ဝၢႆးပီႈၼွင်ႉတႆးမိူင်းဢမႄႊရိၵၼ်ႊႁူပ်ႉထူပ်းယဝ်ႉ ၸဝ်ႈၶုၼ် ထုၼ်းဢူး ဢၢၼ်းပွၵ်ႈၶိုၼ်းမိူင်းမၢၼ်ႈ ၵမ်းလဵဝ်၊ ၵူၺ်းၵႃႈ ဢိင်ၼိူဝ်ပီႈၼွင်ႉတႆးတီႈမိူင်းၵျပၼ်ႊ ၶႂ်ႈႁူပ်ႉသေဢွၵ်ႇၶၢဝ်း တၢင်းၵႂႃႇႁူပ်ႉထူပ်း လႄႈ မၼ်းၸဝ်ႈပႆႇပဵၼ်ပွၵ်ႈၵမ်းလဵဝ်။

ၶၢဝ်းတၢင်းမိူင်းဢမႄႊရိၵၼ်ႊပွၵ်ႈၼႆႉ  ၸဝ်ႈၶုၼ်ထုၼ်းဢူး၊ ႁူဝ်ပဝ်ႈငဝ်ႈငုၼ်း ၻီႊမွၵ်းၶရေႊသီႊ ၸိူဝ်ႉၶိူဝ်းတႆး ႁိုဝ် ပႃႇတီႇႁူဝ် သိူဝ် (SNLD) မီးၽႅၼ်ၵၢၼ်ႁွတ်ႈထိုင်ၶိုၼ်းမိူင်းမၢၼ်ႈ ဝၼ်းထိ 02/10/12 (မိူဝ်ႈဝႃး)၊ ၵူၺ်းၵႃႈ ဢိင်ၼိူဝ်ပီႈၼွင်ႉတႆးတီႈမိူင်း ၵျပၼ်ႊၶဝ်ၵေႃႈ ၶႂ်ႈႁူပ်ႉမၼ်းၸဝ်ႈ ၼႆသေ ဢွၵ်ႇၶၢဝ်းတၢင်းလုၵ်ႉမိူင်းၵျပၼ်ႊ ၵႂႃႇယဵမ်ႈမၼ်းၸဝ်ႈတီႈမိူင်းဢမႄႊရိၵၼ်ႊလႄႈ ဢမ်ႇပဵၼ်၊  ယွၼ်ႉၼၼ် မၼ်းၸဝ်ႈလႆႈၵိုတ်းဝႆႉ/လိူၼ်ႈၶၢႆႉ ၶၢဝ်းတၢင်း။ လႆႈႁူႉဝႃႈတေၸွမ်းသၢႆၵၢၼ် ဝိၼ်သေ ပွၵ်ႈၶိုၼ်းထိုင် မိူင်းထႆးမိူဝ်ႈၼႆႉသေ သိုပ်ႇပွၵ်ႈထိုင်မိူင်းမၢၼ်ႈ မိူဝ်ႈၽုၵ်ႈ ဝၼ်းထိ 04/10/12 ၵၢင်ၼႂ်ယၢမ်း 08:15 မူင်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် ၸၢႆးလဵၵ်ႉ လၢတ်ႈဝႃႈ- ၸဝ်ႈၶုၼ်ထုၼ်းဢူးၼႆႉ ၸွမ်ၸိုင်ႈတဵင်းၸဵင်ႇယိုၼ်ႈ မိုဝ်း ပိူဝ်ႈတႃႇႁႂ်ႈပဵၼ်တူဝ်တႅၼ်းမိူင်းမၢၼ်ႈ ၵႂႃႇၶဝ်ႈႁူမ်ႈပၢင်ၵုမ်ၸၢတ်ႈ ၸိုင်ႈၽွမ်ႉႁူမ်ႈ (UN) ဢၼ်ၸတ်းႁဵတ်းမိူဝ်ႈဝၼ်းထိ ပူၼ်ႉမႃးမိူဝ်ႈ 27/09/12 ။ ၵူၺ်းၵႃႈ  ၵူၼ်းၸၼ်ႉပႃႈတႂ်ႈၶွင်ၸွမ်ၸိုင်ႈတဵင်းၸဵင်ႇ တင်း ၸွမ်ၸိုင်ႈတဵင်းၸဵင်ႇလၢတ်ႈၵႂၢမ်း ဢမ်ႇၶူပ်းငၢမ်ႇ ၵၼ်လႄႈ ၸဝ်ႈၶုၼ်ထုၼ်းဢူးၵေႃႈ လၢတ်ႈၵႂၢမ်းၶေႃႈလဵဝ်ဝႃႈ- “ႁူဝ်ၶဝ်ႇၵဝ်ၸဵပ်း၊ ၵဝ်ဢမ်ႇၵႂႃႇ” ၼႆသေဢမ်ႇ ပဵၼ်ၵႂႃႇၶဝ်ႈႁူမ်ႈ ပၢင်ၵုမ် UN - ဝႃႈၼႆ။