ၸၢႆးၼေႃႇၶမ်း ၵေႃႉထုၵ်ႇမၢပ်ႇၽၢမ်းဝႃႈ ၵဵဝ်ႇၶွင်ႈၵူၼ်းတၢႆ 13 ၵေႃႉ ၼိူဝ်ႁိူဝ်းၼႂ်းမႄႈၼမ်ႉၶွင်၊ ၺႃးၶိုၼ်ႈလုမ်းတြႃးၶႄႇ ၼၼ်ႉ ပေႃးပဵၼ်လုမ်းတြႃးမိူင်းထႆး မၼ်းၸၢႆးၸၢင်ႈလွတ်ႈ ၵွပ်ႈလၵ်းထၢၼ် ဢမ်ႇၼႅၼ်ႈၼႃ။

ဝၢႆးလုမ်းတြႃးၶႄႇ ထတ်းသၢင်ၸၢႆးၼေႃႇၶမ်း တင်းၸုမ်းၸိူဝ်း ပူၼ်ႉမႃးမိူဝ်ႈဝၼ်းထိ 20-21/09/12 ယဝ်ႉ၊ မိူဝ်ႈလဵဝ် တၢင်းၵၢၼ်ၶႄႇလႆႈၸတ်းဝႆႉလုမ်းတြႃးၶိုၵ်ႉတွၼ်း ပိူဝ်ႈတႃႇတႅပ်းတတ်းလွင်ႈ ၼေႃႇၶမ်း။ ၵူၺ်းၵႃႈ ပူၼ်ႉမႃး 2 ဝူင်ႈပၢႆယဝ်ႉ ၵေႃႈ ႁၢၼ်ႉတေႃႇမိူဝ်ႈလဵဝ်တိုၵ်ႉယဵၼ်ယူႇသီႇသီႇ။ ၵမ်ႈၽွင်ႈဝႃႈ ၶႄႇၶႂ်ႈႁူႉၶေႃႈမုလ်း လွင်ႈၼေႃႇၶမ်း ၵဵဝ်ႇၶွင်ႈၸွမ်းၵူၼ်း လူင်မၢၼ်ႈ/လၢဝ်း/ထႆး ၸိူင်ႉႁိုဝ်။ ၵူၺ်းၵႃႈ ၵမ်ႈၽွင်ႈသမ်ႉဝႃႈ ၸၢင်ႈပဵၼ် ယွၼ်ႉမီးလွင်ႈၶွင်ႉၶမ်/ပၼ်ႁႃတၢင်းမၢႆမီႈ။

ၵဵဝ်ႇၵပ်းလွင်ႈမၢႆမီႈၼႆႉ ၽူႈလူင်ႉလႅၼ်ႇမၢႆမီႈထႆးၸဝ်ႈၼိုင်ႈ လၢတ်ႈၼႄဝႃႈ- ၸၢႆးၼေႃႇၶမ်းၼႆႉ ပေႃးပဵၼ်လုမ်းတြႃးထႆးတႄႉ မၼ်းလွတ်ႈပူၼ်ႉယဝ်ႉ။ ပေႃးတႅၵ်ႈၵၼ်တင်းလွင်ႈၶႃႈႁႅမ်ၵၼ်ၼႂ်း မိူင်းထႆး၊ ဢၼ်ၸိုဝ်ႈလိုဝ်းလင်တင်ႈတႄႇလိူၼ်ပူၼ်ႉမႃး ၸိုင် မၼ်းပိူင်ႈၵၼ်။ လွင်ႈၶႃႈႁႅမ်ဢၼ်ပဵၼ် ယူႇၼႂ်းမိူင်းထႆးၼႆႉ 1.တူဝ်တၢႆ ၽူႈထုၵ်ႇၶႃႈ မီးၼႂ်းတီႈလိၼ်ၵေႃႉထုၵ်ႇၵၢဝ်ႇႁႃ (ၵေႃႉလႆႈထုၵ်ႇၸိၼႄး ဝႃႈၶႃႈႁႅမ်တၢႆၵူၼ်း)။ 2.ၼႂ်းတူဝ်တၢႆၵေႃႈ မီးမၢၵ်ႇၵွင်ႈၶမ်ယူႇ။ 3.ၵေႃႉထုၵ်ႇၵၢဝ်ႇႁႃ မီးၵွင်ႈတင်းၼမ် (ဢမ်ႇမီးဝႂ်ဢၼုၺၢတ်ႈ License တင်းၼမ်)။ 4.လူတ်ႉၵႃးၶွင်ယိူဝ်ႇ (ၵူၼ်းၺႃးၶႃႈတၢႆ) မီးၼႂ်းတီႈ လိၼ်ၵေႃႉထုၵ်ႇၵၢဝ်ႇႁႃ။ 5.မီးၵေႃႉႁူႉႁၼ် (ၽယၢၼ်း) ဢၼ်ၵမ်ႉထႅမ်လွင်ႈၶႃႈၵူၼ်း။


ၸၢႆးၼေႃႇၶမ်းတင်းၸုမ်းၸိူဝ်း ၺႃးၶိုၼ်ႈလုမ်းတြႃးၶႄႇမိူဝ်ႈလိူၼ်ပူၼ်ႉ

ၵူၼ်းၵေႃႉၼႆႉ မီးလၵ်းထၢၼ်တင်းၼမ်လႄႈ တႃႇတေလွတ်ႈပူၼ်ႉတၢင်းၽိတ်းၼၼ်ႉ ဢမ်ႇငၢႆႈငၢႆႈ၊ မၼ်းဢမ်ႇမိူၼ်ၵၼ် တင်းလွင်ႈၼေႃႇၶမ်း။ လွင်ႈၸၢႆးၼေႃႇၶမ်းၼႆႉ ၵွပ်ႈဝႃႈ- 1.ၼမ်ႉမႄႈၶွင် ဢမ်ႇၸႂ်ႈၶွင် ၼေႃႇၶမ်း၊ ပဵၼ်ၶွင်ၵူႈမိူင်းမိူင်း ဢမ်ႇၼၼ် ပဵၼ်ၶွင်လၢဝ်း/ထႆး/မၢၼ်ႈ။ 2.ၽူႈႁူႉႁၼ် ၵမ်ႉထႅမ်လွင်ႈၶႃႈၵူၼ်းၵေႃႈဢမ်ႇမီး။ ဢၼ်လုၵ်ႈၼွင်ႉမၼ်းၸိၼႄး မၼ်းဝႃႈ ပဵၼ်ၵူၼ်းသင်ႇၵၢၼ် ၼၼ်ႉၵေႃႈ ၵွပ်ႈပဵၼ်ၵူၼ်း ၶိုၼ်ႈလုမ်းတြႃး/ပဵၼ် ၵူၼ်းထုၵ်ႇၵၢဝ်ႇႁႃၼင်ႇၵၼ်လႄႈ ဢမ်ႇမီး ၼမ်ႉၼၵ်း၊ ၵွပ်ႈဝႃႈၵူၼ်းၸိူဝ်းၼႆႉ ၼင်ႇႁိုဝ်တူဝ်ၶဝ်ပေႃးတေလွတ်ႈ ၼၼ်ႉ ၶဝ်ၸၢင်ႈလႃႈလီႈလၢတ်ႈ လူင်ၵႂႃႇၵူႈပိူင်ပိူင်၊ သင်ပဵၼ်ၽူႈႁူႉႁၼ်ၸွမ်း (ၽယၢၼ်း) တၢင်းၼွၵ်ႈတႄႉ မီးၼမ်ႉၼၵ်းလွင်ႈယုမ်ႇ ယမ်။ 3.တေႃႇထိုင်မိူဝ်ႈလဵဝ် ၶိူင်ႈၵွင်ႈၵၢင်ႇ ဢၼ်ယိုဝ်း ႁိုဝ် ၵၢၼ်ၶႃႈႁႅမ်တၢႆၵူၼ်း 13 ၵေႃႉၼၼ်ႉၵေႃႈ ပဵၼ်လဝ်းလႂ်၊ လဝ်းၼၼ်ႉလဝ်းၼႆႉဢွၵ်ႇမႃးၵေႃႈယင်းပႆႇငိၼ်း။ ဢိင်ၼိူဝ်လွင်ႈတၢင်းၸိူဝ်းၼႆႉ သေ သင်ဝႃႈၸၢႆးၼေႃႇၶမ်းလႆႈၶိုၼ်ႈလုမ်းတြႃးထႆးတႄႉ သၢႆငၢႆလွတ်ႈမၼ်းမီးၼမ်၊ ၵွပ်ႈဝႃႈၽူႈ ႁူႉႁၼ်/ လၵ်း ထၢၼ်ၵူႈပိူင်ပိူင် ဢၼ်ပိူၼ်ႈၵၢဝ်ႇႁႃမႃးၼႆႉ မၼ်းဢမ်ႇပဵင်းပေႃးပိူဝ်ႈတႃႇပၼ်တူတ်ႈတၢမ်ႇ မတ်ႉတူဝ်မၼ်း။

ပိူင်ၼိုင်ႈၵေႃႈၵွပ်ႈႁဝ်းၶႃႈပဵၼ်ထႆးလႄႈ  မၢႆမီႈၶႄႇမီးၸိူင်ႉႁိုဝ် ႁဝ်းဢမ်ႇႁူႉတႄႉတႄႉ။ ၵူၺ်းၵႃႈပီႈ ၼွင်ႉမၼ်းၵေႃႈလီ၊ ၵူၼ်း ၼႂ်းၼႃႈႁိူၼ်းမၼ်းၸိူဝ်းပဵၼ်ၼၢင်းမေးမၼ်းၵေႃႈလီ၊ ၸွႆႈလႆႈၵႃႈႁိုဝ်ၵေႃႈ ထုၵ်ႇလီၸွႆႈ၊ ၵွပ်ႈဝႃႈ တေၸၢင်ႈႁဵတ်းႁႂ်ႈတၢင်းၽိတ်း ၼၵ်းပဵၼ်မဝ်၊ ပေႃးပဵၼ်မဝ်ၵေႃႈၸၢင်ႈႁၢႆ လႄႈပူၼ်ႉလွတ်ႈ။ ဢၼ်လီသုတ်း ပေႃးလႆႈၽူႈတၢင်ဝႃႈၵႂၢမ်း (သေႉၼေႇ) ၶႄႇ ၸွႆႈပၼ် ယိင်ႈၶႅၼ်း လီ၊ ၵွပ်ႈဝႃႈၶဝ်ႁူႉမၢႆမီႈၶႄႇ- ဝႃႈၼႆ။

ဝၢႆးၵိူတ်ႇလိူင်ႈမႃး ၵေႃႉပဵၼ်ၼၢင်းမေးမၼ်းသမ်ႉပၢႆႈယူႇၸိူဝ်းၼၼ်ႉ ဢမ်ႇထုၵ်ႇလီပဵၼ်၊ တီႈတႄႉ မၼ်း ထုၵ်ႇလီ ၸွႆႈပၼ်၊ ၵွပ်ႈဝႃႈ ၶဝ်လႆႈယူႇလႆႈၵိၼ်မႃးၵေႃႈယွၼ်ႉပိူဝ်ႈၽူဝ်ၶဝ်။ မိူၼ်ၼင်ႇၵူၼ်းထႆး ၺႃးတိၺွပ်း တီႈတၢင်ႇ ဝၢၼ်ႈတၢင်ႇမိူင်းၼႆ လုမ်းၽွင်းတၢင်ထႆးတိုၼ်းၵႂႃႇၸွႆႈ၊ ၵူၼ်းဢမႄႊရိၵၼ်ႊ ၺႃးတိၺွပ်း တၢင်ႇဝၢၼ်ႈတၢင်ႇမိူင်း ၵေႃႈ ၽိတ်းႁိုဝ်ဢမ်ႇၽိတ်း ၶဝ်တိုၼ်းၵႂႃႇၸွႆႈ၊ ၵွပ်ႈဝႃႈတူတ်ႈ တၢမ်ႇၼၵ်းႁႂ်ႈပဵၼ်မဝ်၊ တူတ်ႈတၢမ်ႇမဝ်ႁႂ်ႈပဵၼ်ႁၢႆ။ တၢင်ႇဝၢၼ်ႈတၢင်ႇမိူင်းၵိူတ်ႇၶိုၼ်ႈမႃး ပၼ်ႁႃၸိူင်ႉ ၼႆၵေႃႈ ပိူၼ်ႈတိုၼ်းၸွႆႈၵၼ်- ၽူႈလူင်ႉလႅၼ်ႇမၢႆမီႈထႆး သိုပ်ႇလၢတ်ႈၼင်ႇၼႆ။