ၵူၼ်းဝၢၼ်ႈၸၢဝ်းၶၢင် ႁဵတ်းၵိၼ်ၵၢၼ်သူၼ်/ၽဝ်ထၢၼ်ႇ ၼႂ်းဢိူင်ႇမိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ လႆႈထုၵ်ႇသိုၵ်းမၢၼ်ႈတိၺွပ်းပေႃႉထုပ်ႉယိုဝ်းတၢႆၽွင်းၵႂႃႇၽဝ်ထၢၼ်ႇ ပွၵ်ႈၶိုၼ်း ႁိူၼ်း။

ပူၼ်ႉမႃးမိူဝ်ႈဝၼ်းထိ 15/11/12 ယၢမ်းၵၢင်ဝၼ်းတဵင်ႈ၊ ၽွင်းၸၢဝ်းၶိူဝ်းၶၢင် ၵူၼ်းႁဵတ်းၵိၼ်ၵၢၼ် သူၼ်/ ၽဝ်ထၢၼ်ႇၵေႃႉၼိုင်ႈ ၵႂႃႇၽဝ်ထၢၼ်ႇပွၵ်ႈၶိုၼ်းႁိူၼ်း၊ ၺႃးသိုၵ်းမၢၼ်ႈ ၸွမ်းတၢင်း 6 ၵေႃႉ တိၺွပ်း။ ၸိၼႄးဝႃႈၵဵဝ်ႇၶွင်ႈၸုမ်းယိပ်းၵွင်ႈၵၢင်ႇၼႆသေ ပေႃႉထုပ်ႉယိုဝ်းတၢႆပႅတ်ႈ တီႈႁိမ်းၼမ်ႉပုင်ႇ တၢင်းၵႂႃႇၼမ်ႉတူႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းဝီးၵေႃႉၼိုင်ႈလၢတ်ႈဝႃႈ-ၵေႃႉတၢႆၸိုဝ်ႈႁွင်ႉ ဢူးလႃႉသမ်ႇပွၵ်ႉၼေႃႇ၊ ဢႃႇယု 48 ၊ ပဵၼ်ၵူၼ်းဢိူင်ႇမိူင်းဝီး၊ မီးလုၵ်ႈလၢင်း 5 ၵေႃႉ၊ ႁဵတ်းၵိၼ်ၵၢၼ်သူၼ် လႄႈၵၢၼ်ၽဝ် ထၢၼ်ႇ။ လူင်းလၸၢမ်ႇပွၵ်ႉၼေႃး ၼႆႉ ဢမ်ႇၵဵဝ်ႇၵၼ်တင်းၸုမ်း ယိပ်းၵွင်ႈၵၢင်ႇၸုမ်းလႂ်၊ မၼ်းပဵၼ် ၵူၼ်းၽဝ်ထၢၼ်ႇ ၵူၺ်း၊ ၶၢပ်ႈတူဝ်မၼ်းပူၼ်ႉ(ၾင်)မိူဝ်ႈဝၼ်းထိ 16/11/12 ယဝ်ႉ- ဝႃႈၼႆ။

ပီႈၼွင်ႉၸမ်ၸႂ်ၵေႃႉတၢႆလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ဢူးလႃႉသမ်ႇပွၵ်ႉၼေႃႇၼႆႉ ၺႃးၵွင်ႈ ၸၢၵ်ႈယိုဝ်းသႂ်ႇ 6 ၵမ်းသေ ၺႃးတီႈပုမ်/မိုဝ်း/ၶႃ၊ လႆႈႁၼ်ႁွႆးမၢၵ်ႇၵွင်ႈပဵၼ်ႁူးပဵၼ်ႁူးဝႆႉ၊ ၸွမ်းၼႃႈ မၼ်းၵေႃႈပဵၼ်ႁွႆး ပေႃႉထုပ်ႉသေၵႂ်ႈဝႆႉ၊ ႁူဝ်မႄႈမိုဝ်းၾၢႆႇၶႂႃ ပေႃးၸမ်ၶၢတ်ႇ၊ ၶူဝ်းၶွင်ၸႂ်ႉသွႆၸိူဝ်း ႁဵတ်းၵိၼ်ၵၢၼ်သူၼ် မိူၼ်ၼင်ႇ မိတ်ႈ/ၽႃႉဢၼ်မၼ်းပႃးၵႂႃႇၵိုၵ်းတူဝ်ၼၼ်ႉၵေႃႈ သိုၵ်းမၢၼ်ႈ ဢဝ်ၵႂႃႇမူတ်း။ သိုၵ်းမၢၼ်ႈၶဝ်လၢတ်ႈတီႈၼႂ်းဝၢၼ်ႈ ဝႃႈ မၼ်းဢၢင်ႈဢဝ်မၢၵ်ႇပွမ်းဝိုတ်ႉထိုမ်ႈသႂ်ႇႁဝ်း၊ ၵွပ်ႈၼၼ် ႁဝ်းပေႃႉထုပ်ႉၶႃႈ ႁႅမ်မၼ်း တၢႆပႅတ်ႈယဝ်ႉ- ဝႃႈၼႆ။

သိုၵ်းမၢၼ်ႈၸုမ်းဢၼ်ၶႃႈႁႅမ်တၢႆၸၢဝ်းၶၢင်ပွၵ်ႈၵမ်းၼႆႉ ပႆႇႁူႉဝႃႈပဵၼ်ၸုမ်းလႂ်၊ တိုၵ်ႉမီးၵၢၼ်ၸွပ်ႇ ထတ်းယူႇ။ ၵူၺ်းၵႃႈ သိုၵ်းမၢၼ်ႈ ဢၼ်တူင်ႉၼိုင်ပွတ်းမိူင်းဝီးၸိူဝ်းၼႆႉ မီးသိုၵ်းမၢၼ်ႈတပ်ႉၶလယ 144 ဢၼ်ဢဝ်ႁူမ်ႇလူမ်ႈ တေႃႈလွတ်ႇၵႅသ်ႉတ်/တေႃႈၼမ်ႉမၼ်း လိပ်း ၸုမ်းလဵဝ်ၵူၺ်း- ၵူၼ်းၼႂ်း ပိုၼ်ႉတီႈလၢတ်ႈၼႄၼင်ႇၼႆ။

ဝၢႆးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလႄႈ လူင်ပွင်ၸိုင်ႈမၢၼ်ႈတူၵ်းလူင်းၵိုတ်းယိုဝ်းၵၼ် ႁိုင်မႃးၶၢဝ်း တၢင်း 1 ပီၼႆႉ လႆႈႁၼ်ၵူၼ်းဝၢၼ်ႈ ၵူၼ်းသူၼ်တၢႆယွၼ်ႉၼမ်မႃးတိၵ်းတိၵ်း- ထဝ်ႈဝၢၼ်ႈထဝ်ႈၼႃး ၶဝ်လၢတ်ႈၼင်ႇၼႆ။