ဝၼ်းယႂ်ႇလူင်ႁူင်ႁၢင်း ဢႃႇယုၸဝ်ႈႁေႃၶမ်းမိူင်းထႆးၶွပ်ႈႁွပ်ႈ 85 ဝႃႇသႃ (ဝၼ်းပေႃႈ) ၼႂ်းဝၼ်းထိ 05/12/12 ၼႆႉ လွႆၵေႃႇဝၼ်း ငဝ်ႈၼႃႈလိၼ်သိုၵ်းၵဵင်းတုင် ၸတ်းႁဵတ်း ပၢင်ယွင်ႈယေႃးယွၼ်းပွၼ်း ႁႂ်ႈဢႃႇယုၸဝ်ႈယိုၼ်းယၢဝ်း ၶၢဝ်းႁိုင်။ ၾၢႆႇၼိုင်ႈ ၸဝ်ႈၼႃႈတီႈထႆးဢွၼ်ႁူဝ်ၵူၼ်းဝၢၼ်ႈ ၸတ်းပၢင်ပိုတ်ႇလွင်ႈႁူမ်ႇလူမ်ႈၸွမ်းလႅၼ်လိၼ်။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းထိ 05/12/12 ပွတ်းၼႂ် မီးၵၢၼ်ႁႅၼ်းတၢၼ်းၸွမ်းၾိင်ႈထုင်းသႃသၼႃ ပုတ်ႉထ၊ ႁဵတ်းတၢင်း လီယွၼ်းပွၼ်းထိုင် ၸဝ်ႈႁေႃၶမ်းထႆး ႁႂ်ႈယူႇလီၵိၼ်ဝၢၼ်၊ ၵတ်းၸိုၼ်ႈယဵၼ် ၸႂ် ႁႂ်ႈဢႃႇယု ယိုၼ်းယၢဝ်း။ ၵၢင်ၶမ်ႈ တင်ႈတႄႇယၢမ်း 19:00 မူင်းၵႂႃႇ ၸဝ်ႈၵွၼ်းၸိုၼ်ႈ (ၽူႈၵွၼ်းၼႃႈလိၼ်သိုၵ်း မၢႆ 1 ၵဵင်းတုင်) ဢွၼ်ႁူဝ်ၼမ်းၼႃႈၵူၼ်း သိုၵ်း၊ ၵူၼ်းမိူင်း၊ ၶူးသွၼ်၊ လုၵ်ႈႁဵၼ်း၊ မေႃယႃ တီႈလွႆၵေႃႇဝၼ်း ၸပ်းတဵၼ်းတိူင်ႇၵၢဝ်ႇယွၼ်းပွၼ်းပၼ်ၸဝ်ႈႁေႃၶမ်းထႆး ထႅင်ႈ၊  မီးၸဝ်ႈၼႃႈတီႈဝၢၼ်ႈမိူင်းထႆး ၵႂႃႇၶဝ်ႈႁူမ်ႈ ယွၼ်းပွၼ်းၸွမ်းတင်းၼမ်။


ဝၢႆးယွၼ်းပွၼ်းယဝ်ႉ သိုပ်ႇမီးတၢင်းၵႃႈၼူၵ်ႉ/တူဝ်း၊ တၢင်းၵႃႈမွၵ်ႇတိၼ်မွၵ်ႇမိုဝ်း ၶွင်လုၵ်ႈႁဵၼ်းလွႆ ၵေႃႇဝၼ်း၊ ႁူင်းႁဵၼ်းတႃႉ ထူင် ဝၢၼ်ႈထိူတ်ႉထႆး။ မီးပၢင်လမ်ႁူဝ်(ၵၼ်ႇတေႃး)သေယဝ်ႉတူဝ်ႈၵႂႃႇ။

ၾၢႆႇၼိုင်ႈတၢင်းၼိုင်ႈ ဢွၼ်ၼႃႈၼႆႉ မိူဝ်ႈဝၼ်းထိ 04/12/12 ပွတ်းၼႂ် ၸဝ်ႈၼႃႈတီႈထႆး ၽူႈၵွၼ်း တပ်ႉမူႇ တီႈလၢၼ်ႇ ၽယႃးၾႆး ဢွၼ်ႁူဝ်ၵူၼ်းဝၢၼ်ႈ လွႆၵေႃႇဝၼ်းလႄႈ ၽယႃးၾႆး ၸတ်းႁဵတ်း ပဵၼ်ပၢင်ပိုတ်ႇၶူင်းၵၢၼ်မူႇဝၢၼ်ႈလႅၼ်လိၼ် ၵႅၼ်ႇၶႅင် (ထႆး-မၢၼ်ႈ-လၢဝ်း)ၸွမ်းလႅၼ်လိၼ်တႆး-ထႆး ဝူင်ႈၵၢင်လၢၼ်ႇ ယႃးၾႆးလႄႈ လၢၼ်ႇႁူမ်ႇလူမ်ႈလွႆၵေႃႇဝၼ်း။ မီးၽူႈယႂ်ႇၵူၼ်းလူင်ထႆး ၾၢႆႇသိုၵ်း၊ ၾၢႆႇပလိၵ်ႈ၊ ၽူႈၵွၼ်းၸႄႈဝဵင်းမႄႈၾႃႉလူင်၊ ၽူႈၵွၼ်းဢိူင်ႇ၊ ၽူႈၵွၼ်းဝၢၼ်ႈ၊ ၵူၼ်းဝၢၼ်ႈ၊ ၾၢႆႇမေႃယႃ မႄႈၾႃႉလူင်၊ ၶူးသွၼ်လႄႈလုၵ်ႈႁဵၼ်း ၽယႃးၾႆးၸိူဝ်းၼႆႉၶဝ်ႈႁူမ်ႈ။ ၾၢႆႇတႆးမီးၸဝ်ႈ သိုၵ်းၵွၼ်း ၸိုၼ်ႈ၊ ၶူးသွၼ်လႄႈ လုၵ်ႈႁဵၼ်းႁူင်းႁဵၼ်းလွႆၵေႃႇဝၼ်း၊ ၽူႈယႂ်ႇၵူၼ်းလူင်၊ ၵူၼ်းဝၢၼ်ႈ လႄႈ မေႃယႃႁူင်းယႃၶဵမ်ၶမ်းၶူင်း လွႆၵေႃႇဝၼ်းၸိူဝ်းၼႆႉၶဝ်ႈႁူမ်ႈ၊ မီးၽူႈၶဝ်ႈႁူမ်ႈတင်းမူတ်း မွၵ်ႈႁဵင်ပၢႆ-ၼႆယဝ်ႉ။


ပွတ်းၼႂ်ယၢမ်း 10:00 မူင်း ၽူႈၵွၼ်းၸႄႈဝဵင်းမႄႈၾႃႉလူင် ပဵၼ်ၽူႈၼင်ႈၸိုင်ႈ ၵၢဝ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႅဝ်ႈ။ ဝၢႆးၼၼ်ႉ ၽူႈယႂ်ႇၵူၼ်းလူင်ၸိူဝ်းမႃးၶဝ်ႈႁူမ်ႈ ၸႅၵ်ႇပၼ်သိူဝ်ႈၼႃလႄႈၽႃႈမႆ ပၼ်ၽူႈ မီးဢႃႇယု (ၵူၼ်းထဝ်ႈၵူၼ်းၵႄႇ) ၸိူဝ်းယူႇၼႂ်းလႅၼ်လိၼ်သွင်ၾင်ႇ မိူင်းတႆးတင်းမိူင်းထႆးၼင်ႇၵၼ်။ ဝၢႆးၼၼ်ႉ သိုပ်ႇထၢႆႇႁၢင်ႈၵိုၵ်းၵၼ်ပဵၼ်တီႈမၢႆတွင်း။ မီးၵၢၼ်တူင်ႉၼိုင် မိူၼ်ၼင်ႇတၢင်းၵႃႈၾိင်ႈထုင်း တႆး လုၵ်ႈႁဵၼ်းလွႆၵေႃႇဝၼ်း၊ ႁူင်းႁဵၼ်းတႆးမိတ်ႉၽယႃးၾႆး၊ ၵၢၼ်လဵၼ်ႈႁႅင်း၊ မေႃယႃႁူင်းယႃမႄႈ ၾႃႉလူင်ၶဝ် ၵူတ်ႇထတ်းတၢင်းပဵၼ်၊ ၵူတ်ႇၶဵဝ်ႈ၊ ထူၺ်ႈၶဵဝ်ႈ၊ ၸႅၵ်ႇပၼ်ယႃႈယႃၵူၼ်းဝၢၼ်ႈ- ၸိူဝ်းၼႆႉ။