တင်ႈတႄႇႁူဝ်လိူၼ်ၼူဝ်ႊဝႅမ်ႊၿိူဝ်ႊ (2012) ၼႆႉ မႃး တေႃႇထိုင်ယၢမ်းလဵဝ် မၢၵ်ႇတႅၵ်ႇၼႂ်းၸႄႈဝဵင်း ၵျွၵ်ႉမႄး ဢမ်ႇယွမ်း 4 ပွၵ်ႈ၊ ၼႂ်းလၢႆပွၵ်ႈၼႆႉ ၵူၼ်းမိူင်း၊ ပႃႇတီႇသိူဝ်ၽိူၵ်ႇ ပႃးၸဵမ်သိုၵ်းတႆး SSPP/SSA လၢတ်ႈဝႃႈ ပဵၼ်သိုၵ်း မၢၼ်ႈၽႅၼ်ၵၢၼ်ႁဵတ်းၵေႃႇလိူင်ႈ။

ပူၼ်ႉမႃးမိူဝ်ႈဝၼ်းထိ 19/11/12 ၵၢင်ၼႂ်မွၵ်ႈယၢမ်း 07:00 မူင်း၊ ၵူၼ်းဝၢၼ်ႈပၵ်ႈၵႃႇ (ဝၢၼ်ႈမႂ်ႇ) ဢၼ်ယၢၼ်ၾၢႆႇတူၵ်း ဝဵင်းၵျွၵ်ႉမႄး ၵႆမွၵ်ႈ 2-3 လၵ်း၊ ၸိုဝ်ႈၼၢင်းဢေးထေး၊ ဢႃႇယု 27 ပီ၊ ၵႂႃႇယဵပ်ႇၺႃးမၢၵ်ႇတႅၵ်ႇတီႈတၢင်းၽႄ ဢၼ်ဢမ်ႇပေႃး ၵႆၵၼ်တင်းတပ်ႉမၢၼ်ႈ ၶမယ 501 ၽွင်းမၼ်းၼၢင်း တိုၵ်ႉၵႂႃႇ ႁူတ်းၼမ်ႉသူၼ်၊ ယွၼ်ႉၺႃးမၢၵ်ႇတႅၵ်ႇသေ မၼ်းၼၢင်း လႆႈၶဝ်ႈႁူင်းယႃ တီႈၵျွၵ်ႉမႄးတေႃႇမိူဝ်ႈလဵဝ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းၵျွၵ်ႉမႄးၵေႃႉၼိုင်ႈ ဢိင်ဢၢင်ႈၵႂၢမ်းၵူၼ်းဝၢၼ်ႈပၵ်ႈၵႃႇ (ဝၢၼ်ႈမႂ်ႇ) လၢတ်ႈၼႄဝႃႈ- မိူဝ်ႈသိုၼ်း ယၢမ်းၵၢင်ၼႂ် 7 မူင်း၊ မၢၵ်ႇတႅၵ်ႇတီႈႁိမ်းဝၢၼ်ႈႁဝ်း ယၢၼ်တပ်ႉသိုၵ်း မၢၼ်ႈၶမယ 501 မွၵ်ႈ 1 လၵ်းၵူၺ်း။ မိူဝ်ႈၽွင်းမၢၵ်ႇ တႅၵ်ႇၼၼ်ႉ သိုၵ်းမၢၼ်ႈဢမ်ႇမႃးတူၺ်း၊ ဝၢႆးမၢၵ်ႇတႅၵ်ႇ ၵူၼ်းပဵၼ်ႁွတ်ႈၵႂႃႇတီႈ ႁူင်းယႃယဝ်ႉ ၸင်ႇၵႂႃႇဢွၼ်ၵၼ်ထၢႆႇႁၢင်ႈ။ ႁိမ်းႁွမ်းဢွင်ႈတီႈ မၢၵ်ႇတႅၵ်ႇၼၼ်ႉ မိူဝ်ႈၵၢင်ၶမ်ႈ ဢွၼ်ၼႃႈၼၼ်ႉ မီးၵူၼ်းဝၢၼ်ႈလတ်းၽၢၼ်ႇၵႂႃႇမႃးႁၼ်သိုၵ်းမၢၼ်ႈ တူင်ႉၼိုင်ယူႇ၊ ၽိူဝ်ႇသိုၵ်းမၢၼ်ႈဢမ်ႇမီးယဝ်ႉၵေႃႈ ထိုင်မႃး ၵၢင်ၼႂ်ၵေႃႈမၢၵ်ႇတႅၵ်ႇ- ဝႃႈၼႆ။ 

ၾၢႆႇၼိုင်ႈ တၢင်းၵိင်ႇၸႄႈဝဵင်းမိူင်းငေႃႉၵေႃႈ မိူဝ်ႈဝၼ်းထိ 14/11/12 မီးမၢၵ်ႇတႅၵ်ႇ။ ၵပ်းၵၢႆႇလွင်ႈၼႆႉ ၵူၼ်းဝၢၼ်ႈဢွၼ်ၵၼ် လၢတ်ႈဝႃႈ ႁိမ်းႁွမ်းဝဵင်းမိူင်းငေႃႉ ဢမ်ႇမီးသိုၵ်းတႆး၊ မီးပလိၵ်ႈမၢၼ်ႈလႄႈ သိုၵ်းမၢၼ်ႈ ဢၼ်တူင်ႉၼိုင်လတ်းၽၢၼ်ႇၵႂႃႇမႃး ၵူၺ်း။ ပိုၼ်ႉတီႈၼႃႈလိၼ်ဢၼ်သိုၵ်းတႆးတူင်ႉၼိုင် ယၢၼ်ဝဵင်းမိူင်းငေႃႉ ဢမ်ႇယွမ်းမွၵ်ႈ 7-8 လၵ်း တေႃႇထိုင် 20 လၵ်း ၸိူဝ်းၼႆႉ၊ သိုၵ်းတႆးဢမ်ႇမႃးၵၢႆ ႁိမ်း ဝဵင်းမိူင်းငေႃႉ- ဝႃႈၼႆ။

ဢိင်ၼိူဝ်မၢၵ်ႇတႅၵ်ႇတီႈမိူင်းငေႃႉသေ ပူၼ်ႉမႃးမိူဝ်ႈဝၼ်းသုၵ်းထိ 16/11/12 ၼႆႉ သိုၵ်းမၢၼ်ႈႁွင်ႉထူပ်း ၵူၼ်းဝၢၼ်ႈ/ၵၢင်ႉၵႄႇ ၶဝ်သေၸီႉၸႅင်ႈၼႄဝႃႈ- လွင်ႈဢၼ်မၢၵ်ႇတႅၵ်ႇၼႆႉ ဢမ်ႇၸႂ်ႈၶဝ်ႁဵတ်း၊ ပဵၼ်ၵူၼ်းထိူၼ်ႇ ဢၼ်ၶႂ်ႈသုၵ်ႉယုင်ႈဢူၼ်ၵဝ်း၊ ပဵၼ်သိုၵ်းတႆး (SSPP/SSA) ႁဵတ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽွင်းတႅၼ်းၵူၼ်းမိူင်း ၸၢႆးတၢၼ်းမွင်ႇ ပႃႇတီႇသိူဝ်ၽိူၵ်ႇ ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၵျွၵ်ႉမႄး၊ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ဢိင်ၼိူဝ်မၢၵ်ႇၵႆႉတႅၵ်ႇ၊ ၵူၼ်းမိူင်းလႆႈၺႃး ၸၢၵ်ႇတိၺွပ်း/ ပေႃႉထုပ်ႉ/ႁႅမ် လၢႆပွၵ်ႈသေ ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇၽိုတ်ႇ၊ ႁႃၵိၼ်လဵင်ႉတွင်ႉ ယၢပ်ႇ။ ၵွပ်ႈၼႆ ၽွင်းတႅၼ်း သၽႃးၼိူဝ်/တႂ်ႈ ၶဝ်တေႁူပ်ႉဢုပ်ႇ ဢူဝ်းၵၼ်၊ တေႁူပ်ႉပႃးၵူၼ်းမိူင်း၊ တေႁွင်ႉပႃးၸဝ်ႈၼႃႈတီႈ ၾၢႆႇၽွင်းငမ်းၶဝ်သေ ၸီႉၸႅင်ႈၼႄ၊ တွင်ႈထၢမ်ၶေႃႈမုလ်းတီႈ ၵူၼ်းဝၢၼ်ႈ ၵူၼ်းမိူင်းပႃး ပိူဝ်ႈတႃႇ တႅမ်ႈပဵၼ်လိၵ်ႈလၢႆးသေ တၢင်ႇထိုင်တၢင်းၼိူဝ်၊ ပဵၼ်ႁူဝ်ၶေႃႈဢုပ်ႇၼႂ်းသၽႃး လႆႈ- ဝႃႈၼႆ။

ၸဝ်ႈသိုၵ်းလူင်ၸၢႆးထူး ၵႅမ်ၽူႈၼမ်းၼႂ်း (SSPP/SSA) ဢိင်ဢၢင်ႈၶေႃႈၵႂၢမ်းၵူၼ်းဝၢၼ်ႈၼႂ်းပိုၼ်ႉတီႈ မွၵ်ႇလၢတ်ႈၼႄဝႃႈ- သိုၵ်းတႆးႁဝ်းၶႃႈ ဢမ်ႇလႆႈႁဵတ်းၸိူင်ႉၼၼ်၊ ဢၼ်ႁဝ်းၶႃႈလႆႈငိၼ်းၵူၼ်းဝၢၼ်ႈ ဝႃႈတႄႉ ဢၼ်ပွႆႇမၢၵ်ႇသႂ်ႇၵူၼ်းဝၢၼ်ႈ၊ ယိုဝ်းၵူၼ်းဝၢၼ်ႈၸိူဝ်းၼႆႉ ပဵၼ်ပလိၵ်ႈမၢၼ်ႈတင်းသိုၵ်းမၢၼ်ႈ လွၼ်ႉလွၼ်ႉ- ဝႃႈၼႆ။

မိူဝ်ႈဝၼ်းသဝ် (17/11/12) ပူၼ်ႉမႃးၼႆႉၵေႃႈ သိုၵ်းမၢၼ်ႈၸီႉၼႄးဝႃႈပဵၼ်သၢႆသိုၵ်းတႆးၼႆသေ ၵႂႃႇတိဢဝ်ၽူႈၵွၼ်းဝၢၼ်ႈ ၵဝ်ႇဝၢၼ်ႈၵွင်း ၸၢႆးၸၢမ်ႇၺုၼ်ႉ တင်း ပီႇတုၸိတ်ႉထၢၵ်ႈ လုင်းၵၼ်ႇတ မႃႇၶဝ် 2 ၵေႃႉ ၵႂႃႇၶင်ဝႆႉ တီႈတပ်ႉပၢင်သဝ်းပလိၵ်ႈ၊ ၵူၼ်းဝၢၼ်ႈလႆႈဢဝ်ငိုၼ်းၵႂႃႇထၢႆႇထွၼ်ဢဝ်၊ ၸၢႆးၸၢမ်ႇၺုၼ်ႉတႄႉ ထုၵ်ႇပွႆႇဢွၵ်ႇမႃး ၼႂ်းဝၼ်းၼၼ်ႉၵမ်းလဵဝ်၊ လုင်းၵၼ်ႇ တမႃႇတႄႉ (ၺႃးၵုမ်းၶင် 2 ၶိုၼ်း) တိုၵ်ႉလႆႈဢွၵ်ႇမႃးၶိုၼ်းမိူဝ်ႈသိုၼ်း (19/11/12)ၼႆႉၵူၺ်း- ဝႃႈၼႆ။

ၼွၵ်ႈသေၼၼ်ႉ တၢင်းဝၢၼ်ႈၼွၵ်ႈၼႃးပၢင်ႇ ပွတ်းဢိူင်ႇဝၢၼ်ႈၶိုမ်း၊ ဝၢၼ်ႈႁူၺ်ႈ ၸိူဝ်းၼႆႉၵေႃႈ ႁူဝ်ၼႃႈၵၢင်ႉၵႄႇဝၢၼ်ႈဢိူင်ႇ ၶဝ်ၺႃးသိုၵ်းမၢၼ်ႈတိၺွပ်းၵႂႃႇၵုမ်းၶင် ဝႆႉပဵၼ်လၢႆလၢႆၵေႃႉ- ၼႆယဝ်ႉ။