ၸဝ်ႈၼႃႈတီႈမၢၼ်ႈ ဢၼ်ဢူးဢွင်ႇမိၼ်းဢွၼ်ႁူဝ် ႁွတ်ႈၽႅဝ်ဢႅဝ်ႇယဵမ်ႈမိူင်းလႃး ၵူၼ်းၼပ်ႉႁူဝ် သိပ်း။ လၢတ်ႈတီႈၸုမ်းမိူင်းလႃး ႁႂ်ႈႁဵတ်းၸွမ်းပိူင်ငဝ်ႈပိုင်းမိူင်း 2008 သူင်ႇတူဝ်တႅၼ်းၶဝ်ႈလဵပ်ႈႁဵၼ်း ပၢင်ၵုမ်သၽႃး၊ ၸွႆႈပႃးလွင်ႈငိုၼ်းတွင်းၼပ်ႉႁူဝ်သိပ်းလၢၼ်ႉ။

ဝၼ်းထိ 03/12/12 (မိူဝ်ႈၼႆႉ) မွၵ်ႈယၢမ်းတဵင်ႈဝၼ်း ဢူးဢွင်ႇမိၼ်း ၵႅမ်ႁူဝ်ပဝ်ႈ (မၢႆ 2) ၶွမ်ႊမတီႊ ၶိုင်ပွင် လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC)ဢွၼ်ႁူဝ်ၸုမ်းၸိူဝ်း ၶီႇႁိူဝ်းဝိၼ်မႅင်းမီႈ 2 လမ်း ၵႂႃႇၽႅဝ်တီႈ မိူင်းလႃး ၼႃႈလိၼ်တပ်ႉသိုၵ်း (NDAA) ၸိုင်ႈတႆးပွတ်းဢွၵ်ႇ။ သွင်ၾၢႆႇႁူပ်ႉထူပ်းဢုပ်ႇ ၵၼ် တေႃႇထိုင်ယၢမ်း 13:30-14:30 မူင်း ၵိၼ်ၶဝ်ႈႁူမ်ႈမူႇၵၼ်။ မွၵ်ႈယၢမ်း 15:00 မူင်း ၸုမ်းၸိူဝ်း ဢူးဢွင်ႇမိၼ်းဢွၼ်ႁူဝ် ဝိၼ်ၵႂႃႇတီႈသိုဝ်လိုဝ်း၊ လႆႈငိၼ်းဝႃႈတေပွၵ်ႈၶိုၼ်းမႃးၼွၼ်း တီႈၵဵင်းတုင်၊ မိူဝ်ႈၽုၵ်ႈ ၸင်ႇသိုပ်ႇၶၢဝ်းတၢင်းၵႂႃႇ ၼႃႈလိၼ်ဝႃႉ ငဝ်ႈငုၼ်းပၢင်သၢင်း- ၼႆယဝ်ႉ။

ၶၢဝ်းတၢင်းပွၵ်ႈၼႆႉ ၸွမ်းၼင်ႇၾၢႆႇမၢၼ်ႈပွင်ႇလႅင်း ၸႅင်ႈပၼ်ဝႆႉၼၼ်ႉ တင်းၶီႇႁိူဝ်းဝိၼ်မႅင်းမီႈ လႄႈၸိူဝ်းၶီႇလူတ်ႉၵႃး  ဢၼ်လုၵ်ႉၵဵင်းတုင်ၵႂႃႇ မီးၸဝ်ႈၼႃႈတီႈမၢၼ်ႈတင်းမူတ်း 39 ၵေႃႉ၊ ၵူၺ်းၵႃႈ မိူဝ်ႈၵႂႃႇၽႅဝ်တီႈမိူင်းလႃး ၸိူဝ်းမႃးတၢင်းၵၢင်ႁၢဝ် တင်း ၸိူဝ်းမႃးတၢင်းလိၼ် မီးၵူၼ်း 50 ပၢႆ။ ၾၢႆႇၸဝ်ႈၼႃႈတီႈမိူင်းလႃးၵေႃႈ တင်ႈတႄႇႁူဝ်ပဝ်ႈလူင် ၸဝ်ႈၸၢႆးလိုၼ်း လူင်းမႃး၊ ပႃးၸဵမ်ၾၢႆႇသိုၵ်း၊ ၾၢႆႇၽွင်းငမ်းၸိူဝ်းၼႆႉ မႃးပႂ်ႉႁပ်ႉတွၼ်ႈႁူပ်ႉထူပ်းမၢၼ်ႈတင်းမူတ်း၊ ၵွပ်ႈၵူၼ်းၼမ်လႄႈ ၵၢၼ်ဢုပ်ႇ ဢူဝ်း ပေႃးဢမ်ႇၶႂ်ႈငိၼ်းသင်- လႅင်ႇၶၢဝ်ႇလႅၼ်လိၼ်မိူင်းတႆး-ၶႄႇလၢတ်ႈၼႄၼႆယဝ်ႉ။

သိုပ်ႇလၢတ်ႈဝႃႈ- ဢူးဢွင်ႇမိၼ်း လၢတ်ႈၵႂၢမ်းဝႃႈ ၵွပ်ႈဢမ်ႇယၢမ်ႈၽႅဝ်သေပွၵ်ႈလႄႈ မႃးဢႅဝ်ႇမႃး ယဵမ်ႈၸႂ်းၵၼ်လႄႈမႃး မိုတ်ႈၵိုဝ်းၵၼ်။ ၶႂ်ႈႁႂ်ႈတင်းသွင်ၾၢႆႇႁဵတ်းၸွမ်းၶေႃႈလႆႈၸႂ် ဢၼ်လႆႈတူၵ်း လူင်းၵၼ်မႃး 3 မိူဝ်ႈ 3 ပွၵ်ႈၸိူဝ်းၼၼ်ႉ ႁႂ်ႈဢွၵ်ႇ ၼမ်ႉဢွၵ်ႇတူဝ်ၵႂႃႇ- ဝႃႈၼႆ။

ၼွၵ်ႈသေၼၼ်ႉ ပဵၼ်ဢူးတဵင်းၸေႃႇ လၢတ်ႈၵႂၢမ်းၵမ်ႈၼမ်။ လၢတ်ႈဝႃႈ- ၸွမ်းၼင်ႇဢၼ်ၸုမ်းမိူင်း လႃးတုၵ်းယွၼ်းဝႆႉ ၸိူဝ်းၼၼ်ႉ တေၶတ်းၸႂ်ပၼ်ၵႂႃႇ။ လိူဝ်သေၼၼ်ႉ ၵဵဝ်ႇလူၺ်ႈလွင်ႈၸၢၵ်ႈၾႆး (ၾႆးၾႃႉႁႅင်းၼမ်ႉ)ၸိူဝ်းၼႆႉ ၶႂ်ႈႁဵတ်းလၢႆတီႈၵေႃႈႁဵတ်း၊ လွင်ႈမိူင်းမေႃႇႁႄႈၸိူဝ်းၼႆႉၶႂ်ႈႁဵတ်းၵေႃႈ ႁဵတ်းၵႂႃႇ။ ၵဵဝ်ႇလူၺ်ႈၵၢၼ်သိုၵ်းၵေႃႈ တုၵ်းယွၼ်းႁႂ်ႈႁဵတ်းၸွမ်းပိူင် ငဝ်ႈပိုင်းမိူင်း 2008 ။ ၵဵဝ်ႇလူၺ်ႈ ၵၢၼ်မိူင်းၵေႃႈ ၸွမ်းၼင်ႇၼႂ်းပီၼႃႈ (လိူၼ်ၵျႅၼ်ႊၼိဝ်ႊရီႊ)ၼႆႉ တေမီးပၢင်ၵုမ်သၽႃး (ၸၼ်ႉၸႄႈမိူင်း)လႄႈ ယွၼ်းႁွင်ႉမွၵ်ႇဝႆႉႁႂ်ႈသူင်ႇတူဝ်တႅၼ်းၵႂႃႇၶဝ်ႈလဵပ်ႈႁဵၼ်း- ၼႆယဝ်ႉ။

ၸွမ်းၼင်ႇဢၼ်ၸုမ်းမိူင်းလႃးယွၼ်းဝႆႉတႃႇႁဵတ်းမႆႉ 10,000 တၼ်ႊၼၼ်ႉ မိူဝ်ႈၼႆႉၾၢႆႇမၢၼ်ႈ ဢၼုၺၢတ်ႈပၼ် ႁႂ်ႈႁဵတ်း 1,000 တၼ်ႊၵွၼ်ႇ။ ၼွၵ်ႈသေၼၼ်ႉ ၸွႆႈထႅမ်ပၼ်ပႃးငိုၼ်းတႃႇ 60 လၢၼ်ႉပျႃးပၢႆ (600 သႅၼ်ပၢႆ)၊ တႃႇ 40 လၢၼ်ႉ ပဵၼ်တႃႇငိုၼ်းလိူၼ် 2 လိူၼ် ဢၼ်ၾၢႆႇလူင်ပွင်ၸိုင်ႈ တူၵ်းလူင်းဝႆႉဝႃႈတေပၼ်ငိုၼ်းလိူၼ် 20 လၢၼ်ႉ (200 သႅၼ်)၊ တႃႇ 20 လၢၼ်ႉပၢႆသမ်ႉ ပဵၼ်ၵႃႈၶဝ်ႈ သၢၼ် ဢၼ်လႆႈတူၵ်းလူင်းဝႆႉဝႃႈ တေပၼ် 1 လိူၼ် 1,000 ထူင် တႃႇ 2 လိူၼ်၊ တင်းၵႃႈ ငိုၼ်းလိူၼ် 2 လိူၼ် ႁူမ်ႈၵၼ် 60 လၢၼ်ႉပၢႆ- ဝႃႈၼႆ။ 

ပၢင်ႁူပ်ႉထူပ်းဢုပ်ႇဢူဝ်းပွၵ်ႈၼႆႉ ၾၢႆႇၸုမ်းမိူင်းလႃး ဢမ်ႇတုၵ်းယွၼ်းသင်၊ လႆႈတၢင်ႇၼႄလွင်ႈလႆႈ တင်ႈပဵၼ်မႃးမိူင်းလႃး၊ လွင်ႈပူၵ်းပွင် ႁဵတ်းသဵၼ်ႈတႃႈသၢႆတၢင်းၼႂ်းဝၢၼ်ႈဢိူင်ႇ ၼႂ်းၼႃႈလိၼ်မိူင်းလႃး ၸိူဝ်းၼႆႉၵူၺ်း- ၼႆယဝ်ႉ။

ၽူႈယႂ်ႇၵူၼ်းလူင်မၢၼ်ႈၸိူဝ်းၵႂႃႇမိူင်းလႃးပွၵ်ႈၼႆႉ မီးဢူးဢွင်ႇမိၼ်းဢွၼ်ႁူဝ်။ ၽွင်းလူင်ၵိုၵ်းလုမ်း ၸွမ်ၸိုင်ႈ ဢူးၸူဝ်းတဵင်း။ ၽွင်းလူင်ၾၢႆႇလႅၼ်လိၼ် ဢူးတဵင်းထေး။  ၽွင်းလူင်ၾၢႆႇသၽႃး ဢူးတဵင်းၸေႃႇ။ ၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ။  ၽွင်းလူင်ႁွင်ႈၵၢၼ်လူင်ၾၢႆႇႁူမ်ႇလူမ်ႈ လႄႈလႅၼ်လိၼ် လူင်ပွင်ၸိုင်ႈၸႄႈမိူင်းတႆး ၸဝ်ႈသိုၵ်းလူင်ဢွင်ႇတူႇ။ ၽူႈၵွၼ်းတိူင်းသိုၵ်း (သၢမ်ၸဵင်ႇ) တၢၼ်းထုၼ်းဢူး။ ၽူႈၵွၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) ဢွင်ႇၸူဝ်း ၸိူဝ်းၼႆႉ- ၼႆယဝ်ႉ။