တပ်ႉသိုၵ်းဝႃႉ UWSA သူင်ႇၸဝ်ႈၼႃႈတီႈၶဝ်ႈၵူတ်ႇထတ်း ၵူၼ်းသိုၵ်း၊ ၵူၼ်းမိူင်း၊ လူတ်ႉၵႃး ၸိူဝ်းယူႇသဝ်းတူင်ႉၼိုင် မၢၵ်ႇမိူဝ်ယူႇၼႂ်းမိူင်းလႃး ၼႃႈလိၼ်တပ်ႉသိုၵ်း NDAA ။

တင်ႈတႄႇႁၢင်လိူၼ်သႅပ်ႊထႅမ်ႊၿိူဝ်ႊ (2012)မႃးႁၢၼ်ႉတေႃႇမိူဝ်ႈလဵဝ် တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) သူင်ႇၸဝ်ႈ ၼႃႈတီႈသိုၵ်းၶဝ် ၶဝ်ႈၵူတ်ႇထတ်း/ႁႃၵူၼ်းသိုၵ်း၊ ၵူၼ်းမိူင်း ၶွင်ဝႃႉ ၸိူဝ်းၶဝ်ႈ ယူႇသဝ်းတူင်ႉၼိုင်/ ၵႃႉၶၢႆၼႂ်းၼႃႈလိၼ် မိူင်းလႃး။ ၼွၵ်ႈသေၼၼ်ႉ ယင်းၵူတ်ႇထတ်းပႃးလူတ်ႉၵႃး ဝႃႉ၊ ပေႃးထူပ်းႁၼ်ဢမ်ႇဝႃႈၵူၼ်းဝႃႈၵႃး ဢဝ်ပွၵ်ႈၶိုၼ်းမိူဝ်း ၼႂ်းၼႃႈလိၼ်ဝႃႉတင်းမူတ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းလႃးၵေႃႉၼိုင်ႈလၢတ်ႈဝႃႈ- ၸဝ်ႈၼႃႈတီႈဝႃႉၸိူဝ်းမႃးၵူတ်ႇထတ်းၼႆႉ ၸႅၵ်ႇၽႄႁဵတ်းပဵၼ်ၸုမ်း ပဵၼ်ၸုမ်း၊ ၸုမ်းလႂ် 6-7 ၵေႃႉ ႁူမ်ႈပႃးပလိၵ်ႈမိူင်းလႃးသေ သွၵ်ႈတဝ်ၵူတ်ႇ ထတ်းႁႃၵူၼ်း၊ လူတ်ႉၵႃးဝႃႉၶဝ်။ မိူဝ်ႈလဵဝ် ၵူၼ်းတင်းလူတ်ႉၵႃးဢၼ်ၶဝ်ၵူတ်ႇထတ်းႁၼ်ၼၼ်ႉ ဢဝ်ပွၵ်ႈမိူဝ်းၶိုၼ်း တင်းၼမ်ယဝ်ႉ။ ၵမ်ႈၼမ်ၶဝ်မႃးထတ်းႁႃၵူၼ်း သိုၵ်းၶဝ်ၸိူဝ်းမႃးလၵ်ႉၵႃႉၶၢႆ၊ ယူႇလွၵ်ႇယူႇလၢႆ ႁႃၵိၼ်ယူႇ သိူဝ်းမူၼ်ႈ ၼႂ်းမိူင်းလႃးၸိူဝ်းၼႆႉ။

သိုပ်ႇလၢတ်ႈထႅင်ႈဝႃႈ- ၵူၼ်းသိုၵ်းဝႃႉၸိူဝ်းဢမ်ႇမီးပုၼ်ႈၽွၼ်းသေ မႃးယူႇသဝ်းၼႂ်းမိူင်းလႃးၼၼ်ႉ ပေႃးငိၼ်းၶၢဝ်ႇလွင်ႈ ၸဝ်ႈၼႃႈတီႈဝႃႉၶဝ်မႃးၵူတ်ႇထတ်းၵေႃႈ ၵမ်ႈၽွင်ႈဢွၼ်ၵၼ်သွတ်ႉသႅတ်ႉပၢႆႈ။ ၵမ်ႈၽွင်ႈၸိူဝ်းပဵၼ် လူတ်ႉၵႃးတိတ်းပၢႆႉ(မၢႆလူတ်ႉ)ဝႃႉၵေႃႈ လၵ်ႉထွတ်ႇဢွၵ်ႇသေဢဝ်ပၢႆႉၶွင်မိူင်းလႃး သႂ်ႇတႅၼ်း၊ ၵွပ်ႈၵူဝ်ၺႃးဢဝ် သူင်ႇပွၵ်ႈ- ဝႃႈၼႆ။

လွင်ႈၼႆႉ ပဵၼ်မႃးဝၢႆးသေၼႂ်းတပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) မီးလွင်ႈလႅၵ်ႈလၢႆႈၶၢႆႉပုတ်ႈတၼ်း ႁဵင်းၵၼ်၊ တပ်ႉၸုမ်း 468 ဢၼ်ၵုမ်းထိုင်လႅၼ်လိၼ်မိူင်းလႃးၼၼ်ႉ မီးၵၢၼ်ပူတ်းထွၼ်ၸၢႆးသု လုၵ်ႈၼွင်ႉ ဝိူၺ်ႉသႅဝ်ႇၵင်းဢွၵ်ႇသေ ဢဝ်တႃႉ ပၢင်း ၵေႃႉပဵၼ်လၢၼ် ပဝ်းယဵဝ်သျႅင် ပုတ်ႈတႅၼ်း။

ၾၢႆႇၼိုင်ႈၵေႃႈ ၵူၼ်းၸမ်ၸႂ်မူႇၸုမ်းမိူင်းလႃးၵေႃႉၼိုင်ႈလၢတ်ႈဝႃႈ- လွင်ႈတၢင်းဢၼ်တပ်ႉသိုၵ်းဝႃႉ မႃးၵူတ်ႇထတ်းၵူၼ်း ၶဝ်ၼႂ်းၼႃႈလိၼ်မိူင်းလႃးၼႆႉ ပဵၼ်မႃးဝၢႆးတပ်ႉသိုၵ်းမိူင်းလႃး သူင်ႇလိၵ်ႈတၢင်ႇ ထိုင်ၵႂႃႇတီႈ ၸုမ်းသိုၵ်းဝႃႉ ငဝ်ႈငုၼ်းပၢင် သၢင်း၊ လွင်ႈဝႃႈ မီးၵူၼ်းသိုၵ်း ၵူၼ်းဝႃႉ ၸိူဝ်းမႃးယူႇၼႂ်းၼႃႈ လိၼ်မိူင်းလႃး ယူႇၵိၼ် ၵၼ်လူမ်လၢမ်၊ လွင်ႈယူႇလွင်ႈၵိၼ် လွင်ႈၵႃႉ လွင်ႈႁေႃႈလူတ်ႉၵႃးၸိူဝ်းၼႆႉ ဢမ်ႇပေႃးၶႂ်ႈၸွမ်းပၵ်းပိူင် မိူင်းလႃး- ဝႃႈၼႆ။