တင်ႈတႄႇၽွင်းၵၢင်လိူၼ်ပူၼ်ႉမႃး ၸုမ်းဝႃႉတေႃႉၼမ်ႉ မၼ်းမိူင်းထႆး ၶဝ်ႈတၢင်းလၢၼ်ႇ BP1 ၼိုင်ႈဝၼ်းၼပ်ႉ ႁူဝ်ႁဵင်လိတ်ႊ ႁၢၼ်ႉတေႃႇမိူဝ်ႈလဵဝ်ပႆႇၵိုတ်း။ ၵႃႈၽၢၼ်ႇ လၢၼ်ႇ 1 လိတ်ႊ ပၼ်ၸဝ်ႈၼႃႈတီႈမၢၼ်ႈ 2 ဝၢတ်ႇ။

တင်ႈတႄႇၵၢင်လိူၼ်သႅပ်ႊထႅမ်ႊၿိူဝ်ႊ (2012) မႃးတေႃႇထိုင်မိူဝ်ႈလဵဝ် ၶၢဝ်းတၢင်းလိူၼ်ပၢႆၼႆႉ ၸုမ်းသိုၵ်းဝႃႉတေႃႉၼမ်ႉမၼ်း ၻီႊၸႄႊလ် (Diesel) တၢင်းမိူင်းထႆး  ၶဝ်ႈမိူဝ်းၼႂ်းမိူင်းတႆး၊ လတ်းၽၢၼ်ႇတၢင်းၼွင်ဢုၵ်း၊ လၢၼ်ႇလႅၼ်လိၼ် (BP1) ၊ ပုင်ႇပႃႇၶႅမ်သေ ဢဝ်ၵႂႃႇၵဵပ်းဝႆႉတီႈႁူၺ်ႈ ဢေႃႈ ၼိုင်ႈဝၼ်းဢမ်ႇယွမ်း 6,000 လိတ်ႊပၢႆ။ လႆႈၸၢႆႇငိုၼ်းပၼ်တီႈသိုၵ်းမၢၼ်ႈ ဢၼ်ပႂ်ႉတီႈလၢၼ်ႇ လႅၼ်လိၼ် BP1 ၼိုင်ႈလိတ်ႊလႂ် 2 ဝၢတ်ႇ။ ႁၢၼ်ႉတေႃႇမိူဝ်ႈလဵဝ် ၸုမ်းဝႃႉတေႃႉၶဝ်ႈၼမ်ႉမၼ်း ၻီႊၸႄႊလ် ဢမ်ႇယွမ်းမွၵ်ႈ 500,000 လိတ်ႊ- ၼႆယဝ်ႉ။

ၼမ်ႉမၼ်းၻီႊၸႄႊလ်ၼႆႉ မိူဝ်ႈလဵဝ်ၵႃႈၶၼ်ၼႂ်းမိူင်းထႆး 1 လိတ်ႊမွၵ်ႈ 30 ဝၢတ်ႇပၢႆ၊ သိုၵ်းဝႃႉၶဝ် ဢဝ်လူတ်ႉမိူင်းၶႄႇတေႃႉ ၶဝ်ႈ 1 လမ်းတၢင်ႇလႆႈ 1,600 ၵႄးလ်လွၼ်ႊ။ ၸႂ်ႉၵႄးလ်လွၼ်ႊ မီး 4 လိတ်ႊ၊။ ပေႃးၼပ်ႉၸွမ်း ၵႄးလ်လွၼ်ႊ 4 လိတ်ႊ 1 ဝၼ်းတေႃႉၶဝ်ႈတၢင်းၼမ်လိတ်ႊ 6,400 ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းပွတ်းလႅၼ်လိၼ်ၵေႃႉၼိုင်ႈလၢတ်ႈဝႃႈ- ၼမ်ႉမၼ်းၻီႊၸႄႊလ်ၼႆႉ ပေႃးသုၼ်ႇတူဝ်ၵူၼ်းမိူင်း တေႃႉၶဝ်ႈဢမ်ႇလႆႈ၊ ပေႃးသိုၵ်းဝႃႉတေႃႉၶဝ်ႈသမ်ႉလႆႈ။ ဢၼ်ၸုမ်းသိုၵ်း ဝႃႉၶဝ်တေႃႉၶဝ်ႈၼၼ်ႉ ၶဝ်ၸႂ်ႉပိူဝ်ႈတႃႇသုၼ်ႇတူဝ်/မူႇ ၸုမ်းၶဝ်ၵူၺ်း၊ မိူၼ်ၼင်ႇၵႂႃႇၸႂ်ႉၼႂ်းၼႃႈၵၢၼ် ႁဵတ်းသူၼ်ယၢင်တင် (Rubber) ၊ တႃႇသႂ်ႇလူတ်ႉၵႃးၶဝ်။ ၾၢႆႇၼိုင်ႈၵေႃႈ သင်ဝႃႈပဵၼ်သိုၵ်းသိူဝ်မႃး ၵေႃႈ ႁႂ်ႈပဵၼ်ၾၢႆႇပေႉပုၼ်ႈ၊ ပေႃးမီးၼမ်ႉမၼ်း ဝႆႉၵေႃႈမိူၼ်ၵၼ်တင်းမီးႁႅင်းဝႆႉ။ လိူဝ်သေၼၼ်ႉ ၼမ်ႉမၼ်းၻီႊၸႄႊလ်ၼႆႉ ၸၢင်ႈဢဝ်ၸႂ်ႉထႅင်ႈ လၢႆလွင်ႈ လၢႆၾၢႆႇယူႇ-  ဝႃႈၼႆ။

မိူဝ်ႈၵူႈပွၵ်ႈ ၽွင်းသိုၵ်းမၢၼ်ႈၶလယ 225 ပၵ်းယူႇၼႆႉ ၵူၼ်းမိူင်းမုင်ႈမွင်းဝႃႈ ပေႃးဝႃႈသိုၵ်းမၢၼ်ႈ ၶလယ 65 မႃးပုတ်ႈပၵ်း ဢဝ်ပုၼ်ႈၽွၼ်းယဝ်ႉ လွင်ႈၼႆႉတေဢမ်ႇမီးယဝ်ႉ၊ ၵူၺ်းၵႃႈ ၶလယ 65 မႃးပုတ်ႈပၵ်းယဝ်ႉၵေႃႈ တိုၵ်ႉမိူၼ်ၵဝ်ႇယူႇ၊ ၵူၼ်းမိူင်းတေႃႉၼမ်ႉမၼ်းၶဝ်ႈဢမ်ႇလႆႈ၊ ၸုမ်းဝႃႉသမ်ႉ တေႃႉလႆႈ။ လွင်ႈၼႆႉ ပိူဝ်ႈတႃႇ ၵူၼ်းမိူင်းဢမ်ႇမီးၽွၼ်းလီသင်။ လူတ်ႉၵႃးၸုမ်းဝႃႉတေႃႉၼမ်ႉမၼ်း ၻီႊၸႄႊလ်ၼႆႉ ၼိုင်ႈဝၼ်းလႂ် 2 လမ်း ၵၢင်ဝၼ်းၵႂႃႇ- ၵၢင်ၶိုၼ်းမႃးတိၵ်းတိၵ်း၊ တၢင်ႇၵေႃႈတၢင်ႇ ၼၵ်း၊ သဵၼ်ႈတၢင်းၵေႃႈလုၵွႆၼမ် - ၵူၼ်းမိူင်းၶၢင်းပွင်ႉ ၼႄၼင်ႇၼႆ။

ၵဵဝ်ႇၵပ်းလွင်ႈတေႃႉၶဝ်ႈၼမ်ႉမၼ်းၸိူဝ်ႉၾႆး (Fuel) ၼႆႉ ဝၢႆးဢဝ်လွင်ႈငမ်းယဵၼ် တူၵ်းလူင်းၵိုတ်း ယိုဝ်း ၵၼ်ယဝ်ႉ၊ ၸဝ်ႈၼႃႈ တီႈၾၢႆႇၵၢၼ်မၢၵ်ႈမီးၶွင် ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) တင်းၵူၼ်း 2-3 ၵေႃႉၵေႃႈ ယၢမ်ႈ ႁွတ်ႈၽႅဝ်ၵႂႃႇၼေႇပျီႇတေႃႇသေယွၼ်းပႃႊမိတ်ႊ (ဢၼုၺၢတ်ႈ) ပိူဝ်ႈတႃႇ တေႃႉၶဝ်ႈၼမ်ႉမၼ်းၸိူဝ်ႉၾႆးၶဝ်ႈတၢင်းလၢၼ်ႇ မႄႈသၢႆ- တႃႈၶီႈလဵၵ်း။ တၢင်းၼေႇပျီႇတေႃႇ လၢတ်ႈဝႃႈ- ႁႂ်ႈၵႂႃႇယွၼ်းတီႈလူင်ပွင်ၸိုင်ႈမိူင်းတႆး၊ ၽိူဝ်ႇၵႂႃႇယွၼ်းတီႈလူင်ပွင် ၸိုင်ႈၸႄႈမိူင်းတႆး သမ်ႉလၢတ်ႈဝႃႈ- ႁႂ်ႈၵႂႃႇ ယွၼ်းတီႈ ၸဝ်ႈၼႃႈတီႈၼႂ်းပိုၼ်ႉတီႈတႃႈၶီႈလဵၵ်း၊ ပေႃးၸဝ်ႈၼႃႈတီႈၶဝ် တီႈတႃႈၶီႈလဵၵ်းပၼ်ၵေႃႈလႆႈယဝ်ႉ။ ၵူၺ်းၵႃႈ ၽိူဝ်ႇမႃးယွၼ်းတီႈတႃႈၶီႈလဵၵ်း သမ်ႉလႆႈႁပ်ႉၵႂၢမ်းတွပ်ႇဝႃႈ- ၸၼ်ႉၸႄႈတွၼ်ႈ မိူၼ်ႁဝ်းၼႆႉ တေႁဵတ်းႁိုဝ်ပၼ်ပႃႊမိတ်ႊၼမ်ႉမၼ်း၊ လွင်ႈၼႆႉ ယဝ်ႉတီႈၼေႇပျီႇတေႃႇၵမ်းသိုဝ်ႈ၊ ႁႂ်ႈၶိုၼ်းၵႂႃႇယွၼ်း တီႈၼေႇပျီႇတေႃႇ။ လွင်ႈၼႆႉ ႁဵတ်းႁႂ်ႈၾၢႆႇၵၢၼ်မၢၵ်ႈမီး (RCSS/SSA) ဢမ်ႇႁၢၼ်ႉၸႂ်သေပွၵ်ႈၶိုၼ်း- လႅင်ႇၶၢဝ်ႇဢမ်ႇယိုၼ် ယၼ်လႆႈ ယၢမ်ႈလၢတ်ႈၼႄၼင်ႇၼႆ။

ၵမ်ႈၽွင်ႈဝႃႈ- ဢၼ် (RCSS/SSA) ၵႂႃႇယွၼ်းတီႈၼေႇပျီႇတေႃႇၼၼ်ႉ မၼ်းပဵၼ်တၢင်းၵၢၼ်လႄႈ ပိူဝ်ႈတႃႇလႆႈပႃႊမိတ်ႊ တေႃႉၶဝ်ႈၼမ်ႉမၼ်းၼၼ်ႉ ဢမ်ႇငၢႆႈငၢႆႈ။ ဢၼ်ၸုမ်းဝႃႉၶဝ် ဢဝ်ၶဝ်ႈတၢင်း လၢၼ်ႇ BP1 ၼႆႉတႄႉ ၵွပ်ႈပဵၼ်ၵၢၼ်လမ်ၼမ်ႉ ယၵ်းမိုဝ်းၵၼ်တင်း ၸဝ်ႈၼႃႈတီႈမၢၼ်ႈၼႂ်းပိုၼ်ႉ တီႈတူင်ႇတၢင်ႇ၊ ပဵၼ်လၢႆးလၵ်ႉတေႃႉ ၶဝ်ႈလႄႈ ပေႃးပၼ်လိတ်ႊလႂ် 2 ဝၢတ်ႇၵေႃႈၸၢင်ႈလႆႈ- ဝႃႈၼႆ။

ၵူၼ်းႁဵတ်းၵၢၼ်ၼႂ်းပႃႇတီႇၵၢၼ်မိူင်းၵေႃႉၼိုင်ႈလၢတ်ႈၼႄဝႃႈ- လွင်ႈၵၢတ်ႇမိုတ်းၸိူဝ်းၼႆႉ ဢမ်ႇမီး ၼမ်ႉတွၼ်း ပိူဝ်ႈတႃႇ ၵူၼ်းမိူင်း၊ သင်ပဵၼ်လႆႈၶႂ်ႈႁႂ်ႈပဵၼ်တၢင်းၵၢၼ်သေ ႁႂ်ႈမီးၶွၼ်ႇၶဝ်ႈတႃႇမိူင်းတႆး။ မိူဝ်ႈလဵဝ်ၼႆႉ ႁဵတ်းၵၢၼ်သင်ၵေႃႈယဝ်ႉ ဢမ်ႇမီးၶွၼ်ႇ/ငိုၼ်းၶဝ်ႈတႃႇၸႄႈမိူင်းတႆး- ဝႃႈၼႆ။