်ႈဝႃႈ- ပဵၼ်တိုၵ်းပွၵ်ႈ ၵမ်းၼႆႉ သိုၵ်းမၢၼ်ႈ 3-4 တပ်ႉၵွင်ႁူမ်ႈႁႅင်းၵၼ် ၵႂႃႇယိုဝ်းတပ်ႉသိုၵ်းတႆးၼႂ်းဢိူင်ႇမိူင်းပူးလူင် ၸႄႈဝဵင်းမိူင်းပဵင်း၊ သိုၵ်းမၢၼ်ႈဢဝ်မေႃႇထႃႇ M60 ယိုဝ်းသႂ်ႇတပ်ႉသိုၵ်းတႆးလၢႆလုၵ်ႈ။ တင်းသွင်ၾၢႆႇ မီးလွင်ႈလုသုမ်းၼင်ႇၵၼ်။ လႆႈႁူႉဝႃႈၾၢႆႇသိုၵ်းမၢၼ်ႈဝၢတ်ႇၸဵပ်းႁၢဝ်ႈႁႅင်း 3 ၵေႃႉ၊ ၾၢႆႇသိုၵ်းတႆးတႄႉ လႆႈငိၼ်းဝႃႈသုမ်းၵွင်ႈလဝ်းၼိုင်ႈ။ ပၢင်တိုၵ်းပဵၼ်မိူဝ်ႈဝၼ်းထိ 06/02/12 ။

ၵပ်းၵၢႆႇလွင်ႈၼႆႉ ထိုင်မႃးဝၼ်းထိ 09/02/12 ၸဝ်ႈသိုၵ်းလူင်ဢွင်ႇမွင်း တူဝ်တႅၼ်း RCSS/SSA ၽူႈၵွၼ်းလုမ်းၵပ်းသၢၼ် တီႈၵဵင်းတုင် ၵႂႃႇတီႈလုမ်းၵွၼ်းတိူင်းသိုၵ်းသၢမ်ၸဵင်ႇ(ၵဵင်းတုင်)၊ ၵႂႃႇႁူပ်ႉ ဢုပ်ႇၸဝ်ႈၼႃႈတီႈၵျီႊဝၼ်ႊ (G1) ၸဝ်ႈသိုၵ်း လူင်ၶိၼ်ႇမွင်ႇထူၺ်း သေတွင်ႈထၢမ်ၵွပ်ႈသင်လႆႈ ပဵၼ်ပၢင်တိုၵ်း။ ၶိၼ်ႇမွင်ႇထူၺ်း တွပ်ႇဝႃႈ- လွင်ႈၼႆႉ သိုၵ်းမၢၼ်ႈၵႂႃႇ ၸွပ်ႇသွၵ်ႈၵူတ်ႇထတ်းပိုၼ်ႉ တီႈၼႃႈလိၼ်လႄႈ သွင်ၾၢႆႇၽႃႇၺႃးၵၼ်သေ လႆႈပဵၼ်ပၢင်တိုၵ်းၵၼ်ၵူၺ်း၊ ဢမ်ႇဝူၼ်ႉဝႃႈ တေပဵၼ် ပၢင်တိုၵ်းၵၼ်၊ ၵွပ်ႈၼႆ တႄႇဢဝ်ၼႆႉၵႂႃႇသိုၵ်းမၢၼ်ႈ တေဢမ်ႇၵႂႃႇတူင်ႉၼိုင်ၸွပ်ႇသွၵ်ႈၵူတ်ႇထတ်း ၼႃႈလိၼ် ပွတ်းၼၼ်ႉထႅင်ႈ- ဝႃႈၼႆ။

ယွၼ်ႉၼႂ်းၸိုင်ႈတႆး တိုၵ်ႉမီးၵၢၼ်ပူၼ်ႉပႅၼ်သုၼ်ႇလႆႈၵူၼ်း၊ လွင်ႈယိုတ်းတီႈလိၼ်ၸိူဝ်းၼႆႉယူႇလႄႈ ႁဵတ်းႁႂ်ႈမီးၵူၼ်းမိူင်း တႆးပၢႆႈၽေးၶဝ်ႈမိူင်းထႆးတင်းၼမ်။  ၸွမ်းၼင်ႇၾၢႆႇၸွႆႈထႅမ်ၵူၼ်းပၢႆႈၽေးၸွမ်း လႅၼ်လိၼ် ၵဵင်းမႆႇ ႁဵတ်းဝႆႉသၢႆမၢႆမၼ်း ၸွမ်းၵူႈလိူၼ်ၼၼ်ႉ တီႈဢေႇသုတ်း ၵူၼ်းမိူင်းတႆးပၢႆႈၽေး ၽႅဝ်မႃးတၢင်းလႅၼ်လိၼ် မိူင်းထႆး 3 ၸႄႈတွၼ်ႈ ဢၼ်တိတ်း ၵၼ်တင်းမိူင်းတႆး မိူၼ်ၼင်ႇတၢင်း မႄႈႁွင်ႈသွၼ်၊ ၵဵင်းမႆႇ၊ ၵဵင်းႁၢႆးၸိူဝ်းၼႆႉ ၶၢဝ်းတၢင်း 1 လိူၼ်ဢမ်ႇယွမ်း 1,000 ၵေႃႉ။ ယႃႇဝႃႈ ၵူၼ်း ပၢႆႈၽေး ဢိၵ်ႇၵူၼ်းၸိူဝ်းၶဝ်ႈႁဵတ်းၵၢၼ်မိူင်းထႆးတေပွၵ်ႈမိူဝ်းယူႇၶိုၼ်းဝၢၼ်ႈၵဝ်ႇမိူင်းလင်တူဝ်ၵဝ်ႇ၊ ယင်းတိုၵ်ႉ မီးၵူၼ်းပၢႆႈၶဝ်ႈတၢင်းမိူင်းထႆးယူႇ ဢမ်ႇထၢတ်ႇဢမ်ႇဝၢႆး- ၽူႈလဵပ်ႈႁဵၼ်းၶဝ်ၵေႃႈယၢမ်ႈ လၢတ်ႈၼင်ႇၼႆ။