ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) လႆႈႁူပ်ႉဢုပ်ႇဢူဝ်း ၸုမ်းၶိုင်ပွင်လွင်ႈငမ်းယဵၼ် လူင်ပွင်ၸိုင်ႈ တဵင်းၸဵင်ႇ၊ လႆႈၸႂ်တူၵ်းလူင်းဢမ်ႇပဵၼ်တၢင်းၵၢၼ်သေတႃႉ သင်ဝႃႈ ႁဵတ်းဢွၵ်ႇၼမ်ႉဢွၵ်ႇတူဝ်လႆႈ ပဵၼ်လွင်ႈပဵၼ်ၵၢၼ် လႆႈၽွၼ်းလီတင်းသွင်ၾၢႆႇ။

ပူၼ်ႉမႃးမိူဝ်ႈဝၼ်းထိ 09/11/12 ၵၢင်ၶမ်ႈ တင်ႈတႄႇယၢမ်း 18:00-21:00 မူင်း (3 ၸူဝ်ႈမူင်း)၊ ဢိင်ၼိူဝ်ၶွင်ႊသီႊႁူမ်ႈတုမ်ၵူႈ ၸၢဝ်းၶိူဝ်း (UNFC) လႆႈႁူပ်ႉထူပ်းဢုပ်ႇဢူဝ်းဢူးဢွင်ႇမိၼ်း ၵႅမ်ႁူဝ် ပဝ်ႈၶွမ်ႊမတီႊ ၶိုင်ပွင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC) ၼႂ်းဝဵင်းၵဵင်းမႆႇတီႈၼိုင်ႈသေ  ဝၼ်းထိ 18/11/12 ၶုၼ်ဢူၵ်ႉၵႃႇ ၵႅမ်ၽူႈၼမ်းၼႂ်းမၢႆ 2 UNFC လၢတ်ႈၼႄဝႃႈ- ဢၼ် UNFC လႆႈႁူပ်ႉထူပ်းဢုပ်ႇဢူဝ်းၵၼ်တင်း ဢူးဢွင်ႇမိၼ်းပွၵ်ႈၼႆႉ လႆႈၸႂ်တူၵ်းလူင်းဢမ်ႇပဵၼ်တၢင်းၵၢၼ် လၢႆၶေႃႈ၊ ၵူၺ်းၵႃႈ သင်ဝႃႈဢွၵ်ႇ ၼမ်ႉဢွၵ်ႇတူဝ် မႃးတႄႉ မၼ်းပဵၼ်ၵၢၼ်လႆႈၽွၼ်းလီတင်း 2 ၾၢႆႇ- ဝႃႈၼႆ။

ၶုၼ်ဢူၵ်ႉၵႃႇၼႆႉ ၼွၵ်ႈသေပဵၼ်ၵႅမ်ၽူႈၼမ်းၼႂ်းမၢႆ 2 UNFC ယဝ်ႉ ယင်းပဵၼ်ပႃးႁူဝ်ပဝ်ႈၸုမ်းပူတ်း ပွႆႇၸၢတ်ႈ ပဢူဝ်း (PNLO) ဢၼ်တူၵ်းလူင်းၵိုတ်းယိုဝ်း ၵၼ်တင်းလူင်ပွင်ၸိုင်ႈမၢၼ်ႈၵႂႃႇ မိူဝ်ႈဝၼ်း ထိ 25/08/12 ၊ ပဵၼ်ၸုမ်းထိ 13 လႄႈၸုမ်းလိုၼ်းသုတ်း။

ၶုၼ်ဢူၵ်ႉၵႃႇ လၢတ်ႈဝႃႈ- ႁဝ်းၶႃႈလႆႈၸႂ်တူၵ်းလူင်းၵၼ်လၢႆၶေႃႈ၊ ၶေႃႈလႆႈၸႂ်ၸိူဝ်းၼၼ်ႉ 1.ပၼ်ႁႃ ၵၢၼ်မိူင်းတေလႆႈဢဝ်လၢႆး ၵၢၼ်မိူင်းၵႄႈလိတ်ႈ။ 2.လွင်ႈဢုပ်ႇဢူဝ်းၵၢၼ်မိူင်း တေဢမ်ႇလႆႈဢုပ်ႇ ဢူဝ်းၵၼ်တင်း ၸုမ်းလႂ်ၸုမ်းၼၼ်ႉ၊ တေလႆႈဢုပ်ႇဢူဝ်း ၵူႈၸုမ်းၸုမ်းၽွမ်ႉႁူမ်ႈၵၼ်တင်းသဵင်ႈ (UNFC ပႃးၸဵမ်ၸိူဝ်းဢမ်ႇၸႂ်ႈ UNFC)။ 3.ၵဵဝ်ႇၵပ်းႁူဝ်ၶေႃႈဢုပ်ႇဢူဝ်းတၢင်ႇဢၼ် တေၵႂႃႇဢုပ်ႇ ၵၼ်တင်း တီႈသုၼ်လွင်ႈငမ်းယဵၼ်မျၢၼ်ႇမႃႇ (Myanmar Peace Center) ၊ ၼႂ်းလိူၼ်ၻီႊသႅမ်ႊၿိူဝ်ႊ။

ႁူဝ်ၶေႃႈမိူၼ်ၼင်ႇ- 1.ၶွပ်ႇပိူင်ၵၢၼ်ဢုပ်ႇဢူဝ်း၊ တေယူႇၼႂ်းၶွပ်ႇပိူင်လႂ်။ 2.ၶပ်းမၢႆ/ႁူဝ်ၶေႃႈၵၢၼ် ဢုပ်ႇဢူဝ်း။ 3.ၵဵဝ်ႇၵပ်းလွင်ႈ တတ်းမၵ်းၶၢဝ်းယၢမ်း။ 4.လွင်ႈၸွႆႈထႅမ်လၢႆးႁဵတ်းသၢင်ႈ (ထဵၵ်ႊၼိၵ်ႊ) လႄႈ လွင်ႈငိုၼ်းၵႃႈ ၸႂ်ႉၸၢႆႇၼႂ်းၶၵ်ႉၵၢၼ်လွင်ႈငမ်းယဵၼ်။ ၼွၵ်ႈသေႁၢင်ႈႁႅၼ်းပိူဝ်ႈတႃႇပၢင်ၵုမ် ၼၼ်ႉ ဢၼ်ႁဝ်းၶႃႈထုၵ်ႇလႆႈႁဵတ်း မီးထႅင်ႈပိူင်ၼိုင်ႈ၊ ယႃႇႁႂ်ႈမီးလုၵ်ႈၸုမ်း UNFC သေၸုမ်း ၸုမ်းဢွၵ်ႇၼွၵ်ႈၶွပ်ႇၼွၵ်ႈတၢင်းသေ  ၵႂႃႇဢုပ်ႇဢူဝ်း တူၵ်းလူင်းၵၢၼ်မိူင်း တင်းမၢၼ်ႈတၢင်းႁင်း ၵူၺ်း- ဝႃႈၼႆ။

ၼႂ်းတႅဝ်းႁူမ်ႈ UNFC တင်းမူတ်းမီး 11 ၸုမ်းၼႆႉ ယႃႇႁႂ်ႈမီးသေၸုမ်းၸုမ်းၵႂႃႇဢုပ်ႇမၢၼ်ႈသေ တူၵ်းလူင်းႁင်းၵူၺ်း၊ ပေႃးၵႂႃႇတူၵ်း လူင်းႁင်းၸုမ်းၽႂ်ၸုမ်းမၼ်း ႁဵတ်းႁႂ်ႈၼႃႈၵၢၼ်တႃငၢၼ်းၸိူဝ်း UNFC ၶတ်းၸႂ်ႁဵတ်းသၢင်ႈမႃးတင်းမူတ်းၼၼ်ႉမဝ်ပႅတ်ႈမူတ်း၊ ၵွပ်ႈဝႃႈ ၾၢႆႇၼိုင်ႈၵေႃႈပိူၼ်ႈတိုၼ်း ထၢင်ႇထိူမ်ႁၼ်ဝႃႈ မၢၼ်ႈဢမ်ႇၶႂ်ႈဢုပ်ႇဢူဝ်းၸုမ်းၸၢဝ်းၶိူဝ်းမုၵ်ႉယႂ်ႇၾုင်လူင်၊ ၶႂ်ႈဢုပ်ႇၸုမ်းလႂ်ၸုမ်း ၼၼ်ႉသေ တူၵ်းလူင်းပႅတ်ႈ ငၢႆႈငၢႆႈ။ ပေႃးႁဵတ်းၼၼ် ဢဵၼ်းဢၢၼ်းႁဝ်းၶႂ်ႈလႆႈမိူင်းၾႅတ်ႊၻရိူဝ်ႊလ်၊ မိူင်းၻီႊမွၵ်းၶရေႊသီႊ ၸိူဝ်းၼႆႉ တေဢမ်ႇပဵၼ်လႆႈ- ၶုၼ်ဢူၵ်ႉၵႃႇထတ်းသၢင်ၼင်ႇၼႆ။

ဢွၼ်ၼႃႈၼႆႉ ၸုမ်းသိုဝ်ႇမွၼ်း (IMNA) လႆႈဢွၵ်ႇၶၢဝ်ႇဝႆႉဝႃႈ တႅဝ်းႁူမ်ႈ UNFC လႆႈတုၵ်းယွၼ်းၼေႇ ပျီႇတေႃႇ ပိူဝ်ႈတႃႇပိုၼ်ၽၢဝ်ႇ ၵိုတ်းယိုဝ်းပတ်းပိုၼ်ႉတင်းမိူင်း။ ၵပ်းၵၢႆႇလွင်ႈၼႆႉ ၶုၼ်ဢူၵ်ႉၵႃႇ ယင်းလၢတ်ႈဝႃႈ- ၼွၵ်ႈသေၼၼ်ႉ ႁဝ်းယင်းလႆႈတိုၵ်းသူၼ်းၶဝ်ဝႃႈ ႁႂ်ႈပိုၼ်ၽၢဝ်ႇပႃးလွင်ႈပူတ်းဝၢင်း ပွႆႇၽႃႈပၼ် ၵဵဝ်ႇလွင်ႈၵၢၼ် သၢၼ်ၶတ်းတၢင်းၵၢၼ်မိူင်းတင်းသဵင်ႈ၊ ၽူႈၵူၼ်းၸိူဝ်းမီးတၢင်းၽိတ်း မႃးၵဵဝ်ႇၵပ်းလွင်ႈၵၢၼ်မိူင်း တင်းသဵင်ႈ ၼၼ်ႉ ဢမ်ႇဝႃႈၵူၼ်းတူၵ်းၶွၵ်ႈ၊ ၵူၼ်းဢမ်ႇတူၵ်းၶွၵ်ႈၶဝ် ႁႂ်ႈလႆႈပိုၼ်ၽၢဝ်ႇပူတ်းဝၢင်းပွႆႇၽႃႈ ပၼ်တူတ်ႈ(တၢမ်ႇ)- ၼႆယဝ်ႉ။

ဢွၼ်ၼႃႈမိူဝ်ႈဢူးဢွင်ႇမိၼ်းပႆႇၶဝ်ႈမိူင်းထႆးၼၼ်ႉ ဢူးလႃႉမွင်ႇသူၺ်ႇ ၵေႃႉပဵၼ်ၽူႈၶဝ်ႈပႃးၼႂ်းၶွမ်ႊ မတီႊ ၶိုင်ပွင်လွင်ႈငမ်းယဵၼ် လၢတ်ႈတီႈၾၢႆႇသိုဝ်ႇၶၢဝ်ႇၸုမ်းၼိုင်ႈဝႃႈ- ၵႅမ်ႁူဝ်ပဝ်ႈဢူးဢွင်ႇမိၼ်း ဢမ်ႇမီးၽႅၼ်ၵၢၼ် ပိူဝ်ႈတႃႇႁူပ်ႉထူပ်း (UNFC) ၶဝ်။ မီးၽႅၼ်တေႁူပ်ႉထူပ်း မိူၼ်ၼင်ႇ ပႃႇတီႇမႂ်ႇ သုင်ၸိူဝ်ႉၸၢတ်ႈယၢင်းလႅင် (KNPP) ၊ ၸုမ်းမၢၼ်ႈၸိူဝ်းယူႇၼွၵ်ႈမိူင်း မိူၼ်ၼင်ႇတႅဝ်းႁူမ်ႈၻီႊမွၵ်း ၶရႅတ်ႊတိၵ်ႊလုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ၊ ၸုမ်း DPNS ၊ ၸုမ်းၼၢင်းယိင်းမိူင်းမၢၼ်ႈ (WLB) ၸိူဝ်းၼႆႉ။

UNFC ၼႆႉ ၵေႃႇတင်ႈၶိုၼ်ႈမႃးလူၺ်ႈ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇလုၵ်ႉၽိုၼ်ႉ ၶၢင် ၶျၢင်း ယၢင်း မွၼ်း ပႃးၸဵမ်တႆး၊ မီးလုၵ်ႈၸုမ်း တင်းမူတ်း 11 ၸုမ်း။  1.တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF)၊ 2.ၸုမ်းၶၢင်လွတ်ႈလႅဝ်း (KIO)၊ 3.ပႃႇတီႇမႂ်ႇသုင်ၸၢတ်ႈယၢင်းလႅင် (KNPP)၊ 4.ႁူမ်ႈတုမ်ၸၢတ်ႈ ယၢင်းၽိူၵ်ႇ (KNU)၊ 5.ပႃႇတီႇ မိူင်းမွၼ်းမႂ်ႇ (NMSP) ၊ 6.ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ၊ 7.မုၵ်ႉၸုမ်းပူတ်းပွႆႇ ၸၢတ်ႈပဢူဝ်း (PNLO) ၊ 8.ၶွင်ႊသီႊၸၢတ်ႈရၶႅင်ႇ (ANC) ၊ 9.တႅဝ်းႁူမ်ႈပူတ်းပွႆႇၸိူဝ်ႉၸၢတ်ႈ ပလွင်ႈ (PSLF) ၊ 10.ႁူမ်ႈတုမ်ၻီႊမွၵ်းၶရႅတ်ႊတိၵ်ႊလႃးႁူႇ (LDU) ၊ 11.ၸုမ်းၸိူဝ်ႉၸၢတ်ႈဝႃႉ (WNO) ။

ၼႂ်း 11 ၸုမ်းၼႆႉ ဢၼ်ဢဝ်လွင်ႈငမ်းယဵၼ်၊ တူၵ်းလူင်းၵိုတ်းယိုဝ်းၵၼ်တင်းမၢၼ်ႈ မီး 6 ၸုမ်း- CNF, KNPP, KNU, NMSP, SSPP/SSA, PNLO ။ ၸိူဝ်းပႆႇတူၵ်းလူင်းမီး 5 ၸုမ်း- KIO, ANC, PSLF, LDU, WNO ။

ၸုမ်းၸၢဝ်းၶိူဝ်း ၸိူဝ်းဢမ်ႇၶဝ်ႈပႃးၼႂ်း UNFC သေလႆႈတူၵ်းလူင်းၵိုတ်းယိုဝ်းၵၼ်တင်းမၢၼ်ႈမီး 7 ၸုမ်း- 1.တပ်ႉသိုၵ်းမိူင်းဝႃႉၽွမ်ႉ ႁူမ်ႈ (UWSA)၊ 2.တပ်ႉသိုၵ်းဢူၺ်းလီၻီႊမွၵ်းၶရႅတ်ႊတိၵ်ႊ ၸိူဝ်ႉၸၢတ်ႈ (NDAA) ၊ 3.တပ်ႉသိုၵ်းယၢင်းပုတ်ႉထ (DKBA) ၊ 4.ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉ သိုၵ်းၸိုင်ႈတႆး (RCSS/SSA) ၊ 5.ၸုမ်းၼႃႇၵ NSCN ၊ 6.ၶွင်ႊသီႊလွင်ႈငမ်းယဵၼ်ယၢင်း KPC ၊ 7.ပႃႇတီႇပူတ်းပွႆႇရၶႅင်ႇ (ALP) ၸိူဝ်းၼႆႉ။

ၼွၵ်ႈသေၼၼ်ႉ မီးထႅင်ႈပႃႇတီႇမိူင်းၵယၢၼ်းမႂ်ႇ (KNLP) ၊ မူႇၸုမ်းၼႆႉ  မီးၵၢၼ်တူၵ်းလူင်းၵိုတ်းယိုဝ်း ၵၼ်ဝႆႉ တင်းၸုမ်းသိုၵ်းမၢၼ်ႈ ၸဵမ်မိူဝ်ႈပီ 1994 ၊ တင်ႈတႄႇဝၢႆးၵိုတ်းယိုဝ်းမႃး ႁၢၼ်ႉတေႃႇထိုင်မိူဝ်ႈ လဵဝ် ပႆႇမီးၵၢၼ်တိုၵ်းယိုဝ်းၵၼ်သေပွၵ်ႈ၊ ပႆႇမီးၵၢၼ်တူၵ်းလူင်း ၵိုတ်းယိုဝ်းမႂ်ႇထႅင်ႈ၊  ပႆႇသႂ်ႇပႃးၼႂ်း ၸုမ်းဢဝ်လွင်ႈ ငမ်းယဵၼ် ဢၼ်ႁဵတ်းသၢင်ႈယူႇယၢမ်းလဵဝ်။

တႅဝ်းႁူမ်ႈ UNFC ၼႆႉမီးလၵ်းၵၢၼ်ယိူင်းဢၢၼ်းၵၢၼ်သိုၵ်း ၵၢၼ်မိူင်းၼင်ႇၵၼ်။ ၵၢၼ်သိုၵ်း ပိူဝ်ႈတႃႇ ၵေႃႇတင်ႈတပ်ႉသိုၵ်းႁူမ်ႈ တုမ်။ တွၼ်ႈၵၢၼ်မိူင်း ပိူဝ်ႈတႃႇၵေႃႇတင်ႈ ၸိုင်ႈမိူင်းႁူမ်ႈတုမ်ၾႄႊၻရိူဝ်ႊ၊ ႁႂ်ႈၸၢဝ်းၶိူဝ်းမီးသုၼ်ႇလႆႈၽဵင်ႇပဵင်းလႄႈ ႁႂ်ႈၵူႈၸၢဝ်းၶိူဝ်း မီးသုၼ်ႇလႆႈ ၽွင်းငမ်းတူဝ်ၵဝ်ႇႁင်းၶေႃ ၸိူဝ်းၼႆႉ။