ပၢင်ၸႃပၼ ဝၼ်းပူၼ်ႉၶၢပ်ႈတူဝ်ၸဝ်ႈၶိတ်ႉသူၺ်ႇ၊ ၽူႈၵေႃႉ ႁၢပ်ႇၵၢၼ်ၸိူဝ်ႉၸၢတ်ႈၼႂ်းပဢူဝ်း-တႆး မႃးလၢႆသိုပ်ႇလၢႆပၢၼ် တီႈပဵင်းလူင်ၼၼ်ႉ ၸဝ်ႈယွတ်ႈသိုၵ်း တင်းၽူႈယႂ်ႇၵူၼ်း လူင်ၼႂ်း (RCSS/SSA) ၵႂႃႇၶဝ်ႈႁူမ်ႈၼႄလွင်ႈမွင်ၸႂ်ၸွမ်း လၢႆၵေႃႉလၢႆၸဝ်ႈ။

ဝၼ်းထိ 18/10/12 (မိူဝ်ႈဝႃး) ဝၼ်းသူင်ႇၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈ ၸဝ်ႈၶိတ်ႉသူၺ်ႇ တီႈပဵင်းလူင်၊ မီးၽူႈယႂ်ႇၵူၼ်းလူင် ၼႂ်းၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၵႂႃႇၶဝ်ႈႁူမ်ႈ လၢႆၵေႃႉ လၢႆၸဝ်ႈ၊ မိူၼ်ၼင်ႇႁူဝ်ပဝ်ႈလူင် ၸဝ်ႈယွတ်ႈသိုၵ်း၊ ၵႅမ်ႁူဝ်ပဝ်ႈၸဝ်ႈၸၢႆးယီႈ၊ ၸဝ်ႈၵၼ်း ၸဵတ်း၊ ၸဝ်ႈပွင်ၶိူဝ်း ၸိူဝ်းၼႆႉ။ ၶၢပ်ႈတူဝ်မၼ်းၸဝ်ႈၼႆႉ ႁွပ်ႇၶဝ်ႈ ႁဵဝ်ႈတီႈပႃႇႁဵဝ်ႈၶႅၵ်ႇ ပဵင်းလူင်၊ တၢင်းလုၵ်ႉပဵင်းလူင်ၵႂႃႇ လၵ်းတႅင်ႇ၊ ဢဝ်သႂ်ႇဝႆႉၼႂ်းၶုမ်ၵုတ်း (ဢူးမၢင်ႇ) မိူၼ်ၼင်ႇၸဝ်ႈၵွၼ်း ၸိူင်း။ မီးၵူၼ်းၶဝ်ႈႁူမ်ႈတင်းၼမ်တင်းလၢႆ၊ ၵူၺ်းၵႃႈ ဢိင်ၼိူဝ်ဢမ်ႇလႆႈမွၵ်ႇထိုင်သေ ၾၢႆႇပီႈၼွင်ႉယၢင်း ဢမ်ႇလႆႈမႃး ၶဝ်ႈႁူမ်ႈ။

ၸဝ်ႈၶိတ်ႉသူၺ်ႇ ဢႃႇယု 74 ပီ လုသဵင်ႈၵႂႃႇမိူဝ်ႈဝၼ်းထိ ဝၼ်းထိ 13/10/12 ယၢမ်းၵၢင်ၶိုၼ်း၊ လိုၼ်းသုတ်း ပူၼ်ႉၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈ ဝၼ်းထိ 18/10/12 (မိူဝ်ႈဝႃး)။ ယွၼ်ႉၵွပ်ႈမၼ်းၸဝ်ႈ မီးတၢင်းပဵၼ်လိူတ်ႈသုင်၊ တၢင်းပဵၼ်ႁူဝ်ၸႂ်၊ တၢင်းပဵၼ်တႂ် (မၢၵ်ႇၵႅဝ်း) ၸိူဝ်းၼႆႉ၊ လိုၼ်းသုတ်း  ၶဝ်ႈယူတ်းယႃတူဝ်တီႈႁူင်းယႃၵဵင်းမႆႇၵေႃႈ ယူတ်းယႃဢမ်ႇလႆႈ။

ၸဝ်ႈၶိတ်ႉသူၺ်ႇၼႆႉ ပဵၼ်ၸၢဝ်းၶိူဝ်းယၢင်း၊ ၸႃတိဝၢၼ်ႈၵိူတ်ႇ ဝၢၼ်ႈၵယိၼ်ႇလေးသဵၵ်ႉ (တႃႈယၢင်း ဢွၼ်ႇ) ၸႄႈဝဵင်းသထုင်ႇ မိူင်းယၢင်း။ ၵိူတ်ႇမိူဝ်ႈပီဝၼ်းထိ 25/07/1938 ၊ (ပိုၼ်းတူဝ်ဢၼ်ဢၢၼ်ႇ ၼႄတၢင်းၵၢၼ်ဝႃႈ 28/08/1938)၊ ပီမိူင်း 1330 လိူၼ်ပႅတ်ႇလွင်ႈ 14 ၶမ်ႈ ဝၼ်းၸၼ်။ တႄႇၼႃႈ ႁိူၼ်းၵိုၵ်းၼၢင်းသူၺ်ႇဢိင်ႇ ၵူၼ်းလၢႆးၶႃႈ၊ မီးလုၵ်ႈလၢင်းႁူမ်ႈၵၼ် 4 ၵေႃႉ ၸၢႆး 3 ၵေႃႉ၊ ယိင်း 1 ၵေႃႉ။ ႁၢပ်ႇၵၢၼ်ၸိူဝ်ႉၸၢတ်ႈၸိုင်ႈတႆးမႃး လၢႆသိုပ်ႇပၢၼ် မိူၼ်ၼင်ႇၼႂ်းတပ်ႉသိုၵ်းပဢူဝ်း၊ ၼႂ်းတပ်ႉ သိုၵ်းတႆးပၢၼ်ၼိုင်ႈယဝ်ႉပၢၼ်ၼိုင်ႈ။ ထိုင်မႃးပၢၼ် ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ၵေႃႈ ႁပ်ႉပဵၼ်တီႈၵိူဝ်း ၵုမ်တေႃႇပေႃးသဵင်ႈမုၼ်။ (ပိုၼ်းတူဝ်ၵႅပ်ႈ မၼ်းၸဝ်ႈ ဢၢၼ်ႇလႆႈၼႂ်းၶၢဝ်ႇပၢင်လူင် ၾၢႆႇတႆး ဢၼ်ဢွၵ်ႇၵႂႃႇဢွၼ်ၼႃႈၼႆႉ)။