လွင်ႈၵူၼ်းဝၢၼ်ႈသွင်ၵေႃႉပီႈၼွင်ႉၺႃးသိုၵ်းမၢၼ်ႈဢဝ်ၵွင်ႈ လူင်/ၵွင်ႈဢွၼ်ႇယိုဝ်း၊ သမ်ႉတိၺွပ်း ပေႃႉထုပ်ႉ ပႃးၼၼ်ႉ ၵွပ်ႈၵူၼ်းဝၢၼ်ႈ ဢမ်ႇႁၢၼ်ႉၸႂ်သေ ႁဵတ်းလိၵ်ႈတၢင်ႇၽွင်း တႅၼ်းၵူၼ်းမိူင်း ပႃႇတီႇသိူဝ်ၽိူၵ်ႇတင်း ၸွမ်ၸိုင်ႈတဵင်း ၸဵင်ႇ၊ ႁႂ်ႈၸွႆႈၵႄႈလိတ်ႈပၼ်။

ဢိင်ၼိူဝ်ပူၼ်ႉမႃးမိူဝ်ႈဝၼ်းထိ 24/09/12 ၵူၼ်းဝၢၼ်ႈ 2 ၵေႃႉပီႈၼွင်ႉ ၸၢႆးၼွင်ႉလူင် ဢႃႇယု 18 ၊ ၸၢႆးၼွင်ႉဢွၼ်ႇ ဢႃႇယု 16 တူၵ်းၸႂ်သဵင်မၢၵ်ႇတႅၵ်ႇၽွင်းၵႂႃႇႁဵတ်းႁႆႈၶဝ်ႈၵၢပ်ႇသေလႅၼ်ႈပၢႆႈ၊ သမ်ႉၺႃးသိုၵ်း မၢၼ်ႈဢဝ်ၶိူင်ႈၵွင်ႈလူင်/ၵွင်ႈဢွၼ်ႇယိုဝ်း သႂ်ႇၵူၺ်းပႆႇပေႃး၊ ၺႃးတိၺွပ်းထဵတ်ႈထၢမ် ပေႃႉထုပ်ႉ ဢဝ်မိူဝ်းတီႈၵွင်းတပ်ႉမၢၼ်ႈ၊ ၵုမ်းၶင်ဝႆႉလႆႈၶၢဝ်းတၢင်း 4 ဝၼ်း ၸင်ႇပွႆႇပွၵ်ႈႁိူၼ်း။ ယွၼ်ႉ ၺႃးၸၢၵ်ႇမၢၵ်ႇ၊ သိုၵ်းမၢၼ်ႈပေႃႉထုပ်ႉၵုမ်းၶင်၊ ဝၢႆးမႃးပဵၼ်ၵိၼ်းဝႆႉလႄႈ ႁဵတ်းႁႂ်ႈပီႈၼွင်ႉၸိူဝ်ႉၶိူဝ်း ဢိၵ်ႇ ၵူၼ်းဝၢၼ်ႈ ဢမ်ႇႁၢၼ်ႉၸႂ်သေ ဢွၼ်ၵၼ်ႁဵတ်း လိၵ်ႈလၢႆးတၢင်ႇထိုင်လုင်းၸၢႆးလႃႉဢွင်ႇ ၽွင်းတႅၼ်းသၽႃးၵူၼ်းမိူင်း၊ ပႃႇတီႇသိူဝ်ၽိူၵ်ႇ SNDP ၸႄႈဝဵင်းၼမ်ႉတူႈ လႄႈတၢင်ႇပႃးထိုင်ၸွမ် ၸိုင်ႈတဵင်းၸဵင်ႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ဝၼ်းထိ 24/09/12 မၢၵ်ႇတႅၵ်ႇၼႂ်းမူႇၾုင်သိုၵ်းမၢၼ်ႈ ဝူင်ႈၵၢင်ဝၢၼ်ႈပၢင်ဝူဝ်း တင်းဝၢၼ်ႈပၢင်မေႃႈၶၢင် တီႈႁိမ်းသူၼ်ၶဝ်ႈၵၢပ်ႇၵူၼ်းဝၢၼ်ႈ ၽွင်းၵိုတ်းလိုဝ်ႈၶၢဝ်းတၢင်း၊ ယွၼ်ႉမီး မၢၵ်ႇတႅၵ်ႇသေ သိုၵ်းမၢၼ်ႈၵေႃႉၼိုင်ႈတင်းၵူၼ်း သူင်ႇတၢင်း ၸိုဝ်ႈလုင်းၸၢႆး တၢႆထင်တီႈၸွမ်းၵၼ်၊ မီးသိုၵ်းမၢၼ်ႈၵေႃႉၼိုင်ႈ တိူဝ်ႉဝၢတ်ႇၸဵပ်းသေမိူဝ်းတၢႆတီႈႁူင်းယႃႈၼမ်ႉ တူႈ။ လွင်ႈမၢၵ်ႇတႅၵ်ႇၼႆႉ ၵမ်ႈၼမ်ဝႃႈ သိုၵ်းမၢၼ်ႈဢဝ်မၢၵ်ႇပွမ်း လုတ်ႈတူၵ်းမိုဝ်းသေတူၵ်းတႅၵ်ႇ၊ ၵူၺ်းၵႃႈ ၾၢႆႇသိုၵ်းမၢၼ်ႈ သမ်ႉလၢတ်ႈ/ၵႄႈတူဝ်ဝႃႈ ပဵၼ်မၢၵ်ႇသိုၵ်းတႆး ၵၢင်ဝႆႉၸွမ်းတူၼ်ႈမႆႉသေတဵၵ်းၼဵၼ်မၼ်း- ဝႃႈၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ၸၢႆးၼွင်ႉလူင်ၼႆႉ ၸၢၵ်ႇမၢၵ်ႇလူင်တိူဝ်ႉၺႃးတီႈပေလင် တင်းတီႈၵႅမ်ႈ။ ၶႃပီႈၼွင်ႉ ၼႆႉ လိူဝ်သေၺႃးတိူဝ်ႉဝၢတ်ႇၸဵပ်းယဝ်ႉ ၺႃးသိုၵ်းမၢၼ်ႈတိၺွပ်းပေႃႉထုပ်ႉ ထႅင်ႈ၊ တင်းဝၢတ်ႇၸဵပ်း သေၺႃးပေႃႉထုပ်ႉ ဢဝ်မိူဝ်းတီႈၵွင်းတပ်ႉမၢၼ်ႈ။ သိုၵ်းမၢၼ်ႈပွႆႇပၼ်ၶိုၼ်း ၶမ်ႈဝၼ်းၽတ်းထိ 27/09/12 ၵၢင်ၶမ်ႈ၊ ထိုင်ၵၢင်ၼႂ်မႃး (28/09/12) ၸၢႆးၼွင်ႉလူင်ပဵၼ်ၵိၼ်းလိူဝ် ႁႅင်းသေ လႆႈဢဝ်သူင်ႇၵႂႃႇယူတ်းယႃ တီႈႁူင်းယႃၼမ်ႉတူႈ- ပၢင်ႁႆး။ ၵေႃႉၼွင်ႉသမ်ႉၺႃးပေႃႉ ထုပ်ႉၼိူဝ်ႉယူၼ်ႈ-ၸမ်ႉမၢၼ်ႉတၢင်းၼႂ်းသေ ဢဝ်ယူႇၵိုၵ်းႁိူၼ်း၊ ယူတ်းယႃဝႆႉလူၺ်ႈလၢႆးသြႃႇတႆး/ ယႃႈယႃတႆး- ဝႃႈၼႆ။

ၵူၼ်းသူင်ႇတၢင်း လုင်းၸၢႆး ဢႃႇယု 53 ၊ ၵေႃႉဢၼ်တၢႆၸွမ်းသိုၵ်းမၢၼ်ႈယွၼ်ႉမၢၵ်ႇတႅၵ်ႇၼၼ်ႉ ပဵၼ်ၵူၼ်း ဝၢၼ်ႈပၢင်ဝူဝ်း။ လွင်ႈၼႆႉ လႆႈႁူႉဝႃႈၶမ်ႈဝၼ်းထိ 23/09/12 သိုၵ်းမၢၼ်ႈတပ်ႉၶမယ 324 တင်း တပ်ႉလႃႈသဵဝ်ႈၵမ်ႈၽွင်ႈႁူမ်ႈၵၼ်ဢွၵ်ႇၶၢဝ်း တၢင်းမႃးၼွၼ်းတီႈပၢင်ဝူဝ်း၊ ၵၢင်ၼႂ်ဝၼ်းထိ 24/09/12 ႁွင်ႉဢဝ်/တိၺွပ်း ၵူၼ်းဝၢၼ်ႈ လုင်းၸၢႆးလုၵ်ႉပၢင်ဝူဝ်းဢွၵ်ႇဝၢၼ်ႈ မုင်ႈၼႃႈၵႂႃႇၸူးတၢင်း ပၢင်မေႃႈၶၢင်။

လုင်းၸၢႆးၼႆႉ ပီႈၼွင်ႉၸိူဝ်ႉၶိူဝ်း ဢိၵ်ႇၵူၼ်းဝၢၼ်ႈႁႅၼ်းသွမ်းပၼ်မိူဝ်ႈဝၼ်းဢႃးတိတ်ႉထိ 30/09/12 (လိူၼ် 10 မူၼ်း)၊ ဢၼ်သိုၵ်းမၢၼ်ႈလၢတ်ႈဝႃႈတေမႃးၸွႆႈထႅမ်ပၼ် ၵႃႈသေႁၢႆလုသုမ်းၼၼ်ႉ ဢမ်ႇမႃးၸွႆႈထႅမ်သင်၊ ၵူၼ်းဝၢၼ်ႈလႄႈ ၵူၼ်းႁိူၼ်းၵူၼ်းယေး လႆႈၵဵပ်းငိုၼ်းၵၼ်သေၸတ်းႁႅၼ်း ပၼ်ၵႂႃႇ။ လုင်းၸၢႆး မီးလုၵ်ႈလၢင်း 6 ၵေႃႉ၊ တႄႇၼႃႈႁိူၼ်းၵႂႃႇယဝ်ႉ ၵေႃႉၼိုင်ႈ၊ တႃႇ 2 ၵေႃႉတိုၵ်ႉၶဝ်ႈ ႁူင်းႁဵၼ်းယူႇ၊  ၵေႃႉၼိုင်ႈဢႃႇယု 10 ၶူပ်ႇ ၶဝ်ႈႁူင်းႁဵၼ်းၸၼ်ႉ 4 ၊ ၵေႃႉၼိုင်ႈ 8 ၶူပ်ႇ ၶဝ်ႈၸၼ်ႉ 2 ။

ဢိင်ၼိူဝ်ပေႃႈမႄႈပီႈၼွင်ႉ၊ ၵူၼ်းဝၢၼ်ႈဢမ်ႇႁၢၼ်ႉၸႂ် လွင်ႈၵူၼ်းဝၢၼ်ႈသွင်ၵေႃႉပီႈၼွင်ႉၺႃးပေႃႉ ထုပ်ႉလၢႆလၢႆ၊ ဢိၵ်ႇ လုင်းၸၢႆးတၢႆၵႂႃႇၸိူဝ်းၼႆႉလႄႈ လႆႈႁဵတ်းလိၵ်ႈတၢင်ႇထိုင် ၸၢႆးဢွင်ႇလႃႉ ၽွင်းတႅၼ်းသၽႃးၵူၼ်းမိူင်း မိူဝ်ႈဝၼ်းဢႃးတိတ်ႉထိ 30/09/12 ၊ သိုပ်ႇယိုၼ်ႈထိုင်ပႃးၸွမ်ၸိုင်ႈ တဵင်းၸဵင်ႇ။ တၢင်ႇလၢတ်ႈတုၵ်းယွၼ်းဝႃႈ ၼင်ႇႁိုဝ်တေဢမ်ႇပဵၼ်ထႅင်ႈၼၼ်ႉ တုၵ်းယွၼ်းၶႂ်ႈႁႂ်ႈၸွမ် ၸိုင်ႈ/ ၽွင်းတႅၼ်းၶဝ်ဢွၼ်ႁူဝ်ၼမ်းၼႃႈသေ ၵႄႈလိတ်ႈပၼ်။ ယႃႇႁႂ်ႈၼႂ်းပိုၼ်ႉတီႈပဵၼ်သိုၵ်းသိူဝ်၊ ႁႂ်ႈၵတ်းယဵၼ်၊ ႁႂ်ႈသၢင်ႈလွင်ႈငမ်းယဵၼ်လႆႈ ဢၼ်ၸိုၼ်ႈၸၢင်ႇ - တုၵ်းယွၼ်းၵႂႃႇၼင်ႇၼႆ။