ဢိင်ၼိူဝ်ၸဝ်ႈတူၼ်ၶူး ထမ်မသႃမိ ၵမ်ႉၸွႆႈပၼ်ႁႅင်းသေ ၼႂ်းလိူၼ်ၻီႊသႅမ်ႊၿိူဝ်ႊတၢင်းၼႃႈၼႆႉ ၸၼ်ႉၸွမ်သင်ၶ တီႈတႃႈၵုင်ႈ တေၸတ်းပၢင်ၵုမ်ၵဵဝ်ႇလူၺ်ႈလွင်ႈသႃသၼႃ ဢၼ်မီးၸိုဝ်ႈဝႃႈ “မႃးတူၺ်းလႄႈ”။

ဝၼ်းထိ 21-22/10/12 တေမီးၵၢၼ်ၸတ်းပၢင်ၵုမ်  ၵဵဝ်ႇၵပ်းလွင်ႈပုတ်ႉထသႃသၼႃ တီႈဝဵင်းလူင် တႃႈၵုင်ႈ၊ ၸိုဝ်ႈဝႃႈ “ဢေးႁိပသ်ႉသိၵူဝ်း” ဢၼ်မီးတီႈပွင်ႇဝႃႈ “မႃးတူၺ်းလႄႈ”။ ပိူင်လူင်မၼ်း ပၢင်ၵုမ်တေသပ်းလႅင်း ၼႄလွင်ႈၶေႃႈၵႂၢမ်း ၾၢၵ်ႇပုတ်ႉထၸဝ်ႈၵဵဝ်ႇလူၺ်ႈၵၢၼ်ဝိပသ်ႉသၼႃလႄႈ ပၢႆးၸႂ်။ (An applied message of the Bhddha in Meditation and Psychology) - ၼႆယဝ်ႉ။

ၸုမ်းဢၼ်ၸတ်းပၢင်ၵုမ်ၼႆႉ ပဵၼ်ၸၼ်ႉၸွမ်ၾၢႆႇၽိူၺ်ၽႄႈပုတ်ႉထသႃသၼႃ ၼိၵၢႆထေရဝႃတ ၵူႈၸိုင်ႈမိူင်း (International Theravada Buddhist Missionary University) တီႈတႃႈၵုင်ႈ။ ပိူဝ်ႈတႃႇ ပဵၼ်မႃး ပၢင်ၵုမ်ၼႆႉ ၸဝ်ႈတူၼ်ၶူး ၻွၵ်းတိူဝ်ႊၶမ်းမၢႆ ထမ်မသႃမိ ၸွႆႈထႅမ်ပၼ်ႁႅင်း- ၼႆယဝ်ႉ။

ၸဝ်ႈတူၼ်ၶူးထမ်မသႃမိၼႆႉ 1.ပဵၼ်ၻွၵ်းတိူဝ်ႊၼႂ်းသင်ၶၸဝ်ႈတူၼ်လဵဝ်၊ ဢၼ်ယဝ်ႉၵၢၼ်ႁဵၼ်းတီႈ ၸၼ်ႉၸွမ် ဢွၵ်ႊၾိူတ်ႊသ် (Oxford) မိူင်းဢိင်းၵလဵတ်ႈ။ 2.ပဵၼ်လုၵ်ႈၸုမ်းသုၼ်ၵၢင်ဢွၵ်ႊၾိူတ်ႊ ၾၢႆႇလဵပ်ႈႁဵၼ်း ပုတ်ႉထသႃသၼႃ (Fellow, Oxford Center for Buddhist Studies) ။ 3.ပဵၼ်ၾၢႆႇ ပုတ်ႉထသႃသၼႃ ၶွင်ဢွၵ်ႊၾိူတ်ႊ (Buddhish chaplain, Oxford) ပေႃးမီးလွင်ႈၵိူတ်ႇလွင်ႈတၢႆ ၸၢဝ်းပုတ်ႉထ ဢွၼ်ၵၼ် ၶဝ်ႈႁႃပိုင်ႈဢိင်မၼ်းၸဝ်ႈ။ ၼွၵ်ႈသေၼၼ်ႉ ပဵၼ်ၽူႈၼမ်းၼႂ်း ၸၼ်ႉၸွမ် တူင်ႇဝူင်းပုတ်ႉထ သႃသၼႃ ၵူႈၸိုင်ႈမိူင်း (Executive Secretary International Association of Buddhist Universities-ESIABU) ဢၼ်ၸဝ်ႈတူၼ်ၶူးလူင် ထမ်းမၵူဝ်းသႃၵျၢၼ်း မိူင်းထႆး ပဵၼ်ႁူဝ်ပဝ်ႈ။

ၸဝ်ႈတူၼ်ၶူးထမ်မသႃမိ ပဵၼ်လုၵ်ႈလုင်းၸၢင်းၶမ်းဢေႃး-ပႃႈၸၢင်းသူၺ်ႇ၊ ၵိူတ်ႇမိူဝ်ႈဝၼ်းထိ 23/11/1964 တီႈဝၢၼ်ႈ ၼွင်ပၢင်ႇ ၸႄႈဝဵင်းလၢႆးၶႃႈ။ ယၢမ်းလဵဝ်ဢႃႇယုၸဝ်ႈ 48 ဝႃႇသႃ။ ၶိုၼ်ႈပဵၼ်သၢင်ႇ မိူဝ်ႈဢႃႇယုၸဝ်ႈ လႆႈ 6 ၶူပ်ႇ၊ တီႈဝတ်ႉ သီရိမင်ႇၵလႃႇၵျွင်းဢုတ်ႇ ဝဵင်းလၢႆးၶႃႈ။ ၶိုၼ်ႈပဵၼ်ၸၢင်းတီႈ ဝတ်ႉဝေႇၸယၼ်ႇတႃႇ ဝဵင်းမေႃႇလမႅင်ႇ မိူင်းမွၼ်း။ ယၢမ်ႈႁဵၼ်းမႃးၸဵမ်ၼႂ်းမိူင်း ၼွၵ်ႈမိူင်းလၢႆလၢႆတီႈသေ ယဝ်ႉၸၼ်ႉၸွမ် (Oxford) တီႈမိူင်းဢိင်းၵလၼ်ႇ၊ ပဵၼ်ၸဝ်ႈၵွၼ်းဝတ်ႉဝႆႉ တီႈမိူင်း ဢိင်ႊၵလၼ်ႊ တေႃႇထိုင်ယၢမ်းလဵဝ်။ လႆႈႁၢပ်ႇၵိုတ်ႉၵၢၼ် သႃသၼႃတင်းၼမ်၊ လႆႈႁဵတ်းၶူး သွၼ်ႁေႃးထမ်း/တြႃးၼႄထမ်း တြႃးဝိပသ်သၼႃလႄႈ ပပ်ႉယႂ်းႁိုၼ်ၽိုၼ်ထမ်းၵေႃႈ တႅမ်ႈဢွၵ်ႇ လၢႆလၢႆပပ်ႉ၊ ပႃးၸဵမ်တွပ်ႇၶေႃႈထၢမ် ၵဵဝ်ႇလူၺ်ႈပၼ်ႁႃလွင်ႈ ထမ်းမၼႂ်း Internet ၸိူဝ်းၼႆႉ။