ၵူၼ်းဝၢၼ်ႈ ဢၼ်ယၢမ်ႈၶဝ်ႈဢွၵ်ႇသိုၵ်းတႆး၊ ၾိုၵ်းၵၢၼ်မေႃ ယႃၼႂ်းတပ်ႉတႆး၊ ပဵၼ်ၵေႃႉမီးၵုၼ်းမုၼ် ၼိူဝ် သိုၵ်းမၢၼ်ႈ မိူဝ်ႈဢမ်ႇယူႇလီ ထုၵ်ႇသိုၵ်းမၢၼ်ႈလိုမ်းၵုၼ်းမုၼ်၊ ၸိၼႄးပဵၼ်သိုၵ်းတႆး တိၺွပ်း ၵုမ်းၶင် တေႃႇမိူဝ်ႈလဵဝ်ပႆႇပွႆႇၶိုၼ်း။

ပူၼ်ႉမႃးမိူဝ်ႈဝၼ်းထိ 05/10/12 သိုၵ်းမၢၼ်ႈတပ်ႉၶလယ 131 ၵေးသီး၊ သၢႆသိုၵ်း 2  ဢၼ်ၸဝ်ႈႁၢၼ် ထုၼ်းၼွင်ႇဢွၼ်ႁူဝ် ဢွၵ်ႇတၢင်းၵႂႃႇတူင်ႉၼိုင်ပွတ်းဝၢၼ်ႈၼွၵ်ႈ ၼႂ်းၸႄႈဝဵင်းမိူင်းၵိုင် ပွတ်းႁမ်းငၢႆး၊ ၵႂႃႇတိၺွပ်းဢဝ်ၵူၼ်းဝၢၼ်ႈၼေႃႇသႅင်၊ ဢိူင်ႇႁမ်းငၢႆး (ယၢၼ်ၾၢႆႇတူၵ်းႁမ်းငၢႆး 2 လၵ်း) ၸိုဝ်ႈၸၢႆး လႅင်း ဢႃႇယု 20 ပီ၊ လုၵ်ႈလုင်းဢွင်ႇထုၼ်း ၵႂႃႇၵုမ်းတူဝ်ၶင်ဝႆႉ ႁၢၼ်ႉတေႃႇမိူဝ်ႈလဵဝ်ပႆႇပွႆႇပၼ်ၶိုၼ်း။

ၵဵဝ်ႇၵပ်းလွင်ႈၼႆႉ သိုၵ်းမၢၼ်ႈလၢတ်ႈတီႈၵူၼ်းဝၢၼ်ႈဝႃႈ- တေႁွင်ႉပေႃႈမႄႈ တင်းၵူၼ်းဝၢၼ်ႈသေ ထတ်းထၢမ်တူၺ်း၊ လွင်ႈဝႃႈမၼ်းၸၢႆးၵဵဝ်ႇၶွင်ႈသိုၵ်းတႆးႁိုဝ်ဢမ်ႇၵဵဝ်ႇၶွင်ႈ၊ မၼ်းပဵၼ်သိုၵ်းတႆး ႁိုဝ် ဢမ်ႇၸႂ်ႈသိုၵ်းတႆးတႄႉ- ၼႆယဝ်ႉ။

ၵူၼ်းဝၢၼ်ႈၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ-ၸၢႆးလႅင်းၼႆႉ ၸွမ်းၼင်ႇသိုၵ်းမၢၼ်ႈလႆႈလၵ်းထၢၼ် (သၢၵ်ႈသေႇ) မၼ်းဝႆႉ ၼၼ်ႉသေ ၸိၼႄးဝႃႈမၼ်းၸၢႆးပဵၼ်သိုၵ်းတႆး RCSS/SSA ၸုမ်းလွႆတႆးလႅင်း၊ မိူဝ်ႈလဵဝ်သိုၵ်းမၢၼ်ႈတိၺွပ်းၵုမ်းတူဝ်ၶင် ဝႆႉလႆႈ 13 ဝၼ်းယဝ်ႉ။ မိူဝ်ႈတႄႇမၼ်း လႆႈငိၼ်းဝႃႈမီးတီႈ ႁွင်ႈၶင် တီႈၵေးသီး၊ ၵူၺ်းၵႃႈ မီးတႄႉဢမ်ႇမီးတႄႉၵေႃႈဢမ်ႇႁူႉ၊ ၽႂ်ၵေႃႈဢမ်ႇလႆႈၵႂႃႇႁူပ်ႉ၊ ပေႃႈမႄႈ ပီႈၼွင်ႉမၼ်းၵေႃႈ ဢွၼ်ၵၼ်မႆႈၸႂ်ယူႇ- ဝႃႈၼႆ။

ၵူၼ်းဝၢၼ်ႈသိုပ်ႇလၢတ်ႈဝႃႈ- ၸၢႆးလႅင်းၼႆႉ ပဵၼ်ၵူၼ်းၼုမ်ႇပၢၼ်မႂ်ႇ၊ ယၢမ်ႈၵႂႃႇယူႇၼႂ်းၶူးဝဵင်းလူင်သေ ႁူႉလိၵ်ႈႁူႉလၢႆး၊ ၵႂၢမ်းမၢၼ်ႈၵေႃႈၶႅၼ်ႇ၊ မၼ်းၸၢႆးဢမ်ႇၸႂ်ႈၵူၼ်းႁဵတ်းၵိၼ်ႁႆႈသႆႉၵိၼ်သူၼ် ထမ်းမၻႃး။ ထႅင်ႈလွင်ႈၼိုင်ႈၵေႃႈ မၼ်းၸၢႆး ယၢမ်ႈၵႂႃႇ ႁဵၼ်း/သွၼ်ၵၢၼ်ၾၢႆႇမေႃယႃ/ ၾၢႆႇလုမ်းလႃး ၵူၼ်းပဵၼ် ဢၼ်လွႆတႆးလႅင်းပိုတ်ႇပၼ်၊ ဝၢႆးၼၼ်ႉၵေႃႈ ပွၵ်ႈမႃး ယူႇႁိူၼ်း ၼႂ်းဝၢၼ်ႈၼႂ်းသူၼ်ၶိုၼ်း- ဝႃႈၼႆ။

ၵပ်းၵၢႆႇလွင်ႈတိၺွပ်းၸၢႆးလႅင်းၼႆႉ ပူၼ်ႉမႃးမိူဝ်ႈႁူဝ်လိူၼ်ၵျူၼ်ႊ (2012) သိုၵ်းမၢၼ်ႈတပ်ႉၵေးသီး 2 ၵေႃႉ၊ ပႃးၸၼ်ႉၶုၼ် ႁၢၼ် (2 တုမ်ႇ) ၵေႃႉၼိုင်ႈ လႄႈ ပလိၵ်ႈမၢၼ်ႈၵေႃႉၼိုင်ႈ  လၵ်ႉပၢႆႈတပ်ႉၵႂႃႇၸူး တပ်ႉသိုၵ်း ၸိုင်ႈတႆး RCSS/SSA ဢၼ်ပၵ်းတီႈႁူဝ်ၶၢႆး ၼႂ်းဢိူင်ႇႁူဝ်ၶၢႆး ၸႄႈဝဵင်းမိူင်းၵိုင်။ ၽူႈၵွၼ်း ၸႄႈဝဵင်း RCSS/SSA  ၶုၼ်သိုၵ်းၸၢမ်ႇၾႃႉၵေႃႈလဵင်ႉလူ ဝႆႉ။ ဝၢႆးၼၼ်ႉဢမ်ႇႁိုင် ထိုင်မႃးဝၼ်းထီႉ 4 ၵေႃႉပဵၼ်ပလိၵ်ႈ လၵ်ႉဢဝ်ၵွင်ႈ M 79 လဝ်းၼိုင်ႈ တင်းလူတ်ႉၶိူင်ႈလမ်းၼိုင်ႈ လုၵ်ႉတီႈတပ်ႉတႆးၶီႇ ပၢႆႈသွင်ႉမိူဝ်းၸူးတီႈ တပ်ႉမၢၼ်ႈသေ ဢဝ်ၵွင်ႈမွပ်ႈပၼ်တပ်ႉမၢၼ်ႈ။ ၵူၺ်းၵႃႈ ဝၢႆးမႃးသိုၵ်းမၢၼ်ႈၵေႃႈ ဢဝ်ၵွင်ႈ M79 ၼၼ်ႉ မွပ်ႈပၼ်တီႈသိုၵ်းတႆး ၶိုၼ်း- ၵူၼ်းပွတ်းလၢႆးၶႃႈၵေႃႉၼိုင်ႈလၢတ်ႈၼႄၼင်ႇၼႆ။

ၵူၼ်းဝၢၼ်ႈၼႂ်းပိုၼ်ႉတီႈသိုပ်ႇလၢတ်ႈဝႃႈ- ၽွင်းသိုၵ်းတႆးလဵင်ႉလူဝႆႉမၢၼ်ႈၸိူဝ်းၼၼ်ႉ ၶဝ်သမ်ႉဢမ်ႇ ယူႇလီ။ ၽွင်းၼၼ်ႉ ၸၢႆးလႅင်း သမ်ႉၵႂႃႇယူတ်းယႃပၼ်။ ၽိူဝ်ႇဝၢႆးၼၢဝ်ၶႅၼ်းယဝ်ႉ မၢၼ်ႈၵေႃႉၼိုင်ႈ လၵ်ႉၵွင်ႈသိုၵ်းတႆးသွင်ႉပၢႆႈၵႂႃႇၸူးတပ်ႉ မၢၼ်ႈ။ ၵွင်ႈၼၼ်ႉ သိုၵ်းမၢၼ်ႈဢဝ်မွပ်ႈပၼ်ၶိုၼ်းတီႈသိုၵ်း တႆး၊ သိုၵ်းတႆးၵေႃႈ ၶိုၼ်းပွႆႇပၼ်သိုၵ်းမၢၼ်ႈသေယဝ်ႉတူဝ်ႈၵၼ် ၵႂႃႇ။ ၵူၺ်းၵႃႈ ဢိင်ၼိူဝ်ၸဝ်ႈႁၢၼ် ထုၼ်းၼွင်ႇ ဢွၼ်သၢႆသိုၵ်းၵႂႃႇ တူင်ႉၼိုင် ပွတ်းႁမ်းငၢႆးၵမ်းၼႆႉ မိူဝ်ႈဝၼ်းထီႉ 05/10/12 ၽႅဝ်ၵႂႃႇတီႈ ဝၢၼ်ႈၼေႃႇသႅင်။

ပေႃးသိုၵ်းမၢၼ်ႈၵႂႃႇၽႅဝ်တီႈဝၢၼ်ႈၼေႃႇသႅင်ၵေႃႈ ၵမ်ႈၽွင်ႈၵႂႃႇၵိုတ်းလိုဝ်ႈတီႈႁိူၼ်းၸၢႆးလႅင်း၊ ၸၢႆးလႅင်းၵေႃႈ ႁဵတ်းၸွမ်းၼင်ႇ ၾိင်ႈၸဝ်ႈႁိူၼ်းႁပ်ႉတွၼ်ႈႁူမ်ၸူမ်းၶႅၵ်ႇသေ ဢဝ်ၼမ်ႉၵတ်းၼမ်ႉ ယဵၼ်ၵႂႃႇတမ်း။ လိူၵ်ႈလိူၵ်ႈသိုၵ်းမၢၼ်ႈၸိူဝ်းၵႂႃႇၵိုတ်းလိုဝ်ႈ တီႈႁိူၼ်းၸၢႆးလႅင်းၼႆႉ သမ်ႉပႃးသိုၵ်း မၢၼ်ႈ 2 ၵေႃႉ ဢၼ်လၵ်ႉ ပၢႆႈတပ်ႉ ၵႂႃႇၸူး သိုၵ်းတႆးၵႃႈပူၼ်ႉမႃး သမ်ႉတွင်းၸၢႆးလႅင်း မိူဝ်ႈၵႂႃႇယူတ်း ယႃပၼ်ၽွင်းဢမ်ႇယူႇလီၼၼ်ႉလႄႈ  ၸိၼႄးဝႃႈ ၸၢႆးလႅင်းပဵၼ်သိုၵ်းတႆးၼႆသေတိၺွပ်းၵႂႃႇ။ ထႅင်ႈလွင်ႈ ၼိုင်ႈ သိုၵ်းမၢၼ်ႈ ၶူၼ်ႉသွၵ်ႈတီႈႁိူၼ်းၵေႃႈ သမ်ႉႁၼ် မႅၼ်ႈႁၢင်ႈထၢႆႇ ဢၼ်ၸၢႆးလႅင်း ၼုင်ႈသိူဝ်ႈသိုၵ်းၶူဝ်းလၢႆးထၢႆႇႁၢင်ႈ ၵိုၵ်းၵၼ်ဝႆႉတင်းသိုၵ်းတႆး ၵေႃႈပႃး။

ၵူၼ်းဝၢၼ်ႈသိုပ်ႇလၢတ်ႈဝႃႈ- ၸၢႆးလႅင်းၼႆႉ ပဵၼ်ၵူၼ်းဝၢၼ်ႈၵေႃႉၼိုင်ႈၵူၺၺ်လႄႈမိူဝ်ႈဢၼ်တၢင်း လွႆတႆးလႅင်းၶၢၼ်းႁွင်ႉ ၵူၼ်းမႃး ပိူဝ်ႈတႃႇၵႂႃႇၾိုၵ်းၵၢၼ်မေႃယႃၵေႃႈ ၵွပ်ႈဢမ်ႇလိူဝ်လႆႈလႄႈၵႃႈလႆႈ ၵႂႃႇ၊ ၶိုၼ်းမၼ်းပွၵ်ႈမႃး ယူႇႁိူၼ်းႁိုင်ယဝ်ႉ။  မၼ်းၸၢႆးဢမ်ႇၸႂ်ႈၵူၼ်းသိုၵ်း၊ မၼ်းပဵၼ်ၵူၼ်းဝၢၼ်ႈ ထမ်းမၻႃးၵူၺ်း။ ယွၼ်ႉပိူဝ်ႈဢမ်ႇၸႂ်ႈ သိုၵ်းတႆးလႄႈ ဢၼ်သိုၵ်း မၢၼ်ႈတိၺွပ်းၵႂႃႇၵုမ်းၶင်ၼႆႉ ၵွပ်ႈၸၢႆးလႅင်းဢမ်ႇၸႂ်ႈသိုၵ်းတႆးလႄႈသိုၵ်းတႆးၵေႃႈ ဢမ်ႇၵႂႃႇတုၵ်းယွၼ်းႁႂ်ႈပွႆႇပၼ်။ ဢိင်ၼိူဝ်သိုၵ်း မၢၼ်ႈၼႄးဝႃႈ မၼ်းၸၢႆးပဵၼ်သိုၵ်းတႆးသေ ဢဝ်ၵႂႃႇၵုမ်းၶင်ဝႆႉ ၼႂ်းၶွၵ်ႈ၊ မၢင်ၽဝ်ႇသိုၵ်းမၢၼ်ႈတေ ပေႃႉထုပ်ႉ မၼ်းယူႇႁိုဝ်ၵေႃႈဢမ်ႇႁူႉ၊ မိူဝ်ႈလဵဝ် ၵေႃႉပဵၼ်ပေႃႈမႄႈ ၶႂ်ႈၵႂႃႇႁူပ်ႉ ၵေႃႈ ဢမ်ႇလႆႈႁူပ်ႉ - ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းၼွင် ႁွတ်ႈၵေးသီး ဢၼ်ပဵၼ်ၵူၼ်းႁူႉၸၵ်းမိုတ်ႈၵိုဝ်းၸၢႆးလႅင်းၵေႃႉၼိုင်ႈ လၢတ်ႈ ၼႄဝႃႈ- သိုၵ်းမၢၼ်ႈၼႆႉ ၸၢႆးလႅင်းပဵၼ်ၽူႈမီးၵုၼ်းမုၼ်ၼိူဝ်ၶဝ်၊ ပဵၼ်ၵူၼ်းယူတ်းယႃသမ်း ၶဵမ်ပၼ်ၶဝ် မိူဝ်ႈဢမ်ႇယူႇလီၼၼ်ႉ ပေႃးႁၢႆပေႃးၶႅၼ်းၵေႃႈ  ၶဝ်သမ်ႉၶိုၼ်းတိမတ်ႉဢဝ်ၵႂႃႇၶင်ၶွၵ်ႈ ပေႃႉထုပ်ႉ၊ လွင်ႈၼႆႉ  လီဢဝ်ပဵၼ်တွၼ်ႈသွၼ်ယူႇ- ဝႃႈၼႆ။