ယိင်းသႅင်ၵႅဝ်ႈ
ဢႃယု - 22 ၶူပ်ႇ
ၸိုဝ်ႈပေႃႈ - လုင်းသႃႇဢေး
ၸိုဝ်ႈမႄႈ - ပႃးတၢၼ်းထေး
တီႈၵိူတ်ႇ - ဝၢၼ်ႈတႃႈတေႈ၊ ၸႄႈဝဵင်းသီႇပေႃႉ။
ထၢမ်။    ။ ၸိုဝ်ႈ ယိင်းသႅင်ၵႅဝ်ႈၼႆႉ ပဵၼ်ၸိုဝ်ႈပၢႆးမွၼ်း ဢမ်ႇၼၼ် ပဵၼ်ၸိုဝ်ႈၸဵမ်မိူဝ်ႈလဵၵ်ႉ။
တွပ်ႇ။    ။ ၸိုဝ်ႈမိူဝ်ႈလဵၵ်ႉတႄႉ ၼၢင်းၺူဝ်ႇၺူဝ်ႇဢေး ဢေႃႈ။ ၸိုဝ်ႈဢၼ်ဝႃႈ ယိင်းသႅင်ၵႅဝ်ႈၼႆႉ ပဵၼ်ၸိုဝ်ႈပၢႆးမွၼ်း ၵူၺ်းၶႃႈ။

ထၢမ်။    ။ မီးပီႈၼွင်ႉလၢႆၵေႃႉ၊ သမ်ႉပဵၼ်ၵေႃႉတၢမ်းလႂ်။
တွပ်ႇ။    ။ မီးပီႈၼွင်ႉႁႃႈၵေႃႉ။ ၶႃႈယိင်းသႅင်ၵႅဝ်ႈပဵၼ်ၵေႃႉလဵၵ်ႉသုတ်းဢေႃႈ။

ထၢမ်။    ။ တေႇၶဝ်ႈၼႂ်းတူင်ႇဝူင်းပၢႆးမွၼ်းမႃး မိူဝ်ႈဢႃယုလႆႈၵႃႈႁိုဝ်။
တွပ်ႇ။    ။ မိူဝ်ႈဢႃယုလႆႈ 7 ၶူပ်ႇၼၼ်ႉဢေႃႈ။

ထၢမ်။    ။ တႃႇလႆႈႁဵတ်းၼၢင်းငၢမ်းတႆးလႄႈ ႁွင်ႉၵႂၢမ်းတႆးၼၼ်ႉ ၸွင်ႇပေႃႈမႄႈယိင်းၶဝ်ပၼ်ႁႅင်းယူႇႁိုဝ်။
တွပ်ႇ။    ။ ပၼ်ႁႅင်းမႃးယူႇၵူႈၶၢဝ်းယၢမ်းၶႃႈ။

ထၢမ်။    ။ တႃႇလႆႈပဵၼ်ၽူႈႁွင်ႉၵႂၢမ်းၸိုဝ်ႈလိုဝ်းၼႂ်းတူင်ႇဝူင်းပၢႆးမွၼ်းမႃးၼၼ်ႉ မိူဝ်ႈတေႇမၼ်း လႆႈၶတ်းၸႂ်မႃးၸိူင်ႉႁိုဝ်။
တွပ်ႇ။    ။ လွင်ႈသင်သေဢမ်ႇဝႃႈ တႃႇႁႂ်ႈထိုင်တီႈလႆႈၼၼ်ႉတႄႉ ပိူင်လူင်မၼ်းထုၵ်ႇလႆႈႁပ်ႉဢဝ်ၵႂၢမ်း ပိူၼ်ႈၵူႈလွင်ႈ၊ ယဝ်ႉၵေႃႈလူဝ်ႇလႆႈၶတ်းၸႂ်၊ ယိူၼ်ႉၸႂ်ၼၼ်ႉၶႃႈၼႃႇ။ ယဝ်ႉၵေႃႈ ၾၢႆႇပၢႆးယူႇလီတူဝ်ၵဝ်ႇၵေႃႈလူဝ်ႇလႆႈသႂ်ႇ     ၸႂ်တႄႉတႄႉ ဝႃႈဝႃႈၼၼ်ႉၶႃႈၼႃႇၼႆ။

ထၢမ်။    ။ ဢွၼ်တၢင်းမိူဝ်ႈပႆႇပဵၼ်ၽူႈႁွင်ႉၵႂၢမ်းလႄႈ မႄႈၸၢင်ႈၵႃႈ ဢိၵ်ႇၼၢင်းငၢမ်းၼၼ်ႉ ယၢမ်ႈမီးတူဝ် ထူပ်းၸိူင်ႉႁိုဝ်။
တွပ်ႇ။    ။ လွင်ႈၾၢႆႇသူင်ၸႂ်ႁွင်ႉၽဵင်းၼၼ်ႉတႄႉ ၸဵမ်မိူဝ်ႈဢႃႇယုလႆႈ 7 ၶူပ်ႇၼၼ်ႉ သူင်ၸႂ်ႁွင်ႉၵႂၢမ်း karaoke ၼႂ်းလၢၼ်ႉ၊ မၢင်ပွၵ်ႈၼႂ်းပွႆးၼႂ်းလၢမ်း။ ယၢမ်ႈလႆႈၶႄႉၶဵင်ႇတၢင်းႁၢင်ႈလီးမႃး လၢႆပွၵ်ႈလၢႆၽဝ်ႇ။

ထၢမ်။    ။ လႆႈငိၼ်းၶၢဝ်ႇဝႃႈယိင်းသႅင်ၵႅဝ်ႈ ယွၼ်းဢွၵ်ႇၼႂ်းၸုမ်းၸၢတ်ႈသႅင်း “မွၵ်ႇၵွၼ်တႆး” ယဝ်ႉၼႆၼၼ်ႉ ၸႂ်ႈတေႉႁႃႉ။
တွပ်ႇ။    ။ ဢေႃႈၶႃႈ ၸႂ်ႈတႄႉတႄႉဢေႃႈ။ လႆႈထွၼ်တူဝ်ဢွၵ်ႇမိူဝ်ႈၼႂ်းလိူၼ်မေႊ 2012 ၼၼ်ႉၶႃႈဢေႃႈ။

ထၢမ်။    ။ မီးလွင်ႈတၢင်းၸိူင်ႉႁိုဝ်သေလႄႈ လႆႈယွၼ်းဢွၵ်ႇ။
တွပ်ႇ။    ။ ၵဵဝ်ႇၵပ်းလူၺ်းၽႂ်ၽႂ်ၵေႃႈ ႁၼ်ထိုင်လွင်ႈသုၼ်ႇတူဝ်ပဵၼ်ယႂ်ႇ။ လွင်ႈထၢင်ႇလဵၵ်ႉၼိူဝ်ၵၼ်၊ ထၢင်ႇ ၽိတ်းၵၼ် ၸိူဝ်းၼႆႉၶႃႈဢေႃႈ။

ထၢမ်။    ။ ၵမ်းလိုၼ်းသုတ်း ၶႂ်ႈၾၢၵ်ႇၶေႃႈၵႂၢမ်းထိုင် ပီႈၼွင်ႉတႆးႁဝ်းၶဝ်ၸိူင်ႉၼင်ႇႁိုဝ်။
တွပ်ႇ။    ။ ဢေႃႈၶႃႈ၊ ၶႂ်ႈၾၢၵ်ႇၶေႃႈၵႂၢမ်းတႄႉၵေႃႈ ၶႂ်ႈဝႃႈၶႃႈယိင်းဢွၵ်ႇၼႂ်းမူႇၼႂ်းၸုမ်းမႃးဝႃႈၼႆသေတႃႉ ၵူၺ်းၵႃႈ ဢၼ်ပဵၼ်ၵၢၼ်ပၢႆးမွၼ်းၼၼ်ႉတႄႉၵေႃႈ တေဢမ်ႇဢၢၼ်းပွႆႇၽႃႈ။ တႃႇႁႂ်ႈပေႃး တေၶိုပ်ႈၼႃႈၵႂႃႇၶၢဝ်းၵႆၼၼ် ဢိင်ပိုင်ႈလူၺ်ႈတၢင်းသူင်ၸႂ် ဢၼ်လႆႈမီးမႃးၸဵမ်မိူဝ်ႈလဵၵ်ႉၼၼ်ႉသေ တေသိုပ်ႇၶတ်းၸႂ်ၵႃႇတိၵ်ႈတိၵ်းယူႇၶႃႈ၊ ၵမ်းလိုၼ်းငိၼ်းၸူမ်းၶွပ်ႈၸႂ်ထိုင်ပီႈၼွင်ႉၽူႈပၼ်ႁႅင်းႁဝ်းၶဝ် တင်းသဵင်ႈတႄႉတႄႉဢေႃႈ။