ၸွမ်ၸိုင်ႈတဵင်းၸဵင်ႇဝႃႈ ငိုၼ်းၸိူဝ်းဢၼ်လႆႈမႃးတီႈၶူဝ်းၶွင် သၽႃဝ တေၽႄပၼ်ၸႄႈမိူင်း။ ၼွၵ်ႈသေၼၼ်ႉ တေ ဢူၼ်းပၼ်ဢမ်းၼၢၸ်ႈႁႂ်ႈၸၢဝ်းၶိူဝ်းမီးသုၼ်ႇလႆႈၽွင်းငမ်း တူဝ်ၵဝ်ႇၼမ် မႃးလိူဝ်ၵဝ်ႇ။

ႁူင်းပွႆႇသဵင်ၾရီႊဢေႊသျိူဝ်ႊ (RFA) ဢွၵ်ႇၶၢဝ်ႇမိူဝ်ႈဝၼ်းထိ 01/10/12 ၊  ၽွင်းလူင်လုမ်းၸွမ်ၸိုင်ႈ ဢူးၸူဝ်းတဵင်းလၢတ်ႈ ဝႃႈ- ၸွမ်ၸိုင်ႈတဵင်းၸဵင်ႇ မီးၽႅၼ်ၵၢၼ်ပိူဝ်ႈတႃႇၽႄပၼ်ငိုၼ်းၶဝ်ႈ တီႈၸႄႈ မိူင်းၶဝ် ၼမ်လိူဝ်ၵဝ်ႇ၊ ၵဵဝ်ႇလူၺ်ႈငိုၼ်းၶဝ်ႈ ဢၼ်လႆႈမႃးတီႈၶူဝ်းၶွင်သၽႃႇဝဢၼ်ဢွၵ်ႇၼႂ်းၸႄႈ မိူင်းၶဝ်။

ၼွၵ်ႈသေၼၼ်ႉ ၼင်ႇႁိုဝ်ၸၢဝ်းၶိူဝ်းတေမီးသုၼ်ႇလႆႈၽွင်းငမ်းတူဝ်ၵဝ်ႇၼမ်ၶိုၼ်ႈမႃးၼၼ်ႉ တေဢူၼ်းပၼ်ဢမ်းၼၢၸ်ႈ (ဢႃႇၼႃႇ) တီႈၸၢဝ်းၶိူဝ်းၶဝ် ႁႂ်ႈၽွင်းငမ်းတူဝ်ၵဝ်ႇလႆႈႁင်းၵူၺ်း။ ၼႆႉပဵၼ်ၾၼ် (တၢင်းယိူင်းဢၢၼ်း) ၶွင်ႁဝ်းၶႃႈလႄႈၸွမ် ၸိုင်ႈတဵင်းၸဵင်ႇ။ ၵူၺ်းၵႃႈ တႃႇတေ ႁဵတ်းလႆႈၼၼ်ႉ ဢွၼ်တၢင်းသုတ်း တၵ်းလႆႈမႄးၵႄႈၶိုၼ်းမၢႆမီႈၸႅၵ်ႇၽႄပုၼ်ႈသုၼ်ႇ ငိုၼ်းၶဝ်ႈ- ဝႃႈၼႆ။