ၸဝ်ႈယွတ်ႈသိုၵ်း၊ ၸဝ်ႈၵၼ်းၸဵတ်းမွၵ်ႇလၢတ်ႈၵႂၢမ်းၾၢင်ႉ တိူၼ်ပီႈၼွင်ႉတႆး ၼႂ်းဝၼ်းယႂ်ႇဝၼ်းလူင် မိူင်းၸိုင်ႈထႆး (05/12/12) ဢၼ် RCSS ဢဝ်တိုဝ်ႉတၢင်းဢွၼ်ႁူဝ်ၼမ်းၼႃႈ ၸတ်းပၢင်ပွႆးႁပ်ႉ တွၼ်ႈပီမႂ်ႇတႆး 2107 ၼီႈ၊ တီႈဝတ်ႉၻွၼ်းၸၼ်ႇ ဢိူင်ႇတႃႈသႃလႃး မိူင်းၵဵင်းမႆႇ။

ၸဝ်ႈယွတ်ႈသိုၵ်း တူင်ႉတၵ်ႉႁူမ်ၸူမ်ပီႈၼွင်ႉတႆးသေမွၵ်ႇလၢတ်ႈၵႂၢမ်း ပိူင်လူင်မၼ်းဝႃႈ ပီႈၼွင်ႉတႆး ၵူႈၵေႃႉ ႁႂ်ႈမီးသၸ်ႉၸႃႇ၊ သတိ၊ ဝိရိယ။ မိူၼ်ၼင်ႇႁႂ်ႈမီးသၸ်ႉၸႃႇတေႃႇဢူၺ်းၵေႃႉ၊ တေႃႇပေႃႈ လဵင်ႉၵေႃႉမီးၵုၼ်းမုၼ်၊ တေႃႇၸိူဝ်ႉၸၢတ်ႈဝၢၼ်ႈမိူင်း။ ၵူၼ်းၵေႃႉဢၼ်ႁၵ်းလင် 3 လွင်ႈၼႆႉ ႁႃတၢင်းၶိုၼ်ႈယႂ်ႇယၢပ်ႇ၊ တီႈယူႇၵိတ်ႇၵႅပ်ႈ၊ ၼႃႈတႃၸိုဝ်ႈသဵင်လု၊ ဢမ်ႇမီးဢူမုၼ်။ ႁႂ်ႈမီးသတိ မႃးတူၵ်းမိူင်းထႆးၵေႃႈ တေႁဵတ်းသင်တေလၢတ်ႈသင် ၸိူဝ်းၼႆႉ ႁႂ်ႈမီးသတိမေႃၾၢင်ႉၵႅမ်း၊ ယႃႇႁဵတ်းၵၢၼ်ၽိတ်း မၢႆမီႈထႆး၊ ယႃႇပေၵႃႉယႃႈမဝ်းၵမ်။ ဝိရိယ မႃးမိူင်းထႆးႁဵတ်းၵၢၼ်ႁႃငိုၼ်းၵေႃႈ ႁႂ်ႈၵႆႉႁဵတ်းၵၢၼ်- ၸိူဝ်းၼႆႉ။

ၼွၵ်ႈသေၼၼ်ႉ မၼ်းၸဝ်ႈမွၵ်ႇလၢတ်ႈတိုၵ်းသူၼ်းထိုင်ပီႈၼွင်ႉတႆးထႅင်ႈဝႃႈ- မႃးတူၵ်းမိူင်းထႆး ယႃႇလွၵ်ႇႁဵတ်းဝႂ်ပွမ်ပၼ် ၵၼ်၊ မိူၼ်ၼင်ႇပီႈၼွင်ႉတႆး လုၵ်ႉမိူင်းတႆးၶဝ်ႈမိူင်းထႆး လုၵ်ႉတီႈမႆႈမႃး ႁႃတီႈၵတ်း။ ဢမ်ႇမီးဝတ်းဝႂ်သေ ၶႂ်ႈလႆႈၶႂ်ႈမီးဝတ်းဝႂ် ၸိူဝ်းၼႆႉ တႆးႁဝ်းၼင်ႇၵၼ်ၵမ်ႈၽွင်ႈသမ်ႉဢဝ် တိုဝ်ႉတၢင်းလွၵ်ႇႁဵတ်းဝႂ်ပွမ်ပၼ်ၵၼ်။ ပီႈၼွင်ႉတႆးၸိူဝ်းဢမ်ႇႁူႉၵၼ်ႉႁဵတ်းၵၢၼ် ဢဝ်ၼမ်ႉႁိူဝ်ႇ ၼမ်ႉၶႆးလႅၵ်ႈလႆႈငိုၼ်းမႃး သမ်ႉမႃးၺႃးၵူၼ်းလွၵ်ႇႁဵတ်းဝႂ်ပွမ်၊ သဵင်ႈငိုၼ်းၸွမ်းဝႂ်ပွမ်၊ ၸႂ်ႉဢမ်ႇလႆႈ ၸိူဝ်းၼႆႉ ယႃႇပေႁႂ်ႈလႆႈမီး။ ယႃႇပေၵႃႉၵူၼ်း၊ မိူၼ်ၼင်ႇမၢင်ၵေႃႉမႃးမိူင်းထႆးသေ ပွၵ်ႈမိူဝ်းမိူင်းတႆး၊ သမ်ႉမိူဝ်းၵဝ်းမိူဝ်းလွၵ်ႇ ပိူၼ်ႈမႃး ၶၢႆတူဝ်မိူင်းထႆး၊ မၢင်ၵေႃႉၵႂႃႇၶၢႆတူဝ်ႁွတ်ႈၽႅဝ်မိူင်းမလေႊသျိူဝ်ႊ ၸိူဝ်းၼႆႉၵေႃႈမီး။ ၵၢၼ်ၸိူဝ်းၼႆႉယႃႇပေႁဵတ်း သေၵမ်း- ဝႃႈၼႆ။

ၸဝ်ႈၵၼ်းၸဵတ်း မွၵ်ႇလၢတ်ႈၵႂၢမ်းၵဵဝ်ႇၵပ်းလၢႆးႁဵတ်းသၢင်ႈၵူၼ်းသီႇၶိူဝ်း ၾၢင်ႉၵႅမ်းထိုင်ပီႈၼွင်ႉတႆး ဝႃႈ- တၢင်းတိုဝ်းၵမ်/ လၢႆးႁဵတ်းသၢင်ႈတႆးၼႆႉ ပေႃးမီးၵေႃႉလဵဝ် ႁႃဢႅဝ်ႇႁႃလၢဝ်း၊ ပေႃးမီးသွင်ၵေႃႉ ၶႃႉၶၢႆၸိုဝ်ႈပိူၼ်ႈ၊ ပေႃးမီးသၢမ်ၵေႃႉ ႁႃၵိၼ်လဝ်ႈ တွၵ်းၵႅဝ်ႈၵၼ်ယဝ်ႉၽိတ်းမေႃးပေႃႉႁူဝ်ၵၼ်။ တၢင်းႁဵတ်းသၢင်ႈၶႄႇ ပေႃးမီးၵေႃႉလဵဝ်ႁၢပ်ႇၵၢၼ်းႁႃၵႃႉႁႃၶၢႆ၊ သွင်ၵေႃႉႁူမ်ႈၵၼ် ပိုတ်ႇႁၢၼ်ႉၵႃႉ၊ သၢမ်ၵေႃႉ ႁူမ်ႈၵၼ်ပိုတ်ႇၶွမ်ႊပၼီႊ။ တၢင်းႁဵတ်းမၢၼ်ႈ ၵေႃႉလဵဝ်ၼွၼ်းဝၼ်း၊ သွင်ၵေႃႉၶႃႉၶၢႆၸိုဝ်ႈ ပိူၼ်ႈ၊ သၢမ်ၵေႃႉ ယွင်ႈၵၼ်ႁဵတ်းသြႃႇ။ တၢင်းႁဵတ်းဢိင်းၵလဵတ်ႈ ၼိုင်ႈၵေႃႉဢၢၼ်ႇလိၵ်ႈတူၺ်းလိၵ်ႈ၊ သွင်ၵေႃႉဢုပ်ႇဢူဝ်း ၵၢၼ်မိူင်း၊ သၢမ်ၵေႃႉ ႁႃၶႂၢၵ်ႈမိူင်းပိူၼ်ႈ။ လၢႆးႁဵတ်းၸိူဝ်းၼႆႉ ဢၼ်လႂ်လီႁႂ်ႈတႆး ႁဝ်းလိူၵ်ႈဢဝ်၊ ဢၼ်လႂ်မဝ်ႁႂ်ႈတႆးႁဝ်းမေႃ ပႅတ်ႈ- ၼႆယဝ်ႉ။

ပၢင်ပွႆးသူင်ႇသင်ႇပီတႆး 2106 ၊ ႁပ်ႉတွၼ်ႈပီမႂ်ႇတႆး 2107 ဢၼ်ဢဝ်တိုဝ်ႉတၢင်း ဝၼ်းယႂ်ႇဝၼ်းလူင် မိူင်းထႆးသေ ၸတ်းတီႈ ဝတ်ႉၻွၼ်းၸၼ်ႇၼႆႉ လွင်ႈမူၼ်ႈသိူဝ်း မီးၵူၼ်းၼုမ်ႇတႆးၼႂ်းၵဵင်းမႆႇ လႄႈၵူၼ်းၼုမ်ႇ လၢႆလၢႆၸုမ်းမူၼ်ႈၸႂ်ပၼ်။ မီးၸၢတ်ႈ သႅင်းလႅင်းမႂ်ႇ ပဵင်းလူင် မႃးၵႃႈ/ႁွင်ႉၵႂၢမ်း လဝ်ႇမူၼ်ႈတူၼ်ႈၸႂ်ပၼ်။ ၼွၵ်ႈသေၼၼ်ႉ ၸုမ်းထမ်ႇမၸၵ်ႈၵျႃႇ ဝတ်ႉပႃႇပဝ်ႈၵေႃႈ မႃးၼႄတၢင်း ၵႃႈလၢႆးသႅၼ်ႉလၢႆးၸိူင်းတႆး ၸိူဝ်းၼႆႉ။ ႁူမ်ႈပီႈၼွင်ႉၵူၼ်းၶဝ်ႈႁူမ်ႈပၢင်ပွႆး ဢိၵ်ႇၸဝ်ႈၵႃႉတၢင်းၶၢႆ ၼပ်ႉႁူဝ် ႁဵင်ၵေႃႉ။