တၢင်းၵၢၼ်ၶႄႇၵေႃႇတင်ႈၸုမ်းၶေႃၶေႃ ပိူဝ်ႈတႃႇထတ်း ထၢမ်/ထတ်းသၢင် လွင်ႈၸၢႆးၼေႃႇၶမ်း၊ ၵေႃႉလႆႈထုၵ်ႇ မၢပ်ႇၽၢမ်းဝႃႈ ၵဵဝ်ႇၶွင်ႈၵၢၼ်ၶႃႈႁႅမ်ၵူၼ်း 13 ၵေႃႉ ၼိူဝ်ႁိူဝ်း ၼႂ်းမႄႈၼမ်ႉၶွင်၊ ၺႃးလၢဝ်းတိသူင်ႇပၼ်ၶႄႇသေ တင်းလုၵ်ႈၼွင်ႉၸုမ်းၸိူဝ်းၵမ်ႈၽွင်ႈလႆႈၶိုၼ်ႈလုမ်း တြႃးၶႄႇမိူဝ်ႈလိူၼ်ပူၼ်ႉ။

ၵူၼ်းၸမ်ၸႂ်ၼႃႈႁိူၼ်းၸၢႆးၼေႃႇၶမ်းၵေႃႉၼိုင်ႈလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- မိူဝ်ႈလဵဝ် တၢင်းၼႃႈႁိူၼ်း ၸၢႆးၼေႃႇၶမ်း လႆႈၸၢင်ႈၽူႈတၢင်ဝႃႈၵႂၢမ်း တီႈႁွင်ႊၵူင်ႊ (Hong Kong) ပိူဝ်ႈတႃႇၵႂႃႇ လၢတ်ႈၵႄႈတၢင် ၸၢႆးၼေႃႇၶမ်းယဝ်ႉ။ ၵဵဝ်ႇၵပ်းလွင်ႈ ၸၢႆးၼေႃႇၶမ်းၼႆႉ တင်ႈတႄႇဝၼ်းထိ 21/09/12 မႃး ၶၢဝ်းတၢင်း 3 ဝူင်ႈၼႆႉ တၢင်းၵၢၼ်ၶႄႇလႆႈတင်ႈဝႆႉ ၸုမ်းၶေႃၶေႃ (Collegiate bench) ပိူဝ်ႈတႃႇထတ်းသၢင်လွင်ႈ ၸၢႆးၼေႃႇၶမ်း- ဝႃႈၼႆ။

ဝၢႆးလုမ်းတြႃးၶႄႇ ထတ်းသၢင်ၸၢႆးၼေႃႇၶမ်း တင်းၸုမ်းၸိူဝ်း ပူၼ်ႉမႃးမိူဝ်ႈဝၼ်းထိ 20-21/09/12 ယဝ်ႉ၊ တၢင်းၵၢၼ်ၶႄႇ လႆႈၸတ်းဝႆႉလုမ်းတြႃးၶိုၵ်ႉတွၼ်း ပိူဝ်ႈတႃႇတႅပ်းတတ်းလွင်ႈၼေႃႇၶမ်း။ ၵူၺ်းၵႃႈ ပူၼ်ႉမႃး 3 ဝူင်ႈပၢႆႁၢၼ်ႉတေႃႇမိူဝ်ႈလဵဝ် ၵေႃႈတိုၵ်ႉယဵၼ်ယူႇသီႇသီႇ။ ၵမ်ႈၽွင်ႈဝႃႈ ၶႄႇၶႂ်ႈႁူႉၶေႃႈမုလ်း ထႅင်ႈလွင်ႈၼေႃႇၶမ်း ၵဵဝ်ႇၶွင်ႈၸွမ်းၵူၼ်းလူင်မၢၼ်ႈ/လၢဝ်း/ထႆး ၸိူင်ႉႁိုဝ်။ ၵူၺ်းၵႃႈ ၵမ်ႈၽွင်ႈသမ်ႉဝႃႈ ၸၢင်ႈပဵၼ်ယွၼ်ႉမီးလွင်ႈ ၶွင်ႉၶမ်/ပၼ်ႁႃတၢင်းမၢႆမီႈ။

ၵဵဝ်ႇၵပ်းလွင်ႈမၢႆမီႈၼႆႉ ၽူႈလူင်ႉလႅၼ်ႇမၢႆမီႈထႆးၸဝ်ႈၼိုင်ႈ ယၢမ်ႈလၢတ်ႈၼႄဝႃႈ- ၸၢႆးၼေႃႇၶမ်းၼႆႉ ပေႃးပဵၼ်လုမ်းတြႃး ထႆးတႄႉမၼ်းလွတ်ႈပူၼ်ႉယဝ်ႉ၊ ၵွပ်ႈဢမ်ႇမီးလၵ်းထၢၼ်ၼႅၼ်ႈၼႃ ပိူဝ်ႈတႃႇ ဢဝ်တၢင်းၽိတ်းမၼ်း တဵမ်ထူၼ်ႈ။ ပေႃးတႅၵ်ႈၵၼ်တင်းလွင်ႈၶႃႈႁႅမ်ၵၼ်ၼႂ်းမိူင်းထႆး၊ ဢၼ်ၸိုဝ်ႈ လိုဝ်းလင် တင်ႈတႄႇလိူၼ်ပူၼ်ႉမႃး ၸိုင် မၼ်းပိူင်ႈၵၼ်။ လွင်ႈၶႃႈႁႅမ်ဢၼ်ပဵၼ်ယူႇၼႂ်းမိူင်းထႆးၼႆႉ 1.တူဝ်တၢႆၽူႈထုၵ်ႇၶႃႈ မီးၼႂ်းတီႈလိၼ် ၵေႃႉထုၵ်ႇၵၢဝ်ႇႁႃ (ၵေႃႉလႆႈထုၵ်ႇၸိၼႄး ဝႃႈၶႃႈႁႅမ်တၢႆ ၵူၼ်း)။ 2.ၼႂ်းတူဝ်တၢႆၵေႃႈ မီးမၢၵ်ႇၵွင်ႈၶမ်ယူႇ။ 3.ၵေႃႉထုၵ်ႇၵၢဝ်ႇႁႃ မီးၵွင်ႈတင်းၼမ် (ဢမ်ႇမီးဝႂ် ဢၼုၺၢတ်ႈ License ၵမ်ႈၼမ်)။ 4.လူတ်ႉၵႃးၶွင်ယိူဝ်ႇ (ၵူၼ်းၺႃးၶႃႈတၢႆ) မီးၼႂ်းတီႈလိၼ်ၵေႃႉ ထုၵ်ႇၵၢဝ်ႇႁႃ။ 5.မီးၵေႃႉႁူႉႁၼ် (ၽယၢၼ်း) ဢၼ်ၵမ်ႉထႅမ်လွင်ႈၶႃႈ ၵူၼ်း။ ၵူၼ်းၵေႃႉၼႆႉ မီးလၵ်းထၢၼ်တင်းၼမ်လႄႈ တႃႇတေလွတ်ႈပူၼ်ႉတၢင်းၽိတ်း ၼၼ်ႉ ဢမ်ႇငၢႆႈငၢႆႈ၊ မၼ်းဢမ်ႇမိူၼ်ၵၼ်တင်းလွင်ႈၼေႃႇၶမ်း။

လွင်ႈၸၢႆးၼေႃႇၶမ်းၼႆႉ ၵွပ်ႈဝႃႈ- 1.ၼမ်ႉမႄႈၶွင် ဢမ်ႇၸႂ်ႈၶွင်ၼေႃႇၶမ်း၊ ပဵၼ်ၶွင်ၵူႈမိူင်းမိူင်း ဢမ်ႇၼၼ် ပဵၼ်ၶွင်လၢဝ်း/ ထႆး/မၢၼ်ႈ။ 2.ၽူႈႁူႉႁၼ်ၵမ်ႉထႅမ်လွင်ႈၶႃႈ ၵူၼ်းၵေႃႈဢမ်ႇမီး။ ဢၼ်လုၵ်ႈၼွင်ႉမၼ်း ၸိၼႄးမၼ်းဝႃႈ ပဵၼ်ၵူၼ်းသင်ႇ ၵၢၼ်ၼၼ်ႉၵေႃႈ ၵွပ်ႈပဵၼ်ၵူၼ်းၶိုၼ်ႈလုမ်း တြႃး/ပဵၼ်ၵူၼ်းထုၵ်ႇၵၢဝ်ႇႁႃ ၼင်ႇၵၼ်လႄႈ ၼမ်ႉၼၵ်းမၼ်းဢေႇ၊ ၵွပ်ႈဝႃႈ ၵူၼ်းၸိူဝ်းၼႆႉ ၼင်ႇႁိုဝ် တူဝ်ၶဝ်ပေႃးတေလွတ်ႈၼၼ်ႉ ၶဝ်ၵေႃႈ ၸၢင်ႈလႃႈလီႈလၢတ်ႈ လူင်ၵႂႃႇၵူႈပိူင်ပိူင်၊ သင်ပဵၼ်ၽူႈႁူႉႁၼ် ၸွမ်း (ၽယၢၼ်း)တၢင်းၼွၵ်ႈတႄႉ ၼမ်ႉၼၵ်း ၸၢင်ႈမီးၼမ်။ 3.တေႃႇထိုင်မိူဝ်ႈလဵဝ် ၶိူင်ႈၵွင်ႈၵၢင်ႇ ဢၼ်ၸႂ်ႉၼႂ်းၵၢၼ်ၶႃႈ ႁႅမ်ၵူၼ်း 13 ၵေႃႉ ၼၼ်ႉၵေႃႈ ပဵၼ်လဝ်းလႂ်၊ လဝ်းၼၼ်ႉလဝ်းၼႆႉဢွၵ်ႇမႃး ၵေႃႈယင်းပႆႇငိၼ်း။ ဢိင်ၼိူဝ်လွင်ႈတၢင်း ၸိူဝ်းၼႆႉသေ သင်ဝႃႈ ၸၢႆးၼေႃႇၶမ်းလႆႈၶိုၼ်ႈလုမ်းတြႃး ထႆးတႄႉ သၢႆငၢႆလွတ်ႈမၼ်းမီးၼမ်၊ ၵွပ်ႈဝႃႈၽူႈႁူႉႁၼ်/လၵ်းထၢၼ် ၵူႈပိူင်ပိူင် ဢၼ်ပိူၼ်ႈၵၢဝ်ႇႁႃမႃး ၼႆႉ မၼ်းဢမ်ႇပဵင်းပေႃးပိူဝ်ႈတႃႇ ပၼ်တူတ်ႈတၢမ်ႇ ပိူဝ်ႇတႃႇမတ်ႉတူဝ်မၼ်း။

ပိူင်ၼိုင်ႈၵေႃႈၵွပ်ႈႁဝ်းၶႃႈပဵၼ်ထႆးလႄႈ  မၢႆမီႈၶႄႇမီးၸိူင်ႉႁိုဝ် ႁဝ်းဢမ်ႇႁူႉတႄႉတႄႉ။ ၵူၺ်းၵႃႈပီႈ ၼွင်ႉမၼ်း ၵေႃႈလီ၊ ၵူၼ်းၼႂ်းၼႃႈႁိူၼ်းမၼ်းၸိူဝ်းပဵၼ်ၼၢင်းမေးမၼ်းၵေႃႈလီ၊ ၸွႆႈလႆႈၵႃႈႁိုဝ်ၵေႃႈ ထုၵ်ႇလီၸွႆႈ၊ ၵွပ်ႈဝႃႈ တေၸၢင်ႈႁဵတ်းႁႂ်ႈ တၢင်းၽိတ်းၼၵ်းပဵၼ်မဝ်၊ ပေႃးပဵၼ်မဝ်ႁႂ်ႈႁၢႆ/လႆႈပူၼ်ႉ လွတ်ႈ။ ဢၼ်လီသုတ်း ပေႃးလႆႈ ၽူႈတၢင်ဝႃႈၵႂၢမ်းၶႄႇ ၸွႆႈပၼ်ယိင်ႈၶႅၼ်းလီ၊ ၵွပ်ႈဝႃႈၶဝ်ႁူႉမၢႆမီႈ ၶႄႇ- ဝႃႈၼႆ။