သိုၵ်းမၢၼ်ႈႁၢင်ႈႁႅၼ်းပိူဝ်ႈတႃႇဢုပ်ႇဢူဝ်းၸုမ်းၶၢင် KIA ပွတ်းမိူင်းမၢဝ်း (မိူင်းၶႄႇ) တၢင်းၼိုင်ႈၵူၺ်း ၵႃႈ ၾၢႆႇၼိုင်ႈ သမ်ႉႁၢင်ႈႁႅၼ်းသိုၵ်း တေႃႉမၢၵ်ႇမိုဝ်ႈၸိုၼ်းယၢမ်း၊ ၶဝ်ႈၼမ်ႉ တၢင်းၵိၼ် ၶိုၼ်ႈၸူးတႅဝ်း ၼႃႈ ဢၼ်တေႃႇၼႃႈဢိူမ်ႈၸမ် ငဝ်ႈငုၼ်းလၢႆႇၸႃႇ။

ၵဵဝ်ႇၵပ်းလွင်ႈၼႆႉ လုၵ်ႈၸုမ်းတႅဝ်းႁူမ်ႈၻီႊမွၵ်းၶရႅတ်ႊတိၵ်ႉ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၵေႃႉၼိုင်ႈလၢတ်ႈဝႃႈ- သိုၵ်းမၢၼ်ႈဢဝ်ႁိူဝ်းဝိၼ်ႁၢတ်ႊသၵီႊ တၢင်ႇၶဝ်ႈၼမ်ႉတၢင်းၵိၼ် မႃးလူင်းတီႈ သျတၼ်ပႃသေ သိုပ်ႇတၢင်ႇမႃႉတၢင်ႇလႃး ၵႂႃႇလၢႆႁူး လၢႆတၢင်း၊ သူင်ႇၶိုၼ်ႈၵႂႃႇၸူးတပ်ႉ တႅဝ်းၼႃႈ ဢၼ်ဢိူမ်ႈၸမ် လၢႆႇၸႃႇဢမ်ႇထၢတ်ႇ၊ မိူၼ်ၼင်ႇတၢင်းပွတ်းတွၼ်ႈပၢင်သဝ်းတပ်ႉမၢၼ်ႈ ပွတ်းၼႃးလူင်၊ ဝၢၼ်ႈမေႃႇ၊ ဝၢၼ်ႈသၢႆး၊ ၼမ်ႉမူးလေး ၸိူဝ်းၼႆႉ- ဝႃႈၼႆ။

တင်ႈတႄႇဝၼ်းထိ 13/10/12 မႃးတေႃႇထိုင်မိူဝ်ႈဝႃး (15/10/12)ၼႆႉ သိုၵ်းမၢၼ်ႈတေႃႉမၢၵ်ႇမိုဝ်ႈ ၸိုၼ်းယၢမ်း/ၶဝ်ႈၼမ်ႉတၢင်းၵိၼ် ယူႇၶိူဝ်းယႂ်း။  ၵူၺ်းၵႃႈ ၾၢႆႇၼိုင်ႈၵေႃႈ ၼႂ်းဝႆးဝႆးဢမ်ႇလၢႆဝၼ်းၼႆႉ ၸုမ်းလူင်ပွင်ၸိုင်ႈ တဵင်းၸဵင်ႇ၊ ၾၢႆႇၵေႃႇသၢင်ႈလွင်ႈငမ်းယဵၼ် တင်းၸုမ်းၶၢင် (KIA) တေႁူပ်ႉဢုပ်ႇ ဢူဝ်းၵၼ် တၢင်းမိူင်းမၢဝ်းထႅင်ႈၵမ်းၼိုင်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်းၼႂ်းတပ်ႉၶၢင် (KIA) ၵေႃႉၼိုင်ႈလၢတ်ႈဝႃႈ- ပေႃးဝႃႈႁဝ်းၶႃႈႁၢင်ႈ ႁႅၼ်း ပိူဝ်ႈတႃႇဢုပ်ႇၵၼ် ၾၢႆႇသိုၵ်းမၢၼ်ႈသမ်ႉႁၢင်ႈႁႅၼ်း တေႃႉသူင်ႇၶဝ်ႈၼမ်ႉတၢင်းၵိၼ်ၶဝ်မႃးယူႇ ၶိူဝ်းၶိူဝ်း။ ၶဝ်ၶႂ်ႈၼႄဢဵၼ်ႁႅင်းဝႃႈ ပေႃးသူဢမ်ႇတူၵ်း လူင်းၵေႃႈႁဝ်းတေယိုဝ်း။ မိူဝ်ႈလဵဝ် သိုၵ်းမၢၼ်ႈ ဢဵၼ်ႁႅင်းမွၵ်ႈ 1,000 ဢိူမ်ႈၸမ်ငဝ်ႈငုၼ်းလၢႆႇၸႃႇ ယၢၼ်မွၵ်ႈ 5 လၵ်းၵူၺ်း။ တီႈတပ်ႉပၢင်သဝ်း လၵျႃးယၢၼ်ႇ ဢၼ်သိုၵ်းမၢၼ်ႈ ယိုတ်းလႆႈတီႈၶၢင် ၵႃႈပူၼ်ႉမႃးၼၼ်ႉ သိုၵ်းမၢၼ်ႈႁၢင်ႈႁႅၼ်းၵွင်ႈ လူင်ၶဝ်ဝႆႉပဵၼ် လၢႆလၢႆလဝ်း- ဝႃႈၼႆ။

ၸိူင်ႉႁိုဝ်ၵေႃႈလီ ပဵၵ်ႉသမ်ႉသွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇၵေႃႈ ပၢင်တိုၵ်းသိုၵ်းမၢၼ်ႈ တင်း သိုၵ်းၶၢင် ၸွမ်းလႅၼ် လိၼ်မိူင်းၶႄႇ ယင်းတိုၵ်ႉယဵၼ်ယူႇ။