ႁူဝ်ပဝ်ႈပႃႇတီႇႁူဝ်သိူဝ် လုၵ်ႉတႃႈၵုင်ႈဝိၼ်ႁွတ်ႈၵဵင်းတုင် ပိုတ်ႇလုမ်းၵေႃၽႄငဝ်ႈငုၼ်း၊ တေလိုဝ်ႈသဝ်းတီႈ ၵဵင်းတုင် ၶဝ်ႈပၢင်ပွႆးပီမႂ်ႇတႆး ဢၼ်ၵေႃလိၵ်ႈလၢႆးလႄႈၾိင်ႈငႄႈတႆး ပတ်းပိုၼ်ႉႁူမ်ႈၵၼ်ၸတ်း။

ဝၼ်းထိ 07/12/12 (မိူဝ်ႈၼႆႉ) ၸဝ်ႈၶုၼ်ထုၼ်းဢူး ႁူဝ်ပဝ်ႈငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး (SNLD) ႁိုဝ် ပႃႇတီႇႁူဝ်သိူဝ် ၶိုၼ်ႈသၢႆၵၢၼ်ဝိၼ် လုၵ်ႉတႃႈၵုင်ႈ (မႃးၵိုတ်းလိုဝ်ႈတီႈႁၢႆးႁူဝ်းၸူဝ်ႈၵႅပ်ႉ)၊ သိုပ်ႇဝိၼ်ႁွတ်ႈၵဵင်းတုင် ယၢမ်း 10:00 မူင်းပၢႆ။ ယၢမ်း 11:00 မူင်း မၼ်းၸဝ်ႈဢွၼ်ႁူဝ်ပိုတ်ႇလုမ်း ၵေႃၽႄငဝ်ႈငုၼ်း (SNLD) တီႈၵဵင်းတုင် ႁိမ်းၼွင်တုင်-ၼႆယဝ်ႉ။

ယိူင်းဢၢၼ်းၶွင်ပႃႇတီႇႁူဝ်သိူဝ် (SNLD) ၼႆႉ ဢၢၼ်းပိုတ်ႇလုမ်းၵေႃၽႄငဝ်ႈငုၼ်းပဵၼ်တၢင်းၵၢၼ် တီႈၵဵင်းတုင်၊ တူၼ်ႈတီး၊ လႃႈသဵဝ်ႈ၊ ဝဵင်းလိူဝ်ႇ (မၼ်းတလေး)ၸိူဝ်းၼႆႉ။ တီႈၵဵင်းတုင်ၼႆႉ ပဵၼ်ပွၵ်ႈ ဢွၼ်တၢင်းသုတ်း။ ႁူဝ်ပဝ်ႈႁူဝ်သိူဝ်တီႈၵဵင်းတုင် ၼႆႉ ပဵၼ်လုင်းသုရၽူၼ်း၊ ၽူႈၼမ်းၼႂ်း ၸၢႆးသၢမ်တိပ်ႉ ၵဵင်းလၢၼ်း။

လုင်းၸၢႆးတိပ်ႉလၢတ်ႈဝႃႈ- မိူဝ်ႈဢၼ်ၸဝ်ႈၶုၼ်ထုၼ်းဢူး ၽႅဝ်ႁွတ်ႈမႃးတီႈၵဵင်းတုင်ၼႆႉ ပီႈၼွင်ႉၵူႈ ၸၢဝ်းၶိူဝ်းၵႂႃႇပႂ်ႉႁပ်ႉ တွၼ်ႈမၼ်းၸဝ်ႈ မီး 400 ပၢႆ၊ ပေႃးယဝ်ႉမၼ်းၸဝ်ႈမႃးဝႄႉဝႆႈၽြႃးလူင် ဝတ်ႉၵၢင်ဝဵင်း တီႈၵဵင်းတုင်သေမႃးပိုတ်ႇလုမ်း- ဝႃႈၼႆ။

ၸၢႆးလဵၵ်ႉ ၽူႈၶၢၼ်ပၢၵ်ႇႁူဝ်သိူဝ် လၢတ်ႈဝႃႈ- SNLD ၼႆႉ မီးယိူင်းဢၢၼ်းပိုတ်ႇလုမ်းၵေႃၽႄသေ ပိုတ်ႇတီႈၵဵင်းတုင် ပဵၼ်ၵမ်းထိၼိုင်ႈ၊ လႆႈႁၼ်ၵူၼ်းဝၢၼ်ႈၵူၼ်းမိူင်းမႃး ႁူမ်ၸူမ်းတွၼ်ႈႁပ်ႉ ပဵၼ်ႁူဝ် ပၢၵ်ႇၸိူင်ႉၼႆ ယိၼ်းၸူမ်းၸွမ်း၊ ဢဝ်ၵုၼ်းဢဝ်မုၼ်ၸွမ်း။ ၸဝ်ႈၶုၼ်ထုၼ်းဢူး တေယူႇတေႃႇ ထိုင်ဝၼ်း ပိုတ်ႇပၢင်ပွႆးပီမႂ်ႇတႆးပတ်းပိုၼ်ႉ (2107 ၼီႈ) ဢၼ်ၸတ်းႁဵတ်းႁူမ်ႈၵၼ်တီႈၵဵင်းတုင်၊ ပေႃးသၢင်ႇတေႃႇၵေႃႈ တေၵႂႃႇဢႅဝ်ႇယဵမ်ႈထိုင်မိူင်းလႃး၊ သိုဝ်လိုဝ်း၊ တၢင်းတႃႈၶီႈလဵၵ်းၸိူဝ်းၼႆႉ - ဝႃႈၼႆ။