ပူၼ်ႉမႃးမိူဝ်ႈၼႂ်းလိူၼ်ၼူဝ်ႊဝႅမ်ႊၿိူဝ်ႊ (2012) ၼႆႉသိုၵ်း မၢၼ်ႈ ဢွၵ်ႇငႃးသိုၵ်းတူင်ႉၼိုင် ၶိုၼ်ႈယိုဝ်း သိုၵ်းတႆး (SSPP/SSA) လႄႈတပ်ႉပၢင်သဝ်း ၼႂ်းၸိုင်ႈတႆးပွတ်းႁွင်ႇ 10 ပွၵ်ႈပၢႆ။

ၵဵဝ်ႇၵပ်းလွင်ႈၼႆႉ ၸဝ်ႈႁၢၼ်ၸၢႆးလႃႉ ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA)  လၢတ်ႈဝႃႈ- ႁဝ်းၵိုတ်းယိုဝ်းၵၼ်မႃး ၸမ်တေတဵမ်ပီယဝ်ႉ၊ ၵူၺ်းၵႃႈ တပ်ႉသိုၵ်းမၢၼ်ႈ ၼႆႉ ပေႃးဝႃႈငိၼ်းၶၢဝ်ႇ တပ်ႉႁဝ်းယူႇသဝ်းတူင်ႉၼိုင် မီးတီႈလႂ်ၵေႃႈ ႁၢင်ႈသိုၵ်းၶိုၼ်ႈၸူးသေ လႆႈပဵၼ် ပၢင်တိုၵ်းၵၼ်ယူႇတိၵ်းတိၵ်း။ ပိူင်လူင်မၼ်းပဵၼ်ပွတ်းတွၼ်ႈၼႃႈလိၼ် ၾၢႆႇႁွင်ႇတၢင်းၵႃး လႃႈသဵဝ်ႈ-ဝဵင်းလိူဝ်ႇ (မၼ်းတလေး) လႄႈ ၾၢႆႇတူၵ်းတၢင်းၵႃး ပွတ်းသႅၼ်ဝီၸိူဝ်းၼႆႉ။ ၼႂ်းလိူၼ်ၼူဝ်ႊဝႅမ်ႊ ၿိူဝ်ႊ (2012)ၼႆႉၵူၺ်း ယိုဝ်းၵၼ် 10 ပွၵ်ႈပၢႆ- ဝႃႈၼႆ။

သိုပ်ႇလၢတ်ႈဝႃႈ- မိူဝ်ႈဝၼ်းထိ 18/11/12 ယိုဝ်းၵၼ်ပွတ်းတေႃႉသၢင်ႇ၊ ဝၼ်းထိ 24/11/12 ယိုဝ်းၵၼ်ဝူင်ႈၵၢင်မိူင်းလူင် တင်းၵျွၵ်ႉမႄး၊ ယိုဝ်းၵၼ်ႁိုင်ဝႆႉ၊ မီးမၢၼ်ႈမီးႁႅင်းသိုၵ်းမွၵ်ႈ 200-300 ။ ဝၼ်းထိ 28 ယိုဝ်းၵၼ်ႁိမ်းဝၢၼ်ႈၶိူဝ်းၼိမ်း၊ ၼႂ်းၸႄႈဝဵင်းၵျွၵ်ႉမႄး။

ပွတ်းတွၼ်ႈၼႃႈလိၼ်ၼႆႉ သိုၵ်းႁဝ်းမီး 3 တပ်ႉၸုမ်း၊ ၼႂ်း 3 တပ်ႉၸုမ်းၼႆႉ မီးႁႅင်းတိုၵ်း 1,000 ပၢႆ၊ ၵွပ်ႈၼႆ ပေႃးဝႃႈသိုၵ်း မၢၼ်ႈလႆႈၶၢဝ်ႇႁဝ်းသေ မုင်ႈၼႃႈမႃးၸူးႁဝ်းတိၵ်းတိၵ်းၵေႃႈ ႁဝ်းၵႃႈလႆႈယိုဝ်း။ ၵမ်ႈၼမ် ပေႃးတူၺ်းၼႂ်းပၢင်တိုၵ်း ၵွပ်ႈသိုၵ်း မၢၼ်ႈပဵၼ်ၾၢႆႇၶိုၼ်ႈၸူးလႄႈ ႁဝ်းယူႇၾၢႆႇၶႅၼ်းၸႂ်/ပေႉ ပုၼ်ႈယူႇ၊ ဢၼ်တၢႆၵေႃႈသိုၵ်းမၢၼ်ႈတိူဝ်ႉဝၢတ်ႇတၢႆၼမ်၊ ၾၢႆႇႁဝ်းၵေႃႈ မီးလွင်ႈလုသုမ်းၽွင်ႈယူႇ- ဝႃႈၼႆ။

သိုပ်ႇလၢတ်ႈဝႃႈ- လွင်ႈငမ်းယဵၼ်ၼႆႉ ၶႂ်ႈပွင်ႇဝႃႈၸိူင်ႉႁိုဝ်ၵေႃႈဢမ်ႇႁူႉ၊ မိူဝ်ႈႁဝ်းလႆႈၸႂ်တူၵ်းလူင်းၵၼ် တႄႉဝႃႈ ႁဝ်းၽႅဝ်တီႈလႂ် ၵေႃႈႁဝ်းယူႇသဝ်းၵႂႃႇၼႂ်းပိုၼ်ႉတီႈတီႈၼၼ်ႈ၊ ႁဝ်းဢမ်ႇသိုပ်ႇယိုဝ်းၵၼ်။ ၵူၺ်းၵႃႈ သမ်ႉဢမ်ႇၸႂ်ႈ ၸိူင်ႉၼၼ်၊ မွင်းသိုၵ်း မၢၼ်ႈငိၼ်းၶၢဝ်ႇႁဝ်းၵူၺ်း ႁၢင်ႈႁႅၼ်းသိုၵ်းၶိုၼ်ႈၸူး တိၵ်းတိၵ်း။ ၼွၵ်ႈသေၼၼ်ႉ သမ်ႉတိမတ်ႉၵူၼ်းဝၢၼ်ႈပေႃႉထုပ်ႉ၊ ထၢမ်ႁႃႈသိုၵ်းတႆး၊ ပေႃးၵူၼ်း ဝၢၼ်ႈဢမ်ႇမွၵ်ႇဢမ်ႇလၢတ်ႈၵေႃႈ သမ်ႉပေႃႉထုပ်ႉႁႅမ်-ဝႃႈၼႆ။

ၸွမ်းၼင်ႇယိုၼ်းၶိုတ်းလႆႈသေ ပၢင်လူင် ဢွၵ်ႇၶၢဝ်ႇၵႂႃႇဢွၼ်ၼႃႈၼႆႉ ဝၼ်းထိ 31/10/12 သိုၵ်းမၢၼ်ႈတပ်ႉ 503 ၸဝ်ႈသိုၵ်း ယႄးၼၢႆႇဢူးဢွၼ်ႁူဝ် ႁႅင်းၵူၼ်း 100 ပၢႆ ၶိုၼ်ႈၸူးတပ်ႉ SSPP/SSA သၢႆသိုၵ်းတပ်ႉၸုမ်း 612 ဢၼ်မီးၾၢႆႇႁွင်ႇၵျွၵ်ႉ လူင်းၵျီး (ၵိင်ႇၸႄႈဝဵင်းမိူင်းမိတ်ႈ)၊ သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း၊ သိုၵ်းမၢၼ်ႈတၢႆ 6 ၵေႃႉ၊ ဝၢတ်ႇၸဵပ်း 5 ၵေႃႉ။

ဝၼ်းထိ 02/11/12 သိုၵ်းမၢၼ်ႈၶိုၼ်ႈၸူးသၢႆသိုၵ်းတပ်ႉၸုမ်းတပ်ႉ 612 ဢၼ်မီးႁိမ်းၵိၼ်ၸိ ၼႂ်းၵိင်ႇၸႄႈဝဵင်းမိူင်းငေႃႉ သေ လႆႈပဵၼ်ပၢင်တိုၵ်းၵၼ်ထႅင်ႈ။ လႆႈႁူႉဝႃႈ ၾၢႆႇတပ်ႉသိုၵ်းမၢၼ်ႈ ၸၼ်ႉၸဝ်ႈႁၢၼ် တိူဝ်ႉဝၢတ်ႇၸဵပ်းမိူဝ်းတၢႆတီႈ ၵျွၵ်ႉမႄးၵေႃႉၼိုင်ႈ။

ဝၼ်းထိ 04/11/12 သိုၵ်းမၢၼ်ႈၶလယ 23 ၸဝ်ႈသိုၵ်းတၢၼ်းထုၼ်းဢွင်ႇဢွၼ်ႁူဝ် ႁႅင်းၵူၼ်း 90 ၶိုၼ်ႈၸူးသၢႆသိုၵ်း တပ်ႉၸုမ်း 612 SSPP/SSA ဢၼ်မီးတီႈ ၵွင်သလၢမ်း (ပၢင်ႇလေႃႉ) ၵိင်ႇၸႄႈ ဝဵင်းမိူင်းငေႃႉ။ လႆႈပဵၼ်ပၢင်တိုၵ်းၵၼ်ထႅင်ႈ။ ၵူၼ်းမိူင်းငေႃႉလၢတ်ႈဝႃႈ သိုၵ်းမၢၼ်ႈႁၢမ်ၵူၼ်းၶဝ်မိူဝ်း တီႈမိူင်းငေႃႉ 4 ႁၢမ်။

ဝၼ်းထိ 09/11/12 တပ်ႉသိုၵ်းမၢၼ်ႈၶိုၼ်ႈၸူးသၢႆသိုၵ်း SSA တီႈဝၢၼ်ႈလွႆလဵၵ်း၊ ဢိူင်ႇမိူင်းၵုင်း ၸႄႈဝဵင်းတေႃႉသၢင်ႇ၊ ပဵၼ်ပၢင်တိုၵ်းၵၼ်ၶိုင်ႈဝၼ်း၊ သွင်ၾၢႆႇမီးလွင်ႈလုသုမ်းၼင်ႇၵၼ်။

ဝၼ်းထိ 14/11/12 ပဵၼ်ပၢင်တိုၵ်းၵၼ်ၼႂ်းၵႄႈဝၢၼ်ႈၶိုမ်း တင်း ဝၢၼ်ႈႁူၺ်ႈ၊ ဢိူင်ႇဝၢၼ်ႈၶိုမ်း ၵိင်ႇၸႄႈဝဵင်းမိူင်းငေႃႉ ယၢၼ်ၾၢႆႇတူၵ်းမိူင်းငေႃႉမွၵ်ႈ 7 လၵ်း။

တပ်ႉသိုၵ်းမၢၼ်ႈ ဢၼ်ၽိူမ်ထႅမ်ႁႅင်းသိုၵ်း ၶဝ်ႈတူင်ႉၼိုင်ၼႂ်းတူင်ႇတၢင်ႇပွတ်းတွၼ်ႈၼႆႉထႅင်ႈ ပဵၼ်တပ်ႉၶမယ 501, 502, 503 လႄႈ ၶလယ 23 ၊ တပ်ႉၵွင် 71 ဢွင်ႇလၢၼ်ႇ (မိူင်းမၢၼ်ႈ)၊ တပ်ႉၵွင် 95 မၼ်းတလေး ၸိူဝ်းၼႆႉ။

ပႃႇတီႇမႂ်ႇသုင်ၸိုင်ႈတႆး (SSPP/SSA) ၼႆႉ တင်ႈတႄႇလႆႈၸႂ်တူၵ်းလူင်းၵိုတ်းယိုဝ်းမႃး တင်းလူင်ပွင် ၸိုင်ႈမၢၼ်ႈ ဝၼ်းထိ 28/01/12 ဢၼ်မီးၵၢၼ်ဢုပ်ႇဢူဝ်းတူၵ်းလူင်း ၸၼ်ႉၸိုင်ႈမိူင်းႁူမ်ႈတုမ် မႃးႁၢၼ်ႉတေႃႇမိူဝ်ႈလဵဝ်လႆႈပဵၼ်ပၢင်တိုၵ်းၵၼ် တင်း ၾၢႆႇတပ်ႉသိုၵ်းမၢၼ်ႈဢမ်ႇယွမ်း 50 ပွၵ်ႈ- ၼႆယဝ်ႉ။