ပႃႇတီႇႁူဝ်သိူဝ် (SNLD) ၵႂႃႇႁွမ်းတၢၼ်းငိုၼ်းလႄႈ ၸွႆႈထႅမ်ယႃႈယႃ ၵူၼ်းပၢႆႈၽေးသိုၵ်းသိူဝ် ၼႂ်းမိူင်းၶၢင် ၸွမ်းပၢင်သဝ်းၵူၼ်းပၢႆႈၽေးလၢႆတီႈ တင်းမူတ်း 160 သႅၼ်။

ၽူႈၶၢၼ်ပၢၵ်ႇႁူဝ်သိူဝ် ၸၢႆးလဵၵ်ႉ ပိုတ်ႇလၢတ်ႈၼႄလွင်ႈၼႆႉဝႃႈ- မိူဝ်ႈဝၼ်းၶရိတ်ႉသမၢသ်ႊပူၼ်ႉမႃး ၼၼ်ႉ ႁဝ်းၶႃႈလႆႈ ႁွမ်းငိုၼ်းၵႂႃႇၸွႆႈထႅမ်ငိုၼ်းလႄႈယႃႈယႃပၼ်ၵူၼ်းၸိူဝ်းၺႃးၽေးသိုၵ်းသိူဝ် ၼႂ်းပွၵ်ႉ 4 တီႈၵျွင်း ၶရိယၼ်ႇ ႁူမ်ႈတင်း ၸၢဝ်းလီးသူး 67 လင်ႁိူၼ်း။ ၼႂ်းၸႄႈဝဵင်းမိူင်းမွၵ်ႇ တီႈဝၢၼ်ႈၵၢတ်ႇၵဵဝ်ၵေႃႈ တႃႇၵူၼ်း 500 ပၢႆ - ဝႃႈၼႆ။

မိူဝ်ႈဝၼ်းထိ 24/12/12 ဝၼ်းႁႅၵ်ႈသုတ်း ပႃႇတီႇႁူဝ်သိူဝ်ၵႂႃႇၸွႆႈထႅမ်ၵူၼ်းၺႃးၽေး သိုၵ်းသိူဝ်တီႈ ဝဵင်းမႂ်ႇ၊ ၸႄႈဝဵင်းဝၢၼ်ႈ ၸေႈ၊ ၸႄႈဝဵင်းမိူင်းမွၵ်ႇ။ ၶမ်ႈဝၼ်းထိ 25 ၽႅဝ်ၵႂႃႇတီႈဝဵင်း မျိတ်ႉၵျီးၼႃးသေ ၸွႆႈထႅမ် ၵူၼ်းပၢႆႈၽေးသိုၵ်းသိူဝ် ဢၼ်ယူႇတီႈ ဝတ်ႉတႆးလႅင်။ ဢၼ်ၵႂႃႇၸွႆႈထႅမ်တင်းသဵင်ႈ ပဵၼ်တူဝ် ယႃႈယႃတႃႇ 40 သႅၼ်၊ တူဝ်ငိုၼ်း 120 သႅၼ်၊ ႁူမ်ႈ 160 သႅၼ်။

ၽူႈၶၢၼ်ပၢၵ်ႇႁူဝ်သိူဝ်သိုပ်ႇလၢတ်ႈဝႃႈ-ၶၢဝ်းတၢင်းဢၼ်ႁဝ်းၶႃႈၵႂႃႇၸွႆႈထႅမ်ၼႆႉ ဢမ်ႇၸႂ်ႈလိူၵ်ႈၼႃႈ ၵူၼ်းၺႃးၽေးသိုၵ်းသိူဝ် ဝႃႈ ပဵၼ်ၸၢဝ်းၶိူဝ်းသင်။ ၵူၼ်းပိုၼ်ႉတီႈၸိူဝ်းႁဝ်းၶႃႈၵႂႃႇၸွႆႈထႅမ်ၼၼ်ႉ ပႃးၸဵမ်တႆး/မၢၼ်ႈ/ ၶၢင်/လီးသူး (လိသေႃး) ၸိူဝ်းၼႆႉ။ ဢၼ်ႁဝ်းၶႃႈလႆႈႁၼ် လုၵ်ႈဢွၼ်ႇၵမ်ႈၼမ် ဢမ်ႇလႆႈႁဵၼ်းလိၵ်ႈလၢႆးလီလီ၊ လွင်ႈလုမ်းလႃးပၢႆးယူႇလီၵေႃႈဢမ်ႇတဵမ်ထူၼ်ႈ၊ ဝၢၼ်ႈမိူင်းၼိုင်ႈလုၵ်ႈ ၼႆႉ ပေႃးဝႃႈဢၼႃႇၵၢတ်ႈၶွင်လုၵ်ႈဢွၼ်ႇ ဢမ်ႇလီၵေႃႈ တေတုမ်ႉတိူဝ်ႉဢၼႃႇၵၢတ်ႈၸိုင်ႈမိူင်း။ ၵွပ်ႈၼၼ် ႁဝ်းၶႃႈဢမ်ႇၶႂ်ႈငိၼ်းပၢင်တိုၵ်း၊ ၶႂ်ႈႁႂ်ႈမၼ်း ယဝ်ႉတူဝ်ႈမူတ်းပိၵ်းသေ ႁူမ်ႈၵၼ်ၵေႃႇသၢင်ႈ လွင်ႈငမ်းယဵၼ် ဢၼ်ၸိုၼ်ႈၸၢင်ႇ၊ ထုၵ်ႇလီၸွႆႈၵၼ်လူၺ်ႈမႃႇ လူၺ်ႈႁႅင်း သိုဝ်ႈၽႂ်တၼ်းမၼ်း- ဝႃႈၼႆ။

ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး (SNLD) ဢၼ်ၸဝ်ႈၶုၼ်ထုၼ်းဢူးဢွၼ်ႁူဝ်ၼႆႉ ပိူဝ်ႈတႃႇ ၵေႃႇသၢင်ႈ လႆႈလွင်ႈ ငမ်းယဵၼ်ၼၼ်ႉ  ဢွၼ်ႁူဝ်ၸတ်းႁဵတ်းပၢင်ၵုမ်သၢင်ႈလွင်ႈယုမ်ႇယမ် ပိူဝ်ႈတႃႇ လွင်ႈငမ်းယဵၼ် ၼႂ်းတႆး၊ ယဝ်ႉတူဝ်ႈၵႂႃႇမိူဝ်ႈ 26-28/11/12 ။ မိူဝ်ႈလဵဝ်ၵေႃႈ ၼင်ႇႁိုဝ်ၸုမ်းယိပ်းၵွင်ႈ ၵၢင်ႇၼႂ်းတႆး တေပဵၼ်ဢၼ်လဵဝ်ၵၼ်၊ ၼင်ႇႁိုဝ်ၵူၼ်းမိူင်းတႆး ပေႃး တေၽွမ်ႉသဵင်ပဵင်းပၢၵ်ႇၵၼ်ၵေႃႈ တိုၵ်ႉၶတ်းသၢင်ႈႁၢင်ႈပွင် ပိူဝ်ႈတႃႇယၢင်ႈၸူးပၢင်ၵုမ်လူင်ၸၢဝ်းၶိူဝ်းပတ်းပိုၼ်ႉမိူင်းႁူမ်ႈတုမ် ထႅင်ႈယူႇ။