ၼၢင်းယိင်းဢွၼ်ႇ ဢႃႇယု 12 ၶူပ်ႇ၊ ၵေႃႉလုၵ်ႉမႃးတၢင်း ၵဵင်းတုင်၊ ၺႃးၵူၼ်းမၢၵ်ႈမီးၶဝ်ၶျေႃးသိုဝ်ႉ ၶၢႆတူဝ်မႃးတၢႆ တီႈႁူင်းႁႅမ်း 9 ၸၼ်ႉ တီႈတႃႈၶီႈလဵၵ်း။ ၵူၼ်းမၢၵ်ႈမီးၶဝ်ဝႃႈ တေတိတ်းတေႃႇပေႃႈမႄႈ သၢႆႈတႅၼ်း ၵႃႈတူဝ်ပၼ်။

ၵဵဝ်ႇၵပ်းလွင်ႈၼႆႉ ၵူၼ်းႁဵတ်းၵၢၼ်တီႈႁူင်းႁႅမ်း 9 ၸၼ်ႉ (မႄႈၶၢဝ်) ၵေႃႉၼိုင်ႈလၢတ်ႈဝႃႈ- ဢေးဢွၼ်ႇၵေႃႉၼႆႉ တၢႆၵႂႃႇမိူဝ်ႈ ဝၼ်းပုတ်ႉ ၵၢင်ၶမ်ႈမွၵ်ႈယၢမ်းတဵင်ႈၶိုၼ်း။ ဢၼ်ၵဝ်ၶႃႈလႆႈႁူႉတႄႉ ပဵၼ်ဝႃႉ/ၸုမ်းငမ်းယဵၼ်ၶဝ်သိုဝ်ႉမႃး။ လုၵ်ႈဢွၼ်ႇၵေႃႉ ၼႆႉ ယူႇတၢင်းၵဵင်းတုင်၊ ၸိုဝ်ႈၵေႃႈဢမ်ႇႁူႉ၊ ပေႃႈမႄႈၵေႃႈ ဢမ်ႇႁူႉ၊ တၢႆယဝ်ႉၵေႃႈ ဢဝ်ဢွၵ်ႇႁူင်းႁႅမ်းၵႂႃႇၵမ်းလဵဝ်။ လႆႈငိၼ်းဝႃႈ ဢဝ်ၵႂႃႇၾင် ၸွမ်းတၢင်း။ ၵဵဝ်ႇၵပ်းလွင်ႈၼႆႉ လႆႈငိၼ်းဝႃႈ ယူႇတီႈၵူၼ်းမၢၵ်ႈမီးၶဝ် တေတိတ်းတေႃႇပေႃႈမႄႈ မၼ်းၼၢင်း သေ တေသၢႆႈပၼ်ၵႃႈတူဝ် မၼ်းၼၢင်းယူႇ- ဝႃႈၼႆ။

တင်ႈတႄႇ 3-4 လိူၼ်မႃးၼႆႉၼၢင်းယိင်းဢွၼ်ႇ ဢၼ်ဢႃႇယုပႆႇတဵမ်တၢင်းမိူင်းပဵင်း၊ ၵဵင်းတုင်၊ မိူင်းၽျၢၵ်ႈပႃးၸဵမ်တၢင်ႇ ဝၢၼ်ႈတၢင်ႇဝဵင်း ၺႃးထုၵ်ႇၶျေႃးသိုဝ်ႉ သူင်ႇမႃးတၢင်းလႅၼ်လိၼ်ၼႆႉ ၼမ်ၼႅၼ်ႇ၊ ၵမ်ႈၼမ်တႄႉ လုၵ်ႉတၢင်းၵဵင်းတုင်မႃး။ ပိူင်လူင်တႄႉ ၵူၼ်းမီးငိုၼ်းၶဝ်သိုဝ်ႉဢဝ်သၢဝ် ဢွၼ်ႇ ပိုတ်ႇႁူဝ်သၢဝ် (ပိုတ်ႇပရိသုတ်ႇ) ဢၼ်ဝႃႈၼၼ်ႉ- ၸဝ်ႈၵႃးၵေႃႉ ၼိုင်ႈလၢတ်ႈၼင်ႇၼႆ။ (ပရိသုတ်ႇၼႆၼၼ်ႉ ပဵၼ်ပႃလိ။ ပွင်ႇဝႃႈ “ၽီပႆႇတိူဝ်ႉ-ၽိူဝ်ႉပႆႇၽႃႇ”)။

ၵဵဝ်ႇၵပ်းလွင်ႈၼႆႉ ပႃႈၼၢင်းၶမ်းမူဝ် ၵူၼ်းတႃႈၶီႈလဵၵ်း လၢတ်ႈဝႃႈ- ၶေႃႈၵႂၢမ်းဢၼ်ၼႆႉ (ပိုတ်ႇပရိသုတ်ႇ) ပိူၼ်ႈသူင်ၵၼ် လၢတ်ႈ၊ ပေႃးပဵၼ်သၢဝ်ဢွၼ်ႇဢၼ်ဢႃႇယု 12-13 ၶူပ်ႇ တူဝ်ၶိင်းယႂ်ႇမၢၵ်ႈ၊ သမ်ႉသုင်၊ ႁၢင်ႈလီ ၸိူဝ်းၼႆႉ လႆႈၶၢႆႁူဝ်သႅၼ်၊ ပေႃးဢမ်ႇပေႃးႁၢင်ႈလီ လႆႈၶၢႆႁူဝ် မိုၼ်ႇ။ ပိူင်လူင်တႄႉ လၢတ်ႈတီႈပေႃႈမႄႈ ဝႃႈၵႂႃႇႁႃငိုၼ်း၊ ပေႃႈမႄႈၵေႃႈႁူႉၸွမ်းလွင်ႈၼႆႉယူႇ၊ ၵူၺ်းၵႃႈ ၶွႆပိူၼ်ႈယူႇႁိူၼ်းတိူၵ်ႈ/ မီးလူတ်ႉမီးၵႃးလႄႈ ယိူၼ်ႉပွႆႇပၼ်လုၵ်ႈယိင်းဢွၵ်ႇၵႂႃႇႁႃငိုၼ်း၊ ယွၼ်ႉလွင်ႈၼႆႉလႄႈ ပဵၼ်မႃး- ဝႃႈၼႆ။

တင်ႈတႄႇဝၢၼ်ႈမိူင်း/မိူင်းမၢၼ်ႈလႅၵ်ႈလၢႆႈမႃးယဝ်ႉ၊ ပိုတ်ႇမိူင်း/လႅၼ်လိၼ်မႃးယဝ်ႉၼႆၵေႃႈ ၵူၼ်းၵႃႉ ၵူၼ်းၸွမ်းလႅၼ်လိၼ် ၶႅၼ်းလိူင်ႇမႃး။ တင်ႈတႄႇ 3-4 လိူၼ်မႃးၼႆႉ ၸုမ်းႁႄႉၵင်ႈၼၢင်းယိင်း ဢႃႇယုတႅမ်ႇလိူဝ် 25 ဢမ်ႇလႆႈၵႂႃႇတၢင်းလႅၼ် လိၼ်ထႆးၼႆၵေႃႈဢမ်ႇမီးယဝ်ႉလႄႈ လွင်ႈၵႃႈၶၢႆလုၵ်ႈ ဢွၼ်ႇၼၢင်းယိင်း ၶႅၼ်းၼမ် လိူဝ်မႃး။ ၾၢႆႇၼိုင်ႈၵေႃႈ ပေႃႈမႄႈ ဢမ်ႇမီးပိုၼ်ႉႁူႉတၢင်းႁၼ် ပိူဝ်ႈတႃႇ ပူၵ်းပွင်ပၼ်ႁႂ်ႈလုၵ်ႈဢွၼ်ႇ မေႃလိၵ်ႈမေႃလၢႆး၊ ၵူၺ်းႁူႉၶႂ်ႈလႆႈငိုၼ်းတွင်းၵူၺ်းလႄႈ လုၵ်ႈဢွၼ်ႇ ၼၢင်းယိင်းၵေႃႉၼႆႉ ၸင်ႇလႆႈတၢႆၵႂႃႇ ၸိူင်ႉၼႆ- ၸုမ်းၼၢင်းယိင်းၵဝ်ႇမိူင်းမၢၼ်ႈ ဢၼ်ယူႇတႃႈၶီႈလဵၵ်း ၵေႃႉ ၼိုင်ႈလၢတ်ႈၼႄၼင်ႇၼႆ။