ၼႂ်းၸိုင်ႈတႆးပွတ်းႁွင်ႇ 4 ၸႄႈဝဵင်း၊ ၼႃႈလိၼ်ဢၼ် တပ်ႉသိုၵ်းၸိုင်ႈတႆး SSPP/SSA တူင်ႉၼိုင် ၼၼ်ႉ သၢႆသိုၵ်းလႄႈပၢင်သဝ်းၸူဝ်ႈၵႅပ်ႉၶွင်တပ်ႉတႆး လႆႈထုၵ်ႇ သိုၵ်းမၢၼ်ႈၶိုၼ်ႈလေႃႇတိုၵ်း လႄႈပဵၼ်ပၢင်တိုၵ်းယူႇ ၶိူဝ်းယႂ်း။

ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းလူင်ၸၢႆးထူး ၵႅမ်ၽူႈၼမ်းၼႂ်း (SSPP/SSA)  လၢတ်ႈဝႃႈ- ၼွၵ်ႈသေ ငဝ်ႈငုၼ်းဝၢၼ်ႈႁႆးၼႆႉ ၶႂ်ႈဝႃႈပဵၼ်ပၢင်တိုၵ်းၵၼ်ၵူႈတီႈ၊ ပိူင်လူင်မၼ်း မိူၼ်ၼင်ႇၼႂ်းၸႄႈဝဵင်းၼမ်ႉ တူႈ၊ ၵျွၵ်ႉမႄး၊ သႅၼ်ဝီ၊ မိူင်းမိတ်ႈၸိူဝ်းၼႆႉ။ သိုၵ်းမၢၼ်ႈၼႆႉ ပေႃးဝႃႈငိၼ်းၶၢဝ်ႇသိုၵ်းတႆးတူင်ႉၼိုင် ၵႂႃႇမႃး လိုဝ်ႈသဝ်းယူႇ ပွတ်းတွၼ်ႈလႂ်ၵေႃႈ ဢဝ်သၢႆသိုၵ်းၶဝ်ၸွမ်း လိုပ်ႈလမ်းလေႃႇတိုၵ်းတိၵ်းတိၵိး လႄႈ လႆႈပဵၼ်ပၢင်တိုၵ်းၵၼ်မႃး ၶိူဝ်းၶိူဝ်းယႂ်းယႂ်း- ဝႃႈၼႆ။

သိုပ်ႇလၢတ်ႈဝႃႈ- ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇၸႄႈဝဵင်းသႅၼ်ဝီ၊ ၵျွၵ်ႉမႄး၊ ၼမ်ႉတူႈ၊ မိူင်းမိတ်ႈ ၸိူဝ်းၼႆႉ ပဵၼ်ၼႃႈ လိၼ် SSPP/SSA တပ်ႉၸုမ်း 1 ၊ တပ်ႉၸုမ်း 153 ၊ တပ်ႉၸုမ်း 612 ၸိူဝ်းၼႆႉ တူင်ႉၼိုင်။ ၾၢႆႇသိုၵ်းမၢၼ်ႈသမ်ႉ ပဵၼ်တပ်ႉၵွင်တႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ) 1 ၵျွၵ်ႉမႄး၊ တပ်ႉပႃႈတႂ်ႈ ၸၵၶ 16 သႅၼ်ဝီ။ ၼွၵ်ႈသေၼၼ်ႉ ဢၼ်ၶိုၼ်ႈယိုဝ်းတပ်ႉတႆးၼႆႉ ပႃးတပ်ႉဢွင်ႇလၢၼ်ႇ (မၼ်းတလေး) ထႅင်ႈ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းတပ်ႉၼႂ်းၼႃႈလိၼ်သိုၵ်းၵေႃႉၼိုင်ႈလၢတ်ႈဝႃႈ- သိုၵ်းမၢၼ်ႈၼႆႉ ဢမ်ႇၸႂ်ႈ တိုၵ်းယိုဝ်းႁဝ်းၶႃႈ ၵူၺ်း၊ တဵၵ်းတဵင်ပေႉၵိၼ်/လူလၢႆပႃးၵူၼ်းမိူင်းလူးၵွၼ်ႇ၊ ပိူဝ်ႈတႃႇမႄႇၶႂၢၵ်ႈဢဵၼ် ႁႅင်းသိုၵ်းၶဝ်သေ ၵေႃႇလိူင်ႈယိုဝ်းမၢၵ်ႇ သႂ်ႇဝၢၼ်ႈဢိူင်ႇ တီႈၵူၼ်းယူႇ၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ဝၢတ်ႇၸဵပ်းလုတၢႆၸွမ်း။ ၾၢႆႇၼိုင်ႈၵေႃႈ ၸိၼႄးၽူႈၵွၼ်း ဝၢၼ်ႈယူႇၾၢႆႇလင်ၵမ်ႉထႅမ်ပၼ်ႁႅင်း သိုၵ်းတႆး ၼႆသေ မတ်ႉၵႂႃႇ ပေႃႉထုပ်ႉ ၵုမ်းၶင်ၸိူဝ်းၼႆႉၵေႃႈမီး။ ၵွပ်ႈၼၼ် ႁဝ်းၶႃႈ ၵိုတ်းယိုဝ်းၵၼ် မႃးၼႆႉ တေလႆႈဝႃႈၵိုတ်းယိုဝ်းႁိမ်းႁွမ်းငဝ်ႈငုၼ်း ဝၢၼ်ႈႁႆးၵူၺ်း၊ တၢင်ႇတီႈတၢင်ႇလႅၼ်ဢမ်ႇၵိုတ်း။ ယူႇတီႈႁဝ်းၶႃႈယူႇၼႃႈသိုၵ်းတႄႉ ပေႃးႁၼ်သိုၵ်းမၢၼ်ႈ မုင်ႈၼႃႈၶိုၼ်ႈမႃးၸူးႁဝ်းၵေႃႈ တိုၼ်းလႆႈ ယိုဝ်းယဝ်ႉ- ဝႃႈၼႆ။

ပႃႇတီႇမႂ်ႇသုင်ၸိုင်ႈတႆး (SSPP/SSA) ၼႆႉ တင်ႈတႄႇၵိုတ်းယိုဝ်းမႃး တင်းလူင်ပွင်ၸိုင်ႈမၢၼ်ႈ ဝၼ်းထိ 28/01/12 မီးၵၢၼ်ဢုပ်ႇဢူဝ်းတူၵ်းလူင်း ၸၼ်ႉၸိုင်ႈမိူင်းႁူမ်ႈတုမ် မႃးႁၢၼ်ႉတေႃႇမိူဝ်ႈလဵဝ် လႆႈပဵၼ်ပၢင်တိုၵ်း ၵၼ်တင်း ၾၢႆႇတပ်ႉသိုၵ်းမၢၼ်ႈဢမ်ႇယွမ်း 50 ပွၵ်ႈ- ၼႆယဝ်ႉ။

ၾၢႆႇၼိုင်ႈ ၸွမ်းၼင်ႇပိူင်ငဝ်ႈပိုင်းမိူင်း 2008 ၸႄႈဝဵင်းမၢၼ်ႈတူင်ႈ ပဵၼ်ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းတဢၢင်း (ပလွင်ႈ)၊ ၵူၺ်းၵႃႈ ၼႂ်းၸႄႈဝဵင်းမၢၼ်ႈတူင်ႈ ၸိုင်ႈတႆးပွတ်းႁွင်ႇၼႆႉ တေႃႇထိုင်မိူဝ်ႈ လဵဝ် သိုၵ်းမၢၼ်ႈတင်းသိုၵ်းတဢၢင်း လႆႈပဵၼ်ပၢင်တိုၵ်းၵၼ် တီႈဢေႇသုတ်း 2 ဝၼ်းၼိုင်ႈပွၵ်ႈ- ၽူႈမီးၸၼ်ႉၵေႃႉၼိုင်ႈ ၼႂ်းတပ်ႉသိုၵ်းပူတ်းပွႆႇမိူင်းတဢၢင်း (TNLA) လၢတ်ႈၼင်ႇၼႆ။

တပ်ႉသိုၵ်းတဢၢင်း (TNLA) ၼႆႉ ပိူဝ်ႈတႃႇၵိုတ်းယိုဝ်းၵၼ်တင်း လူင်ပွင်ၸိုင်ႈမၢၼ်ႈၼၼ်ႉ ယၢမ်ႈ ႁူပ်ႉထူပ်း ဢုပ်ႇဢူဝ်း ဢူးဢွင်ႇမိၼ်း (ၵႅမ်ႁူဝ်ပဝ်ႈၸုမ်းၶိုင်ပွင်လွင်ႈငမ်းယဵၼ်) ဢမ်ႇပဵၼ်တၢင်း ၵၢၼ်တီႈၼႂ်းမိူင်းထႆး ပွၵ်ႈၼိုင်ႈယဝ်ႉ-ဝႃႈၼႆ။