ဢိင်ၼိူဝ်တေမီးပၢင်ၵုမ်လူင်ၵူႈၸၢဝ်းၶိူဝ်း တီႈတႃႈၵုင်ႈ ဝၼ်းထိ 26-29/11/12 ၼႆႉသေ ၶႂ်ႈလၢတ်ႈ လွင်ႈ လိူဝ်သေၵေႃႇသၢင်ႈလွင်ႈယုမ်ႇယမ်ၵၼ်ထုၵ်ႇလႆႈ ၵေႃႇသၢင်ႈပႃးလွင်ႈၶဝ်ႈၸႂ်ၵၼ် (ပွင်ႇၸႂ်ၵၼ်)။ ၵွပ်ႈယုမ်ႇယမ်ဝႃႈ ပဵၼ်ဢၼ်ၵမ်ႉၸွႆႈပိူဝ်ႈတႃႇလႆႈမႃး လွင်ႈငမ်းယဵၼ်။

ဢၼ်လႆႈလၢတ်ႈလွင်ႈၼႆႉ ဢမ်ႇၸႂ်ႈၶႃႈႁဝ်းပဵၼ်ၽူႈႁူႉ ယႂ်ႇႁၼ် ၵႂၢင်ႈလူင်၊ ၸိူဝ်းဢၼ်ႁူႉယႂ်ႇႁၼ်ၵႂၢင်ႈလိူဝ် ၶႃႈႁဝ်းမီးတင်းၼမ် ဢၼ်ဝႃႈၼၼ်ႉ ၶႃႈႁဝ်းယွမ်းႁပ်ႉ ဝႆႉယူႇၶႃႈ။ ၵူၺ်းၵႃႈ ၵႂၢမ်းဢၼ် ၶႃႈႁဝ်းလၢတ်ႈၼႆႉ ပဵၼ်ၵႂၢမ်းၸိူဝ်းဢၼ် ၽူႈႁူႉယႂ်ႇႁၼ်ၵႂၢင်ႈၶဝ် သင်ႇလၢတ်ႈမႃးသေ လႆႈမႃးတေႃႉတႆႇၶႆႈၼႄၶိုၼ်း ၵူၺ်း။

ၼႂ်းယႂ်းႁိုၼ်ၽိုၼ်ထမ်း ထမ်ႇမပတ ပုတ်ႉထၵေႃးတမ လႆႈသင်ႇ လၢတ်ႈဝႆႉဝႃႈ- ၽူႈပေႉၼႆႉ မီးၶဵၼ်၊ ၽူႈၵၢၼ်ႉၼႆႉ သမ်ႉလႆႈ ၼွၼ်းသဝ်ႈမွင်၊ ၽူႈဢမ်ႇပေႉဢမ်ႇၵၢၼ်ႉ ၸင်ႇမီးလွင်ႈငမ်း ယဵၼ်။ လွင်ႈၼႆႉပွင်ႇဝႃႈ ၼင်ႇႁိုဝ်ပေႃးတေလႆႈလွင်ႈငမ်းယဵၼ် ႁဝ်းၶႃႈ ႁူႉပုၼ်ႈႁဝ်းလၢႆလၢႆၵူၺ်း ဢမ်ႇႁူႉပုၼ်ႈပိူၼ်ႈ ဢမ်ႇ ၸၢင်ႈလႆႈ။ ႁဝ်းၶႃႈႁူႉပုၼ်ႈပိူၼ်ႈ ဢမ်ႇႁူႉပုၼ်ႈႁဝ်းၵေႃႈ ဢမ်ႇၸၢင်ႈလႆႈ။ ပေႃးႁဝ်းၶႃႈႁူႉပုၼ်ႈပိူၼ်ႈပုၼ်ႈႁဝ်းၼင်ႇၵၼ် ႁဝ်းၸင်ႇၸၢင်ႈလႆႈလွင်ႈငမ်းယဵၼ်။

ၵဵဝ်ႇၵပ်းလူၺ်ႈၵၢၼ်ၵေႃႇသၢင်ႈလွင်ႈယုမ်ႇယမ်ၵၼ်ၼႆႉ ယူႇတီႈၶႃႈႁဝ်းဝူၼ်ႉမႅၼ်ႈဝႃႈ- ႁဝ်းလီလႆႈ ထတ်းႁႃၶူၼ်ႉႁႃဢွၼ် တၢင်းဝႃႈ ယွၼ်ႉပိူဝ်ႈသင်/ယွၼ်ႉလွင်ႈတၢင်းသင်လႄႈႁဝ်းၶႃႈဢမ်ႇမီးလွင်ႈ ယုမ်ႇယမ်ၵၼ်။ ပေႃးႁဝ်းထတ်းႁႃ ၶူၼ်ႉႁႃလႆႈဝႃႈ ယွၼ်ႉလွင်ႈတၢင်းၸိူဝ်းၼႆႉလႄႈ ႁဝ်းဢမ်ႇ မီးလွင်ႈယုမ်ႇယမ်ၵၼ်ၼႆၵေႃႈ ႁဝ်းၸၢင်ႈၶႆႈၸႂ်/ၶိုင်ပွင် လၢႆးဢၼ်တေမူၼ်ႉမႄး ၼင်ႇႁိုဝ်ႁဝ်းပေႃး တေမီးလွင်ႈယုမ်ႇယမ်ၵၼ်မႃး၊ လွင်ႈၼႆႉလီၵေႃႈဢဝ်-မဝ်ၵေႃႈပႅတ်ႈ။

ၼွၵ်ႈသေၵေႃႇသၢင်ႈလွင်ႈယုမ်ႇယမ်ၵၼ်ၼႆႉ ဢၼ်ႁဝ်းၶႃႈထုၵ်ႇလႆႈၵေႃႇသၢင်ႈထႅင်ႈၼၼ်ႉ ပဵၼ်လွင်ႈ ၶဝ်ႈၸႂ် (ပွင်ႇၸႂ်) ၼိူဝ်ၵၼ်။ ထုၵ်ႇလႆႈၶဝ်ႈၸႂ်ၼိူဝ်ၵၼ်ဝႃႈ- ၵွပ်ႈသင်လႄႈပိူၼ်ႈမႃးႁဵတ်းႁၢႆႉတေႃႇႁဝ်း၊ ၵွပ်ႈသင်လႄႈ ပိူၼ်ႈမႃးႁဵတ်းႁႂ်ႈႁဝ်း လိူတ်ႇမႆႈ၊ လွင်ႈၼႆႉႁဝ်းၶႃႈလီလႆႈထတ်းႁႃတူၺ်း။ ပေႃးႁဝ်းၶႃႈ ထတ်းႁႃတူၺ်းလႆႈ လွင်ႈတၢင်းမၼ်းၸိုင်ၸၢင်ႈလႆႈၽွၼ်းလီတင်းၼမ်။ မိူၼ်ၼင်ႇၵႂၢမ်းဢိင်း ၵလဵတ်ႈဝႃႈ- တီႈလႂ်မီးလွင်ႈ ၶဝ်ႈၸႂ်ၵၼ် တီႈၼၼ်ႈဢမ်ႇမီးလွင်ႈၸင်းၵၼ် (Where there is understanding, there is no hate) ။ ၼွၵ်ႈသေဢမ်ႇမီးလွင်ႈၸင်းၵၼ်ယဝ်ႉ လွင်ႈထၢင်ႇထိူမ် ၼိူဝ်ၵၼ် ၵေႃႈတေ ဢမ်ႇမီး၊ ပိူၼ်ႈႁဵတ်းသင်ၵေႃႈႁဝ်း တေၶဝ်ႈၸႂ်သေ ႁၢင်ႈႁႅၼ်းတူဝ်ႈတၼ်းဝႆႉ။ ပွင်ႇဝႃႈ ႁဝ်းတေဢမ်ႇမီးလွင်ႈပႅၵ်ႇ ၸႂ်ပိူင်ႈၸႂ်သေ တူဝ်ႈတၼ်းဝႆႉ ပိူဝ်ႈတႃႇႁႃလၢႆးၵႄႈလိတ်ႈမူၼ်ႉ မႄး။ ယွၼ်ႉၼၼ် ၵဵဝ်ႇၵပ်းလွင်ႈၶဝ်ႈၸႂ်ၼိူဝ်ၵၼ်ၼႆႉ ႁဝ်းၶႃႈထုၵ်ႇလႆႈ ၵေႃႇသၢင်ႈပႃး။

ၼွၵ်ႈသေၼၼ်ႉ ႁဝ်းၶႃႈလီလႆႈႁူႉၸၵ်းလွင်ႈယူပ်ႈယွမ်းၾၢႆႇႁဝ်း၊ ထမ်းမၻႃးၵူၼ်းႁဝ်းၶႃႈၼႆႉ မေႃႁၼ်ၶီႈ တႃပိူၼ်ႈဢမ်ႇမေႃ ႁၼ်ၶီႈတႃႁဝ်း/တူဝ်ၵဝ်ႇ၊ မေႃႁၼ်လွင်ႈယူပ်ႈယွမ်းပိူၼ်ႈ ဢမ်ႇမေႃ ႁၼ်လွင်ႈယူပ်ႈယွမ်းႁဝ်း၊ ယွၼ်ႉပိူဝ်ႈၼၼ် တီႈဢၼ် ဝၢၼ်ႈမိူင်းႁဝ်းၶႃႈဢမ်ႇမီးလွင်ႈငမ်းယဵၼ်မႃး၊ မီးတၢင်းလိူတ်ႇမႆႈမႃးတႃႇသေႇၼႆႉ မၢင်ၽဝ်ႇၵေႃႈပႃးလွင်ႈယူပ်ႈယွမ်းၾၢႆႇ ႁဝ်းၵေႃႈပဵၼ်လႆႈ။ လွင်ႈယူပ်ႈယွမ်းၾၢႆႇႁဝ်းမီးသင် ႁဝ်းၶႃႈထုၵ်ႇလႆႈ ထတ်းႁႃတူၺ်းသေ လီလႆႈဢွၼ်ၵၼ်မႄးၵႄႈ၊ ပေႃးဝႃႈႁဝ်းၶႃႈမႄးၵႄႈလႆႈလွင်ႈယူပ်ႈယွမ်းတူဝ်ၵဝ်ႇၼႆ တေပဵၼ်ဢၼ်ၵမ်ႉၸွႆႈလွင်ႈငမ်းယဵၼ်ယူႇ ႁၼ်ထိုင်ၼင်ႇၼႆ။

မုၵ်ႉမူႇၾုင်ၵူၼ်းတီႈလႂ်ဢမ်ႇဝႃႈ ပေႃးမီးၵူၼ်းၸႂ်ၸႃႉ/ၸႂ်ႁၢႆႉ/ၸႂ်ဢမ်ႇလီၼႆၸိုင် ၵူၼ်းႁိမ်းႁွမ်း ၼၼ်ႉၵေႃႈ ပဵၼ်ၸႂ်ၸႃႉ ၸႂ်ဢမ်ႇလီ ၸႂ်ဢမ်ႇၵတ်းဢမ်ႇယဵၼ်ၸွမ်း။ ၵူၺ်းၵႃႈ မုၵ်ႉမူႇၾုင်ၵူၼ်းၼႆႉ ပေႃးမီးၵူၼ်းၸိူဝ်း ဢၼ်ၸႂ်ၼိမ် ၸႂ်ၵတ်း ၸႂ်ယဵၼ်ၼႆႉ ႁိမ်းႁွမ်းၼၼ်ႉၵေႃႈ လႆႈၸႂ်ၼိမ် ၸႂ်ၵတ်း ၸႂ်ယဵၼ်ၸွမ်း၊ ၼႆႉပဵၼ် ထမ်းမၻႃးမိူင်းၶူင်းၵၢင်။

ယွၼ်ႉပိူဝ်ႈၼၼ် ၸိူဝ်းႁဝ်းၶႃႈဢၼ်ၶတ်းၸႂ်ႁႃတၢင်း လွင်ႈငမ်းယဵၼ်ၼႆႉ ႁႂ်ႈဢွၼ်ၵၼ်မီးၸႂ်ငမ်း ယဵၼ်သေၵမ်း။ ပေႃးႁဝ်း မီးၸႂ်ငမ်းၸႂ်ယဵၼ် ႁဝ်းၵေႃႈတေၸၢင်ႈႁႃတၢင်းလႆႈ ၼင်ႇႁိုဝ်ပေႃးတေမီး လွင်ႈငမ်းယဵၼ်၊ ပၼ်ႁႃမီးသင် လၢႆလၢႆၵေႃႈ ႁဝ်းၶႃႈတေၸၢင်ႈႁႃတၢင်းသေပူၼ်ႉၶၢမ်ႈလႆႈ။ မုင်ႈမွင်း ဝႃႈ ပၢင်ၵုမ်လူင်ၼႆႉ တေၸၢင်ႈႁဵတ်းသၢင်ႈ ၼႃႈၵၢၼ်လႆႈ ၸွမ်းၼင်ႇ ဢူၵ်းၼင်ႇၸႂ်ၵူၼ်းမိူင်းႁဝ်းၶႃႈ ဢၼ်လႆႈလိူတ်ႇမႆႈမႃးပီယၢဝ်းၶၢဝ်းႁိုင် ႁႂ်ႈပေႃးလႆႈ ၵတ်းယဵၼ်ၼၼ်ႉယူႇ။