ပီမႂ်ႇတႆး ပီငူး 2107 ဢၼ်တေလႅၵ်ႈလၢႆႈၶၢႆႉၶဝ်ႈထိုင်မႃး ၼႂ်းဝၼ်းထိ 14/12/12 ၼႆႉ ၼႂ်းမိူင်းထႆး တေႃႇထိုင် လႅၼ်လိၼ်တႆး-ထႆး ၸိူဝ်းၼႆႉ မီးလွင်ႈႁၢင်ႈႁႅၼ်း ၸတ်းႁဵတ်းပၢင်ပွႆးႁပ်ႉတွၼ်ႈလၢႆလၢႆ တီႈ၊ မီးမေႃႁွင်ႉ ၽဵင်းၵႂၢမ်းတႆး ၸိုဝ်ႈသဵင်ယႂ်ႇၶဝ်ႈႁူမ်ႈမူၼ်ႈၸႂ်ပၼ်တင်း ၼမ်။

ၸႄႈတွၼ်ႈၵဵင်းမႆႇ
ဝၼ်းထိ 12-14/12/2012 ဝတ်ႉၵူႇတဝ်ႈ ဝဵင်းၵဵင်းမႆႇ။ မီးမေႃႁွင်ႉၽဵင်းၵႂၢမ်းတႆး ၸၢႆးထႅၼ်ႈလႅဝ်း၊ ၼၢင်းလၢဝ်ၼုမ်ႇႁွမ်၊ ၼၢင်းလၢဝ်လၢဝ်၊ ၼၢင်းလႃၼူၼ်း၊ ၸၢႆးလွမ်ႉဝုၼ်း ၸိူဝ်းၼႆႉမႃးမူၼ်ႈၸႂ်ပၼ်။

ဝၼ်းထိ 13/12/2012 ဝၢၼ်ႈလၢၼ်း ဢိူင်ႇမွၼ်ႈပိၼ်ႇ မိူင်းၾၢင်။

ဝၼ်းထိ 12-14/12/2012 တီႈဝတ်ႉၾႃႉဝဵင်းဢိၼ်း ဝၢၼ်ႈလၵ်းတႅင်ႇ၊ ဢိူင်ႇပဵင်းလူင် ၸႄႈဝဵင်းဝဵင်းႁႅင်။

ၸႄႈတွၼ်ႈၵဵင်းႁၢႆး  
ဝၼ်းထိ 11-15/12/2012 ဝၢၼ်ႈႁိၼ်တႅၵ်ႇ (ထိူတ်ႉထႆး) ၸႄႈဝဵင်းမႄႈၾႃႉလူင်။

ဝဵင်းလူင်မိူင်းၵွၵ်ႇ (ၵုင်းထဵပ်ႈ)
ဝၼ်းထိ 15-16/12/2012 ၸတ်းတီႈသမႃးၶူမ်းထႆးရႃးမၼ်း ၸႄႈဝဵင်းဝၢင်းၶုၼ်ထဵၼ်း။ မီးၽူႈႁွင်ႉၵႂၢမ်း ၸၢႆးသႅင်ၸွမ်ၾႃႉ၊ ၼၢင်းၶမ်းၼွင်ႉ၊ ၵႃႈၶဝ်ႈတူၺ်းၼိုင်ႈၵေႃႉ 100-400 ဝၢတ်ႇ။ ဢမ်ႇမီးတီႈၼင်ႈ 100 ၊ မီးတီႈၼင်ႈ 200 ၊ မီးတီႈၼင်ႈ မီးပႃးၽိူၼ်တၢင်းၵိၼ် 400 ။

ဝၼ်းထိ 15-16/12/2012 ဝတ်ႉမႂ်ႇ သႃထုပရႃႇတိတ်ႇ ၶဵတ်ႇယၢၼ်းၼႃးဝႃး။ မီးၸုမ်းၼုမ်ႇႁၢႆးၸၢႆးယိင်း တီႈၵုင်းထဵပ်ႈ လဝ်ႇမူၼ်ႈတူၼ်ႈၸႂ်ပၼ်။

လႅၼ်လိၼ်တႆး-ထႆး
ဝၼ်းထိ 12-14/12/2012 လွႆတႆးလႅင်း ငဝ်ႈၸိုင်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) တေႃႇၼႃႈမိူင်းထႆး ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ်။

ဝၼ်းထိ 12-15/12/2012 လွႆသၢမ်သိပ်း (လွႆသၼ်ၸု) ငဝ်ႈငုၼ်းတပ်ႉၸုမ်း 727 (RCSS/SSA) ။ တေႃႇၼႃႈမိူင်းထႆး ၸႄႈဝဵင်းမိူင်းၾၢင်။

ဝၼ်းထိ 12-14/12/2012 ၵွင်းမုင်ႈမိူင်း ငဝ်ႈငုၼ်းၼႃႈလိၼ်သိုၵ်းမၢႆ 6 (RCSS/SSA) ၊ တေႃႇၼႃႈမိူင်းထႆး ၸႄႈဝဵင်းမႄႈႁွင်ႈသွၼ်။  မီးဝူင်းၼူဝ်ႊၼဵမ်ႊ (Nonames) ၵဵင်းမႆႇ တေႁွတ်ႈၽႅဝ် ႁွင်ႉၽဵင်းၵႂၢမ်းမူၼ်ႈၸႂ်ပၼ်။

ဝဵင်းႁူဝ်မိူင်း
ဝၼ်းထိ 11-15/12/2012 ဝဵင်းႁူဝ်မိူင်း ၸိုင်ႈတႆးပွတ်းၸၢၼ်း (ဢွင်ႈတီႈငဝ်ႈငုၼ်းၵဝ်ႇ တပ်ႉသိုၵ်းမိူင်းတႆး MTA ဢၼ်ၸဝ်ႈၶုၼ်သႃႇဢွၼ်ႁူဝ်) ။

ပီမႂ်ႇတႆးၼႆႉ လႅၵ်ႈလၢႆႈၶၢႆႉၸွမ်းလၵ်းၼီႈပီတႆး။ ၼႂ်းပီၶရိတ်ႉ 2012 ၊ ပီသႃသၼႃ 2555 (မိူင်းထႆး)၊ ပီသႃသၼႃ 2556 (ၸိုင်ႈမိူင်းႁူမ်ႈတုမ်မၢၼ်ႈ)ၼႆႉ လိူၼ်သိပ်းသွင်လပ်း မႅၼ်ႈမိူဝ်ႈလၵ်းၼီႈပီတႆး 2106 (ပီၼၵႃး) လႅၵ်ႈလၢႆႈၶၢႆႉၶဝ်ႈ ပီ 2107 (ပီငူး)။ ပီမႂ်ႇတႆး လိူၼ်ၸဵင်မႂ်ႇဝၼ်းၼိုင်ႈပီၼႆႉ တူၵ်းမႅၼ်ႈဝၼ်းထိ 14/12/2012 ၊ ၵွပ်ႈၼၼ် ၶမ်ႈၶိုၼ်းဝၼ်းထိ 13 လိူၼ် 12 လပ်း တင်ႈတႄႇ ယၢမ်းတဵင်ႈၶိုၼ်းၵႂႃႇ ၸၢဝ်းၶိူဝ်းတႆး ဢွၼ်ၵၼ်ႁူမ်ၸူမ်းႁပ်ႉတွၼ်ႈပီမႂ်ႇတႆး တႄႉတႄႉဝႃႈဝႃႈ။