ၸွမ်းၼင်ႇၸုမ်းၶၢဝ်ႇၽူႈတွႆႇႁွၵ်ႈလႆႈတွင်ႈထၢမ်သေ ၵႅမ်ၽူႈၼမ်းၼႂ်းလႄႈ ၽူႈၶၢၼ်ပၢၵ်ႇပႃႇတီႇႁူဝ်သိူဝ် (SNLD) တွပ်ႇလၢတ်ႈၶၢဝ်းတၢင်း ၸဝ်ႈၶုၼ်ထုၼ်းဢူး ၵႂႃႇမိူင်းလႃး၊ သပ်းလႅင်းၼႄလွင်ႈပၢင်ၵုမ်တႆးတႃႈၵုင်ႈ ဢိၵ်ႇၶၵ်ႉၵၢၼ် သၢင်ႈ လွင်ႈယုမ်ႇယမ် ပိူဝ်ႈတႃႇလွင်ႈငမ်းယဵၼ်။

ထၢမ်-လႆႈငိၼ်းဝႃႈပူၼ်ႉမႃး 2-3 ဝၼ်းၼႆႉ ပႃႇတီႇ SNLD ႁဝ်းၶႃႈ ႁွတ်ႈၽႅဝ် ၵႂႃႇၼႃႈ လိၼ်မိူင်းလႃး၊ လွင်ႈၼႆႉၵႂႃႇၸိူင်ႉႁိုဝ်၊ လွင်ႈတၢင်းပဵၼ်ၸိူင်ႉႁိုဝ်ၶႃႈ?။

တွပ်ႇ-1.ၵႂႃႇၸႂ်းဢုၼ်ႇၸႂ်းယဵၼ်ၵၼ်၊ ၵွပ်ႈဝႃႈ ႁူဝ်ပဝ်ႈလူင် ၶုၼ်ထုၼ်းဢူး လႄႈ ၵႅမ်ႁူဝ်ပဝ်ႈ၊ ၽူႈၼမ်းၼႂ်းၶဝ်ၸဝ်ႈၸိူဝ်းၼႆႉ ပႆႇယၢမ်ႈႁွတ်ႈတီႈမိူင်းလႃး။ 2.မိူဝ်းသပ်းလႅင်းၼႄ လွင်ႈပၢင်ဢုပ်ႇၵုမ်ၶူၼ်ႉၶႆႈ လွင်ႈၵေႃႇသၢင်ႈလွင်ႈယုမ်ႇ ယမ်ပိူဝ်ႈတႃႇၵၢၼ်ငမ်းယဵၼ် ဢၼ်ႁဝ်းၶႃႈႁဵတ်းယဝ်ႉတူဝ်ႈၵႂႃႇမိူဝ်ႈဝၼ်းထိ 26-27-28/11/12 တီႈတႃႈၵုင်ႈ၊ လွင်ႈငဝ်း လၢႆးပဵၼ်ႁိုဝ်၊ လွင်ႈ (ဢွင်ႇမၢၼ်) ထိုင်တီႈ မၼ်းပဵၼ်ႁိုဝ် ၸိူဝ်းၼႆႉ။ ၸွမ်းၼင်ႇႁဝ်းၶႃႈ ယိူင်းဢၢၼ်းဝႆႉဝႃႈ ပၢင်ၵုမ်ထိ 1 ၼႆႉ ပဵၼ်တႃႇၸၢဝ်း ၶိူဝ်းတႆးတင်းသဵင်ႈဢုပ်ႇၵုမ်ၵၼ်၊ ၶၵ်ႉထိ 2 မႃး ပိူဝ်ႈတႃႇၸၢဝ်းၶိူဝ်း ၼႂ်းမိူင်းတႆးတင်းသဵင်ႈလႄႈ မုၵ်ႉၸုမ်းၸၢဝ်းၶိူဝ်းတင်းသဵင်ႈဢုပ်ႇဢူဝ်းၵၼ်ၼႆ လႄႈ ပေႃးထႅင်ႈၵမ်းထိ 2 မႃး ယူႇတီႈၸုမ်းၸဝ်ႈၸၢႆးလိုၼ်းၶဝ် (ၼႃႈလိၼ်ၶိုၵ်ႉ တွၼ်းမၢႆ 4)ၼႆႉၵေႃႈ ႁႂ်ႈလႆႈၶဝ်ႈႁူမ်ႈပႃး၊ ပႃးၸဵမ်ႁူဝ်ၼႃႈ ၼႃႈလိၼ်ၶိုၵ်ႉ တွၼ်း မၢႆ1 မၢႆ 2 ၸိူဝ်းၼႆႉ။ မိူဝ်ႈၵမ်းဢွၼ်တၢင်းၼၼ်ႉ ၶဝ်ၸဝ်ႈၵေႃႈပွႆႇၵႂႃႇၽူႈတၢင် တူဝ်ယူႇ၊ ပေႃးဝႃႈႁဵတ်းထႅင်ႈပွၵ်ႈၵမ်းထိ 2 မႃး ၶႂ်ႈႁႂ်ႈတၢမ်တူဝ်ၸဝ်ႈၸၢႆးလိုၼ်း ဢမ်ႇၼၼ် ၸဝ်ႈသၢင်ႇလူႇ ၸိူဝ်းၼႆႉ ၶဝ်ႈႁူမ်ႈပႃးၼႆ ႁဝ်းၶႃႈမိူဝ်းသပ်းလႅင်းလႄႈ မိူဝ်းႁွင်ႉမွၵ်ႇထိုင်။ ၶဝ်ၸဝ်ႈၵေႃႈႁူမ်ၸူမ်းႁပ်ႉတွၼ်ႈဝႃႈ ၼင်ႇႁိုဝ်တေ ၶဝ်ႈႁူမ်ႈပႃးလႆႈၼၼ်ႉ တေၶတ်းၸႂ်ယူႇ- ဝႃႈၼႆ။

ထၢမ်-ၶၢဝ်းတၢင်းဢၼ်ၵႂႃႇၼႆႉ ၸွင်ႇမိူၼ်ၼင်ႇၸႂ်ၼင်ႇၶေႃး ဢၼ်ႁၢင်ႈႁႅၼ်းဝႆႉယူႇၶႃႈႁႃႉ?။

တွပ်ႇ-တေလႆႈဝႃႈပဵင်းပေႃးႁၢၼ်ႉၸႂ်ယူႇ၊ ပေႃးပဵၼ်လႆႈတႄႉဢမ်ႇၵွမ်ႉၵႃႈပီႈၼွင်ႉမိူင်းလႃးၵူၺ်း၊ မိူၼ်ၼင်ႇ ပီႈၼွင်ႉဝႃႉၶဝ် ၵေႃႈ ႁဝ်းၶႂ်ႈမိူဝ်းသပ်းလႅင်းထိုင် လႄႈ ၶႂ်ႈမိူဝ်းႁွင်ႉမွၵ်ႇထိုင်၊  ပၢင်ၵုမ်ၵမ်းထိ 2 မႃး ႁႂ်ႈလႆႈ ၶဝ်ႈပႃးယႂ်ႇယႂ်ႇၼမ်ၼမ်။ ၵူၺ်းၵႃႈ ပၢင်ပွႆးပီမႂ်ႇၵေႃႈသမ်ႉမီးဝၼ်းထိ 12 ၊ ႁူဝ်ပဝ်ႈၶုၼ်ထုၼ်းဢူး သမ်ႉတေ လႆႈမႃးပိုတ်ႇပၢင်ၵႅဝ်ႈပၼ်တီႈၵဵင်းတုင်ၼႆလႄႈ ပွၵ်ႈၼႆႉတီႈပီႈၼွင်ႉမိူင်းဝႃႉတႄႉႁဝ်းၶႃႈဢမ်ႇၸၢင်ႈ ႁွတ်ႈထိုင်ယဝ်ႉ၊ ထႅင်ႈၵမ်းတေမႃးၸင်ႇၶတ်းၸႂ်ထႅင်ႈ။ ယဝ်ႉၵေႃႈ တၢင်တူဝ်ၸုမ်းၵေႃႁူမ်ႈသၢင်ႈ (JAC) သေလႄႈ မိူၼ်ၼင်ႇၸွမ်သိုၵ်းသိူဝ်ထႅၼ်ႈလႄႈ ၸွမ်ႁၢၼ်ၶိူဝ်းတႆးတႄႉ ၶိုၼ်ႈမိူဝ်းတီႈမိူင်းဝႃႉ၊ တေမိူဝ်းသပ်း လႅင်း ၼႄပၢင်ၵုမ်ၼႆႉယူႇ။ တေမိူဝ်းႁွင်ႉမွၵ်ႇ ပေႃးထိုင်ပၢင်ၵုမ်ၵမ်းထိ 2 ႁႂ်ႈၶဝ်ပေႃးလႆႈၶဝ်ႈပႃး၊ ဢမ်ႇၸႂ်ႈႁူဝ် 100 တဵမ်ၵေႃႈၶိုင်ႈလိူဝ်လိူဝ်တႄႉ လႆႈဝႃႈပဵင်းပေႃးႁၢၼ်ႉၸႂ်ယူႇ။

ထၢမ်-ပၢင်ၵုမ်ၵၢၼ်မိူင်း ဢၼ်ၸတ်းတီႈတႃႈၵုင်ႈၵမ်းပူၼ်ႉ ၵမ်ႈၽွင်ႈဝႃႈပေႇႁိၼ်ႉပေႇၵၢၵ်ႇမၼ်းလီၼႅၼ်ႇ၊ တုမ်ႇၶူၼ်ၼိူဝ်ႉ ပေႃးလုၵ်ႉ၊ ဢမ်ႇတွၼ်ႈယၢမ်ႈပဵၼ်မႃး။ ၵူၺ်းၵႃႈ ၵမ်ႈၽွင်ႈထတ်းသၢင်ဝႃႈ ဢမ်ႇလႆႈၶေႃႈ တႅပ်းတတ်းဢၼ်မၼ်ႈၵႅၼ်ႇသင်၊ မၢင်ၽဝ်ႇၵေႃႈၵူဝ်ယဵၼ်းပဵၼ်ၾႆးၽိူင်းၵူၺ်းယဝ်ႉ၊ ဢိင်ၼိူဝ်ပၢင်ၵုမ် ၵမ်းပူၼ်ႉသေ ၶႅၼ်းတေႃႈထတ်းသၢင်ပၼ်ၽွင်ႈၶႃႈ?။

တွပ်ႇ-တၢင်းႁၼ်ထိုင်တႄႉတေမီးလၢႆယၢင်ႇလၢႆပိူင်ယူႇ၊ ဢွၼ်ၼႃႈမိူဝ်ႈပႆႇပဵၼ်ပၢင်ၵုမ်ၼၼ်ႉ ဢၼ်ငဝ်ႈငုၼ်း ၻီႊမွၵ်းၶရေႊသီႊ (SNLD) ႁပ်ႉႁၼ်ထိုင်ၼၼ်ႉတႄႉ ပႃႇတီႇလၢႆၸုမ်းၵေႃႈလီ၊ ၸုမ်းယိပ်းၵွင်ႈၵၢင်ႇလၢႆၸုမ်း ၵေႃႈလီ၊ ၸိူဝ်းဢၼ်မႃးၶဝ်ႈႁူမ်ႈပၢင်ၵုမ်ၼႆႉ ႁႂ်ႈပႂ်ႉထွမ်ႇသဵင်ႁူဝ်ၸႂ်ၵူၼ်းမိူင်း။ ၵူၼ်းမိူင်းယိုၼ်ႈယွၼ်းၸိူင်ႉႁိုဝ်၊ ၵူၼ်းမိူင်းမီးၵၢင်ၸႂ် ၸိူင်ႉႁိုဝ်ၼၼ်ႉ ႁႂ်ႈပႂ်ႉထွမ်ႇသေ ဝၢႆးလင်ၼႆႉၸင်ႇဢဝ်ၶေႃႈလႆႈၸႂ်ၸိူဝ်းလႆႈတီႈပၢင်ၵုမ် ဢွၵ်ႇမႃးၼၼ်ႉသေ ႁႂ်ႈလႆႈဢဝ်ၸႂ်ႉ ပဵၼ်လၵ်းၼမ်းတၢင်းၵၢၼ်ၶွင်ၸုမ်းၽႂ်မၼ်းၵႂႃႇ။ တီႈပၢင်ၵုမ်ၼၼ်ႉ တေဢွၵ်ႇမႃးၶေႃႈတႅပ်းတတ်းဢမ်ႇၸႂ်ႈ၊ ၵွပ်ႈပိူဝ်ႈ မၼ်းပဵၼ် (Conference) ၊ ဢမ်ႇၸႂ်ႈပၢင်ၵုမ်ဢၼ်ႁဝ်း ယၢမ်ႈ။ ပေႃးဝႃႈတႄႇႁူဝ်ၶေႃႈဢၼ်ၼႆႉ၊ တင်ႈႁူဝ်ၶေႃႈဢၼ်ၼႆႉ၊ ဢိင်ၼိူဝ်ႁူဝ်ၶေႃႈၼႆႉ ႁဝ်းတေတႅပ်းတတ်း ၸိူင်ႉႁိုဝ်ၼၼ်ႉ ၶႂ်ႈဢွၵ်ႇမႃးလႆႈၸင်ႇတေဢွၵ်ႇမႃး၊ ၸဵမ်ပိုင်းႁဝ်းၶႃႈတိုၼ်းမုင်ႈ မွင်းဝႆႉၸိူင်ႉၼၼ်။ ၸိူဝ်းဢၼ် ထတ်းသၢင်ဝႃႈ ဢမ်ႇႁၼ်ၶေႃႈတူၵ်းလူင်း၊ ၶေႃႈတႅပ်းတတ်းပုတ်းၶၢတ်ႇသင် ဢၼ်ဝႃႈၼၼ်ႉ မႅၼ်ႈယူႇၶႃႈ။ ၵူၺ်းၵႃႈ ယူႇတီႈၾၢႆႇႁဝ်းၶႃႈၸိူဝ်းဢၼ်မုင်ႈမွင်းဝႆႉၸဵမ်ပိုင်းဝႃႈ ဢမ်ႇတၢပ်ႈဢွၵ်ႇမႃးၶေႃႈ တႅပ်းတတ်းၼၼ်ႉ ၵေႃႈသမ်ႉႁၢၼ်ႉၸႂ်ယူႇ ႁင်းၵူၺ်း။ တေလႆႈဝႃႈတင်းသွင်ပႃႈသွင်ၾၢႆႇႁၼ်မႅၼ်ႈၼင်ႇၵၼ်။

ထၢမ်-လွင်ႈၵေႃႇသၢင်ႈလွင်ႈယုမ်ႇယမ်ၼႆႉ ၼႂ်းတႆးႁဝ်းၶႃႈ ပႃႇတီႇၵၢၼ်မိူင်းႁႂ်ႈပဵၼ်ဢၼ်လဵဝ်ၵၼ်၊ တပ်ႉသိုၵ်းႁႂ်ႈပဵၼ်ဢၼ် လဵဝ်ၵၼ်၊ ၸိူဝ်းၼႆႉၸွင်ႇပႃႈထိုင်တီႈ။ ဢၼ်တေယၢင်ႈၵႂႃႇထႅင်ႈပၢင်ၵုမ်ၵမ်းထိ 2 ၼႆႉ ၶႅၼ်းတေႃႈလၢတ်ႈၼႄၵူၼ်းမိူင်းႁူႉ သေၵမ်းၶႃႈ။

တွပ်ႇ-ပေႃးယူႇတီႈပႃႇတီႇၵၢၼ်မိူင်းသေတူၺ်းတႄႉ တီႈဢေႇသုတ်း ႁဝ်းႁူမ်ႈမိုဝ်းၵၼ်သေႁဵတ်းၵၢၼ်ၵႂႃႇလႆႈ။ ယိူင်းဢၢၼ်း သုင်သုတ်းတႄႉ ပႃႇတီႇတႆးၶႂ်ႈႁႂ်ႈပဵၼ်ပႃႇတီႇလဵဝ်ၵူၺ်း ဢၼ်ဝႃႈၼၼ်ႉ ၸၢင်ႈပဵၼ်မႃးလႆႈယူႇ။ မုင်ႈမွင်းႁၼ်ထိုင်ဝႃႈၸဵဝ်း လႄႈၼၢၼ်းၶေးပဵၼ်မႃးလႆႈယူႇ။ ယူႇတီႈၵူၼ်းလူင်ၵူႈပႃႈၵူႈၾၢႆႇၵေႃႈ ႁပ်ႉႁၼ်တုင်းထွမ်ႇတီႈပၢင်ၵုမ်ၵူၼ်းမိူင်းသေ ၶဝ်ႈၸႂ် ဝႃႈတိုၼ်းထုၵ်ႇလီပဵၼ်ယူႇ။ ပၢႆးဝူၼ်ႉဢၼ်ၼႆႉၸိုမ်းၶဝ်ႈ ၼႂ်းဢွၵ်းဢေႃးၶွင်ႁူဝ်ၼႃႈတႆးႁဝ်းၶဝ်ၵႂႃႇယဝ်ႉ ၼႆၼၼ်ႉႁဝ်းၶႃႈ ယုမ်ႇယမ်ဝႆႉဢၼ်ၼိုင်ႈ။ တီႈဢေႇသုတ်း ထၢၼ်ႈတႂ်ႈၼႆႉႁဝ်းမေႃႁဵတ်းၵၢၼ်ၸွမ်းၵၼ်ၵႂႃႇယဝ်ႉ၊ ၼင်ႇႁိုဝ်တေမေႃႁူမ်ႈမိုဝ်း ၵၼ်ႁဵတ်းၵၢၼ်ၵႂႃႇလႆႈ ၵႂၢင်ႈလိူဝ်ၼႆႉၵေႃႈႁဝ်းၶႃႈၸၢင်ႈၶတ်းၸႂ်လႆႈယဝ်ႉ၊ လွင်ႈၵပ်းသိုပ်ႇတိတ်းတေႃႇၵၼ်ၼႆႉမၼ်းၵႂၢင်ႈၶႂၢင် မႃး။ ပေႃးယူႇတီႈတပ်ႉသိုၵ်းၶဝ်တူၺ်းၼႆၵေႃႈ မိူၼ်ၼင်ႇတပ်ႉသိုၵ်းၼႂ်းမိူင်းတႆး မီးယူႇလၢႆမူႇလၢႆၸုမ်း (ဢမ်ႇၵွမ်ႉၵႃႈတပ်ႉ သိုၵ်းတႆးၵူၺ်း)၊ ၸိူဝ်းမီးၼႂ်းမိူင်းတႆးတင်းသဵင်ႈၼႆႉ ထုၵ်ႇလီပဵၼ်တပ်ႉသိုၵ်းၵႅတ်ႇၶႄႁႄႉ ၵင်ႈ မိူင်းတႆးဢၼ်လဵဝ်ၵူၺ်း ဢၼ်ဝႃႈၼၼ်ႉ ၽႂ်ၵေႃႈတေၶဝ်ႈၸႂ်ၵႂႃႇယူႇ။ ၵွၼ်ႇပႆႇပဵၼ်ဢၼ်ၼႆႉ တပ်ႉသိုၵ်းတႆး ၸုမ်းယႂ်ႇလူင် မိူၼ်ၼင်ႇ RCSS/SSA လႄႈ SSPP/SSA တိုၼ်းထုၵ်ႇလီပဵၼ်ၵွၼ်ႈလဵဝ်မွမ်ႈ လဵဝ်ၵၼ်၊ တပ်ႉလဵဝ်တႃႇလဵဝ်ၵၼ်ၵၼ်ယဝ်ႉ ဢၼ်ဝႃႈၼၼ်ႉၵေႃႈ ယူႇတီႈၵူၼ်းမိူင်းတင်းသဵင်ႈၵေႃႈတုၵ်း ယွၼ်းထိုင်၊ ယူႇတီႈႁူဝ်ၼႃႈတင်းသဵင်ႈၵေႃႈႁပ်ႉႁၼ်ထိုင်ၸိုမ်းၶဝ်ႈၼႂ်းဢွၵ်းဢေႃ ၶဝ်ၸဝ်ႈၵႂႃႇယဝ်ႉလႄႈ ၵႃႈဢမ်ႇပဵၼ် ဢမ်ႇၸူး၊  ၶဝ်ၸဝ်ႈၵေႃႈတေၶတ်းၸႂ်ယူႇၼႆ ႁဝ်းၶႃႈလႆႈငိၼ်းၵႂၢမ်းၸိူင်ႉၼႆ။ သင်ဝႃႈၵိုင်ႉ ၵၢင်ႉပႆႇပဵၼ်လႆႈၵေႃႈ ၸဵမ်ၵူၼ်းမိူင်း၊ ၸဵမ်ၽူႈတၢင်တူဝ်ၽူႈဢွၼ်ႁူဝ်ၵူႈၸဝ်ႈ တိုၼ်းႁပ်ႉႁၼ်ပဵၼ်ၵၢၼ်လီဝႆႉ ယဝ်ႉလႄႈ မီးတၢင်း မုင်ႈမွင်းမႃးၼမ်လိူဝ်ၵဝ်ႇ၊ လွင်ႈၼႆႉပဵၼ်တီႈလီၸႂ်ယႂ်ႇၸႂ်ၵႂ်ႈယူႇၶႃႈ။

ထၢမ်-ပၢင်ၵုမ်ဢၼ်တႃႇၸၢဝ်းၶိူဝ်းတင်းလၢႆၶဝ်ႈႁူမ်ႈၼႆႉ တေပဵၼ်မွၵ်ႈလႂ်၊ တေႁဵတ်းထိုင်ၸၼ်ႉမွၵ်ႈလႂ်ၶႃႈ?။

တွပ်ႇ-ႁဝ်းၶႃႈမုင်ႈမွင်းဝႆႉတႄႉ ဢမ်ႇၸႂ်ႈႁူဝ်ၼႃႈသုင်သုတ်းၵေႃႈ ႁူဝ်ၼႃႈၶၵ်ႉထိ 2 ၸုမ်းၽႂ်ၸုမ်းမၼ်းတႄႉ ထုၵ်ႇလီၶဝ်ႈႁူမ်ႈ ပႃး၊ ၵူၺ်းၵႃႈ ၵွၼ်ႇႁဝ်းၵႂႃႇႁူၺ်းထိုင်လႆႈပီႈၼွင်ႉၼွၵ်ႈၸၢဝ်းၶိူဝ်းတႆး ၼႂ်းမိူင်းတႆးၼၼ်ႉ ဢွၼ်တၢင်းသုတ်းပီႈၼွင်ႉၸၢဝ်း ၶိူဝ်းတႆးၼင်ႇၵၼ်ထုၵ်ႇလႆႈဢွၵ်ႇၶေႃႈလဵဝ်သဵင်လဵဝ်ၵၼ်၊ မိူၼ်ၼင်ႇပေႃးလႆႈ ဢုပ်ႇၵၢၼ်မိူင်းတေႃႇၸၢဝ်းၶိူဝ်းၸိူဝ်းမီးမိူင်းတႆး ၼၼ်ႉ ဢၼ်သိုၵ်းတႆးလႄႈပႃႇတီႇတႆးၶႂ်ႈလႆႈၼၼ်ႉ ပဵၼ်သင်တႄႉတႄႉၼႆ ႁဝ်းၶႃႈတၵ်းလႆႈဢွၵ်ႇၶေႃႈလဵဝ်သဵင်လဵဝ်ၵၼ် ၸင်ႇတေပဵၼ်ၵၢၼ်။ ပေႃးဝႃႈပႃႇတီႇမီး 3 ဢၼ် လၢတ်ႈယူႇ 3 ယၢင်ႇ၊ တပ်ႉသိုၵ်းမီး 2 တပ်ႉၵေႃႈ သမ်ႉလၢတ်ႈယူႇ 2 ယၢင်ႇ ၼႆ ႁဝ်းတေဢုပ်ႇ ၸၢဝ်းၶိူဝ်းၼၼ်ႉ မၼ်းဢမ်ႇမီးတီႈပွင်ႇသင်။ ၵွပ်ႈၼႆ ဢွၼ်တၢင်းသုတ်းႁဝ်းတၵ်းလႆႈၵေႃႇသၢင်ႈ လွင်ႈယုမ်ႇ ယမ်ၵၼ်၊ လွင်ႈႁူမ်ႈၸႂ်ၵၼ်၊ လွင်ႈၶွတ်ႇလိူတ်ႈၵၼ်ၼႂ်းၵႄႈတႆးႁဝ်းၼင်ႇၵၼ်ၵွၼ်ႇ၊ ၵွပ်ႈၼၼ် တေလႆႈ ဢဝ်/ၸႂ်ႉ ၶၢဝ်းယၢမ်းတီႈဢေႇသုတ်း 4-5 လိူၼ်။ ပေႃးတႆးၼင်ႇၵၼ်ဢွၵ်ႇၶေႃႈလဵဝ်သဵင်လဵဝ်ၵၼ်လႆႈယဝ်ႉ ၸင်ႇႁႃသုတ်ႉၸူးမုၵ်ႉၸုမ်း ဢၼ်မီးၼႂ်းမိူင်းတႆး။ မုၵ်ႉၸုမ်းပႃႇတီႇလႄႈသင်၊ မုၵ်ႉၸုမ်းတပ်ႉသိုၵ်း လႄႈသင် မၼ်းမီးလၢႆၸုမ်း၊ ၼၼ်ႉတႄႉတေလႆႈ ဝႆႉၸႂ်ယိုၼ်းယၢဝ်း၊ ၸႂ်ၵႂၢင်ႈၶႂၢင်သေ သုတ်ႉၸူးၶဝ်ၸဝ်ႈ၊ ဢဝ်ၶၢဝ်း ယၢမ်းၼမ်ၼမ်သေသပ်းလႅင်း။ ၵွပ်ႈၼၼ် ၵတ်ႉၼႅၼ်ႇ ၵေႃႈ ပေႃးပဵၼ်လႆႈၶၢဝ်းတၢင်း 3-4-5 လိူၼ်ၼႆႉၵေႃႈ တေလႆႈဝႃႈၵတ်ႉၶႅၼ်ႇယဝ်ႉၶႃႈ။

ထၢမ်-ပေႃးဝႃႈႁဵတ်းပၢင်ၵုမ်တင်းၸၢဝ်းၶိူဝ်းၵေႃႈ တေလႆႈဝႃႈပၢင်ၵုမ်ၵေႃႇသၢင်ႈလွင်ႈယုမ်ႇယမ်၊ တေပဵၼ်ထႅင်ႈ ၶၵ်ႉတွၼ်ႈ ၼိုင်ႈၵူၺ်းၶႃႈႁႃႉ?။

တွပ်ႇ-ဢွၼ်တၢင်းသုတ်းတႄႉ တေလႆႈၵေႃႇသၢင်ႈလွင်ႈယုမ်ႇယမ်ၵၼ်ၵွၼ်ႇ၊ တီႈတႄႉမၼ်း ၵွၼ်ႇပႆႇထိုင်ပၢင် ၵုမ်လွင်ႈ ယုမ်ႇယမ်ၵၼ်ၼႆႉ ပေႃးပဵၼ်လႆႈ ယင်းလီပဵၼ်ပၢင်ၵုမ်ၵေႃႇသၢင်ႈလွင်ႈၶဝ်ႈၸႂ်ၵၼ်ၵွၼ်ႇ၊ ပေႃးပႆႇမီး လွင်ႈၶဝ်ႈၸႂ်/ပွင်ႇၸႂ် ၵၼ်ၼႆႉ မၼ်းတေဢမ်ႇယုမ်ႇယမ်ၵၼ်လႆႈ ဢၼ်ဝႃႈၼၼ်ႉ မိူၼ်ၼင်ႇ ၸဝ်ႈၶိုၼ်းသႂ် ယၢမ်ႈဢုပ်ႇထိုင်ၼၼ်ႉ ႁဝ်းၶႃႈၵေႃႈ ႁပ်ႉႁၼ်လီၶႃႈ။ ၵွပ်ႈၼႆလႄႈ ၼင်ႇႁိုဝ်ၸၢဝ်းၶိူဝ်းၸိူဝ်းမီး ၼႂ်းမိူင်းတႆး၊ ဢၼ်ဢမ်ႇၸႂ်ႈတႆးၸိူဝ်းၼၼ်ႉ ပေႃးတေယုမ်ႇယမ် ၼိူဝ်ႁဝ်းမႃးၼၼ်ႉ ႁဝ်းယိူင်းဢၢၼ်းဢီႈသင်၊ ႁဝ်းယိူင်း ဢၢၼ်းပႃးတႃႇၽႂ်ယူႇ ဢၼ်ဝႃႈၼၼ်ႉ ႁႂ်ႈၶဝ်ပေႃးၶဝ်ႈၸႂ်ၼၼ်ႉ တေလႆႈႁူၺ်းသူၼ်း/သပ်းလႅင်းၼႄ ဢွၼ်တၢင်း။ ၶဝ်ၸဝ်ႈသမ်ႉၶႂ်ႈလႆႈ (လူဝ်ႇ) ဢီႈသင်၊ ႁၼ်ထိုင်ၼိူဝ်ႁဝ်းဢီႈသင်ဢၼ် ဝႃႈၼၼ်ႉ ထုၵ်ႇလီသုတ်ႉႁႃၸူးႁႂ်ႈပေႃးမီးလွင်ႈၶဝ်ႈၸႂ်။ ပေႃးၶဝ်ႈၸႂ်ၵၼ်မႃးယဝ်ႉ ၼင်ႇႁိုဝ်တေယုမ်ႇယမ်ၵၼ်ၼၼ်ႉ တေလႆႈၵေႃႇသၢင်ႈထႅင်ႈၶၵ်ႉထိ 2 ၼႆလႄႈ ပေႃးႁဝ်းၵေႃႇသၢင်ႈလႆႈလွင်ႈယုမ်ႇယမ်ၵၼ်ၵူၺ်းၵေႃႈ ပေႃးပဵၼ်ၵၢၼ်ၶိုၵ်ႉယႂ်ႇ ယဝ်ႉၶႃႈ။

ၼွၵ်ႈသေၼၼ်ႉ ဢၼ်ဝႃႈၸၢဝ်းၶိူဝ်းၼႂ်းမိူင်းတႆးၸိူဝ်းၼၼ်ႉ ႁဝ်းၼင်ႇၵၼ်ၵူၺ်းယုမ်ႇယမ်ၵၼ် မၼ်းႁဵတ်း သၢင်ႈပႆႇယဝ်ႉ၊ ၵၢၼ်ယုမ်ႇယမ်ၵၼ်ၼႆႉ ယူႇတီႈလူင်ပွင်ၸိုင်ႈ၊ ပေႃးလၢတ်ႈၸိူဝ်ႉၶိူဝ်းၵေႃႈ ယူႇတီႈၸိူဝ်ႉၶိူဝ်း မၢၼ်ႈတင်းႁဝ်းၸၢဝ်းၶိူဝ်းတင်း သဵင်ႈၼႆႉ ၸွင်ႇသမ်ႉမီးလွင်ႈယုမ်ႇယမ်ၵၼ်ယူႇႁႃႉ၊ ၸွင်ႇသမ်ႉမီးလွင်ႈၶဝ်ႈၸႂ် ၵၼ်ယူႇႁႃႉၸိူဝ်းၼႆႉသမ်ႉတေပဵၼ်ထႅင်ႈ တွၼ်ႈၼိုင်ႈ။ ၸင်ႇဝႃႈပေႃးႁဵတ်းထႅင်ႈ ၵမ်းထိသွင်မႃး မိူၼ်ၼင်ႇ တိူင်းသိုၵ်းၼႂ်းမိူင်းတႆးမီး 4 တိူင်း၊ ၽူႈၵွၼ်းတိူင်းတင်း 4 ၵေႃႈၵေႃႈ ႁဝ်းၶႃႈၶႂ်ႈႁွင်ႉမွၵ်ႇ(ၽိတ်ႈမွၵ်ႇ)ႁႂ်ႈမႃး လဵပ်ႈႁဵၼ်း၊ ၵၢင်ၸႂ်ၵူၼ်းမိူင်းတႆးမိူၼ်ၼႆ၊ ႁၼ်ထိုင်ၼိူဝ်သူၸဝ်ႈၾၢႆႇ ၽွင်းငမ်းမိူၼ်ၼႆ၊ ႁၼ်ထိုင်ၼိူဝ်ၾၢႆႇ တပ်ႉသိုၵ်းမိူၼ်ၼႆ ႁႂ်ႈၶဝ်ပေႃးႁူႉပွင်ႇၶဝ်ႈၸႂ်ၵႂႃႇၼၼ်ႉ ႁဝ်းၶႃႈတေၶတ်းၸႂ်ပႃးၶႃႈ ဢေႃႈ။

ထၢမ်-ၾၢႆႇၼိုင်ႈၵေႃႈ ၼႂ်းၶၢဝ်းတၢင်း 2-3 ဝၼ်းၼႆႉ ပီမႂ်ႇၵေႃႈတေထိုင်မႃးယဝ်ႉ၊ ၵွပ်ႈၼၼ် ယူႇတီႈပႃႇတီႇ ႁူဝ်သိူဝ် (SNLD) ႁဝ်းၶႃႈသေ ၶၢဝ်းတၢင်းၾႃႉလီပီမႂ်ႇၼႆႉ ၶႂ်ႈၾၢၵ်ႇတွၼ်ႈၵႂၢမ်းသင်ထိုင်ပီႈၼွင်ႉၵူၼ်းမိူင်း ႁဝ်းၶႃႈ?။

တွပ်ႇ-1.ႁႂ်ႈပီႈၼွင်ႉမိူင်းတႆးဢိၵ်ႇလူၺ်ႈ ပီႈၼွင်ႉၸၢဝ်းၶိူဝ်းတႆးတင်းသဵင်ႈ ဢၼ်ယူႇၼႂ်းလုမ်ႈၾႃႉပတ်းပိုၼ်ႉ လႄႈ ပီႈၼွင်ႉ ၼႂ်းၸိုင်ႈမိူင်းႁူမ်ႈတုမ်ၵူႈၸၢဝ်းၶိူဝ်း ႁႂ်ႈၶိုၼ်ႈယႂ်ႇမႂ်ႇသုင်၊ ႁႂ်ႈမၢၵ်ႈမီးလီပဵၼ်ၸွမ်းပီမႂ်ႇၵႂႃႇသေၵမ်း ၼႆ ၶႂ်ႈမီးၵႂၢမ်းလီမင်ႇၵလႃႇ တွၼ်ႈၸူးထိုင်သေယဝ်ႉ သမ်ႉၶႂ်ႈယွၼ်းသူး/ဝၢၼ်းၵၢဝ်ႇထိုင်ဝႃႈ ႁႂ်ႈတႆးတင်းသဵင်ႈ ၶွတ်ႇလိူတ်ႈၽွမ်ႉႁူမ်ႈၵၼ်၊ ႁႂ်ႈၸၢဝ်းၶိူဝ်း ၼႂ်းမိူင်းတႆးတင်းသဵင်ႈမေႃၶွတ်ႇလိူတ်ႈၽွမ်ႉႁူမ်ႈၵၼ် ပိူဝ်ႈတႃႇမိူင်း တႆးၶိုၼ်ႈယႂ်ႇ၊ ယဝ်ႉၵေႃႈၵူၼ်းၼႂ်းၸိုင်ႈမိူင်းႁူမ်ႈတုမ် တင်းသဵင်ႈ ႁႂ်ႈမေႃၶွတ်ႇလိူတ်ႈၽွမ်ႉႁူမ်ႈၵၼ် ပိူဝ်ႈတႃႇ ၸိုင်ႈမိူင်းႁူမ်ႈတုမ်ၶိုၼ်ႈယႂ်ႇ၊ ၵူၼ်းၼႂ်းလုမ်ႈၾႃႉတင်းသဵင်ႈ ႁႂ်ႈမေႃ ၽွမ်ႉၽဵင်ႇတိုၵ်းတေႃးလႆႈၽေးၶဵၼ် သၽႃဝလႄႈ ၶဵၼ်ၵူႈလွင်ႈလွင်ႈသေၵမ်း- ၶႂ်ႈယွၼ်းသူးၼင်ႇၼႆ။