ဢိင်ၼိူဝ်ဢမ်ႇမီးၽႂ်ႁႃလဵင်ႉသေ မေးၼၢင်းတၢင်းႁိူၼ်း ႁဵတ်းလိၵ်ႈထိုင်ၸွမ်ၸိုင်ႈတဵင်းၸဵင်ႇ၊ တုၵ်းယွၼ်းႁႂ်ႈၵေႃႉ ပဵၼ်ၸဝ်ႈၽူဝ် ၸၢႆးဢွင်ႇမျၢတ်ႈ ဢၼ်လႆႈၵႂႃႇပဵၼ် ၽူႈႁူႉႁၼ်ၸွမ်း (သၢၵ်ႈသေႇ) ၸိုင်ႈမိူင်းႁႂ်ႈလႆႈပွၵ်ႈၶိုၼ်းႁိူၼ်း။

ပူၼ်ႉမႃးမိူဝ်ႈဝၼ်းသုၵ်းထိ 17/11/12 လုၵ်ႈလၢင်းမေးၼၢင်းတၢင်းႁိူၼ်း ၸၢႆးဢွင်ႇမျၢတ်ႈ [ၵေႃႉထုၵ်ႇ သူင်ႇတူဝ်ၵႂႃႇမိူင်းၶႄႇ ပိူဝ်ႈတႃႇပဵၼ်ၽူႈႁူႉႁၼ်(သၢၵ်ႈသေႇ)ၸိုင်ႈမိူင်း] ႁဵတ်းလိၵ်ႈတၢင်ႇထိုင်ၸွမ် ၸိုင်ႈ တဵင်းၸဵင်ႇ၊ ၼႂ်းလိၵ်ႈၼၼ်ႉ တုၵ်းယွၼ်း ႁႂ်ႈလူင်ပွင်ၸိုင်ႈမၢၼ်ႈ တင်းလူင်ပွင်ၸိုင်ႈၶႄႇ သူင်ႇတူဝ်ၸၢႆးဢွင်ႇမျၢတ်ႈ ပွၵ်ႈၶိုၼ်းႁိူၼ်း၊ ၵွပ်ႈဝႃႈၵေႃႉပဵၼ်လုၵ်ႈလၢင်းမေး ၼၢင်းတၢင်းႁိူၼ်း ဢမ်ႇမီးၽႂ်ႁႃလဵင်ႉ- ၼႆယဝ်ႉ။

ၸၢႆးဢွင်ႇမျၢတ်ႈၼႆႉ မေးၼၢင်းၸိုဝ်ႈၼၢင်းဢွၼ်ႇ၊ မိူဝ်ႈမၼ်းၸၢႆးၶဝ်ႈဝၢင်းၶိူင်ႈၵွင်ႈၵၢင်ႇပၼ်ၸုမ်း သိုၵ်းမၢၼ်ႈ တီႈတႃႈၶီႈလဵၵ်း ပူၼ်ႉမႃးမိူဝ်ႈၼႂ်းလိူၼ်မေႊ (2012) ၼၼ်ႉ လုၵ်ႈမၼ်းၵေႃႉလဵၵ်ႉသုတ်း ၼွင်ႉၸၼ်ႁွမ် တိုၵ်ႉမီး 2 လိူၼ် (မိူဝ်ႈလဵဝ်မွၵ်ႈ 7 လိူၼ်)၊ မိူဝ်ႈလဵဝ် လုၵ်ႈၸၢႆးလူင် ၸိုဝ်ႈၸၢႆးၼေႃႇ ဢႃႇယုမွၵ်ႈ 7 ၶူပ်ႇ၊ ၼွင်ႉလၢဝ်သႅင် မွၵ်ႈ 5 ၶူပ်ႇ- ၼႆယဝ်ႉ။

ၸၢႆးဢွင်ႇမျၢတ်ႈၼႆႉ ၸိုဝ်ႈတႄႉႁွင်ႉဝႃႈၸဵၼ်းႁူင်၊ ဢႃႇယု 42 ပီ၊ ၵူၼ်းဝၢၼ်ႈၼမ်ႉၶိုမ်း ဢိူင်ႇမိူင်း လဵၼ်း ၵိင်ႇၸႄႈဝဵင်း တႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ယၢမ်ႈႁၢပ်ႇၵိုတ်း ၵၢၼ်သိုၵ်းၼႂ်းတပ်ႉသိုၵ်း မိူင်းတႆး MTA ဢၼ်ၶုၼ် သႃႇဢွၼ်ႁူဝ်၊ ဝၢႆး MTA  ဝၢင်းၶိူင်ႈၵွင်ႈၵၢင်ႇၵႂႃႇ မိူဝ်ႈႁူဝ်ပီ 1996 ယဝ်ႉ မႃးပဵၼ် ႁူဝ်ၼႃႈထိ 2 ၶွင်ၸုမ်းပီႇတုၸိတ်ႉ ၸၢႆးၼေႃႇၶမ်း၊ ပီ 1996 ၸၢႆးၼေႃႇၶမ်း ဢွၵ်ႇၵႂႃႇတူင်ႉၼိုင် ၵုမ်းပွတ်း သၢမ်ၸဵင်ႇၶမ်းၵေႃႈ ၵႂႃႇႁူမ်ႈတူင်ႉၼိုင်ၸွမ်းၵၼ်၊ တေႃႇပေႃးထိုင်ၸၢႆးၼေႃႇၶမ်း ထုၵ်ႇတိၺွပ်းမိူဝ်ႈ ၼႂ်းလိူၼ် ဢေႊပရိူဝ်ႊလ်သေ တႅပ်းတတ်းဢွၼ် ႁူဝ်ၵူၼ်း 15 ၵေႃႉ ၶဝ်ႈဝၢင်းၶိူင်ႈၵွင်ႈၵၢင်ႇပၼ်မၢၼ်ႈ တီႈတႃႈၶီႈလဵၵ်း။ ၵႃႈပူၼ်ႉမႃး လွင်ႈၶႃႈၵူၼ်း ၸွမ်းႁိူဝ်းၶႄႇ 13 ၵေႃႉၼႆႉ ၸၢႆးဢွင်ႇမျၢတ်ႈ တွပ်ႇထဵင်မႃး တႃႇသေႇဝႃႈ ဢမ်ႇလႆႈ ၵဵဝ်ႇၶွင်ႈ၊ ဢမ်ႇလႆႈႁူႉၸွမ်းသင်။

ၵူၺ်းၵႃႈ ပူၼ်ႉမႃးမိူဝ်ႈဝၼ်းထိ 28/08/12 ၸဝ်ႈၼႃႈတီႈမၢၼ်ႈ ၵႅမ်ၽူႈၵွၼ်းပလိၵ်ႈၵျေႃႇထုၼ်း မွပ်ႈၸၢႆးဢွင်ႇမျၢတ်ႈ (ၵႅမ်ၸၢႆးၼေႃႇၶမ်း)ပၼ် ၸဝ်ႈၼႃႈတီႈၶႄႇ လဵဝ်ယႂႄႉၵျိၼ်း ၽူႈၵွၼ်းႁွင်ႈ ၵၢၼ်ၾၢႆႇ တိုၵ်းတေႃးယႃႈမဝ်းၵမ်သေ ဢဝ်ၸၢႆးဢွင်ႇမျၢတ်ႈဢွၵ်ႇၶွၵ်ႈတီႈၵဵင်းတုင် ၵႂႃႇတၢင်းမိူင်းလႃး (ၼႃႈလိၼ် ၶိုၵ်ႉတွၼ်းမၢႆ 4)၊ ပူၼ်ႉၶဝ်ႈၵႂႃႇတၢင်းမိူင်းသိပ်းသွင် ပၼ်းၼႃး၊ သိုပ်ႇၵႂႃႇဝဵင်းၶုၼ်းမိင် ၸိုင်ႈမိူင်းၶႄႇ။ မိူဝ်ႈၼၼ်ႉ လႆႈငိၼ်းဝႃႈပလိၵ်ႈၸၼ်ႉသုင် ၾၢႆႇၽဵဝ်ႈယႃႈမဝ်းၵမ် တီႈၵဵင်းတုင်ၵႂႃႇ ၸွမ်း 2 ၵေႃႉ။ မိူဝ်ႈတေသူင်ႇၵႂႃႇ မိူင်းၶႄႇၼၼ်ႉ လၢတ်ႈဝႃႈတေပွၵ်ႈမႃးၶိုၼ်းဝၼ်းထိ 05/09/12 - ၼႆယဝ်ႉ။
လွင်ႈတၢင်းဢၼ်မၢၼ်ႈသူင်ႇပၼ်ၶႄႇၼႆႉ မိူဝ်ႈမီးတီႈၵဵင်းတုင်ၼၼ်ႉ ၵွပ်ႈၶႄႇၸွမ်းၶဝ်ႈယဵမ်ႈၸႂ်း တုၵ်းယွၼ်းတိၵ်းတိၵ်း လႄႈ လူင်ပွင်ၸိုင်ႈမၢၼ်ႈ လႆႈတူၵ်းလူင်းဝႃႈ ပိူဝ်ႈတႃႇပဵၼ်လၵ်းထၢၼ်တၢင် တူဝ်လူင်ပွင်ၸိုင်ႈမၢၼ်ႈ (State witness) ၵဵဝ်ႇၵပ်းလွင်ႈပဵၼ်ပၼ်ႁႃပွတ်းတွၼ်ႈသၢမ်ၸဵင်ႇၶမ်း ၼႆသေ ဢဝ်ၸၢႆးဢွင်ႇမျၢတ်ႈ သူင်ႇၵႂႃႇတီႈဝဵင်းၶုၼ်းမိင်။ ၽူႈၵွၼ်းၾၢႆႇ ႁူမ်ႇလူမ်ႈသိုၵ်း (ၸယၽ) တီႈၼေႇပျီႇတေႃႇ လၢတ်ႈဝႃႈတေၵႂႃႇႁဵတ်း ၽူႈႁူႉႁၼ်(သၢၵ်ႈသေႇ)ပၼ်လူင်ပွင်ၸိုင်ႈမၢၼ်ႈၵူၺ်း၊ ဢမ်ႇၸႂ်ႈမွပ်ႈပၼ်ၶႄႇ၊ တေဢဝ်ၵႂႃႇ 5  ဝၼ်းၵူၺ်း ၶိုၼ်းပွၵ်ႈမႃး- ဝႃႈၼႆ။