ၸဝ်ႈၼႃႈတီႈထႆးၼွၵ်ႈၶိူင်ႈဝႅပ်ႇ ၶဝ်ႈၶူၼ်ႉသွၵ်ႈႁိူၼ်းယီႈ လၢႆႈ၊ လုၵ်ႈၼွင်ႉၸၢႆးၼေႃႇၶမ်း ဢၼ်ၺႃး တိၺွပ်းၶိုၼ်ႈ လုမ်းတြႃးၶႄႇ တီႈပႃႇမိူတ်ႇမႄႈသၢႆ၊ ႁုပ်ႈယိုတ်းဢဝ်ၶူဝ်းၶွင် /ငိုၼ်းၶမ်းတင်းၼမ်။

ပူၼ်ႉမႃးမိူဝ်ႈဝၼ်းပုတ်ႉထိ 17/10/12 ၸဝ်ႈၼႃႈတီႈထႆး ပလိၵ်ႈၼွၵ်ႈၶိူင်ႈဝႅပ်ႇၵႂႃႇၶူၼ်ႉသွၵ်ႈတီႈ ႁိူၼ်းယီႈလၢႆႈ၊ ၵေႃႉထုၵ်ႇ မၢပ်ႇၼႄးဝႃႈ ၵဵဝ်ႇၶွင်ႈၵၢၼ်ၶႃႈႁႅမ်ၵူၼ်းၸွမ်းႁိူဝ်းၶႄႇ 13 ၵေႃႉ ၼႂ်းမႄႈ ၼမ်ႉၶွင်၊ လႆႈထုၵ်ႇလၢဝ်းတိၺွပ်းသူင်ႇပၼ်ၶႄႇ မိူၼ်ၼင်ႇ ၸၢႆးၼေႃႇၶမ်း လႄႈတၢင်ႇၵေႃႉသေ လႆႈၶိုၼ်ႈလုမ်းတြႃးၶႄႇ မိူဝ်ႈလိူၼ်ပူၼ်ႉ။ ႁုပ်ႈယိုတ်းဢဝ်ၵႂႃႇၶူဝ်းၶွင် လူတ်ႉၶိူင်ႈ 2 လမ်း၊ လူတ်ႉၵႃးဝီႊ ၵူဝ်ႊ (Vigo) 4 ၽၵ်းတူ 1 လမ်း၊ လူတ်ႉၾူဝ်ႊဝီႊလ် (4WD) 1 လမ်း၊ ၼွၵ်ႈသေၼၼ်ႉ ဢဝ်ၵႂႃႇၶူဝ်း ငိုၼ်းၶမ်းၶူဝ်းၶွင်တၢင်ႇပိူင်ထႅင်ႈ- ၼႆယဝ်ႉ။

ယီႈလၢႆႈၼႆႉ ၵူၼ်းၸုမ်းၸၢႆးၼေႃႇၶမ်း မီးႁိူၼ်းယူႇတီႈပႃႇမိူတ်ႇ မႄႈသၢႆ၊ ၺႃးတိၼႂ်းမိူင်းလၢဝ်း ဢွၼ်တၢင်းၼေႃႇၶမ်းတင်း သၢင်ႇၶမ်း။ ၸၢႆးၼေႃႇၶမ်း ၺႃးၸဝ်ႈၼႃႈတီႈလၢဝ်းတိမိူဝ်ႈဝၼ်းထိ 25/04/12 ၼႂ်းမိူင်းလၢဝ်း၊ ဝၢႆးၼႆႉထုၵ်ႇသူင်ႇပၼ်ၶႄႇ။ သၢင်ႇၶမ်း ထုၵ်ႇၸဝ်ႈၼႃႈတီႈထႆးတိမိူဝ်ႈဝၼ်း ထိ 20/04/12  ၽွင်းဢွၵ်ႇတၢင်း လုၵ်ႉတီႈႁိၼ်တႅၵ်ႇၵႂႃႇ တၢင်းၵဵင်းမႆႇ။ ၵူၼ်းၸုမ်းၼေႃႇၶမ်း ၸိူဝ်း ထုၵ်ႇသူင်ႇပၼ်ၶႄႇ မီးမိူၼ်ၼင်ႇ 1.ၸၢႆးၼေႃႇၶမ်း၊ 2.ၸၢႆးဢွင်ႇမျၢတ်ႈ၊ 3.သၢင်ႇၶမ်း၊ 4.ယီႈလၢႆႈ ၸိူဝ်းၼႆႉ။

ၵူၼ်းၵဝ်ႇၼႂ်းတပ်ႉသိုၵ်းမိူင်းတႆး (MTA) ယၢမ်ႈလၢတ်ႈၼႄဝႃႈ- မိူဝ်ႈလဵဝ် ယီႈလၢႆႈ ဢႃႇယုမွၵ်ႈ 56-60 ပီ၊ ဢွၼ်တၢင်းပဵၼ် ႁူဝ်ၼႃႈပီႇတုၸိတ်ႉ ၼႃးႁႆးလူင် ဢိူင်ႇမိူင်းလဵၼ်း ၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈ တႃႈၶီႈလဵၵ်း။ ဝၢႆးမႃးလုၵ်ႉတီႈ ပီႇတုၸိတ်ႉၶဝ်ႈႁူမ်ႈႁွမ်း MTA ဢၼ်ၸဝ်ႈၶုၼ်သႃႇဢွၼ် ႁူဝ်၊ ပေႃးဝႃႈ MTA ဝၢင်းၶိူင်ႈၵွင်ႈၵၢင်ႇ ဝၢႆးၼၼ်ႉၵေႃႈသိုပ်ႇၶဝ်ႈပႃး တူင်ႉၼိုင်ၼႂ်း တပ်ႉသိုၵ်းၸိုင်ႈတႆး SSA ပွတ်းၸၢၼ်း ဢၼ်ၸဝ်ႈယွတ်ႈသိုၵ်းဢွၼ်ႁူဝ်- ဝႃႈၼႆ။

ၽွင်းၼၼ်ႉ ၸၢႆးၼေႃႇၶမ်းၵေႃႉဝၢင်းၶိူင်ႈၸွမ်းၶုၼ်သႃႇ လႆႈဢၼုၺၢတ်ႈၶိုၼ်းယိပ်းၵွင်ႈၵၢင်ႇသေ ပဵၼ်မႃးႁူဝ်ၼႃႈပီႇတု ၸိတ်ႉ တူင်ႉၼိုင်ႈၼႂ်းၸႄႈတွၼ်ႈတႃႈၶီႈလဵၵ်း။ ဢိင်ၼိူဝ်မၢၵ်ႈမီးၽိတ်းႁူ ၽိတ်းတႃသေ ဝၼ်းထိ 09/01/2006 သိုၵ်းမၢၼ်ႈ တင်းၾၢႆႇၽဵဝ်ႈယႃႈမဝ်းၵမ်မၢၼ်ႈ  ၵႂႃႇၵူတ်ႇသွၵ်ႈ တီႈႁိူၼ်းၸၢႆးၼေႃႇၶမ်းတင်း 2 တီႈ တီႈဝၢၼ်ႈပႃႇသၵ်းလႄႈတီႈႁွင်ႈလိုၵ်ႉ၊ တိလႆႈယႃႈမႃႉၼပ်ႉႁူဝ် လၢၼ်ႉမဵတ်ႉ တင်းၶိူင်ႈၵွင်ႈၵၢင်ႇၽွင်ႈ၊ ၵူၺ်းၵႃႈ တူဝ်ၸၢႆးၼေႃႇၶမ်းငိူင်ႉဝႄႈပၢႆႈလွတ်ႈပႅတ်ႈ။

ယီႈလၢႆႈၼႆႉ ထိုင်မႃးၼႂ်းပီ 2006 ပေႃးဝႃႈၸၢႆးၼေႃႇၶမ်း လုၵ်ႉတီႈပီႇတုၸိတ်ႉ ဢွၵ်ႇပၢႆႈၵႂႃႇတင်ႈၸုမ်း ၵဵပ်းၶွၼ်ႇ၊ တူင်ႉၼိုင် ယူႇသဝ်းပွတ်းတွၼ်ႈၼႃႈလိၼ်သၢမ်ၸဵင်ႇၶမ်း၊ ထုၵ်ႇသူၼ်းတုမ်ႁူၺ်းပၢႆးၶဝ်ႈ ပႃးၼႂ်းၸုမ်းၼေႃႇၶမ်း။ ထိုင်မႃး 2011 ထုၵ်ႇၸိၼႄးဝႃႈ ၵဵဝ်ႇၶွင်ႈပႃးလွင်ႈၵူၼ်းၸွမ်းႁိူဝ်းၶႄႇ တၢႆ 13 ၵေႃႉ ၼႂ်းမႄႈၼမ်ႉၶွင် မိူဝ်ႈဝၼ်းထိ 05/10/11 သေထုၵ်ႇ တိဢွၼ်ၼႃႈၸၢႆးသၢင်ႇၶမ်း ၵေႃႉထုၵ်ႇ တၢင်းထႆးတိၺွပ်းလႄႈ ၸၢႆးၼေႃႇၶမ်း ထုၵ်ႇလၢဝ်းတိၺွပ်း။