သိုၵ်းမၢၼ်ႈႁွင်ႉပၢင်ၵုမ် ၽူႈၼမ်းဝၢၼ်ႈ/ဢိူင်ႇ ၼႂ်းၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ၊ ဝၢႆးပၢင်ၵုမ်ယဝ်ႉ တိမတ်ႉထတ်းထၢမ်လွင်ႈၸုမ်းယိပ်း ၵွင်ႈၵၢင်ႇ၊ ပေႃႉထုပ်ႉ ႁွင်ႉၵႂႃႇၵုမ်းၶင် တီႈၼမ်ႉတူႈ။ ႁဵတ်းႁႂ်ႈဝၢႆးမႃး ၵၢင်ႉၵႄႇၶဝ် ၶႂ်ႈပူတ်းထွၼ်တူဝ်ၵိုတ်း လိုဝ်ႈၵၢၼ်။

ပူၼ်ႉမႃးမိူဝ်ႈဝၼ်းထိ 17/10/12 ၽူႈၵွၼ်းငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ 1)ၵျွၵ်ႉမႄး၊ ၸဝ်ႈသိုၵ်းတဵင်းလုၼ်ႇ ႁွင်ႉပၢင်ၵုမ်ၼႂ်းၸႄႈဝဵင်းၼမ်ႉသၼ်ႇ၊ ႁွင်ႉဢဝ်ႁူဝ်ၼႃႈၵၢင်ႉၵႄႇ ၽူႈၵွၼ်း ဝၢၼ်ႈ/ဢိူင်ႇ ၵႂႃႇၶဝ်ႈႁူမ်ႈပၢင်ၵုမ်၊ ၽိူဝ်ႇပၢင်ၵုမ် ယဝ်ႉတူဝ်ႈ သိုၵ်းမၢၼ်ႈ သမ်ႉတိမတ်ႉႁွင်ႉဢဝ်ၸိူဝ်း ၶဝ်ၵႂႃႇတီႈ ဝဵင်းၼမ်ႉတူႈသေ ဢဝ်ၵုမ်းၶင်ဝႆႉတီႈတပ်ႉမၢၼ်ႈၼမ်ႉတူႈ၊ ၵူၺ်းၵႃႈထတ်းထၢမ် ပေႃႉထုပ်ႉ သေ ပွႆႇပၼ်ၶိုၼ်းၶမ်ႈၶိုၼ်းဝၼ်းၼၼ်ႉ ၵမ်းလဵဝ်ၼင်ႇၵဝ်ႇ- ၼႆယဝ်ႉ။

ပူႇၵႄႇ ၵူၼ်းလူင်ဝၢၼ်ႈၸိူဝ်းၺႃးတိၵႂႃႇၼၼ်ႉ ပဵၼ်ဝၢၼ်ႈပၢၼ်းတွင်းၼိူဝ် (ဢထႅတ်ႉပတၢဝ်း)၊ ဝၢၼ်ႈပၢၼ်းတွင်းတႂ်ႈ၊ ဝၢၼ်ႈဝၢႆၼိူဝ်၊ ဝၢၼ်ႈဝၢႆတႂ်ႈ၊ ဝၢၼ်ႈငၢႆးၼိူဝ်၊ ဝၢၼ်ႈငၢႆးတႂ်ႈ၊ ဝၢၼ်ႈလၢၼ်း၊ ဝၢၼ်ႈပဵင်း၊ ဝၢၼ်ႈၶိူဝ်းၶဵမ်၊ ဝၢၼ်ႈလွတ်ႇ၊ ဝၢၼ်ႈၼမ်ႉ လိၼ်း ၸိူဝ်းၼႆႉ- ၽူႈၼမ်းၼႂ်းၵူႈလွင်ႈလွင်ႈ ၸုမ်းၵူၼ်းၼုမ်ႇတဢၢင်း (ပလွင်ႈ) မၢႆႇဢွင်ႇၵူဝ်ႇ လၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းဢိူင်ႇၼႂ်းပိုၼ်ႉတီႈၵေႃႉၼိုင်ႈၵေႃႈလၢတ်ႈဝႃႈ- သိုၵ်းမၢၼ်ႈဢိင်ဢၢင်ႈဝႃႈ တေႁဵတ်းပၢင်ၵုမ်ဝႃႈ ၼႆသေ ႁွင်ႉႁဝ်းၶႃႈၵႂႃႇပၢင်ၵုမ်၊ ၵူၺ်းၵႃႈ တိမတ်ႉႁဝ်းၶႃႈပႄႈပိၵ်ႇသေ ထၢမ်လွင်ႈၵူၼ်းထိူၼ်ႇ၊ ပေႃႉထုပ်ႉ၊ ပိတ်ႉ၊ ႁွင်ႉၵႂႃႇ တီႈတပ်ႉၶဝ်သေဢဝ်ငုၵ်းၵွင်ႈသွင်ႉ။ သမ်ႉပၢႆလွၵ်ႇ ငိုတ်ႈဝႃႈ- ပေႃးသူဢမ်ႇပွင်ႇၶၢဝ်ႇ ၵူၼ်းထိူၼ်ႇ ပွၵ်ႈတေမႃးတေႁဵတ်းႁၢႆႉ ပေႃႉထုပ်ႉႁႅင်းလိူဝ်ၼႆႉၼႆ ၵွၼ်ႇ။ ဢၼ်သိုၵ်းမၢၼ်ႈပေႃႉထုပ်ႉၵမ်းၼႆႉ ၵမ်ႈၽွင်ႈၵေႃႈလိူတ်ႈတူၵ်းယၢင်ဢွၵ်ႇ- ဝႃႈၼႆ။

ဢၼ်သိုၵ်းမၢၼ်ႈတိမတ်ႉၵႂႃႇႁူဝ်ၼႃႈၵၢင်ႉၵႄႇၸိူဝ်းၼႆႉ ပွႆႇပၼ်ၶိုၼ်းယၢမ်းႁူဝ်ၶမ်ႈဝၼ်းၼၼ်ႉၼင်ႇ ၵဝ်ႇ။ ၵူၺ်းၵႃႈ ပူၼ်ႉလွတ်ႈဢွၵ်ႇၶွၵ်ႈတပ်ႉမၢၼ်ႈယဝ်ႉသေတႃႉ ဝၢႆးမႃးၵၢင်ႉၵႄႇၵူၼ်းလူင်ဝၢၼ်ႈၶဝ် ဢမ်ႇၶႂ်ႈႁတ်းႁပ်ႉ ၼႃႈၵၢၼ်ပုၼ်ႈၽွၼ်း ၽူႈၵွၼ်းဝၢၼ်ႈ ၽူႈၵွၼ်းဢိူင်ႇၶိုၼ်း၊ ဢွၼ်ၵၼ်ၶႂ်ႈထွၼ်တူဝ် ဢွၵ်ႇႁင်းၽႂ်ႁင်းမၼ်း- ၽူႈၵွၼ်းဢိူင်ႇသိုပ်ႇလၢတ်ႈၼင်ႇၼႆ။

ၵပ်းၵၢႆႇလွင်ႈၼႆႉ ၽူႈၼမ်းၼႂ်းၵူႈလွင်ႈလွင်ႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (ပလွင်ႈ) TNLA မၢႆႇၽူင်းၵျေႃႇ လၢတ်ႈဝႃႈ- ပွတ်းတွၼ်ႈႁဝ်းၶႃႈၼႆႉ မီးသိုၵ်းပလွင်ႈတင်းသိုၵ်းတႆး ႁူမ်ႈၵၼ်သေတူင်ႉ ၼိုင်၊ သိုၵ်းၶၢင်တႄႉဢမ်ႇထိုင်။ လၢႆးဢၼ်သိုၵ်းမၢၼ်ႈႁဵတ်းၼႆႉ ပဵၼ်လၢႆးဢမ်ႇပေႉမေႃႈပေႃႉၵၢၵ်ႇ၊ မိူၼ်ၼင်ႇ ၵႂႃႇလမ်းယိုဝ်းတပ်ႉသိုၵ်းၸၢဝ်းၶိူဝ်းၸိူဝ်းယူႇ သဝ်းတူင်ႉၼိုင်ပွတ်းတွၼ်ႈၼၼ်ႉဢွၼ် တၢင်း၊ ၽိူဝ်ႇသိုၵ်းၸၢဝ်းၶိူဝ်း တွပ်ႇတႅၼ်းၶဝ်၊ ၶဝ်သမ်ႉလုယႂ်ႇတၢႆၼမ်သ ဢမ်ႇပေႉ သိုၵ်းၸၢဝ်းၶိူဝ်း ယဝ်ႉ သမ်ႉမႃးႁႃပေႃႉထုပ်ႉ ႁႅမ်ၵူၼ်းဝၢၼ်ႈ ၸိူဝ်းဢမ်ႇမီးတၢင်းၽိတ်းသင်။ ပိူင်လူင်တႄႉ ၶႂ်ႈႁဵတ်းႁႂ်ႈ ၵူၼ်း ဝၢၼ်ႈ ယႃႇႁတ်းၵမ်ႉထႅမ်/လဵင်ႉလူၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ။ ပဵၼ်လၢႆးဢမ်ႇပေႉမေႃႈ ပေႃႉၵၢၵ်ႇ၊ ထိူဝ်ၶေႃးၵႆႇၼႄလိင်း- ဝႃႈၼႆ။