သိုၵ်းမၢၼ်ႈပွင်ႇလၢတ်ႈသိုၵ်းတႆး ႁႂ်ႈၶၢႆႉထွၼ်ဢွၵ်ႇပၼ်တပ်ႉ ပၢင်သဝ်းတႃႈသၢမ်ပူးထႅင်ႈ၊ ဢၢင်ႈဝႃႈ သိုၵ်းမၢၼ်ႈတေမီး ၵၢၼ်ပုတ်ႈလၢႆႈၶၢႆႉတပ်ႉၵၼ်လႄႈ ႁႂ်ႈငိူင်ႉထွၼ်ဢွၵ်ႇပၼ်ၸူဝ်ႈၵႅပ်ႉ။

ဝၼ်းထိ 04/10/12 (မိူဝ်ႈဝႃး) ၼႆႉ တပ်ႉသိုၵ်းမၢၼ်ႈ ပွင်ႇၶၢဝ်ႇၸႅင်ႈဝွၵ်ႇၸူးသိုၵ်းတႆး တပ်ႉသိုၵ်းၸိုင်ႈ တႆး (SSPP/SSA) ဝႃႈ- ႁႂ်ႈတပ်ႉတပ်ႉသိုၵ်းၸိုင်ႈတႆး ငိူင်ႉထွၼ်ဢွၵ်ႇပၼ်တႃႈသၢမ်ပူး- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉငဝ်ႈငုၼ်းဝၢၼ်ႈႁႆး ၶွင်တပ်ႉသိုၵ်းၸိုင်ႈတႆး (SSPP/SSA) ၵေႃႉဢမ်ႇၶႂ်ႈ ဢွၵ်ႇၸိုဝ်ႈၸဝ်ႈၼိုင်ႈ လၢတ်ႈဝႃႈ- ႁဝ်းငိူင်ႉထွၼ်ပၼ်ၸွမ်းၼင်ႇၶေႃႈတုၵ်းယွၼ်းသိုၵ်းမၢၼ်ႈမႃးၵေႃႈ ၼမ်ယဝ်ႉ၊ ၵွပ်ႈၼၼ် တႃႈသၢမ်ပူးၼႆႉတႄႉ တေဢမ်ႇၸၢင်ႈငိူင်ႉဢွၵ်ႇပၼ်။ ၵူၺ်းၵႃႈ ၾၢႆႇသိုၵ်းမၢၼ်ႈ ၶဝ်လၢတ်ႈဝႃႈ ယွၼ်ႉပိူဝ်ႈတပ်ႉသိုၵ်းမၢၼ်ႈတေမီးၵၢၼ်ပုတ်ႈၶၢႆႉ လၢႆႈတပ်ႉၵၼ်လႄႈ ႁႂ်ႈငိူင်ႉထွၼ် ပၼ်ၸူဝ်ႈၵႅပ်ႉၵူၺ်း- ဝႃႈၼႆ။

ၵပ်းၵၢႆႇလွင်ႈၼႆႉ ၾၢႆႇတပ်ႉသိုၵ်းၸိုင်ႈတႆး SSA လၢတ်ႈဝႃႈ- ပေႃးဝႃႈသိုၵ်းမၢၼ်ႈၶိုၼ်ႈမႃးတီႈတႃႈ သၢမ်ပူးတႄႉ လိူဝ်သေယိုဝ်း လႄႈပိုၼ်ၽၢဝ်ႇယႃႉ ၶိုၼ်းလွင်ႈငမ်းယဵၼ်ၼၼ်ႉ ဢမ်ႇမီးလၢႆးၵႄႈမၼ်း။ ၵူၺ်းၵႃႈ ၾၢႆႇၼိုင်ႈၵေႃႈ မႆႈၸႂ်ၸွမ်းၵူၼ်းဝၢၼ်ႈ ၵူၼ်းမိူင်း ၵွပ်ႈပဵၼ်ၽွင်းဢဝ်မၢၵ်ႇၶဝ်ႈတဝ်ႈၼမ်ႉ၊ ထႅင်ႈၾၢႆႇၼိုင်ႈၵေႃႈ တပ်ႉသိုၵ်းၸိုင်ႈတႆး ဢမ်ႇၶႂ်ႈႁဵတ်းသိုၵ်းတေႃႇတပ်ႉ သိုၵ်းလူင်ပွင်ၸိုင်ႈမၢၼ်ႈ၊ ၶႂ်ႈဢဝ်လၢႆးၵတ်းယဵၼ် ၵႄႈလိတ်ႈၵူၺ်း။ ၵွပ်ႈၼၼ်လႄႈ ဢွၼ်တၢင်းသုတ်း တေတႅမ်ႈလိၵ်ႈၸူး ၸုမ်းၵေႃႇသၢင်ႈလွင်ႈငမ်းယဵၼ် ၶွင်လူင်ပွင်ၸိုင်ႈ ႁႂ်ႈၵႄႈလိတ်ႈပၼ်ႁႃလွင်ႈၼႆႉ- ဝႃႈၼႆ။

တီႈတႃႈသၢမ်ပူးၼႆႉ ပဵၼ်တႃႈ/သဵၼ်ႈတၢင်းဢၼ်တေႃႉတၢင်ႇ ႁႄႈၽူင်း (ၶၼွၵ်ႉၸဵင်း) လတ်း ၽၢၼ်ႇ။ ပဵၼ်ပိုၼ်ႉတီႈၼႃႈ လိၼ်ဢၼ် SSA ယိပ်းၵုမ်း တင်ႈတႄႇၵိုတ်းသိုၵ်း 1989 မႃး။ သိုၵ်းမၢၼ်ႈ ၸႂ်ႉငိူင်ႉထွၼ် ၶၢႆႉဢွၵ်ႇၵမ်းၼႆႉ မိူၼ်ၵၼ်တင်း ဢိုတ်းပႅတ်ႈႁူးထူၺ်ႈၸႂ် ၼႃႈတၢင်းၸၢၼ်းတီႈၼိုင်ႈ။ တႃႈသၢမ်ပူးၼႆႉ ယၢၼ်ၸဵင်ႇၸၢၼ်းဝၼ်းဢွၵ်ႇဝၢၼ်ႈႁႆး 10 လၵ်း၊ ယူႇၼႂ်းဢိူင်ႇႁၢႆးပႃ ၸႄႈဝဵင်းမိူင်းသူႈ။